ئێمە لە تۆرە کۆمەڵایەتیەکان

راپۆرت

ئێران، چۆن جەنگی ڕۆژهەڵاتی ناوەڕاست دەباتەوە

پێش ئەوەی بپرسین ئەگەر ئەمریكا و ئێران بكەونە شەڕەوە كێ ئەیباتەوە، ئەوا باشترە پبرسین ئەوان لە چ جۆرە شەڕێكدان؟ چونكە مەعلومە كە ئێران و ئەمریكا هیچیان نایانەوێت بكەونە جەنگی ڕاستەوخۆوە، ئەم بابەتە پەیوەندیدارە لە دیداری ئابووری جیهانی – پلاتفۆرمی جیۆستراتیجی

بابەتێكی John Chipman لە پەیمانگای نێودەوڵەتی بۆ لێكۆڵینەوەی ستراتیجی – لە دامەزراوەكانی مێژونووسی سەربازی ماكیل هاوارد .

لە مانگی حوزەیرانی ٢٠١٩ دا ، دۆناڵد ترەمپ لە تویتێكدا وتی “ئێران هەرگیز هیچ جەنگێكی نەبردۆتەوە بەڵام هیچ دانوسانێكیشی نەدۆراندوە “، سەرەتای ئەم مانگەش هەمان قسەی دووبارەكردەوە.

شیكردنەوە و پێشنیازی پەیمانگای نێودەوڵەتی بۆ لێكۆڵینەوەی ستراتیجی IISS بۆ تۆڕی ئێران لە ڕۆژهەڵاتی ناوەڕاست بەم شێوەیەیە : ئێران لە دوابەدوای هەرەسهَنانی گفتوگۆی بەرنامە ئەتۆمیەكەی متمانەی لەدەستداوە، بەڵام ڕێگەیەكی تری دۆزیوەتەوە بۆ بردنەوەی جەنگەكە .

هەتا ئێستاش هاوسەنگی سەربازیی تەقلیدی لەبەرژەوەندی ئەمریكا و هاوپەیمانەكانێتی، بەڵام ئێران هاوسەنگی هێزە كاریگەرەكەی خۆی لە ڕۆژهەاتی ناوەڕاست لەبەرژەوەندی خۆی هەڵگێڕاوەتەوە لەڕێگەی باڵادەستی لایەنی سێهەمەوە، ئێران ململانێ ئەكا و جەنگ ئەباتەوە لە ڕێگەی “جەنگ لەناو خەڵكدا” لەجیاتی جەنگ لەنێوان دەوڵەتەكاندا لە گۆڕەپانی شەڕكردن، ئەم جۆرە ململانێیە خۆلادانە لە ململانێی سیستماتیكی دەوڵەت – بەرامبەر- دەوڵەت، ئێران لێی مەعلومە كە توانای سەركەوتنی هەیە لەو بوارەدا چونكە لەڕێگەی دۆستە نادەوڵەتیەكانیەوە بەدووی جەنگەكە كەوتووە .

بەهای ئەم باڵادەستیە ستراتیجیە بۆ تاران گەورەترە لە هێزی تەقلیدی و مووشەكی بالستیكی و هەتا لە بەرنامە ناوكیەكەشی، چونكە ئەوە چەكێكی هەڵبژاردەیە كە بە نایابی دەگونجێت لەگەڵ ململانێكانی ئەمڕۆی ئەم هەرێمە .

ئەم پێشبڕكێیە بە جەنگی دەوڵەت – بەرامبەر- دەوڵەت پێناسە ناكرێت یان بە تێوەگلانی هێزی لێكچووی ملكەچی یاسا نێودەوڵەتیەكان ، بەڵكو ئەم هێزانە جەنگاوەری بۆشایی تاریك و كۆمەڵگەی شێواون و ملكەچی یاسا وڕێساكان نابن و لێپرسراوێتی ناگرنە ئەستۆ و دەركەوتنیان ڕوون نیە و خاوەنی چەندین یاریچیین كە نوێنەرایەتی مۆزایكی بەرژەوەندیە ناوچەیی و هەرێمایەتیەكان دەكەن .

