ئێمە لە تۆرە کۆمەڵایەتیەکان

کوردستان

كەشناسی و هاتوچۆ لەبارەی كەشوهەواوە هۆشداری دەدەنە هاوڵاتیان

خەڵك-بەشی هەواڵ

بەڕێوەبەرایەتی هاتوچۆی هەولێر ڕایدەگەیەنێت، بەهۆی هاتنی شەپۆلێكی بەفر بارینەوە شۆفێران ئاگادار دەكەینەوە بە ووریاییەوە شۆفێری بكەن.

بەڕێوەبەرایەتی هاتوچۆی هەولێر لە ڕاگەیەنراوێكدا ئاماژە بۆ ئەوە دەكات، بە پێی پێشبینیەكانی كەشوهەوا لەماوەی 24 كاتژمێری داهاتوو شەپۆلیكی سەرماو سۆڵە ڕوو لەهەرێمی كوردستان دەكات كە لە سبەی دوای نیوەرۆ دەستپێدەكات وتاكو ڕۆژی هەینی بەردەوام دەبێت.

ئاشكراشیدەكات لەو ماوەیە بەفر لەناوچە شاخاوییەكان دەبارێت وتاكو دەورووبەری شاری هەولێریش دێت ولەدوای تەواوبوونی شەپۆلەكە لەڕۆژی شەممەوە بایەكی وشك دێت وئاسمان ساماڵ دەبێت وپلەكانی گەرماش تاكو ژێر سفری سەدی دێن، ئەمەش وادەكات شەختەوبەستەڵەك پەیدا بێت لەسەر ڕێگاكان بەتایبەتی ڕێگای ناوچە شاخاوییەكان.

هاتوچۆی هەولێر، تكا لەشۆفێران دەكات، زۆر بەهۆشیاری و بەئاگاییەوە مامەڵە لەگەڵ كەشەكە بكەن و بۆ حاڵەتی زۆر پێویست نەبێت نەچنە ناوچە شاخاوییەكان و لەحاڵەتی چوونیان پێداویستییەكانی ڕۆیشتنی ناو بەفریان پێبێت و زنجیر لەتایەكانیان بدەن و بەئۆتۆمبێلی دەبڵ ئەكسل نەبێت هاتووچۆی ئەو شوێنانە نەكەن.
ڕوونیشیدەكاتەوە، لەكاتی بوونی شەختە و لەدوای تەواوبوونی شەپۆلەكە زۆر بەوریایی تر مامەڵە بكەن، چونكە مەترسی شەختەو بەستەڵەك لەسەر ڕێگاكان لەبەفرەكە زیاترە.

لای خۆشیەوە بەڕێوەبەرایەتی كەشناسی و بومەلەرزەزانی هەرێمی كوردستان لە ڕاگەیەنراوێكدا ئاماژە بۆ ئەوە دەكات، سبەی كەشو هەوا بارستە هەوارەكی ساردی سێبیری ڕوولە ناوچەكەمان دەكات، ڕۆژی هەینی باران لە تەواوی ناوچەكەمان دەبارێت، بەهۆی كاریگەری ئەو بارستە هەوا ساردە شەپۆلێكی بەفر بارین ناوچە جیاجیاكانی هەرێم دەگرێتەوە و سەرجەم ناحیە و قەزاكانی ناوچە شاخاوییەكان و سەنتەری پارێزگاكانی سلێمانی و دهۆك و هەڵەبجە بەفر دەبارێت.
ڕوونیشیدەكاتەوە، كاریگەری ئەم شەپۆلە تاكو ڕۆژی شەممە بەردەوامی دەبێت لەگەڵ بارینی بەفر بارین مەودای بینین كەم دەبێتەوە بۆ كەمتر لە 1 كیلۆمەتر و ڕۆژی یەك شەممە نزمترین پلەی گەرمی نزیك دەبێتەوە بۆ ژێر سفر پلەی سیلیزی و دەبێتەهۆی دروستبوونی شەختە لەكاتەكای بەیانی زوودا.
س.ع

کوردستان

تەندروستی كەركوك: هیچ حاڵەتێكی تووشبوون بەڤایرۆسی كۆرۆنا تۆمارنەكراوە

خەڵك – بەشی هەواڵ

هیچ حاڵەتێكی تووشبوون بەڤایرۆسی كۆرۆنا لە كەركوك تۆمار نەكراوە و ڕێنمایی دەدرێتە هاووڵاتیان.

ئەمڕۆ یەكشەممە 23ی شوباتی 2020 دكتۆر كەریم وەلی جەمیل بەڕێوەبەری گشتی تەندروستی كەركوك لەگەڵ زیاد خەلەف مەدید جێگری بەڕێوەبەری گشتی و دكتۆر سەباح نامیق بەڕێوەبەری بەشی تەندروستی گشتی، لەمیانی كۆنگرەیەكی ڕۆژنامەوانیدا جەختیان لەوە كردەوە كە لەپارێزگای كەركوك هیچ حاڵەتێكی تووشبوو بەڤایرۆسی كۆرۆنا تۆمار نەكراوە.

