ئێمە لە تۆرە کۆمەڵایەتیەکان

عێراق

سەركردەیەكی پێشووی حەشد بۆ (خەڵك) هۆكاری توندبوونی خۆپیشاندانەكان ئاشكرادەكات

خەڵك- ئیدریس جەبار
سەركردەیەكی پێشووی حەشدی شەعبی ڕایدەگەیەنێت، لەسەرەتاوە خۆپیشاندانەكان لە عیراق، وەك هەموو خۆپیشاندانە ئاساییەكان لە جیهاندا بەڕێوەچوون، بەڵام سروشتی سەركوتكردن و بەئامانجگرتنیان لەلایەن قەناس بەدەستەكان، بووە مایەی ئەوەی زیاتر ڕقی خۆپیشاندەران ئەستوور بكات.

كەریم نوری، سەركردەی پێشووی حەشدی شەعبی، لە لیدوانێكی تایبەت بە (خەڵك) ڕایگەیاند، “سەركوتكاری و كوشتنی خۆپیشاندەران بۆ ئەوە بوو، تا ڕۆڵەكانی گەلی عیراق پاشەكشە بكەن، بەڵام ئەو كار و كردەوانەی بەرانبەریان ئەنجامدرا، نەبوونە مایەی پاشەكشەكردن و بگرە هێندەی تر ڕق ئەستوور بوون”.

بە وتەی كەریم نوری، “هەندێك حزب و لایەن هەوڵیاندا سواری تەوژمی خۆپیشاندانەكان ببن، بەڵام هەوڵەكان شكستخواردووبوون، خۆپیشاندانەكان توانیان ڕیتمی خۆیان ڕابگرن و ڕێگە بەو دزەكردنە نەدەن”.

هەر لەو بارەیەوە سەركردەكەی پێشووی حەشدی شەعبی وتی، “حزبەكان لە هەوڵەكانیان بۆ چوونە نێو ڕیزی خۆپیشاندانەكان شكستیان هێنا و ئەو قۆناغەش تێپەڕی، ئەوان لەئێستادا بەهیچ شێوەیەك لەلایەن شەقامەوە پەسەندكراو نیین، بۆیە هەر هەوڵێكی تر بخەنەگەڕ بۆ خۆخستنە ڕیزی خۆپیشاندەران، دووچاری شكست دەبنەوە”.

عێراق

پنتاگۆن: هیچ پلانێكمان نییە بۆ كشانەوە لە عیراق

خەڵك – بەشی هەواڵ

دوای ئەوەی زۆرینەی ئەندامانی ئەنجومەنی نوێنەران عیراق دەنگیاندا بە پڕۆژە بڕیارێك كە سەرجەم هێزە بیانییەكان لە عیراق بكشێنەوە، بەڵام وەزارەتی بەرگریی ئەمریكا (پنتاگۆن) ڕایدەگەیەنێت، هیچ پلانێكیان بۆ كشانەوە لە وڵاتەدا نییە.

جۆناسان هۆفمان یاریدەدەری وەزیری بەرگریی ئەمریكا لە لێدوانێكی ڕۆژنامەوانیدا ڕایگەیاند:”پێموایە ڕوونە كە ڕێككەوتنی گشتی لە عیراق ئەوەیە كە هێزەكانی ئەمریكا بە نیازێكی باش لە عیراقن”.

یاریدەدەری وەزیری بەرگریی ئەمریكا ئاماژەیبەوەشداوە، بوونی ئەمریكا لە عیراق “لە قازانجی عیراقە و سەقامگیری و ئاسایشی زیاتر بۆ گەلانی ئە و وڵاتە دەستەبەردەكات”.

جێی ئاماژەیە، ڕۆژی 5/1/2020 ئەنجومەنی نوێنەرانی عیراق جگە لە نوێنەرانی كورد و بەشێك لە سوننەكان، دەنگی لەسەر پڕۆژەبڕیارێك دا بۆ كشانەوەی هێزە بیانییەكان. دەنگدان بە پڕۆژەبڕیارەكەش لەلایەن ئەنجومەنی نوێنەرانی عیراق، دوو ڕۆژ دوای هێرشێكی ئاسمانیی ئەمریكا بوو كە تێیدا قاسم سولەیمانی فەرماندەی فەیلەقی قودس و ئەبومەهدی موهەندیس جێگری سەرۆكی دەستەی حەشدی شەعبی كوژران.

بەردەوام بە لە خوێندنەوە

عێراق

كوژرانی موهەندیس ماڵی شیعە یەكدەخات
پەڕلەمانتارێك: شیعەكان بۆ كاندیدی سەرۆك وەزیران ڕێككەوتوون

خەڵك- بەشی هەواڵ
ئەندامێكی پەڕلەمانی عیراق لە هاوپەیمانی نەسر، كە لەلایەن حەیدەر عەبادییەوە سەرۆكایەتی دەكرێت ئاشكرای دەكات، كە لایەنە شیعەكان لەسەر كەسێك بۆ كاندیدی سەرۆك وەزیران ڕێككەوتوون.

