ئێمە لە تۆرە کۆمەڵایەتیەکان

کوردستان

پارێزگارێك بەشێوەی كتوپڕ دەچێتە فەرمانگە و نەخۆشخانەكان

خەڵك- بەشی هەواڵ

لە كاتژمێر 12:30 شەوی ڕابردوو بەشێوەیەكی كتوپڕ و لەناكاو پارێزگاری هەولێر دەچێتە نەخۆشخانەی فریاكەوتنی ڕۆژهەڵات لە هەولێر و دەڵێت: “ئەو پزیشك و فەرمانبەرانی ئامادەی دەوام نەبوون سزا دەدرێن”.

فرسەت سۆفی، پارێزگاری هەولێر لە هەژماری خۆی لە فەیسبووك ئاماژەی بەوەكردووە، كاتژمێر 12:30 شەوی ڕابردوو بە مەبەستی لە نزیكەوە ئاگاداربوون لە ڕەوشی تەندروستی و بۆ دڵنیابوون لە پابەندبوونی ئێشكگران و فەرمانبەرانی نەخۆشخانەكە بەدەوام و پێشوازی كردن لە نەخۆش، بەشێوەیەكی كتوپڕ و لەناكاو، نەخۆشخانەی فریاكەوتنی ڕۆژهەڵاتمان بەسەركردەوە.

دەشڵێت: “یەكە یەكەی بەشەكانمان بەسەركردەوە و لە نزیكەوە لە ڕەوشی ناو نەخۆشخانەكەمان كۆڵییەوە، بەڕێوەبەری نەخۆشخانەكەمان ڕاسپارد دەستبەجێ دەست بە نۆژەنكردنەوەی ئەو شوێنانە بكەن، كە پێویستیان بە نۆژەنكردنەوە هەیە و ڕێنمایمان بە بەڕێوەبەر و كارمەندانی نەخۆشخانەكەدا لە ئەركەكانیان پەرۆشانە مامەڵە لەگەڵ نەخۆشدا بكەن و لە خزمەتی هاووڵاتیان دابن”.

پارێزگاری هەولێر جەختی لەسەر پابەندبوونی تەواوی فەرمانبەران و دكتۆرەكان بە دەوامی نەخۆشخانەكە كردەوە، هەر فەرمانبەر و پزیشكێك ئامادەی دەوامكردنەكەی نەبووبوو ڕێكاری پێویستی لەبەرامبەردا گیرایەبەر.

کوردستان

پەڕلەمانی كوردستان؛ هۆشداری سەڕهەڵدانەوەی داعش دەدات

خەڵك – بەشی هەواڵ
لیژنەی ناوچە كوردستانییەكانی دەرەوەی هەرێم لەپەڕلەمانی كوردستان ڕایدەگەیەنێت ، جموجۆڵەكانی چەكدارانی داعش لەناوچە كوردستانییەكانی دەرەوەی ئیدارەی هەرێم زیادی كردووە و دەزگا ئەمنییەكانیش وەك پێویست نەیانتوانیوە بەكاری خۆیان هەڵسن لەپێناوپاراستنی سەرو ماڵی هاووڵاتییاندا.

لیژنەی ناوچە كوردستانییەكانی دەرەوەی هەرێم لەپەڕلەمانی كوردستان لە ڕاگەیەنراوێكدا، كەوێنەیەكی دەست (خەڵك) كەوتووە ڕایگەیاندووە، لەپێناو گەڕانەوەی ئارامی بۆ ئەو ناوچانە پێویستە هەرچی زووە هێزی پێشمەرگەی كوردستان بگەڕێنەوە ئەو ناوچانە، دەزگا ئەمنییەكانی ئەو ناوچانەش لێكۆڵینەوە لەو ڕووداوانە بكەن و تاوانبارانیش بەسزای دادپەروەرانەی خۆیان بگەیەنن.

ڕاگەیەندراوی لیژنەی ناوچە كوردستانییەكانی دەرەوەی هەرێم لەپەڕلەمانی كوردستان:

لەماوەی چەند ڕۆژی ڕابردوو جموجۆڵەكانی چەكدارانی داعش لەناوچە كوردستانییەكانی دەرەوەی ئیدارەی هەرێمی كوردستاندا زیادی كردووەو دەزگا ئەمنییەكانیش وەك پێویست نەیانتوانیوە بەكاری خۆیان هەڵسن لەپێناو پاراستنی سەرو ماڵی هاووڵاتییاندا. ئێمە وەكو لیژنەی ناوچە كوردستانییەكان بەنیگەرانییەكی قووڵەوە لەو ڕووداوانە دەڕوانین و پرسەو سەرەخۆشیی خۆشمان ئاراستەی كەس و كاری ئەو شەهیدانە دەكەین كە بوونە قوربانیی دەستی ئەم گرووپە تیرۆریستانە.
لەپێناو گەڕانەوەی ئارامی بۆ ئەو ناوچانە پێویستە هەرچی زووە هێزی پێشمەرگەی كوردستان بگەڕێنەوە ئەو ناوچانە، دەزگا ئەمنییەكانی ئەو ناوچانەش لێكۆڵینەوە لەو ڕووداوانە بكەن و تاوانبارانیش بەسزای دادپەروەرانەی خۆیان بگەیەنن.

