ئێمە لە تۆرە کۆمەڵایەتیەکان

ئابوری

دابەشكردنی نەوت دەستی پێكرد و نرخەكەی هەرزان دەبێت

خەڵك- بەشی هەواڵ
دوای گەیشتنی نەوت لە بەغداوە لە سنووری ئیدارەی ڕاپەڕین دابەشكردن دەستی پێكرد، ئەمڕۆش لە هەڵەبجە دەستی پێكرد و بەوهۆیەوە نرخەكەی لە بازاڕی ئازاد هەرزان دەبێت.

نوخشە ناسح، قائیمقامی ناوەندی هەڵەبجە ڕایگەیاند، ئەمڕۆ یەك شەممە ٢٠١٩/١١/١٧ لە پارێزگای هەڵەبجە دەستكرا بە دابەشكردنی نەوت بەسەر هاووڵاتیاندا.

لای خۆشەوە، ئاوات محەمەد، سەرپەرشتیاری دابەشكردنی سووتەمەنی ھەڵەبجە بە (خەڵك)ی ڕاگەیاند، دەست دەكرێت بە دابەشكردنی بەرمیلێك نەوت بۆ ئەمساڵ و دابەشكردن لە گەڕەكی زەمەقی دەروازەی سنوری شارەوانی هەڵەبجە دەست پێدەكات.

ئاشكراشی كرد، بۆ هەر بەرمیلێك بڕی 46 هەزار دینار وەردەگیرێت و بە پێی كارتی زیرەك ماڵ بەماڵ دابەشدەكرێت.

پێشتریش، د. هەڤاڵ ئەبوبەكر، پارێزگاری سلێمانی ڕایگەیاندبوو، دەستیان بە دابەشكردنی نەوت كردووە، وەك سەرەتاش لە شارەدێی (حاجیاوا) دەستی پێكراوە.

هاووڵاتییەك-یش، كە كاری فرۆشتنی نەوت لە بازاڕی ئازاد دەكات بۆ (خەڵك) ئاماژەی بەوەكرد، لەگەڵ گەیشتنی نەوت لە عیراقەوە بۆ شارەكانی هەرێم و دەستكردن بە دابەشكردنی، خواستی هاووڵاتیان كەمبۆتەوە لەسەر كڕینی نەوت و بەوهۆیەوە بەرمیلێك نەوت 5 هەزار لە نرخەكەی دابەزیوە.

هەرچەندە حكومەتی هەرێم لە مانگی ئەیلولی ڕابردوو بڕیاریدا پێش هاتنی وەرزی سەرما و زستان دابەشكردنی نەوت دەست پێ‌ بكات و هەر خێزانێك بەرمیلێك نەوتی پێ‌ بدات، بەڵام تا ئێستا هیچ بڕە نەوتێكی دابەش نەكردووە، بەڵام حكومەتی عیراق نەوت بە نرخێكی هەرزان بۆ هاووڵاتیانی هەرێم دابین دەكات، كە بۆ بەرمیلێك 31 هەزار دینارە و لە هەرێم دەدرێت بە 46 هەزار دینار، كە وەك دەوترێت ئەو بڕە زیادەیە بۆ كرێی گواستنەوەیە.

ئابوری

وەزارەتی دارایی لەبارەی مووچەی پاشەكەوتكراوەكانەوە ڕوونكردنەوەیەك بڵاودەكاتەوە

خەڵك – بەشی هەواڵ
وەزارەتی دارایی و ئابووری حكومەتی هەرێم ڕایدەگەیەنێت، هەندێك كەس بە ئاگا یان بێ ئاگا دەیانەوێت لە بەهای ئەو سەركەوتنە گەورەیەی شاندی هەرێمی كوردستان بۆ ڕێكەوتن لەگەڵ بەغدا كەمبكەنەوە، دەشڵێت،”سەرباری ئەوەی كە مووچە نەدراوەكان و پاشەكەوتەكانی مووچەش لەسەردەمی ئەم كابینەیەدا نەبووە، بەڵام حكومەتی هەرێم و وەزارەتی دارایی بەرپرسیاریەتی هەموویان لە ئەستۆ دەگرێت”.

وەزارەتی دارایی و ئابووری حكومەتی هەرێم لە ڕوونكردنەوەیەكدا، كە وێنەیەكی دەست (خەڵك) كەوتووە ڕایگەیاندووە، ئەمرۆ پێنجشەممە 5/12/2019، لە دیوانی وەزارەت، كۆنگرەیەكی ڕۆژنامەوانی سەبارەت بە ڕێكەوتنی نێوان هەرێم و بەغدا بەسترا و سەرۆك و ئەندامانی شاندی حكومەتی هەرێم، دۆسیەی بودجە و نەوت ئەنجامی ڕێكەوتنی شاندی هەرێمی كوردستانیان بۆ ڕۆژنامەنووسان ئاشكراكرد.

دەشڵێت،”وەزیری دارایی ئەوەی بۆ هەموو لایەك خستەڕوو، كە حكومەت مووچەی 8 مانگی فەرمانبەران و 12 مانگی خانەنشینان قەرزدارە، بەڵام هیچ ئاماژەیەك بە مووچە ناتەواوەكان نەداوە، كە بە ڕێژەی جیاواز بە پاشەكەوت دابەشكراون”.

ڕاشیگەیاندووە، بەداخەوە هەندێك كەس بە ئاگایی یان بە بێ ئاگا ڕاستیەكان دەشێوێنن دەیانەوێت لە بەهای ئەو سەركەوتنە گەورەیەی شاندی هەرێمی كوردستان كەمكەنەوە.

