ئێمە لە تۆرە کۆمەڵایەتیەکان

ڕاپۆرت و شیکاری

پێش مێسی و دوای مێسی، چی لە بەرشلۆنە گۆڕا و چەند نازناویان بەدەستهێنا؟


خەڵک سپۆرت

کاتێک داتا و ژمارەکان کۆدەکەینەوە، بۆمان دەردەکەوێت لەدوای پەیوەندیکردنی مێسی بە پێکهاتەی یەکەمی بەرشلۆنەوە یانەکە لەسەر ئاستی خەڵات و نازناوەکان گۆڕانکاری گەورەی بەسەرهاتووە، بەتەنها لەسەردەمی ئەفسانە ئەرجەنتینیەکەدا (١٠) نازناوی خولی ناوخۆ و شەش نازناوی جامی شای ئیسپانیا و چوار چامپیۆنز لیگیان لەمێژووی یانەکەدا تۆمار کردووە.

هەوادارانی “بلاوگرانا” قورسە بەلایانەوە بەبێ مێسی بیر لە یانەکەیان بکەنەوە، هۆکارەکەش ئەوەیە کە ئەم یاریزانە لە ١٦ی ئۆکتۆبەری ٢٠٠٤وە مێژووی یانەکەی بە ئاڕاستەیەکی تردا بردووە و چەندین خەڵاتی بەکۆمەڵ و تاکە کەسی خستۆتە هەگبەی نازناوەکانی خۆیی و یانە مێژووییەکەوە.

بۆ یەکەم جار لیۆ لە وەرزی ٢٠٠٤/٢٠٠٥ درێسی بارسای لەسەردەمی فرانک ڕایکاردی هۆڵەندیدا پۆشی، لەو وەرزەدا تەنها لە شەش ڕووبەروبونەوەدا بەشێوەی سەرەکی بەشداری کرد و دەرکەوت جادوی پێیەکانی بۆ داهاتوو کاریگەری زیاتری دەبێت، لەو وەرزەدا نازناوی خولی ناوخۆی ئیسپانیایان “لالیگا” بەدەست هێنا کە لە وەرزی ١٩٩٨/١٩٩٩وە بەدەستیان نەهێنابوو، هەروەها لەوەرزی ٢٠٠٥/٢٠٠٦ نازناوی خولی یانە پاڵەوانەکانیان بەدەستهێنا کە لە وەرزی ١٩٩١/١٩٩٢ توانیبویان تاکە نازناوێک بەدەست بهێنن.

ئێستا و ڕابردوو

بەدرێژایی مێژووی تۆپی پێی ئیسپانیا، بەرشلۆنە خاوەنی ٢٦ نازناوی “لالیگا”یە و (١٠) نازناوی لەسەردەمی مێسیدا تۆمارکراوە، هەروەها خاوەنی پێنج نازناوی خولی یانە پاڵەوانەکانن کە چواریان بەهەمان شێوە لەسەردەمی لیۆدا بووە (٢٠٠٥/٢٠٠٦، ٢٠٠٨/٢٠٠٩، ٢٠١٠/٢٠١١، ٢٠١٤/٢٠١٥)، لەکۆی (٣٠) نازناوی “کۆپا دێل رێ” شەش نازناویان بەهەمان شێوە لەسەردەمی “پوڵگا”دا چنراوەتەوە.

لەپێش سەردەمی “پوڵگا” ئەستێرەکانی بەرشلۆنە لە پێنج بۆنەدا خەڵاتی باشترین یاریزانی جیهانیان بەدەستهێناوە (کرۆیف دووجار ١٩٧٣ و ١٩٧٤، ڕیڤاڵدۆ ١٩٩٩، ستۆیچکۆڤ ١٩٩٤، لویس سوارێز ١٩٦٠)، بەڵام لەدوای دەرکەوتنی مێسی بۆ یەکەم جار ڕۆناڵدینیۆ لەساڵی ٢٠٠٥ بەدەستی هێناوە و لەدەوای ئەو وادەیە مێسی ڕێژەیەی نازناوە تاکە کەسیەکانی یاریزانانی بارسای بۆ ١٢ بەرز کردۆتەوە، کە کۆتاییەکەی باڵۆندۆری(٢٠١٩) بوو.

بەپێی هەژماری کۆتایی داتا و ژمارەکانی لالیگا و چامپیۆنز لیگ و کۆپا و خەڵاتە تاکە کەسیەکان دەردەکەوێت، لەسەردەمی مێسی یانەی بەرشلۆنە هێندەی ٤٥ ساڵی سەردەمی ڕابردووی یانە کەتەلۆنیەکە نازناوی کۆکردۆتەوە.