نەدا شاكر جەودەت، پەڕلەمانتاری هاوپەیمانی نەسر بۆ (خەڵك) ئاماژەی بەوەكرد، هێوربوونەوەی دۆخی سیاسی دەربارەی هەڵبژاردن و دیاری كردنی كەسایەتییەك بۆ سەرۆك وەزیران بەهۆی گفتوگۆی لایەنە سیاسیەكانەوەیە بەتایبەتیش دوای كوژرانی ئەبو مەهدی موهەندیس و پێشێل كردنی سەروەری عیراق.

ڕاشیگەیاند، كوشتنی موهەندیس بووە هۆی یەكخستنی ناوماڵی شیعە لەناو پەڕلەمان.

ئاماژەی بەوەشكرد، بەهۆی نزیكبوونەوەی لایەنە سیاسییەكان لەیەكتری دیاری كردنی كەسێك بۆ سەرۆك وەزیران بەخێرایی ئەنجام دەدرێت و لە چەند ڕۆژی داهاتوودا دیاری دەكرێت.

دەربارەی كاندید كردنی عەبدولمەهدی بۆ سەرۆك وەزیران، نەدا شاكر جەودەت وتی، “ئەوە كارێكی نەگونجاوە و شتی لەوجۆرە ڕوونادات، چونكە خۆپیشاندەران حكومەتی ئێستایان ڕەتكردەوە”.

بەردەوام بە لە خوێندنەوە

عێراق

بەرهەم ساڵح: عیراق هەرگیز نابێتە پێگەیەك بۆ دەستدرێژیكردنە سەر وڵاتانی دراوسێ

خەڵك– بەشی هەواڵ

سەرۆك كۆماری عیراق ڕایدەگەیەنێت، عیراق هەرگیز نابێتە پێگەیەك بۆ دەستدرێژیكردنە سەر وڵاتانی دراوسێ یان گۆڕەپانێك بۆ یەكلایی كردنەوەی بەرژەوەندیەكان.

نووسینگەی ڕاگەیاندنی سەرۆكایەتی كۆماری عیراق لە ڕاگەیەنراوێكدا، كە وێنەیەكی دەست (خەڵك) كەوتووە ڕایگەیاندووە، ئەمڕۆ شەممە 18-1-2020 لە كۆشكی سەلام لە بەغدا بەرهەم ساڵح پێشوازی كرد لە ئەیمن سەفدی، وەزیری دەرەوە و كاروباری تاراوگەی ئەردەن و شاندی یاوەری و سەبارەت بە دواپێشهاتەكانی ناوچەكە و جیهان و پرسە هاوبەشەكانی نێوان هەردوو وڵات گفتوگۆ كرا.

لە دیدارەكەدا وەزیری دەرەوەی ئوردن، ڕێز و سڵاوی شاعەبدوڵای دووەم-ی گەیاندە سەرۆك كۆمار، هاوكات پشتیوانی وڵاتەی بۆ ئاسایش و سەقامگیری عیراق وەك بنەمای ڕاگری ئارامی لەناوچەكەدا دووپاتكردەوە، پەیامی شاعەبدوڵای گەیاند، بۆ پرسینی ھەواڵی تەندروستی سەماحەتی سەید سیستانی و هیوای زوو چاكبوونەوەی بۆ خواست.

بەرهەم ساڵح جەختی لە پێویستی بەرجەستەكردنی بنەماكانی ئاشتی و سەقامگیری و دورخستنەوەی جەنگ و ناكۆكییەكان لە ناوچەكەدا كردەوە، كە دەبێتە هۆی لاوازكردنی توانا مرۆیی و مادییەكان، هاوكات تەئكیدی لە پەنابردنە بەر زمانی گفتوگۆی ڕاستەقینە و ڕوون و ئاشكرا بۆ چارەسەركردنی قەیرانەكان كردەوە.

سەرۆك كۆمار ئاماژەی بەوەشكرد، كە عیراق هەرگیز نابێتە پێگەیەك بۆ دەستدرێژیكردنە سەر وڵاتانی دراوسێ یان گۆڕەپانێك بۆ یەك لاییكردنەوەی بەرژەوەندیەكان، و هەوڵیش دەدات ببێتە فاكتەرێكی گرنگ بۆ كۆكردنەوەی برایان و دۆستان، بەجۆرێك خزمەت بە بەرژەوەندییە هاوبەشەكان بكات، ھاوكات ببێتە هۆكاری بەهێزكردنی ئاشتی و ئارامی لە ناوچەكە و جیهاندا.

هەر لەدیدارەكەدا سەرۆك كۆمار تیشكی خستە سەر گرنگی بەرەوپێشبردنی پەیوەندییە دوو قۆڵییەكانی نێوان عیراق و ئەردەن و فراوانكردنی ئاسۆی هاریكاری بەجۆرێك، كە ببێتە هۆكاری كەمكردنەوەی ئاستەنگە ئابوورییەكان.

بەردەوام بە لە خوێندنەوە

کوردستان