ئێران بۆ ململانێ و شەڕكردن و بردنەوەی جەنگ گەشەی بەو توانایەی خۆیداوە، لەهەمان كاتدا بەشێوەیەك پارێزگاری لەدوژمنایەتیكردنی خۆی دەكات كە گریمانەی كەمترین توانای تۆڵەلێكرنەوەی هەیە.

سوپای قودسی ئێرانی لە سوریا ئاڕاستەی هێزە میلیشیا ناوخۆیی و بێگانەكان دەكات بۆ هێشتنەوەی ڕژیمەكەی بەشار ئەسەد، ئێستاش ئێران خۆی خزاندۆتە ناو پرۆسەی بوژانەوەی حكومی و پەیكەری ئاسایشی نافەرمی لە سوریا .

ئێران لە ڕووی داراییەوە دەرەقەتی ئەم گەمە هەرزانە دێت و هەروەها یاریەكی حاشاهەڵگرە بۆ تاران و كاریگەرە بۆ بەكارهێنانی دژی بوونی ئەمریكا لە ناوچەكە، هەروەها بۆ بەرزكردنەوەی ئاستی هەڕەشەی ئێران لەسەر ئیسرائیل و، بۆ دەورەدانی سیاسەتی ڕووسیا لە سوریا، لەپێناوی ئەوەی خۆی ببێت بە بڕیاردەری سەرەكی لەسەر چارەنووسی ڕژێمی ئەسەد .

جەنگی نابەرابەر
هەتا ئێستاش جەنگی نابەرابەری ئێران ڕووبەڕووی بەرپەرچدانەوەیەكی نێودەوڵەتی كاریگەر نەبۆتەوە چونكە نەیارەكانی ئێران بەسادەیی ناتوانن لەم ناوچەیە هاوسەنگیەكی كاریگەری خۆیان ڕاگرن لەڕێی بەكارهێنانی هێزی تەقلیدیەوە، چونكە هێزە تەقلیدیە نەیارەكانی ئێران توانای ڕێلێگرتن و سنورداركردنی ئەزموونی لەسەرخۆ و كارامەیی ٤٠ ساڵەی ئێرانیان نییە كە لەو جۆرە جەنگەدا لە ئێران بەرنەوە .

ئامادەیی دەوڵەتانی تر بەشێوەیەكی یاسایی كارێكی زەحمەتە بۆ ئەوەی ڕووبەڕووی ئێران ببنەوە لەكاتێكدا ئێران ئامادەییەكی شەرعی هەمیشەیی هەیە لەناو دەوڵەتە دراوسێكانیدا .

ئێران جۆرە ستراتیجیەتێكی تایبەتی پەیرەوكردوە بۆبنیاتنانی سیستمێكی پاڵپشتی بۆخۆی لەناو دەوڵەتە لاوازەكاندا.

دۆكتراینی ئێران سەرچاوەی گرتووە لە شارەزاییەكەیەوە لە شەڕو ململانێ و لە ئایدۆلۆجیە شۆڕشگێڕیەكەیەوە، ئێران زۆربەی كات كۆمەڵگە شیعەكان بەكاردێنێت و هەندێك جار ئەو كۆمەڵگە ناشیعانەش كە ئامانجی هاوبەشیان هەیە تێوە دەگلێنێت .

ڕژێمی ئێران بە ووریایی حساب لەسەر ئەو توانایەی خۆی دەكات بۆ سەرنجڕاكێشانی كەمینەكان و پەراوێزخراوەكان لەدەرەوەی سنوورەكانی خۆی و لەوەش ناچێت بەئاسانی واز لەو تۆڕە بهێنێت كە بینایكردوە لەپێناوی دەستكەوتی زیاتر لە گەمەی دووبارە ڕێكخستنەوەی سیستەمی نێودەوڵەتیدا.

لەچاوی هاوبەشەكانیەوە

سەرچاوەی كاریزمای ئێران لە خۆدەربازكردن و خۆپاراستن لەدەرەوەی یاساو هەموو بەدیلێكی تروەیە تۆڕە كاریگەرەكەی ئێران توانایەكی باڵادەستی هەیە بەشێوەیەك ئیستا بەشێكە لە ستراتیجی كەسایەتیەكەی، بۆیە وازهێنان لەو تۆڕە تەنها كاریگەریەكەی لەدەست نادات، بەڵكو ناسنامەكەشی وندەكات .
ئەگەر ئێران لەناو سیستمی نیودەوڵەتیدا بێت سوودی ئابوری پێدەگات ، بەڵام ئەو سوودە ئابووریە بەربەست و سنور دائەنێت بۆ ئەو جۆرە توانایەی ئێران لە جەنگی ڕیمۆتی كۆنترۆڵ بۆ سوپای قودس . ئێران و سوپای قودس ناتوانن بەیەكەوە لەیەك كاتدا شۆڕشگێڕیش بن و لەناو سیستمی نیودەوڵەتیشدا بن.

