ئێمە لە تۆرە کۆمەڵایەتیەکان

ئابوری

پارێزگاری سلێمانی كێشەی رێگا سەرەكییەكەی شارباژێڕ- پشدەر دەگەیەنێتە ئەنجومەنی وەزیران

سلێمانی- نزار جەزا

هەڤاڵ ئەبوبەكر پارێزگاری سلێمانی كێشەی وەستانی پرۆژەی قیرتاوكردنی رێگای سەرەكی بەستەرەوەی سلێمانی، شارباژێڕ- پشدەر دەگەیەنێتە ئەنجومەنی وەزیران.

هەفتەی رابردوو ژمارەیەك لە كەسایەتییەكانی دێیەكانی دۆڵبێشك و قامیش و گەڵاڵەی ناوچەی شینكایەتی لە شارباژێڕ سەردانی هەڤاڵ ئەبوبەكر پارێزگاری سلێمانییان كرد بۆ گەیاندنی داواكاری دەستپێكردنەوەی پرۆژەی رێگاكە كە لە 2014ەوە راوەستاوە و شازدە ساڵە دەستیپێكردووە و تاكو ئێستا تەواو نەبووە.

هەڤاڵ ئەبوبەكر، پارێزگاری سلێمانی بە(خەڵك)ی ڕاگەیاند، ئەو ڕێگەیەی ئەوان داوادەكەن قیرتاوبكرێت، لەپڕۆژەی نەوتە، واتە لەسەر داهاتی نەوت پڕۆژەكە جێبەجێدەكرێت، لەئێستاشدا نەك ئەو پڕۆژەیە، بەڵكو هەموو پڕۆژەكانی دیكە كە لەسەر داهاتی نەوت جێبەجێدەكرێن، ڕاگیراون.

ئاماژەی بەوەشدا، جێبەجێكردنی ئەو پڕۆژەیە لەدەسەڵاتی پارێزگاردا نییە، بەڵام بەڵێنیان بەخەڵكی ئەو دەڤەرە داوە، داواكارییەكەیان بەرزبكەنەوە بۆ ئەنجومەنی وەزیران و دەبنە پارێزەری ئەو خەڵكە و لەگەڵ نوسینگەی جێگری سەرۆكی حكومەتی هەرێمیش قسەیان كردووە.

باسی لەوەشكرد، ئەو ڕێگەیە ڕێگەیەكی ستراتیژی گرنگە و بارگرانییەكی گەورە لەسەر ڕێگای ڕانیە- قەڵادزێ كەمدەكاتەوە، بۆیە ئومێد دەكەن، لەداهاتی نەوت بڕێك پارەی بۆ تەرخان بكرێت، یاخود بودجەكەی بگوازنەوە بۆ بودجەیەكی دیكە، كە لەئێستادا بتوانرێت خەرج بكرێت.

پڕۆژەی ڕێگای ستراتیژی سلێمانی، شارباژێڕ – پشدەر ماوەی نزیكی شازدە ساڵە بڕیاری قیرتاوكردنی بۆ دەرچووە، بەڵام بەشێوەیەكی لەسەرخۆ تاكو ساڵی 2014 كاری تێداكراوە و بەهۆی قەیرانی دارایی و دەستپێكردنی شەڕی داعشەوە قیرتاوكردنەكەی ڕاگیرا.

لەئێستادا زۆرێك لەهاووڵاتیان بۆ گەیشتن بە ناوچەی پشدەر ڕێگەی دووكان_ ڕانیە بەكاردەهێنن، كە ڕێگەیەكی دوورە و ئەگەر ڕێگەی شارباژێڕ_ پشدەر قیرتاوبكرێت، بەشێوەیەكی بەرچاو ئەو ڕێگەیە نزیكتر دەبێتەوە و خەڵكی ناوچەكانی قەڵادزێ‌ و پشدەر هەر لەو ڕێگەیەوە دەتوانن هاتووچۆبكەن، بەمەش ئاوەدانی زیاتر دەكەوێتە سەر ئەو ڕێگایە.

ناوچەی شینكایەتی لە حەوت دێ پێكدێت و هاوسنوورە لەگەڵ سنووری سەردەشتی رۆژهەڵاتی كوردستان و قەڵادزێ و دۆڵی جافایەتی و نێوەندی قەزای ماوەت و ناوچەی ئالان، ناوچەیەك گرنگی شۆڕشی ئەیلوولی پارتی و شۆڕشی نوێی یەكێتی بووە، بەڵام لە دوای ڕاپەڕینەوە ناوچەكە لەلایەن حكومەتی هەرێم و دوو حزبە دەسەڵاتدارەكەوە پشتگوێخراوە.

