ئێمە لە تۆرە کۆمەڵایەتیەکان

کوردستان

پێنج فراكسیۆنی پەڕلەمانی كوردستان دەنگیان بۆ بۆنەی فەرمی توركمانەكان نەدا

خەڵك- ئارام سەردار
بەهۆی دەنگنەدان بە پێشنیازی یاسای (ڕۆژانی بۆنە فەرمییەكانی نەتەوەی توركمان)، ئەمڕۆ سێ شەممە ۱۰ی كانوونی یەكەمی ۲۰۱۹ توركمانەكان ڕەخنەیان لەبەشێك لەلایەنە سیاسیەكان گرت.

محەمەد سەعدەدین، سەرۆكی فڕاكسیۆنی پارتی گەشەپێدانی توركمانی لەكۆنفڕانسێكی ڕۆژنامەوانیدا ڕایگەیاند، بەداخەوە ئەمڕۆ ڕووەبەڕووی شتێكی چاوەڕوان نەكراو بوونەوە، كەوا هەندێ لایەنی سیاسی، كە نزیكەی لە ٤۰٪ی دەنگی پەڕلەمان پێكدەهێنن، دەنگیان بە پێدانی سیفەتی بەپەلە بۆ پێشنیازی یاسای (ڕۆژانی بۆنە فەرمییەكانی نەتەوەی توركمان) نەدا.

دەشڵێت: “ئێمە هەموومان بەیەكەوە لەسەر گۆڕەپانی سیاسی هەرێم كار دەكەین و ڕێككەوتن هەبووە پێشتر لەنێوان هەموو لایەنەكان و ئێمە دەنگمان داوە بۆ ئەو لایەنانە، كەچی ئەمڕۆ بۆ ئەو پێشنیازە دەنگیان نەدا، لەكاتێكدا لەكۆبوونەوەكانیان لەگەڵ ئێمەی توركمان و لەسەر شاشەكان دەڵێن ئێمە لەگەڵ پێكەوەژیانین لەهەرێمی كوردستان”.

ئەوەشی خستەڕوو، “چیتر پێویست ناكات ئەو لایەنانە باس لە پێكەوەژیان بكەن لەگەڵمان، داوای ڕوونكڕدنەوەش لەكەسی یەكەم یاخوود مەكتەب سیاسی ئەو لایەنانە دەكەین رزِونكردنەوە بدەن، كەوا ئەوە هەڵوێستی فەڕمیانە یاخوود فڕاكسیۆنەكەیان”.

ئەمڕۆ خوێندنەوەی یەكەم بۆ پێشنیازی یاسای (ڕۆژانی بۆنە فەرمییەكانی نەتەوەی توركمان)، پێشنیاری پێدانی سیفەتی بەپەلەشی بۆ خرایە دەنگدان، بەڵام تەنها ٥٥ دەنگی هێنا، هەریەكە لە یەكێتی و گۆڕان و یەكگرتوو و كۆمەڵ و نەوەی نوێ دەنگیان پێ نەدا.

Posted by Xelk Media Network on Tuesday, December 10, 2019

کوردستان

خەڵك؛ ژمارەی حاجییان ئاشكرادەكات
سبەینێ‌ تیروپشك بۆ ناوى حاجيیانی ئەمساڵ دەكرێت

خەڵك- بەشی هەواڵ
وەزارەتی ئەوقاف و كاروباری ئایینی حكومەتی هەرێمی كوردستان ئاشكرای دەكات، كە سبەینێ‌ تیروپشك بۆ حاجییانی ئەمساڵ (2020) ئەنجام دەدرێت و دەشڵێت: “پشكی هەرێم 4 هەزار و 500 حاجییە”.

نەبەز ئیسماعیل، وتەبێژی وەزارەتی ئەوقاف و كاروباری ئایینی هەرێم بۆ (خەڵك) ئاماژەی بەوەكرد، “بەپشتیوانی خوای گەورە سبەینێ‌ یەك شەممە ١٩⁄ ١⁄ ٢٠٢٠ لەدیوانی وەزارەتی ئەوقاف و كاروباری ئایینی بەئامادەبوونی دادوەران و لایەنی پەیوەندیدار، تیروپشك بۆ ناوی حاجییان بۆ ئەمساڵ ٢٠٢٠ ئەنجام دەدرێت”.

ڕاشیگەیاند، لە ساڵی 2017 دا 86 هەزار كەس ناوی نووسی بۆ ئەنجامدانی فەریزەی حەج و لەو ساڵەدا تیروپشك بۆ ناوی حاجییان بۆ ساڵەكانی (2017 و 2018 و 2019) ئەنجام درا.

ئاشكراشی كرد، ئەو ناوانەی لای ئێمە ماون و حەجیان ئەنجام نەداوە 72 هەزار و 202 كەسن و داوای ئەنجامدانی فەریزەی حەج دەكەن، بۆیە تیروپشكیان بۆ دەكرێت و بۆ ئەمەش ناوی 4 هەزار و 500 كەس ڕادەكێشرێت بۆ ئەوەی لەمساڵدا فەریزەی حەج ئەنجام بدەن.

