ئێمە لە تۆرە کۆمەڵایەتیەکان

جیهانی

کریستیانۆ بێدەنگی شکاند هۆکارەکانی ئاڵوگۆڕکردنی لە دوو یاریی یوڤانتۆس ئاشکرا کرد !

خەڵک سپۆرت

بۆ یەکەم جار لەدوای ئاڵوگۆڕکردنی بەرامبەر یانەکانی لۆکۆمۆتیڤ مۆسکۆ و میلان، کریستیانۆ ڕۆناڵدۆی پورتوگالی ڕاستییەکان ئاشکرا دەکات.

لە دوو ڕووبەروبونەوەی کۆتایی یانەی یوڤانتۆس بەرامبەر لۆکۆمۆتیڤ مۆسکۆ لە خولی یانە پاڵەوانەکانی ئەوروپا و بەرامبەر یانەی ئەی سی میلان لە چوارچێوەی ململانێکانی خولی ناوخۆی ئیتاڵیا، ماوریزیۆ ساری ڕاهێنەر دووجار لەسەریەک کریستیانۆ ڕۆناڵدۆی ئەفسانەی یانەی هێنایە دەرەوەی یاریگا و بە یاریزانە یەدەگەکان پێگەکەی پڕکردەوە، ئەوەش نیگەرانی یاریزانە ناودارەکەی پورتوگالی لێکەوتەوە و بابەتەکە لەڕێگەی میدیاکانەوە سەدایەکی بەهێزی دایەوە.

دواتر “دۆن کریستیانۆ” لە دوو ڕووبەروبونەوەی هەڵبژاردەی وڵاتەکەی ئاستێکی ناوازەی پێشکەش کرد، لە چاوپێکەوتنێکیشدا پاش بردنەوەی پورتوگال لە لۆکسمبۆرگ بۆ یەکەم جار بێدەنگی شکاند و بە پەیامنێری کەناڵە تەلەڤیزیۆنیەکانی ڕاگەیاند :” لەکۆتا سێ هەفتەدا تواناکانم سنوردار بوون، هەمووان دەزانن من حەز ناکەم ئاڵوگۆڕ بکرێم، بەڵام لەدوای ئەوەی بڕیاری دانیشاندنم درا هیچ ئاماژەیەکی خراپیشم نەکرد، هەوڵمدا بەوپەڕی توانامەوە یاریدەی یوڤانتۆس بدەم لەکاتێکدا پێکراو بووم”.

هەروەها دەڵێت :” هیچ یاریزانێک حەز ناکات ئاڵوگۆڕی پێبکرێت، بەڵام من تێدەگەم لەبەرئەوەی لەو دوو یارییەدا باش نەبووم، لە لەسەدا سەدی تواناکانمدا نەبووم”.

کریستیانۆ لە دوو ڕووبەروبونەوەی کۆتایی پورتوگال توانی چوار گۆڵ تۆمار بکات و یاریدەی هەڵبژاردەی وڵاتەکەیی دا بۆ گەیشتن بە ململانێکانی یورۆی ٢٠٢٠.

جیهانی

چاڤی هۆکاری ڕەتکردنەوەی بۆندەکەی یانەی بەرشلۆنەی بۆ میدیاکان ئاشکرا کرد

خەڵک سپۆرت

چاڤی هێرناندێزی ئەستێرەی دێرینی یانەی بەرشلۆنە و ڕاهێنەری ئێستای یانەی سەددی قەتەری دووپاتی دەکاتەوە، هێشتا کاتی ئەوە نەهاتووە پۆستی ڕاهێنەری یانەیەکی گەورە وەربگرێت.

لەماوەی چەند هەفتەی ڕابردوودا ئیدارەی یانەی بەرشلۆنەی ئیسپانی لەڕێگەی دوو بەڕێوەبەری یانەکەوە کە پێکهاتوون لە ئۆسکار گوراو و ئیریک ئەبیدال، چەند جارێک پەیوەندیان بە چاڤی هێرناندێزی ڕاهێنەری یانەی سەددی قەتەرییەوە کرد و داوایان لێکرد بگەڕێتەوە بۆ ئیسپانیا و پۆستی ڕاهێنەری یانە کەتەلۆنیەکە وەربگرێت، بەڵام مایسترۆ بەهەموو شێوەیەک ئەو ئۆفەرانەی ڕەتکردەوە و پاڵپشتی خۆی بۆ ئێرنیستۆ ڤاڵڤێردی ڕاهێنەر دەربڕی.

