ئێمە لە تۆرە کۆمەڵایەتیەکان

عێراق

سەرۆكایەتی هەرێم: ئەو كوشتارەی بەرامبەر خۆپیشاندەرانی بەغدا دەكرێت تاوانی بێ پاساون

خەڵك – بەشی هەواڵ

سەرۆكایەتیی هەرێمی كوردستان ڕاگەیەنراوێكی لەبارەی دۆخی خۆپیشاندانەكانی عیراق و ئەو گرژییەی شەوی ڕابردوو لە بەغدا دروستبوو بڵاوكردەوە و ڕایدەگەیەنێت “ئەو كوشتارەی بەرامبەر بە خۆپیشاندەرانی سڤیل لە پردی سنەك و گۆڕپانی خللانی لە بەغدا كرا، تاوانی بێ پاساون”.

سەرۆكایەتیی هەرێمی كوردستان لە ڕاگەیەنراوەكەدا، بە نیگەرانییەكی زۆرەوە لە بەردەوامیی ڕووداو و توندوتیژییەكانی بەغدا و پارێزگاكانی تری عیراق دەڕوانێت و ڕایدەگەیەنێت “لە كاتێكدا پرسە و سەرەخۆشیی قووڵمان ئاڕاستەی كەسوكاری قوربانییان دەكەین و هاوخەمیانین، هیوای زوو چاكبوونەوەش‌ بۆ برینداران دەخوازین، دووپاتی دەكەینەوە كە خۆپیشاندانی ئاشتییانە و سڤیل، مافێكی دەستووریی ڕەوا و پارێزراوە و بە هیچ شێوەیەك قبوڵكراو نییە”.

جێی ئاماژەیە، شەوی ڕابردوو ژمارەیەك چەكداری دەمامكدار لە گۆڕەپانی تەحریری شاری بەغدا تەقەیان لە خۆپیشاندەران كرد و لە ئەنجامدا 16 كەس گیانیان لەدەستدا و زیاتر لە 50 كەسی تریش برینداربوون.

دەقی ڕاگەیەندراوەكەی سەرۆكایەتیی هەرێمی كوردستان..

بە نیگەرانییەكی زۆرەوە لە بەردەوامیی رووداو و توندوتیژییەكانی بەغدا و پارێزگاكانی دیكەی عێراق دەڕوانین. ئەو كوشتارەی بەرامبەر بە خۆپیشاندەرانی سڤیل لە پردی سنەك و گۆڕپانی خللانی لە بەغدا كرا، تاوانی بێ پاساون و تاوانكاران هەر كێ و لە هەر لایەنێكەوە بن، دامودەزگا و لایەنە بەرپرسەكانی عێراق دەبێ بیاندۆزنەوە و بەپێی یاسا مامەڵەیان لەگەڵدا بكرێت.

لە كاتێكدا پرسە و سەرەخۆشیی قووڵمان ئاراستەی كەسوكاری قوربانییان دەكەین و هاوخەمیانین، هیوای زوو چاكبوونەوەش‌ بۆ برینداران دەخوازین، دووپاتی دەكەینەوە كە خۆپیشاندانی ئاشتیانە و سڤیل، مافێكی دەستووریی ڕەوا و پارێزراوە و بە هیچ شێوەیەك قبووڵكراو نییە ئەو زێدەڕۆییە لە توندوتیژی‌ بەرانبەر بە خۆپیشاندەر‌ان بەكار بێت و بكرێنە ئامانجی دەستڕێژ و هێرشی لەوجۆرە.

ئەركی هەموو لایەكە بە گیانێكی نیشتمانیی بەرپرسیارانەوە، مامەڵە لەگەڵ دۆخەكەدا بكەن تاكو لە دەست دەرنەچێت و پێشهاتی ترسناكتر ڕوونەدەن، چیتریش خوێن نەڕژێت و هەمووان لە چوارچێوەی یاسادا بجووڵێنەوە.

سەرۆكایەتیی هەرێمی كوردستان

7/12/2019

عێراق

عادل عەبدولمەهدی‌ هۆشداری‌ دەدات

خەڵك – بەشی هەواڵ

سەرۆك وەزیرانی‌ دەستلەكاركێشاوەی عیراق ڕایدەگەیەنێت، نابێت بە هیچ شێوەیەك هێرش بكرێتەسەر نوێنەرایەتییە دیپلۆماتییەكان، هۆشداریشیدا لەوەی‌ بە ئامانجكردنی‌ باڵیۆزخانەی‌ ئەمریكا دەرەنجامی‌ خراپی‌ بۆ عیراق دەبێت.

عادل عەبدولمەهدی سەرۆك وەزیرانی دەستلەكاركێشاوەی عیراق لە ڕاگەیەنراوێكدا سەبارەت بە مووشەكبارانكردنی ناوچەی سەوز و باڵیۆزخانەی ئەمریكا لە بەغدا، نیگەرانیی سەبارەت بە پێشێلكردنی سەروەریی عیراق و زیانگەیاندن بە نێردە دیپلۆماتییەكان دەربڕی.

عەبدولمەهدی ئاماژەبەوەدەكات: “فەرمان كراوە بە بڵاوەكردنەوەی‌ هێزە ئەمنییەكان تا دەستبكەن بە پشكنین بۆ ڕێگرتن لە دووبارەبوونەوەی ئەو دەستدرێژییانە”.