ڕەنگە ئێران بچێتە ناو دانوسانەوە بۆ قسەكردن لەسەر تۆڕە كاریگەرەكەی، بەڵام هەتا ئیستاش بەردەوام پێداگیریی كردوە لە بەرگریكردن لە هاوپەیمانەكانی و بەتوندی دەستی گرتووە بە دۆستەكانیەوە بە ناوی چیرۆكی بەرگریی .

لەوانەیە ڕابەری باڵای ئێران ئەو ستراتیجە هەڵگەڕێنێتەوە وەك هەڵبژاردەیەك ، بەڵام ئەبێ ئەوەش بزانرێت كە تۆڕی كاریگەری ئێران بەشێكە لە توانا باڵادەستیەكەی و ئەم باڵادەستیەش بەشێكە لە كەسێتیە ستراتیجیەكەی، كە بووە بە سامانێكی سەرەكی ستراتیجی بۆ ئەو ڕژێمە .

گەمارۆی ئابوری بەتەنها لەوەناچێت پاڵ بەڕژێمی ئێرانەوە بنێت بۆ وازهێنان لە توانایەك كە هێزێكی خۆپاراستنی گرنگی پێبەخشیوە، دەوڵەتە لاوازەكان و كۆمەڵگە هەڵوەشاوەكان نێچیری ئاسان و هەرزانن بۆ كاریگەری ئێران .

لە سوریا و عیراق و یەمەن، ئێران دەرفەتی بۆ هەڵكەوتووە بۆ گرتنەبەری ڕێگەی گاڵتەجاری لەڕێی هاوبەشە ناحكومیەكانیەوە، بەڵام كاریگەری ئێران لەسەر ئەو وڵاتانەی كە توانیویانە گەشە بەحكومەتەكانیان بدەن كەمیكردووە و توانای سنوورداركراوە بۆ دامەزراندنی حیزبوڵای نوێ .

دراوسێی لاواز و گەندەڵ بۆ ئەو جۆرە شەڕەی ئێران بەسوودە، بەڵام دامەزراوەی بەهێز كە خزمەتی ئامانجی نیشتیمانی بكات هەرچەندە كەموكوڕیشی هەبێت، بەڵام دەبێتە هێڵی یەكەمی بەرگری دژی كاریگەری ئێران .

وەرگێڕانی : میهرەبان مەلا رەوف

راپۆرت

پارێزگاری هەولێر دڵنیایی بە هاووڵاتیان دەدات
هاووڵاتیان لەگەڕەكی 8ی حەسارۆك بێ‌ خزمەتگوزاری ژیان بەسەردەبەن

خەڵك-ئارام سەردار
خاوەن زەویەكانی 8ی حەسارۆك لەهەولێر، كە لە 16 هەزار پارچە زەوی پێكهاتووە، تاوەكو ئێستا چاوەڕوانی گەیاندنی خزمەتگوزارین بۆ زەویەكانیان تاوەكو بیكەن بەیەكەی نیشتەجێ بوون، بەپێی زانیاریەكانی (خەڵك) بۆ گەیاندنی خزمەتگوزاری قیرتاوكردن بۆ 8ی حەسارۆك لەهەولێر پارێزگا پێویستی بە 85 ملیار دینار هەیە، پارێزگاری هەولێریش ڕایدەگەیەنێت، نامانەوێت قسەكانی ئێمە لەخزمەتی هەندێ نووسینگەی خانووبەرە بێت بۆ ئەوەی بچن زەوی لەسەر هاووڵاتیان گران بكەن، دڵنیایی هاووڵاتیان دەكەینەوە خەمی ئێمەیە و بەهەموو تواناوە هەوڵی دابین كردنی خزمەتگوزاری دەدەین.