لەم بارەیەوە ڕۆژنامەوانان لە کۆنگرەیەکی ڕۆژنامەوانیدا پرسیاریان لە چاڤی کرد، ئەویش لەوەڵامدا ڕایگەیاند :” ئەو بۆندەی لەیانەی بەرشلۆنەوە پێمگەیشت کاتی قبوڵکردنی نەهاتبوو، چونکە من پێموایە هێشتا کاتی ئەوە نەهاتووە بگەڕێمەوە و پۆستی ڕاهێنەرایەتی یانەیەکی هێندە گەورە وەربگرم”.

لە وەڵامەکانیدا هیوای سەرکەوتنی بۆ کیکی سیتینی ڕاهێنەری شوێنگرەوەی ڤاڵڤێردی خواست و ڕایگەیاند :” کیکی سیتینی ڕاهێنەری نوێی یانەی بەرشلۆنەم خۆشدەوێت، حەزم بە شێوازی ڕاهێنان و یاریکردنیەتی، هیوادارم لە داهاتوودا و لەکارە نوێیەکەیدا سەرکەوتن بەدەست بهێنێت”.

سەرچاوە کەتەلۆنیەکان لەنمونەی ڕۆژنامەکانی موندۆ دیپۆرتیڤۆ و سپۆرت پێیان وایە، چاڤی تا کۆتایی وەرز لە پۆستی یانەی سەددی قەتەری بەردەوام دەبێت و ئەگەر زۆرە لەدوای ئەو وادەیە پۆستی ڕاهێنەری یانەیەکی مامناوەندی ئەوروپی وەربگرێت، لەدوای تەواوبوونی ئەو وادەیە و لە نزیکی ساڵانی ٢٠٢١ و ٢٠٢٢ ئەگەر زۆرە بگەڕێتەوە و هاوشێوەی گواردیۆلا ببێتە ڕاهێنەری بلاوگرانا.

بەردەوام بە لە خوێندنەوە

جیهانی

ڕاهێنەری یوڤانتۆس لە مێسی و شەشەم خەڵاتی باڵۆن دۆر بێزارە: یاریدەی کریسیتیانۆ دەدەم

خەڵک سپۆرت

ماوریزیۆ ساری لەکۆتا ڕووبەڕوبونەوەدا بەشداری بە کریستیانۆ ڕۆناڵدۆی ئەستێرەی پێکهاتەکەی نەکرد، بەڵام دووپاتیکردەوە، کە یاریدەدەری دەبێت بۆ بەدەستهێنانی شەشەم خەڵاتی تۆپی ئاڵتونی.

شەوی ڕابردوو یانەی یوڤانتۆس لەچوارچێوەی کێبڕکێکانی جامی ئیتاڵیا بە ئەنجامی چوار گۆڵی بێوەڵام سەرکەوتنی بەسەر یانەی ئودینێزی بەدەستهێنا، لەڕووبەڕوبونەوەکەشدا ماوریزیۆ ساری بە بڕیارێکی هونەری کریستیانۆ ڕۆناڵدۆی پورتوگالی لە پێکهاتەکەی دوورخستەوە.

دوابەدوای یارییەکە، ڕاهێنەرە کارامەکەی بیانکۆنێری لەکۆنگرەیەکی ڕۆژنامەوانیدا بە میدیاکارانی ڕاگەیاند :” دەمەوێت یاریدەی کریستیانۆ بدەم بۆ چنینەوەی شەشەم نازناوی تۆپی ئاڵتونی، چونکە بینینی کەسێک لەو زیاتر خەڵاتەکەی بەدەستهێناوە بابەتێکی بێزارکەرە”.

هەروەها ڕیاگەیاند :” لە داهاتوودا پاولۆ دیبالا یەکێک دەبێت لە پاڵێوراوەکان بۆ ئەم خەڵاتە، یەکێک دەبێت لەوانەی دەگەنە ئاستی باڵا و ڕکابەری سەرجەم نازناوە تاکە کەسیەکان دەکات”.

بەپێی ئەو زانیارییانەی لە ڕۆژنامەی “توتۆ سپۆرت”ی ئیتاڵییەوە بڵاوکراونەتەوە، کریستیانۆ لەڕووبەڕوبونەوەی ئودینێزی بەهۆی هەوکردنی جیوبەکانی لوتیەوە نەیتوانیوە بەشداری لەڕووبەڕوبونەوەکەدا بکات و پێشوەخت ماوریزیۆ ساری و یاریزانەکە لەو بارەیەوە بڕیاریارێکی هاوبەشیان داوە.