ڕاپۆرت و شیکاری

کریستیانۆ دەگەڕێتەوە بۆ ڕیاڵ مەدرید؟ گواستنەوەکە مەحاڵ نییە و کێشە لەبیرکردنەوەی یاریزانەکەدایە


خەڵک سپۆرت

ماوەیەکە دەنگۆی گەڕانەوەی کریستیانۆ ڕۆناڵدۆی پورتوگالی لە یانەی یوڤانتۆسی ئیتاڵییەوە بۆ ڕیاڵ مەدریدی ئیسپانی بەهێزبووە، سەرچاوەکان پێیان وایە گەڕانەوەی ئەفسانە پرتوگالییەکە بۆ مەدرید جوڵەیەکی مەحاڵ نییە.

کریستیانۆ لە هاوینی ٢٠١٨وە یانەی ڕیاڵ مەدریدی بەجێهیشتووە و پاش چنینەوەی چەندین نازناو و دەستکەوتی بەکۆمەڵ و تاکە کەسی لەئێستادا خەون دەبینێت لە ئیتاڵیا هەمان ئەو دەستکەوتانە بچنێتەوە.

خواستی جەمسەرەکان

ڕۆژنامەی “کۆرێری دێلۆ سپۆرت”ی ئیتاڵی ئاشکرای کردووە، کە گواستنەوەی کریستیانۆ ڕۆناڵدۆ لە یانەی یوڤانتۆسەوە بۆ ڕیاڵ مەدرید مەحاڵ نییە.

چەندینجار ئادو ئاگێری ڕۆژنامەوانی مەدریدی و هاوڕێی نزیکی ئەفسانە پورتوگالییەکە ڕایگەیاندووە، کە کریس خەون دەبینێت دووبارە بگەڕێتەوە بۆ ڕیاڵ مەدرید، هەروەها کات و وادەی گواستنەوەکانی هاوینەی ٢٠٢٠ی بە گونجاو وەسفکردووە بۆ کۆتاییهێنان بەم پڕۆسەیە.

ئاگێری ڕایگەیاندووە :” هیچ شتێک لەبواری تۆپی پێدا مەحاڵ نییە، بەڵکو کریستیانۆ لە کۆتا کلاسیکۆدا بەگەڕانەوەی بۆ مەدرید پەیامێکی ئاڕاستەی ئیدارەی ڕیاڵ و هاندەرانی کرد، خەون دەبینێت بگەڕێتەوە و دۆخەکەش لەبارە بۆ ئیمزاکردنی بۆندەکەی، بەو مەرجەی یاریزانەکە و ئیدارەی ڕیاڵ ئامادەبن بۆ ئەم جوڵە مێژووییە”.

ڕووە داراییەکان

لەڕووی داراییەوە کریستیانۆ بەتەنها لەم وەرزەدا بڕی (٥٨) ملیۆن یورۆ لەڕێگەی سپۆنسەرەکانی و سپۆنسەرەکانی یانەی یوڤانتۆسەوە داهاتی هەبووە.

ئەگەر ئەم ڕێژەیەش لەگەڵ بڕی (٣٢) ملیۆنی موچەکەیدا یەکبخرێت (٩٠) ملیۆن یورۆ دەکات، ئەوەش ئەو نرخەیە کە یانەی شاهانە دەبێت پێشکەشی یاریزانەکەی بکات، یاخود زیاتر پێشکەشبکات ئەگەر بیەوێت لە چنگی یانەی یوڤانتۆس دەریبکەن.

بیرکردنەوەی کریستیانۆ

ئادو ئاگێری هاوڕێی کریستیانۆ دەڵێت :” کریستیانۆ لەو یاریزانانەیە کە لە یانەی ڕیاڵ مەدرید سەدان دەستکەوت و نازناوی بەدەستهێناوە، ئێستا دەیەوێت هەمان شت لە یوڤانتۆس دووبارە بکاتەوە، کێشەکە ئەوەیە ئەم یاریزانە لە جۆرە یاریزانانەیە کە لە نیوە ڕێگادا دەستبەرداری خەونەکانی نابێت، بەڵكو دەیگەیەنێتە ئەنجام پاشان هەنگاو دەنێت”.

بەپێی ووتەکانی ئاگێری، کریستیانۆ خەونی چنینەوەی نازناوی خولی یانە پاڵەوانەکانی ئەوروپا و خەڵاتە تاکە کەسییەکانی وەک زە بێست و بالۆن دۆرە بەدرێسی یانەی یوڤانتۆسەوە.

بۆیە قورسە بە ئاسانی و لە کۆتایی ئەم وەرزەدا بگەڕێتەوە بۆ مەدرید و لە نیوە ڕێگا یانەی یوڤانتۆس بەجێبهێڵێت.