لوقمان حەكیم، كە خاوەنی زەوییە لە گەڕەكی 8ی حەسارۆك بە(خەڵك)ی ڕاگەیاند، من بۆ ئەوەی لەژیانی كرێچی دەربازم ببێت پارچەیەك زەویم كڕی بەئومێدی ئەوەی خزمەتگوزاری بۆ بێت و بیكەم بەخانوو، بەڵام زیاتر لە 6 ساڵە ئەو زەویەم كرٍیووە و جگە لەبەڵێن تائێستا هیچ خزمەتگوزاریەكی بۆ نەهاتووە.

دەشڵێت: “من شەش ساڵە زەویەكەم كڕیوە، بەڵام زەویەكان زیاتر لە 15 ساڵە دابەش كراون و تاكە شوێنیشتە هیچ خزمەتگوزاریەكی بۆ نەچووە، بەئومێدین خزمەتگوزاری بۆ بچێت، چونكە زۆرینەی ئەوانەی زەویان هەیە كرێچین لەشوێنەكانی تر”.

هاوكات هێمن شێرزاد، كە هاووڵاتییەكەی نیشتەجێی گەڕەكی 8ی حەسارۆكە بۆ (خەڵك) وتی، “سەیربكەن لەنێو كۆمەڵێك زەوی بەتاڵ خانوومان دروست كردووە، بەناچاری چیتر تاقەتی كرێی خانوومان نەمابوو، دەبینن زیاتر لە 10 ماڵ بەناچاری و بەبێ بوونی هیچ خزمەتگوزاریەك خانوومان كردووە، هیوادارین حكومەت بەزوترین كات هەندێ خزمەتگوزاری سەرتاییمان بۆ دابین بكات”.

لای خۆشیەوە، فرسەت سۆفی، پارێزگاری هەولێر لەوەڵامی پرسیاری (خەڵك) لەچوارچێوەی كۆنفڕانسێكی ڕۆژنامەوانیدا ڕایگەیاند، 8ی حەسارۆك شوێنێكی زۆر فراوانە و تەنها ئەو شوێنەش نیە كەوا خزمەتگوزاری بۆ نەچووبێت، بەڵكو لەزۆر شوێنی تر زەوی دابەشكراوە بەڵام خزمەتگوزاری بۆ نەچووە بەهۆی قەیرانی داراییەوە، ئێستاش ئێمە چاوەڕوانی حكومەتی هەرێمی كوردستانین یاخود ئەگەر بودجەی پەرەپێدانی پارێزگاكان بگەڕێتەوە بۆ گەیاندنی خزمەتگوزاری دڵنیایی دەدەین بەهاووڵاتیان، نووسراویشمان كردووە بۆ وەزارەتی شارەوانی و پشتیوانی هاووڵاتیانیشمان كردووە.

پارێزگاری هەولێر ئاماژەی بۆ ئەوەشكرد، ئێمە بۆ دابینكردنی خزمەتگوزاری بەدوای ڕێگای تریش دەبین ئەگەر مومكین بێت كەرتی تایبەت بەبەرامبەر هەندێ زەوی بازرگانی خزمەتگوزاری بۆ بەرێت، بۆیە ئێستا لەپڕۆسەی گفتووگۆداین.

فرسەت سۆفی وتیشی، “نامانەوێت قسەكانی ئێمە لەخزمەتی هەندێ نووسینگەی خانووبەرە بێت بۆ ئەوەی بچن زەوی لەسەر هاووڵاتیان گران بكەن، دڵنیایی هاووڵاتیان دەكەینەوە خەمی ئێمەیە و بەهەموو تواناوە هەوڵی دابین كردنی خزمەتگوزاری دەدەین، بەڵام نابێت بیرمان بچێت لە ساڵی 2014ەوە بودجەی پەرەپێدانی پارێزگاكانمان بڕاوە و ئێستا پارێزگا هیچ بودجەیەكی نیە، لەكاتێكدا لەساڵی 2012دا تەنها بودجەی پارێزگای هەولێر زیاتر لە 300 ملیار دینار بووە لەپەرەپێدانی پارێزگاكان، بەڵام ئێستا هیچ بودجەیەك نەماوە”.