سەرۆك وەزیرانی دەستلەكاركێشاوەی عیراق ئەوەشیخستەڕوو: “حكومەت پابەندە بە پاراستنی سەرجەم نێردە دیپلۆماتییەكانی وڵاتان لە خاكی عیراقدا و نابێت بە هیچ شێوەیەك هێرش بكرێتەسەر نوێنەرایەتییە دیپلۆماتییەكان”.

عادل عەبدولمەهدی هۆشداریدا لە هێرشكردنە سەر نێردە دیپلۆماتییەكانی وڵاتان و مووشەكبارانكردنیان و ڕایگەیاند:”ئەو جۆرە كارانە مەترسیی گەورەی بۆسەر عیراق هەیە و وڵات دەكاتە گۆڕەپانی شەڕ، بەتایبەت لەكاتێكدا كە حكومەت دەستیكردووە بە گرتنەبەری ڕێوشوێنەكان بۆ جێبەجێكردنی بڕیارەكەی ئەنجومەنی نوێنەران تایبەت بە دەركردنی هێزە بیانییەكان لە عیراقدا”.

ئەمەش لەكاتێكدایە، شانەی ڕاگەیاندنی ئەمنی عیراقی لە ڕاگەیەنراوێكدا ئاشكرایكرد، ئێوارەی ئەمڕۆ یەكشەممە پێنج مووشەكی جۆری كاتیۆشا ئاڕاستەی ناوچەی سەوز لە بەغدا كراون و هێرشەكە هیچ زیانێكی بەدواوە نەبووە، هەروەها بەهۆی ئەو مووشەكانەوە باڵیۆزخانەی ئەمریكا زەنگی ئاگاداركردنەوەی لێداوە.
ك.ج

بەردەوام بە لە خوێندنەوە

عێراق

هاوپەیمانی نێودەوڵەتی: ئۆپراسیۆنەكانمان دژ بە داعش لە عیراق ڕاگیراون

خەڵك – بەشی هەواڵ

وتەبێژی ئۆپەراسیۆنە هاوبەشەكانی هاوپەیمانیی نێودەوڵەتیی دژ بە داعش ڕایدەگەیەنێت: “ئۆپراسیۆنەكانمان دژ بە داعش لەمكاتەدا ڕاگیراون، بەڵام لەكاتێكدا ڕاگیراون كە ئێمە هێشتا پەیوەندیی نزیكمان لەگەڵ هێزە ئەمنییە عیراقییە هاوبەشەكانمان هەیە”.

مایڵز كاگینز وتەبێژی ئۆپەراسیۆنە هاوبەشەكانی هاوپەیمانیی نێودەوڵەتیی دژ بە داعش ڕایگەیاند:”ئۆپراسیۆنە سەربازییەكانی دژ بە داعش راگیراون و هاوپەیمانی ئۆپراسیۆنی سەربازی دژ بە داعش لە دەرەوەی بنكە سەربازییەكان ئەنجام نادات و كاری لەپێشینەی ئێمە پاراستنی هێزە سەربازییەكانمانە. ئێمە ئاستی بەرگریكردن لە بنكەكاندا بەرزتر دەكەینەوە. دیواری كۆنكرێتی زیاتر و هەندێك بابەتی تر كە ئاسایشی ئێمە لەو هەڕەشانەی ماوەی ڕابردوو و هەڕەشە مووشەكییەكان بپارێزێت. هاوپەیمانیی نێودەوڵەتی پلانی نییە هێزی سەربازی زیاتر بهێنێت یان بەشێوەیەكی گەورە جووڵە بە هێزەكانی لە عیراق بكات”.

مایڵز كاگینز لەبارەی هێزەكانیان لە ڕۆژئاوای كوردستان ئەوەیخستەڕوو:”هێزەكانی هاوپەیمانان لەگەڵ هێزەكانی سوریای دیموكرات (هەسەدە) هاوبەشن. ئەركی سەرەكیمان تێكشكاندنی چەكدارە هەڵاتووەكانی داعشە، هەروەها ئێمە لەوێین تا بەرگری لە نەوتەكە بكەین. نەوتەكە بۆ (هەسەدە) گرنگە تا خەرجیی ئەركەكانیان دابینبكەن و بتوانن خەرجیی پڕۆسەكانی هێشتنەوەی زیاتر لە 10 هەزار ئەندامی دەستگیركراوی داعش دابین بكەن”.

ك.ج

بەردەوام بە لە خوێندنەوە

عێراق

بەغدا.. پێنج مووشەك ئاڕاستەی ناوچەی سەوز كران

خەڵك – بەشی هەواڵ

شانەی ڕاگەیاندنی ئەمنی عیراقی بڵاویكردەوە، پێنج مووشەكی كاتیۆشا لە ناوچەی سەوزی بەغدا كەوتوونەتە خوارەوە.

شانەی ڕاگەیاندنی ئەمنی عیراقی لە ڕاگەیەنراوێكدا ئاشكرایكرد، ئێوارەی ئەمڕۆ یەكشەممە پێنج مووشەكی جۆری كاتیۆشا ئاڕاستەی ناوچەی سەوز لە بەغدا كراون.

شانەی ڕاگەیاندنی ئەمنی عیراقی ئەوەشیخستووەتەڕوو، هێرشەكە هیچ زیانێكی بەدواوە نەبووە، هەروەها بەهۆی ئەو مووشەكانەوە باڵیۆزخانەی ئەمریكا لە بەغدا زەنگی ئاگاداركردنەوەی لێداوە.

ك.ج

بەردەوام بە لە خوێندنەوە

کوردستان