ئابوری

هۆشداری دەدرێتە مامۆستایان
مووچەی مانگی داهاتووی ژمارەیەك مامۆستا ڕادەگیرێت

خەڵك- بەشی هەواڵ
بەڕێوەبەرێتی پەروەردەی شارباژێڕ لە سنوری سلێمانی هۆشداری دەداتە بەشێكی مامۆستایان، كە ژمارەی بایۆمەتری و پێناسی باری شارستانی بگەیەننە بەشی ژمێریاری و دەشڵێت: “بەپێچەوانەوە مووچەی مانگی 9 ڕادەگیرێت”.

پشتیوان تاڵب، لێپرسراوی ڕاگەیاندنی پەروەردەی شارباژێڕ بۆ (خەڵك) ئاماژەی بەوەكرد، ئەو مامۆستایانەی ناویان لەلیستی سوردایە ژمارەی بایۆمەتری و ژمارەی پێناسی باری شارستانی و ڕۆژ و ساڵی لەدایكبونیان بهێنن بۆ بەشی ژمێریاری.

ڕاشیگەیاند، پێویستە ئەو مامۆستایانە تا بەرواری 26\11\2018 ئەو بەڵگەنامانە بهێنن، بە پێچەوانەوە ئەگەر تا ئەو بەروارە نەیهێنن مووچەی مانگی 9 وەرناگرن.

ناوی مامۆستایان:
جوانە محمد فرج
هەنار كمال ڕەشید
میدیا ئاسۆ ڕەووف
دلێر ئەمین سەمین
هێمن كریم حمە خان

بەردەوام بە لە خوێندنەوە

ئابوری

دوای هەفتەیەك دەست بە دابەشكردنی نەوت دەكرێتەوە

خەڵك – بەشی هەواڵ
لیژنەی دابەشكردنی سوتەمەنی لە پارێزگای هەڵەبجە ڕایدەگەیەنێت، دابەشكردنی نەوت لە پارێزگای هەڵەبجە بەردەوامە و ڕۆژی چوار شەممە دابەشكردنی نەوت لەهەڵەبجە دەستپێدەكاتەوە.

لیژنەی دابەشكردنی سوتەمەنی لە پارێزگای هەڵەبجە لە ئاگادارییەكدا، كە وێنەیەكی دەست (خەڵك) كەوتووە ڕایگەیاندووە، دابەشكردنی نەوت ڕۆژی چوار شەممە 21-11-2018 لە هەڵەبجە دەست پێدەكاتەوە.

ڕاشیگەیاندووە، سبەی ناوی ئەو بریكارانە بڵاودەكرێتەوە، كە بڕیارە ڕۆژی چوار شەممە نەوت بگاتە گەڕەكەكانیان”.

ئاماژە بۆ ئەوەشكراوە، دابەشكردن لە كاتژمێر 1ی پاش نیوەڕۆوە دەستپێدەكات و نەوت دەگاتە شوێنی دیاریكراوی بریكارەكان، هەروەها بۆ وەرگرتنی نەوت هاوڵاتی پێویستی بەكارتی نەوت و كۆپی ناسنامەیە، نرخی هەر بەرمیلێك نەوت 51 هەزار دینارە.

ئەمە لە كاتێكدایە، لە ڕۆژی پێنج شەممەی هەفتەی ڕابردووەوە دابەشكردنی نەوت لە پارێزگای هەڵەبجە و دەوروبەری ڕاگیراوە.

بەردەوام بە لە خوێندنەوە

ئابوری

پشكی بودجە و مووچەی هەرێم زیادكرا

خەڵك- بەشی هەواڵ
پەرلەمانتارێكی عیراقی تەرخانكراوە داراییەكانی ناو پڕۆژە یاسای بودجەی ساڵی 2019ی بەشێكی وەزارەتەكان ئاشكرادەكات و ڕایدەگەیەنێت، كە پشكی هەرێمی كوردستان بۆ 13% زیاد دەكرێت.

سوهام عەقیلی، ئەندامی لیژنەی دارایی لە پەرلەمانی عیراق ڕایگەیاندووە، پشكی وەزارەتی پەروەردە و خوێندنی باڵا لە بودجەدا 3.72% لە كۆی خەرجی گشتی و هەروەها تێبینی ئەوەشمان كردووە، كە پشكی وەزارەتی تەندروستی و ژینگە زۆر كەمە و 1.98%ی خەرجیە گشتیەكانی بودجەی بۆ تەرخان كراوە.