لیژنەی ناوچە كوردستانییەكانی دەرەوەی هەرێم لەپەرلەمان
١٩ی شوباتی ٢٠٢٠

بەردەوام بە لە خوێندنەوە

کوردستان

لە ڕووداوێكی هاتووچۆدا دوو شۆفێر بریندار بوون

خەڵك- بەشی هەواڵ
بەڕێوەبەرایەتی هاتووچۆی كۆیە ڕایدەگەیەنێت، كە بەهۆی ڕووداوێكی هاتووچۆوە لەسەر ڕێگەی كۆیە- هەولێر دوو شۆفێر بریندار بوون.

بەڕێوەبەرایەتی هاتووچۆی كۆیە لە ڕاگەیەنراوێكدا ئاماژەی بەوەكردووە، كاتژمێر 3ی دوای نیوەڕۆ لەڕێگای كۆیە- ھەولێر ڕووداوێكــی ھاتووچۆ لەنێوان ئۆتۆمبێلــی ئۆپل تەكسی و ئۆتۆمبێل تۆیۆتا یارس ڕوویدا.

ڕاشیگەیاند، كە لەئەنجامی ڕووداوەكە ھەردوو شوفێرەكە بریندار بوون.

ئاشكراشی كردووە، هۆكاری ڕووداوەكە تێپەڕاندنی هەڵە بووە لە شوێنێكی نەدیو، ئەوەش ئەو كارەساتەی ناوەتەوە.

بەردەوام بە لە خوێندنەوە

کوردستان

هاوسەرۆكانی یەكێتی جێگریان دەبێت؟
سكرتاریەتێك بۆ ئەنجوومەنی سەركردایەتی یەكێتی دیاری دەكرێت

خەڵك – بەشی هەواڵ
ئەندامێكی ئەنجوومەنی سەركردایەتی یەكێتی نیشتمانی كوردستان ڕایدەگەیەنێت، سێ كۆبوونەوەی دیكەمان ماوە بۆ كۆتایی هێنان بە پڕۆگرامی یەكێتی، دەشڵێت: “سكرتاریەتێك بۆ ئەنجوومەنی سەركردایەتی هەڵدەبژێرێت، كە لە سەرۆك و جێگر و بڕیاردەر پێكدێت”.

فەرید ئەسەسەرد، ئەندامی ئەنجوومەنی سەركردایەتی یەكێتی نیشتمانی كوردستان بە (خەڵك)ی ڕاگەیاند، كاری كۆبوونەوەكان نزیكە لە كۆتایی و پەیڕەو پەسەند كرا و ئێستا سەرقاڵی پڕۆگرامین بۆ یەكێتی و دەستمان كردووە بە هەڵبژاردنی لێپرسراویەتیەكان، كە لە سەرەوە دەستمان پێكردووە.

وتیشی، “جگە لە هاوسەرۆك بۆ یەكێتی، كە دوێنێ‌ هەڵبژێردران، پێنج كارگێڕیان دەبێت و ئەوانیش هەڵبدەبژێردرێن و دواتر پۆستەكانی دیكە هەڵدەبژێردرێن، كە بۆ ئەنجوومەنی سەركردایەتی سكرتاریەتێك دیاری دەكرێت، كە لە سەرۆك و جێگر و بڕیاردەر پێكدێت”.

ڕاشیگەیاند، هەموو كارەكانی كۆبوونەوەكان بە باشی بەڕێوەدەچن و هیچ كێشەیەك نیە و پڕۆگرامەكانی حزب خەریكە لە كۆتایی نزیك دەبنەوە و پێم وایە دوو بۆ سێ كۆبوونەوەی دیكە كارەكانی تەواو دەبێت.

دوێنێ‌ سێ‌ شەممە، ئەنجوومەنی سەركردایەتی بە زۆرینەی ڕەهای دەنگەكانی هەریەك لە لاهور شێخ جەنگی و بافڵ تاڵەبانی وەك هاوسەرۆكی یەكێتی هەڵبژارد، كە جێگریان نابێت، بەڵكو 5 كارگێڕ هەڵدەبژێردرێن.

بەردەوام بە لە خوێندنەوە

کوردستان