ئەوەشی خستەڕوو، ئەگەر بەنیوەی پێشتریش ئیمكانیەت هەبێت لەلایەن حكومەت، دەتوانین خزمەتگوزاری بۆ زۆربەی ئەو شوێنانە دابین بكەین، لەگەڵ حكومەتیش گفتووگۆمان كردووە بۆ ئەوەی بزانین لە ساڵی 2020 دەتوانین چ پڕۆژەیەكی ستراتیژی بۆ هەولێر بكەین.

بەردەوام بە لە خوێندنەوە

جیهان

پرۆفیسۆرێك پێیوایه‌ 60%ی دانیشتوانی گۆی زه‌وی تووشی ڤایرۆسی كۆرۆنا ده‌بن

خەڵک – لوقمان غه‌فوور

چین 1500 كیلۆمه‌تر سنووری وشكانی هاوبه‌شی هه‌یه‌ له‌گه‌ڵ كۆریای باكوور، به‌ڵام تائێستا ئه‌و وڵاته‌ هیچ حاڵه‌تێكی كۆرۆنای ئاشكرا نه‌كردووه‌، ئه‌مه‌ له‌كاتێكدایه‌ كه‌ به‌رپرسێكی ته‌ندروستی “هۆنك گۆنگ” ده‌ڵێت ئه‌گه‌ر هەیە تا مانگی چوار، سێ به‌شی دانیشتوانی جیهان تووشی نه‌خۆشییه‌كه‌ ده‌بن.

پرۆفیسۆر گابریل لیونگ سه‌رۆكی به‌شی ته‌ندروستی گشتی له‌ زانكۆی “هۆنگ كۆنگ” به‌ ڕۆژنامه‌ی گاردیان-ی وتووه‌  دوای توێژینه‌وه‌یه‌كی ورد كه‌ ڕێكخراوی ته‌ندروستی جیهانی-یان لێ ئاگاداركردووەته‌وه‌ گه‌یشتوونه‌ته‌ ئه‌و بڕوایه‌ی كه‌ 60%ی ژماره‌ی دانیشتوانی گۆی زه‌وی تووشی نه‌خۆشییه‌كه‌ ببن.

ڤایرۆسی كۆرۆنا كه‌ له‌ 30 دیسێمبه‌ری 2019 له‌لایه‌ن چین-ه‌وه‌ به‌فەڕمی ڕاگه‌یه‌نرا تا ئه‌مڕۆ 13ی فێبریوه‌ری 1358 کەسی كوشتووه‌ و به‌پێی ئاماری ته‌ندروستی چین له‌ماوه‌ی 24 کاتژمێری رابردوودا 14 هه‌زار و 840 حاڵه‌تی نوێ تۆماركراوه‌ به‌مه‌ش ژماره‌ی تووشبوان گه‌یشتۆته‌ 60 هه‌زار و 310 كه‌س و له‌وانه‌ش 8 هه‌زار و 243 كه‌سیان له‌ حاڵه‌تی خراپدان.

ڤایرۆسی كۆرۆنا كه‌ چه‌ند ڕۆژێك له‌مه‌وبه‌ر زانایان به‌ فەڕمی ناوی زانستی Covid-19 یان لێنا، له‌ 28 ده‌وڵه‌ت بڵاوبووەته‌وه‌ به‌تایبه‌تی ئه‌و ده‌وڵه‌تانه‌ی هاوسنوورن له‌گه‌ڵ چین زۆرترین تووشبویان تێدا ده‌ركه‌وتووه‌، كه‌چی كۆریای باكوور له‌ سه‌رده‌ستی ڕژێمێكی داپلۆسێنه‌ر به‌ڕێوه‌ده‌چێت و هه‌موو ئامێرێكی په‌یوه‌ندیی و تۆڕه‌ كۆمه‌ڵایه‌تییه‌كان تێیدا قه‌ده‌غه‌یه‌، هیچ حاڵه‌تێكی نه‌خۆشییه‌كه‌ی ڕانه‌گه‌یاندووه‌.