هەروەها یانەی یوڤانتۆسیش خواستی لەسەر گواستنەوەی نییە، چونکە بەهۆیەوە سەدان ملیۆن دۆلار سودی داراییان کردووە و مەحاڵە بتوانن یاریزانێک بەو کێشە وەرزشیی و داراییەوە دابین بکەن، بۆیە چاودیڕی دۆخەکە دەکەن و لەهەر ساتێکدابێت دەرگا بەڕووی یانەی ڕیاڵ مەدرید دادەخەن.

بەردەوام بە لە خوێندنەوە

ڕاپۆرت و شیکاری

کێ توشی کۆرۆنا بووە؟ ئەو یاریزان و ڕاهێنەرانەی خراونەتە ژێر چاودێری پزیشکییەوە


خەڵک سپۆرت

ڤایرۆسی کۆرۆنا لەوڵاتی چینەوە ڕووەو کیشوەری ئەوروپا جوڵەی کردووە و ماوەی مانگێکە وڵاتانی کیشوەری پیر بەدەست ڕێژەی توشبووانەوە دەناڵێنن.

بوارە وەرزشییەکان بەتایبەت تۆپی پێ یەکێکە لەو بوارانەی زیانی بازرگانی گەورەی بەرکەوتووە، بەوپێیەی چەندین خول و پاڵەوانێتی لەترسی تەشەنەکردنی زیاتری ڤایرۆسی کۆرۆنا ڕاگیراون و تەنانەت باس لە دواخستن و هەژمارنەکردنی ئەنجامەکانی ئەم وەرزە دەکرێت.

لەهەفتەی ڕابردوو بۆ کۆتاییەکانی ئەم هەفتەیە، چەندین یاریزان و ڕاهێنەر و کەسایەتی لە یانەکانی ئەوروپا توشی ڤایرۆسە کوشندەکە بوون و چەندین یانە و یاریزانیش خراونەتە کەرەنتینەوە.

کام خولانە ڕاگیراون؟

سەرجەم خولە ئەوروپییەکان لەنمونەی چامپیۆنزلیگ و یوروپا لیگ، هەروەها خولە ناوخۆییەکانی ئینگلتەرا، ئیسپانیا، فەرەنسا، ئەڵمانیا، ئیتاڵیا پەکیانکەوتووە و ڕاگیراون.

هەندێک لە خولەکان لەنمونەی بۆندزلیگی ئەڵمانیا ئاماژە بە دەستپێکردنەوەی یارییەکان دەکەن لەسەرەتای مانگی داهاتوو، لە خولی ئیسپانیاش ماوەی دوو هەفتە دیاریکراوە و لە خولەکانی دیکەش کاتێک دیارینەکراوە.

کام یاریزانانە توشبوون؟

دانێلی ڕوگانی بەرگریکاری یانەی یوڤانتۆس، مانۆلۆ گابیادینی یاریزانی یانەی سامپدۆریا و چوار یاریزانی دیکەی ئەو یانەیە کە پێکهاتوون لە: عومەر کولی، ئالبی ئاکدال، ئانتۆنیۆ لاگۆمینا، مۆرتن تۆرسبی  لە یانەی فیورنتیناش دوسان ڤلاهۆڤیچی سڕبی توشی ڤایرۆسی کۆرۆنا بوون.

لە ئەڵمانیا سێ یاریزانی یانەی هانۆڤەر کە لە خولی پلە دوو یاریی دەکات، بەهەمان شێوە تێستەکانیان پۆزەتیڤ دەرچووە.

لە ئیسپانیا یاریزانێکی باسکەی یانەی ڕیاڵ مەدرید و مارتن ئۆرتیگای بەڕێوەبەری یانەی لیگانێس، بەڵام لە خولی ئینگلتەرا بارودۆخەکە هاوشێوەی ئیتاڵیا بەشێوەیەکی کتوپڕ قورسبوو.

مایکڵ ئارتێتا ڕاهێنەری ئارسیناڵ و هۆدسۆن ئۆدۆی یاریزانی چێڵسی و دەنگۆی توشبوونی چەندین یاریزانی دیکەش هەیە، کە لەچەند کاتژمێری داهاتوودا یەکلایی دەبێتەوە.

ئەو یانانەی چالاکییەکانیان وەستاندووە

یانەکانی لیڤەرپوڵ، ڕیاڵ مەدرید، بەرشلۆنە، فیۆرنتینا، سامپدۆریا، ئینتەرمیلان، یوڤانتۆس چالاکییەکانیان بەفەرمی وەستاندووە، نەک هەر ئەوە، بەڵکو یانەکانی ڕیاڵ مەدرید و یوڤانتۆس و ئینتەرمیلان یاریزنانیان خستۆتە کەرەنتینەوە، یانەکانی (NBA) ئەمریکاش بەهەمان شێوە چالاکییەکانیان ڕاگرت بەتایبەت دوای توشبوونی گۆبێرتی یاریزانی فەرەنسی تیمی یوتاجاز.