 

وێنەی ‏وەزارەتى دارایی و ئابووری - وزارة المالية والاقتصاد‏.

 

بەردەوام بە لە خوێندنەوە

ئابوری

لە حاڵەتی دواكەوتنى پەسەندكردنی بودجەدا
حكومەتی عیراق بەمشێوەیە مووچە دابەش دەكات

خەڵك- بەشی هەواڵ
ئەندامێكی لیژنەی دارایی پەرلەمانی عیراق ڕایدەگەیەنێت، حكومەتی ئێستا ناتوانێت بودجەی ساڵی داهاتوو پێشكەش بكات، تا ئەو كاتەی حكومەتی نوێ‌ پێكدەهێنرێت.

حەنین قەدۆ، ئەندامی لیژنەی دارایی لە پەرلەمانی عیراق لە لێدوانێكیدا بۆ میدیاكانی عیراق، ڕایگەیاندووە”بودجەی گشتی فیدراڵی بۆ ساڵی داهاتوو تا ئەم ساتەش لای لیژنەی ئابورییە لە ئەنجومەنی وەزیران، كێشەیەكی زۆر هەیە بۆ دابینكردنی بڕە داراییەكان بۆ بەجێگەیاندنی ئەو ئەركانەی لەئەستۆیەتی بەرانبەر بە گەلی عیراق كە بە كێشەی مەترسیدار دادەنرێن”.

بە وتەی قەدۆ”پەرلەمان لەئێستادا بەشێوەیەكی نافەرمی بڕگەكانی بودجەی داهاتوو تاوتوێ‌ دەكات، تا زەمینە سازی بۆ داڕشتنی كۆتایی بكات، لەپێناو دەرچوون لەم ئاستەنگە گەورەیەی كە تێیكەوتووین بەهۆی ئەو ئەركە گەورەكانی كەوتوونەتە سەرشانی حكومەت و وەزارەتی دارایی و پەرلەمان”، ڕەتیشیكردەوە “حكومەتی ئێستا بتوانێت بودجەی ساڵی داهاتوو پێشكەش بكات، تا ئەو كاتەی حكومەتی نوێ‌ پێكدەهێنرێت”.

ئەو ئەندامەی لیژنەی دارایی پەرلەمانی عیراق دەڵێت”لەحاڵەتێكدا گەر پەسەندكردنی بودجەی داهاتوو بەهەر هۆیەكەوە بێت دواكەوت، ڕێژەی 1/12ی بودجەی ساڵی داهاتوو مانگانە خەرج دەكرێت بۆ مەبەستی مووچەی فەرمانبەران، تا ئەو كاتەی بودجەكە پەسەند دەكرێت”.

بەردەوام بە لە خوێندنەوە

ئابوری

زانیاری نوێ لەسەر گێڕانەوەی پاشەكەوتی مووچەی فەرمانبەرانی هەرێم

خەڵك-سەعد مەلا عەبدوڵڵا گوڵپی

ئەندامێكی پەڕلەمانی عیراق ڕایدەگەیەنێت، دەبێت عیراق یارمەتی هەرێم بدات لە دانەوەی پاشەكەوتی مووچەی فەرمانبەران.

دوای چەندین گفتوگۆ و كۆبوونەوەی نێوانیان، ئەمڕۆ وەزیری دارایی حكومەتی هەرێم بە فەڕمی ڕێككەوتنی هەرێم و بەغدای ڕاگەیاند و بەپێی ڕێككەوتنەكە ڕۆژانە هەرێم 250 هەزار بەرمیل ڕادەستی سۆمۆ دەكات و لەبەرانبەردا عیراقیش بەشە بودجەی هەرێم دەنێرێت.

شیروان میرزا ئەندامی لیژنەی دارایی لە پەڕلەمانی عیراق بە (خەڵك)ی ڕاگەیاند، پاشەكەوتی مووچە ئەركی حكومەتی هەرێمە بیداتەوە.
وتیشی”پێموایە هەرێم پێشنیاری كردووە و داواشی لە حكومەتی عیراقی كردووە یارمەتی بدات لە دانەوەی قەرزەكان و لەناو قەرزەكانیش بەشێكی پاشەكەوتی مووچەی فەرمانبەرانی هەرێمە”.

لای خۆشیەوە ئومێد سەباح ئەندامی شاندی هەرێم بۆ داوستان لەگەڵ بەغدا لە كۆنفڕانسێكی ڕۆژنامەوانیدا ڕایگەیاند، گێڕانەوەی مووچە پاشەكەوتكراوەكان مافێكی هەرێم و فەرمانبەرانی هەرێمە و دەبێت ئێمە پارێزەری سەرەكی ئەو بابەتە بین و بیگێڕێنەوە بۆ خاوەن ماف.
وتیشی” ئێمە بە بەغدامان ڕاگەیاندووە هۆكاری ئەو كێشەیەی ڕووی لە هەرێم كردووە ئەوەیە كە بودجەكەمان لەلایەن ئێوە بڕدراوە”.

ڕوونیشیكردەوە، بە شاندی عیراقیمان ڕاگەیاندووە، فەرموون بەرهەمی نەوتی و سەرجەم داهاتەكانمان لە ساڵانی ڕابردوو هەمانبووە و ئەو داهاتەی هاتووەتە دەستی ئێمە حساب بكەن و لەبەرانبەردا ئێوەش چەندێك پارەی ئێمەتان لابووە نەتانداوە بەراورد بكەین ئەوكات بە ڕوونی دەردەكەوێت كە ئێمە داهاتمان چەند بووە و چەندمان لێبڕدراوەو ئالیەتی پێویستیشمان بۆ داناوە.

بەردەوام بە لە خوێندنەوە

کوردستان