کریستیانۆ لەم وەرزە و لەکۆی ڕووبەروبونەوەکانی خولی ناوخۆی ئیتاڵیا توانیویەتی ١٤ گۆڵ تۆمار بکات، بەو ڕێژەیەشەوە پلەی دووەمی ڕیزبەندی گۆڵکارانی خولەکەی گرتووە و شارەزایان پێیان وایە، لە نیوەی وەرزەوە بەهێزەوە دەگەڕێتەوە و بۆ وەرزی داهاتوو ڕکابەری سەرەکی خەڵاتەکانی باڵۆن دۆر و زە بێست دەبێت.

بەردەوام بە لە خوێندنەوە

جیهانی

بەهۆی پێکانی ڕاشفۆردەوە هاندەرانی یونایتد داوای دوورخستنەوەی سۆڵشایەر دەکەن

خەڵک سپۆرت

شەوی ڕابردوو یانەی مانچستەر یونایتد لە ڕووبەڕوبوونەوەی گەڕانەوەی قۆناغی چواری جامی یەکێتی یانە ئینگلیزیەکان سەرکەوتنی بەسەر یانەی وڵڤەرهامبتۆندا بەدەسهێنا، بەڵام یاریزانێکی گرنگ و یەکلاکەرەوەیان لەدەستدا.

بەوپێیەی لە یاریی چون شەیتانە سورەکان بەبێ گۆڵ بەرامبەر وڵڤەرهامبتۆن یەکسانبوونیان تۆمار کرد، شەوی ڕابردوو ناچاربوون یاریی گەڕانەوەی قۆناغی چوار ئەنجام بدەن و بە ئەنجامی گۆڵێکی بێوەڵام سەرکەوتنیان بەدەستهێنا، گۆڵەکەش لەلایەن خوان ماتای ئیسپانییەوە تۆمار کرا.

لەهەمان یارییدا مارکۆس ڕاشفۆرد لە ماسولکەکانی پشتیدا دووچاری پێکان هات و لەخولەکی ٨٠ بە خیسی لینگارد ئاڵوگۆڕی پێکرا، ئەم ڕووداوەش توڕەیی هاندەرانی یانە سورە زەبەلاحەکەی گەیاندە ترۆپک، چونکە بەهۆیەوە ئەگەر زۆرە دووربکەوێتەوە و بەشداری ڕووبەڕوبونەوەی لیڤەرپوڵ نەکات.

ڕۆژنامەی “دەیلی مەیڵ”ی بەریتانی ئاشکرای کردووە، لەئێستادا هاندەرانی یونایتد پێیان وایە بەهۆی ئۆلی گۆنار سۆڵشایەرەوە ڕاشفۆرد توشی پێکان هاتووە، چونکە پێکهاتەکانی لەڕووی هێرشبەرییەوە لاوازن و سەرباری ماندووبوونی یاریزانەکە، بەڵام بەهەرشێوەیەک بێت لەو یارییەدا بانگهێشتی کردووە و بەشداریشی پێکردووە.

ڕاشفۆرد لە تۆڕە کۆمەڵایەتیەکانەوە نوسیویەتی: داوای لێبوردن دەکەم کە بەهۆی پێکانەوە نەمتوانی کۆتایی بە یارییەکە بهێنم، لە زۆرینەی کۆمێنتەکانیشدا هاندەرانی یونایتد دەستخۆشیان بۆ ئەستێرە ڕەش ئەسمەرەکە ناردووە و ڕەخنەی توندیان ئاڕاستەی سۆڵشایەری ڕاهێنەر کردووە.

هاندەرێک نوسیویەتی: داوای لێبوردن مەکە، ئێمە دەزانین ئەوەی ڕوویدا بەهۆی گێلی ئۆلیەوە بوو.

هاندەرێکی تر نوسیویەتی: دەزانین بەهۆی بڕیاری ڕاهێنەرەوە لە یاریی وڵڤەردا بەشداریت کرد، چونکە ڕاهێنەرێکی کارامە نییە و ناتوانێت پێکهاتەکانی بەبێ تۆ لەڕووی تۆماری گۆڵەوە کارا بکات.

بەردەوام بە لە خوێندنەوە

کوردستان