سەبارەت بە وەزارەتە ئەمنی و سەربازییەكان وتویەتی، “پشكی وەزارەتی ئاسایش و بەرگری 19%ی خەرجی بودجەی بۆ دانراوە لەكاتێكدا پشكی وەزارەتی كشتوكاڵ و پیشەسازی 1%ی بۆ تەرخان كراوە”.

سەبارەت بە پشكی هەرێم لە بودجە ئاشكرای كردووە، كە پشكی هەرێمی كوردستان لە پڕۆژە یاسای بودجەی فیدڕاڵی زیاد دەكرێت بۆ 13% و لەهەمان كاتیشدا هەژماركردنی نرخی بەرمیلێك نەوت-یش بۆ 60 دۆلار زیادكراوە بۆ ئەوەی كورتهێنانی بودجە كەمبكرێتەوە”.

هاوكات بەپێی زانیارییەكانی (خەڵك) كە لە سەرچاوەیەكی پەرلەمانیەوە دەستی كەوتووە، بڕیارە لە پڕۆژە یاسای بودجەی ساڵی 2019دا پشكی هەرێمی كوردستان بۆ 14% زیاد بكرێت و لەلایەن حكومەتی عیراقەوە مووچەی فەرمانبەرانی هەرێم ڕەوانە بكرێت بە مەرجی ناردنی 250 هەزار بەرمیل نەوتی ڕۆژانەی هەرێم لەلایەن عیراقەوە.

بۆ وەرگرتنی زانیاری زیاتر (خەڵك) چەند جارێك پەیوەندی كرد بە ئەحمەد حاجی ڕەشید و ماجیدە تەمیمی، كە هەردووكیان ئەندامی لیژنەی دارایین لە پەرلەمانی عیراق، بەڵام وەڵامی پەیوەندییەكانیان نەدایەوە.

ئەمە لەكاتێكدایە، كە ئەمڕۆ بە سەرۆكایەتی محەمەد حەلبوسی، سەرۆكی پەرلەمانی عیراق، لیژنەی هاوبەشی پەرلەمان و حكومەت لەسەر دەستكاری كردنی پڕۆژە یاسای بودجە كۆبوونەوە و تا ئێستا هیچ ئەنجامێكی كۆبوونەوەكە بە فەرمی ئاشكرانەكراوە.

لای خۆشیەوە، ئیخلاس سەباح، ئەندامی لیژنەی دارایی و بەشداربووی کۆبوونەوەی ئەمڕۆ، بە ماڵپەڕی فەرمیی پارتی ڕاگەیاندووە، “ئەمڕۆ لیژنەی دارایی پەرلەمان و لیژنەی وەزارەتی دارایی حکوومەتی عێراق کۆبوونەوە و لەو کۆبوونەوەیەدا کۆمەڵێک پێشنیار خرانە ڕوو، لەوانە زیادکردنی نرخی بەرمیلی نەوت و بوودجەی پێشمەرگە و داواش کرا ھەرێم و بەغدا ڕێککەوتنێک بکەن و بیخەنە بەردەم لیژنەکە بۆ ئەوەی بڕیاری لەبارەوە بدەن، بۆیە ئەم چەند ڕۆژە دەدرێتە ھەرێم و بەغدا بۆ ئەوەی ڕێک بکەون و هەفتەی داھاتوو جارێکی دیکە لیژنەکە کۆدەبێتەوە و بڕیاری کۆتایی لەبارەوە دەدات”.

وتیشی، “لە کۆبوونەوەی ئەمڕۆدا ھیچ کەسێک لاریی نەبوو لەبارەی داواکاریی کوردەوە لە پڕۆژە یاسای بودجەدا، بەڵام وا بە باشتر زانرا، کە ڕێککەوتنێک بکرێت، بۆ ئەوەی لە پڕۆژە یاساکەدا جێگیر بکرێت و بڕیاری لەسەر بدرێت، بۆیە چاوەڕێ دەکەن ھەرێم و بەغدا بگەنە ڕێککەوتن”.

بەردەوام بە لە خوێندنەوە
کام لەم وەزارەتانەی کابینەی ٨ لە ئاست خزمەتکردن بە هاولاتیان جێدەستی دیار بووە؟

کوردستان

دوایین