واسق سەلامی كەشناسی عیراقی پێشبینی دەكات، وڵات لەچاوەڕوانی بارێكی كەشوهەوای باراناويدا بێت و بارینی تەرزەشی لەگەڵدا بێت.
سەلامی لە لێدوانێكی ڕۆژنامەوانیدا ڕایگەیاند”لە ماوەی چەند ڕۆژی داهاتوودا كەشوهەواى وڵات گۆڕانكاریی بەخۆوە ببینێت و گەر پێشبینییەكان وەك خۆیان دەربچن، ئەوا باری كەشوهەوای مێژوویی دەبێت و سەرماوسۆڵە و باوبۆرانێكی بەهێز لە دوو ڕۆژی داهاتوودا ڕوو لە وڵات دەكات”.
بە وتەی ئەو كەشناسە”لە ماوەی چەند ڕۆژی داهاتوودا كەشێكی باراناوی دروست دەبێت كە بارانی بەلێزمە و هەورە بروسكە و تەرزە باڵ بەسەر كەشوهەوادا دەگرن و چەند ڕۆژێك ئەم حاڵەتە بەردەوام دەبێت، لەماوەی 24 كاتژمێری ڕابردووشدا پلەكانی گەرما بە بڕی نزیكەی 4 پلە ڕوویان لە بەرزبوونەوە كردووە”.