بەڕێوەبەری گشتی تەندروستی كەركوك جەختیكردەوە، وەك بەڕێوەبەرایەتی تەندروستی كەركوك ماوەیەكە ڕێوشوێنی پێویست و بەپەلەیان بەپێی ڕێنماییەكانی وەزارەتی تەندروستی و پێودانگەكانی ڕێكخراوی تەندروستی جیهانی بۆ خۆپارێزی لەڤایرۆسی كۆرۆنا گرتووەتەبەر، هەروەها هەڵمەتێكی بەرفراوانیشیان سەبارەت بە ڕێوشوێنەكانی خۆپارێزی و هۆشیاركردنەوەی هاووڵاتیان دەستپێكردووە.

دكتۆر كەریم وەلی ڕاشیگەیاند: فەرمانگەی تەندروستی كەركوك بڕیاریدا بە تەرخانكردنی نەخۆشخانەیەك لەگەڕەكی نەسڕ بەمەبەستی دوورخستنەوەی ئەو كەسانەی كە گومانیان لێدەكرێت تووشبووبن بەنەخۆشییەكە و سەرەڕای چارەسەركردنیشیان.

بەڕێوەبەری گشتی تەندروستی كەركوك داوشیكرد، هاووڵاتیان بەمەبەستی جێبەجێ كردنی ڕاستی ڕێوشوێنەكانی خۆپارێزی و پاراستنی كۆمەڵگەیەك كە دووربێت لەڤایرۆسی كۆرۆنا و نەخۆشیەكانی تریش، هاوكاری تیمە تەندروستییەكان بكەن.

ك.ج

بەردەوام بە لە خوێندنەوە

کوردستان

شاندی دانوستانكاری هەرێم بەبێ‌ دەرەنجام لە بەغدا گەڕایەوە

خەڵك – بەشی هەواڵ

ئەندامێكی شاندی دانوستانكاری هەرێم ڕایدەگەیەنێت، شاندی حزبە كوردستانییەكان لە بەغدا گەڕانەوە بێ ئەوەی بگەنە ھیچ دەرەنجامێك.

ئاڵا تاڵەبانی ئەندامی شاندی دانوستانكاری هەرێم لەگەڵ بەغدا لە لاپەڕەی فەڕمی خۆی لە تۆڕی كۆمەڵایەتی فەیسبوك بڵاویكردەوە، پاش زنجیرەیەك لە دیدار كۆبوونەوە و چاوپێكەوتن لەگەڵ ھێز و لایەنە سیاسییەكانی شیعە و سوننە و ئەنجومەنی نوێنەران و محەمەد تۆفیق عەلاوی سەرۆك وەزیرانی راسپێردارو بۆ پێكھێنانی حكومەتی نوێی عیراق، شاندی حزبە كوردستانییەكان لە بەغدا گەڕانەوە بێ ئەوەی بگەنە ھیچ دەرئەنجامێك.

ئاڵا تاڵەبانی ئاماژەی بەوەشداوە، ئەوەش بەھۆی ئەوەی كۆمەڵێك تێبینی ھەبوو لەسەر میكانیزم وبەرنامەی حكومەت دەرھەق بە ناوچە جێناكۆكەكان و بە تایبەت پارێزگای كەركوك لە ڕووی كێشەی ئەمنی و ئیداری و مووچە و بودجە و موستەحەقاتی كورد لە حكومەتی نوێی عیراق كە ھیچ كام لەمانە لە نێو حكومەتەكەی محەمەد تۆفیق عەلاویدا جێگای نەكراوەتەوە.

ئاڵا تاڵەبانی ڕوونیشیكردووەتەوە، شاندی حزبە كوردستانییەكان گەڕاونەتەوە ھەرێم و سبەینێ‌ لەگەڵ سەرۆكی حزبە كوردستانییەكان لەسەرۆكایەتی هەرێم لەسەر ئەو پرسە كۆدەبنەوە و دەبێت حكومەتی ھەرێم بڕیاری چارەنووس ساز بدات.

ك.ج

بەردەوام بە لە خوێندنەوە

کوردستان

سبەینێ‌ شاندێكی باڵای پێشمەرگە دەچێتە بەغدا

خەڵك – بەشی هەواڵ

بڕیارە سبەینێ‌ شاندێكی باڵای وەزارەتی پێشمەرگە بچێتە بەغدا و لەگەڵ لێپرسراوانی وەزارەتی بەرگری عیراق كۆببێتەوە.

وەزارەتی پێشمەرگە بڵاویكردەوە، بڕیارە سبەینێ‌ ٢٤\٢\٢٠٢٠ شاندێكی باڵای وەزارەتی پێشمەرگە، بەسەرۆكایەتی شۆڕش ئیسماعیل وەزیری پێشمەرگەی حكومەتی هەرێمی كوردستان سەردانی بەغدا بكات و لەگەڵ وەزیری بەرگری حكومەتی فیدڕاڵ و لێپرسراوانی باڵای ئەو وەزارەتە كۆببنەوە.

ك.ج

بەردەوام بە لە خوێندنەوە

کوردستان