أ.ح

بەردەوام بە لە خوێندنەوە

کوردستان

نیوەی پەیڕەوی ناوخۆی یەكێتی هەموار كراوەتەوە

خەڵك – بەشی هەواڵ
سەرۆكی لیژنەی هەمواری پەیڕەوی ناوخۆی یەكێتیی نیشتمانیی كوردستان ڕایدەگەیەنێت، تا ئێستا سێ كۆبوونەوەمان كردووە و لە 45%ی هەمواری پەیڕەو تەواو بووە و زۆرینە لەسەر هەموارەكە هاوڕان، دەشڵێت: “ئەمڕۆ دوای 6 كاتژمێر كۆبوونەوە، گەیشتینە پرسی میكانیزم و دەسەڵات و هەڵبژاردنی سەرۆك و بەیانی كارەكانی تەواو دەكرێت”.

فەرید ئەسەسەرد، سەرۆكی لیژنەی هەمواری پەیڕەوی ناوخۆی یەكێتی بە(خەڵك)ی ڕاگەیاند، لە كاتی دەستبەكاربوونمان بۆ هەمواری پەیڕەوی ناوخۆی یەكێتی سێ كۆبوونەوە كراوە، بە ئامادەبوونی زۆرینەی ئەندامان ئەمڕۆش بۆ ماوەی 6 كاتژمێر كۆبووینەوە.

وتیشی، “لە 45%ی كارەكانی هەمواری پەیڕەوی ناوخۆ تەواو بووە، هیچ كێشەیەك نییە و لە 95%ی بابەتەكان كۆدەنگی لەسەرە و 5%ی ئێمە بڕیارمان لەسەر نەداوە، بۆیە دەیبەینەوە بۆ كۆبوونەوەی ئەنجوومەنی سەركردایەتی گشتی لەوێ یەكلادەبێتەوە”.

ڕاشیگەیاند، ئەمڕۆ لەسەر بڕگەی سەرۆك یان سكرتێر كارەكانمان ڕاگرت بۆ سبەینێ، كە بەیانی كۆبووینەوە دەسەڵات و شێوازی هەڵبژاردنی سەرۆك هەموار دەكەینەوە.

ئەسەسەرد جەختیشی كردەوە، كە پەیڕەوەكە هەموار دەكەینەوە بۆ یەكێتی و هیچ پۆستێك لە باڵای كەسدا داناتاشین.

لیژنەی هەمواری پەیڕەوی ناوخۆی یەكێتیی نیشتمانیی كوردستان لە 20 كەس پێكهاتوون، كە بڕیارە لەماوەی 10 ڕۆژدا سەرجەم كارەكانی پەیوەست بە هەمواركردنەوەی پەیڕەوی ناوخۆ ئەنجام بدەن و ڕەوانەی ئەنجوومەنی سەركردایەتی گشتی بكرێت بۆ گفتوگۆ و دەنگدان لەسەر هەمواری پەیڕەوی ناوخۆ و دواجار پەسەند كردنی.
چ.ئ

بەردەوام بە لە خوێندنەوە

کوردستان

كۆسرەت ڕەسوڵ و كونسوڵی ئەمریكا لە هەرێم كۆبوونەوە

خەڵك – بەشی هەواڵ
سەرۆكی ئەنجوومەنی باڵای سیاسی و بەرژەوەندی یەكێتی پێشوازی لە كونسوڵی گشتی ئەمریكا لە هەرێمی كوردستان كرد و گفتوگۆ لەبارەی پەیوەندییەكانی نێوان هەرێم و ئەمریكا كرا.

كۆسرەت ڕەسوڵ عەلی، سەرۆكی ئەنجوومەنی باڵای سیاسی و بەرژەوەندی یەكێتیی نیشتمانیی كوردستان ئێوارەی ئەمڕۆ شەممە ١٨/١/٢٠٢٠ لەشاری هەولێر پێشوازی لە ستیف فەیگن، كونسوڵی گشتی ئەمریكا لە هەرێمی كوردستان كرد و گفتوگۆ لەبارەی پەیوەندییەكانی نێوان هەرێم و ئەمریكا كرا.

بەپێی ڕاگەیەنراوی نووسینگەی كۆسرەت ڕەسوڵ، “هەردوولا هاوڕابوون لەسەر پەرەپێدانی زیاتری پەیوەندییەكان و هەماهەنگی زیاتر لەنێوان هەردوولا، سوپاسی ئەمریكا و وڵاتانی هاوپەیمانی كرد، كە هەمیشە هاوكار و پشتیوانی كورد بوون”.

‎بەشێكی دیكەی كۆبوونەوەكە گفتوگۆكردن بوو لەبارەی دۆخی كوردستان و هەنگاوەكانی چاكسازی لەنێو هێزی پێشمەرگە، هەردوولا گفتوگۆی وردیان كرد لەبارەی هەنگاوەكانی چاكسازی و جەختیان لەوە كردەوە، كە دەبێ هەنگاوی جدی بنرێ بۆ ئەم پڕۆسەیە و پشتیوانی خۆیان بۆ دووپاتكردەوە.

هەر بەپێی ڕاگەیەنراوەكە، “‎پەیوەندییەكانی نێوان هەرێم و بەغدا تەوەرێكی دیكەی دیدارەكە بووە، كە هەریەك لە كۆسرەت ڕەسوڵ و كونسوڵی ئەمریكا لە هەرێم هاوڕابوون، كە گفتوگۆ ببێتە بنەمای كاركردنی نێوان هەرێم و بەغدا و سەرجەم كێشەكان بەگفتوگۆ و لە چوارچێوەی دەستوور چارەسەر بكرێن، كە لە هەموو كات زیاتر پێویستە كورد یەكدەنگ و یەكگوتارو یەكگرتوو بێ”.

بەردەوام بە لە خوێندنەوە

کوردستان