كی بارك مامۆستای كۆلێژی پزیشكی هارڤارد بۆ ڕۆژنامه‌ی یو ئێس توده‌ی، ڕونده‌كاته‌وه‌ كه‌ 10 جار سه‌ردانی مرۆیی بۆ كۆریای باكوور كردووه‌ و ئه‌و وڵاته‌ له‌بواری ته‌ندروستیدا زۆر هه‌ژاره‌، به‌هۆی لاوازی چاودێری ته‌ندروستی كه‌ سیستمێكی زۆر كلاسیكییه‌ توانای به‌رگری ئه‌م جۆره‌ ڤایرۆسانه‌ی نییه‌، ئه‌گه‌ر هه‌ر حاڵه‌تێكیش هه‌بێت نه‌ ده‌زانرێت و نه‌ دركی پێده‌كرێت.

ناجی شه‌فیق به‌رێوه‌به‌ری پێشووی ڕێكخراوی ته‌ندروستی جیهانی له‌ نوسینگه‌ی بیونگ یانگ به‌ وۆل ستریت جۆرنال-ی وتووه‌:”به‌رپرسانی كۆریای باكوور ئه‌سته‌مه‌ بتوانن ده‌مامك-یش بۆ خه‌ڵك دابین بكه‌ن نه‌ك چاره‌سه‌ری سه‌ره‌تایی نه‌خۆشییه‌كه‌”.

ده‌شڵێت: “كاتێك له‌وێ كارم ده‌كرد به‌ سه‌دان ژن و منداڵ كێشه‌ی كه‌مخۆراكی-یان هه‌بوو”، به‌ڵام له‌لایه‌ن به‌رپرسانی پۆنگ یانگ-ه‌وه‌ په‌رده‌پۆش ده‌كرا، بۆیه‌ به‌دڵنیایی له‌نه‌بوونی به‌رگری له‌شدا به‌ئاسانی خه‌ڵك تووشی كۆرنا ده‌بێت”، به‌پێی ئاماری نه‌ته‌وه‌ یه‌كگرتووه‌كان 40%ی خه‌ڵكی كۆریای باكوور، به‌دخۆراكیان هه‌یه‌.

هه‌روه‌ها سونگ ئین بۆم به‌رپرس له‌ وه‌زاره‌تی ته‌ندروستی كۆریای باكوور له‌ لێدوانێكیدا بۆ میدیای كۆریای باكوور جه‌ختی له‌وه‌ كرده‌وه‌ كه‌ هیچ حاڵه‌تێك له‌ وڵاته‌یه‌كه‌یان بڵاونه‌بووەته‌وه‌ له‌كاتێكدا 90%ی بازرگانیشمان له‌گه‌ڵ چین هه‌یه‌.

وتیشی: “وه‌عی خه‌ڵكی وڵاته‌كه‌مان له‌ئاستێكدایه‌ كه‌ توانای خۆپاراستنیان هه‌یه‌”، باسی له‌وه‌شكردووه‌ به‌ڵام تا یه‌ك مانگ ده‌رگای سنوری هێڵێ ئاسن و ئۆتۆمبێل-یان داخستووه‌.

ڕۆژنامه‌ی نیویۆرك تایمز نوسیویه‌تی ئه‌م قسانه‌ی به‌رپرسه‌كه‌ی وه‌زاره‌تی ته‌ندروستی كۆریای باكوور له‌كاتێكدایه‌ كه‌ وڵاتانی وه‌ك ژاپۆن 270 حاڵه‌ت، هۆنگ كۆنگ 50 حاڵه‌ت، كۆریای باشوور 28 حاڵه‌ت، تایوان 18 حاڵه‌ت و تایله‌ند 33 حاڵه‌ت و ڤێتنام 16 حاڵه‌تی لێ تۆماركراوه‌ كه‌ زۆربه‌یان هاوسنوورن یان نزیكن له‌ وڵاتی چین-ه‌وه‌.

بەردەوام بە لە خوێندنەوە

راپۆرت

ڕێگای سەرەكی نێوان سیدەكان- سۆران بێ تابلۆ و هێڵكاری هاتووچۆیه

خەڵك-نزار مستەفا
ڕێگەی شارۆچكەی سۆران- شاڕەدێی سیدەكان ڕێگای چەندان گوندی لەسەرە و دوای درووستكردنی ڕێگاكە بەشێكی زۆری تووشی داڕمان بووە و سەرەڕای قەرەباڵغی ڕێگاكە، بەڵام هیچ تابلۆیەكی هاتووچۆی بۆ دانەنراوە.