وەرزشەکانی تر

هەردوو جەولەی یەکەمی پێشبڕکێی جیهانی فۆرمولا ١ دواخراون، خولی یانە پیشەگەرەکانی ئەمریکاش بەهەمان شێوە بۆ ماوەی ٣٠ ڕۆژ چالاکییەکانیان وەستاندووە.

خولەکانی تێنسی سەرزەوی ئیندیانا وێلس و مەیامی و چەندین خول و پاڵەوانێتی تر لەو بوارەشدا ڕاگیراون.

بەردەوام بە لە خوێندنەوە

ڕاپۆرت و شیکاری

بەهۆی چوار کێشەی هونەرییەوە ئەگەر هەیە لیڤەرپوڵ لە چامپیۆنزلیگ شکستبهێنێت


خەكڵژ سپۆرت

لیڤەرپوڵ لەم وەرزەدا بەجیاوازییەکی زۆرەوە پیش ڕکابەرانی کەوتووە و نزیکە لە چنینەوەی نازناوی خولی ئینگلتەرا لەدوای ٣٠ ساڵ دابڕان لە نازناوەکە، بەڵام لە کۆتا ڕووبەڕوبونەوەکاندا بەشێوەیەکی چاوەڕواننەکراو دۆڕاندنیان تۆمارکردووە.

یانەی لیڤەرپوڵ دوای تۆمارکردنی زنجیرەیەک بردنەوەی لەسەریەک، لە رووبەڕوبونەوەکانی ئەتلەتیکۆ مەدرید، واتفۆرد، چێڵسی بەشێوەیەکی چاوەڕواننەکراو دۆڕاندنی تۆمارکرد، میدیاکانی بەریتانیا چاوەڕوان دەکەن ئەمڕۆ یانە ئینگلیزییەکە بگەڕێتەوە و ئاستەنگییەکان تێپەڕینێت.

ڕۆژنامەی “موندۆ دیپۆرتییڤۆ”ی ئیسپانی شرۆڤەی کێشەکانی یانەی لیڤەرپوڵ دەکات لە چوار کۆتا ڕووبەڕوبونەوەدا و دووپاتیدەکاتەوە، پێکهاتەکەی یۆرگن کلۆپ ڕووبەڕوی چوار کێشەی تاکتیکی ووەرزشیی بووەتەوە، پێکهاتوون لە:

لاوازبوونی بەرگری

لەڕووی هونەرییەوە سیستمی بەرگری یانە سورەکە تێکچووە، هێڵی بەرگری پێکهاتون لە ڤان دایک و ئاڕنۆڵد و ڕۆبێرتسۆن هاوشێوەی سەرەتاکانی وەرز کارانییە، چەندین هەڵەی گەورەیان لە پێدانی مەوداکانی یاریکردن بەڕکابەران و شێوە وەستانیاندا ئەنجامداوە، پێناچێت بەباشی گوێڕایەڵی وردەکارییە تاکتیکیەکانبن.

ناهاوسەنگی هێڵی ناوەند

بەهۆی پێکانی جۆردان هێندرسۆنەوە ناوەندی بەرگری تۆکمەیی لەدەستداوە و لە بونیادنانی هێرشەکانیشدا لاوازبوون، چاوەڕوان ناکرێت بەم نزیکانە ئەستێرەکە بگەڕێتەوە، چارەسەریش لەبەردەستی کلۆپە بۆ بەکارخستنی یاریزانێک بەهەمان خەسلەت لەپێگەکەیدا.

لاوازبوونی باتری

شێوازی لیڤەرپوڵ دینامیکییەکی خێرای پێوە دیارە و لەسەرەتای وەرزەوە تائێستا پێکهاتەکە لە ماندوبووندایە، لەکۆتا ڕووبەڕوبونەوەکاندا باتری وزەی یاریزانان لاوازبووە، ئەوەش کاریکردۆتە سەر سیستمی یاریکردنی پێکهاتەکە بەگشتی.

نەزۆکی هێرشبەریی

لە کۆی چوار ڕووبەڕوبونەوەی کۆتایی لیڤەرپوڵدا هێرشبەران لە سێ ڕووبەڕوبونەوەدا گۆڵیان تۆمار نەکردووە، ئەوەش ماوەی ساڵێکی تەواوە ڕووینەداوە، لەداهاتوودا پێویستە کلۆپ سیانەی هێرشبەری بەخەبەربهێنێتەوە.

بەردەوام بە لە خوێندنەوە

کوردستان