سیروان صابر، هاووڵاتیەكی دانیشتووی شارەدێی سیدەكانە بە(خەڵك )ی ڕاگەیاند، ئەم ڕێگایە یەك سایدە و بەهۆی نەبوونی هێماكانی هاتووچۆ و هێڵكاری ڕێنمایی، هاتووچۆ تێیدا سەختتر بووە.

وتیشی، “ڕێگایەكی سەخت و شاخاوییە و گۆرانی كەش و هەوا و هاتنی وەرزی سەرماش ئاستەنگی لەبەردەم هاتووچۆدا درووست كردووە، بەمەش لەگەڵ گۆڕانی كەش و هەوا تەمومژ دایدەپۆشێت و مەودای بینین بەڕادەیەكی بەرچاو كەمدەبێتەوە، چونكە پێچی زۆر و یەك سایدە، بۆیە سەختی ڕێگاكە و نەبوونی هێماكانی هاتووچۆ مەترسییەكانی زیاتر كردووە”.

لەلایەكی دیكەشەوە، سدیق حەسەن، شۆفێرێكە، كە ڕۆژانە هاووڵاتیان لەسیدەكانەوە بۆ سۆران دەگوازێتەوە بۆ (خەڵك) وتی، “ڕێگاكەمان كەموكوڕییەكی زۆری تێدایە و جگە لەمەش خراپ بوون و رۆچوونی بەشێكی ڕێگاكە و كەمی هێماكانی هاتووچۆ و نەبوونی هێڵكاری لە ڕێگاكەدا كێشە و گرفتی زۆری بۆ ئێمەی شۆفێران دروست كردووە”.

ئەو شۆفێرە وتیشی، “داڕمانی شاخ و هاتنە خوارەوەی بەرد كێشەیەكی تری بۆ درووست كردون، پێویستە كەرتی چواری ڕێگاوبانی سۆران بەردەوام چاودێری ئەو ڕێگایە بكات، چونكە لە كاتی هاتنە خوارەی بەرد و شاخ كارەساتی گەورە درووست دەكات و ئەگەری درووست بوونی ڕووداوی نەخوازراو هەیە” .

لەم بارەیەوە ڕائید دلاوەر لەتیف، وتەبێژی بەڕێوەبەرایەتی هاتووچۆی سۆران بە(خەڵك)ی ڕاگەیاند، وەكو بەڕێوەبەرایەتی هاتووچۆ چەند گرفتێكی ڕێگاكانی سنوری سۆران و دەورووبەریمان چارەسەر كردووە، لە دوو سایدی سیدەكانیش 70 تابلۆ و ڕێنمایی هاتووچۆمان هەڵواسیووە لەگەڵ دانانی پێنج تاسەی یاسایی.

وتیشی، “بۆ ڕێگەی سەرەكی نێوان سۆران – سیدەكان كەشف و دەرخەستەمان كردووە، هەر كاتێك ڕەزامەندی وەزارەتی لەسەر درا ئێمە وەك بەڕێوبەرایەتی هاتووچۆی سۆران هێڵی سپی و هێڵە ئەرزییەكانی هاتووچۆ نوێ دەكەینەوە و ڕێنمایی و هەرچی پێویست بێت بۆ ڕێگاكە دای دەنێین”.

جێگای ئاماژەشە ڕێگەی سەرەكی نێوان سۆران – شارەدێی سیدەكان ڕێگایەكی سەرەكییە و زیاتر لە300 گوند لەخۆدەگرێت و 32كم لەسۆران بۆ سیدەكان دوورە و ڕۆژانە هاتووچۆیەكی زۆری تێدا دەكرێت و لەچەند ساڵی ڕابردووشدا لەلایەن حكومەتی هەرێمەوە پڕۆژەی قیرتاوكردنی بۆ كراوە و بەهۆی سەختی ڕێگاكە و ڕۆچۆنی بەشێكی ڕێگاكە هێڵەكانی ئەرزی هاتووچۆ ڕەش بوونەتەوە و ئەمەش وایكردووە زیاتر ئاستەنگی هاتووچۆ بۆ شۆفێران درووست بكات.

بەردەوام بە لە خوێندنەوە

کوردستان