ئێمە لە تۆرە کۆمەڵایەتیەکان

عێراق

وتەبێژی حكومەتی عیراق بۆ (خەڵك): گۆڕانكاری ڕیشەیی ڕوودەدات

خەڵك- ئیدریس جەبار
وتەبێژی حكومەتی عیراقی ڕایدەگەیەنێت، لەڕێی پڕۆژە یاسایەكەوە، كە بەمزووانە لەلایەن ئەنجوومەنی وەزیرانەوە پێشكەش بە پەڕلەمان دەكرێت، دەبێتە مایەی گۆڕانكاری ڕیشەیی لە ڕێڕەوی پڕۆسەی هەڵبژاردن، ئاماژە بەڕاستكردنەوەی ئەو هەڵانەش دەكات، كە لە پێشتر لە پڕۆسەی سیاسیدا ڕوویاندا.

سەعد حەدیسی، وتەبێژی حكومەتی عیراق، لە لێدوانێكی تایبەت بە (خەڵك) ڕایگەیاند، “لەڕێی پڕۆژە یاسایەكەوە، كە بەمنزیكانە لەلایەن ئەنجوومەنی وەزیرانەوە پێشكەش بە پەڕلەمان دەكرێت، گۆڕانكاری ڕەیشەیی لە پڕۆسەی هەڵبژاردندا ڕوودەدات و دەبێتە مایەی ڕاستكردنەوەی ئەو هەڵانەش، كە پێشتر لە پڕۆسەی سیاسیدا هەبوون”، هیواشی خواست پڕۆژە یاساكە لەلایەن پەڕلەمانەوە پەسەند بكرێت.

بە وتەی حەدیسی، “یاسای هەڵبژاردنی پێشوو، گوزارشتی تەواوەتی لە خواستی دەنگدەری عیراقی نەكردووە، كێشەی زۆری تێدابوو لەڕووی ڕەخسانی هەلی یەكسان بۆ كاندیدەكان، سیستمی هەڵبژاردنی كارپێكراو هەلی بۆ دەستباڵایی حزبەكان و هێزە سیاسییە تەقلیدییەكان ڕەخساندبوو، بەڵام ئەم پڕۆژە یاسایەی ئێستا دەبێتە مایەی تێپەڕاندنی هەموو ئەو لایەنە نەرێنیانەی، كە سیمای سەرەكی پڕۆسەكانی هەڵبژاردنی پێشوو بوون”.

سەعد حەدیسی دەڵێت: “لەڕێی پڕۆژە یاساكەوە بەو پێیەی پشت بە براوەی گەورە دەبەستێت، ڕێگە بۆ سەرهەڵدانی هێزێكی سیاسی نوێ‌ خۆشدەكات و ڕۆڵی گەورە بۆ سیاسیە سەربەخۆكان دەڕەخسێنێت، بە هەمان شێوە بۆ ئەو كەسانەی، كە وەك تاك بەشداری هەڵبژاردن دەكەن نەك وەك قەوارە، ڕۆڵی گەورە دەداتە ئەوانە تا بگەنە پەڕلەمان، وێڕای كەمكردنەوەی تەمەنی خۆكاندیدكردن لە 30 ساڵەوە بۆ 25 ساڵ، كە هەلی گەورە لەبەردەم لاواندا خۆشدەكات بۆ گەیشتن بە دەسەڵات و پۆستە باڵاكان”.

دەربارەی كۆمسیۆنی باڵای هەڵبژاردنەكان، وتەبێژی حكومەتی عیراقی ڕاگەیاند، “پشیەگەری و دادوەری دەكرێتە سیمایەكی سەرەكی لە پڕۆسەی هەڵبژاردن، بە هەمان شێوە پشتبەستن بە كەسانی تەكنۆكرات و شارەزا لە بوارەكانی تەكنیكی و ئامارەكان، كە بواریان پێدەدرێت لە پڕۆسەی هەڵبژاردندا بەشداربن، لە هەمان كاتدا پشت بە هێزە سیاسییەكان نابەسترێت بۆ خۆكاندیدكردن، هەر لەم ڕێڕەوە كار بۆ هەڵبژاردنی ئەندامانی كۆمسیۆنی هەڵبژاردنیش دەكرێت”.

سەعد حەدیسی دەڵێت: “ئەمانە دەركەوتووترین ئەو گۆڕانكاریانەن، كە چاوەڕوان دەكرێت حكومەت لە سیستمی هەڵبژارندا ئەنجامیان بدات”.

عێراق

هەرێم و بەغداد دەست بەگفتوگۆکان دەکەنەوە

خەڵک – بەشی هەواڵ

جێگری سەرۆكی ئەنجومەنی نوێنەرانی عیراق رایگەیاند، بەم زووانە ھەردوو حكومەتی ھەرێم و بەغداد دەست بە گفتوگۆكان دەكەنەوە، چونكە ھیچ بەربەستێكی قورس لە بەردەمیان نییە بۆ ئەوەی بگەنە رێككەوتن.

دكتۆر بەشیر خەلیل حەداد، بۆ ماڵپەڕی فەرمیی پارتی دیموكراتی كوردستان وتی: “دەستپێخەرییەكمان كردووە، كە ھەردوو حكوومەتی ھەرێمی كوردستان و عیراق بگەڕێنەوە سەر مێزی گفتوگۆ و دانوستان دەست پێبكەنەوە، چونكە چەند گفتوگۆ دوابكەوێت، زیانی بۆ خەڵكی كوردستان دەبێت”.

وتیشی: “داوامان كردووە بەپیر داوەكەمان بێن و دەست بە گفتوگۆ بكەن، چاوەڕێش دەكەین بەم زووانە گفتوگۆكان دەست پێبكەنەوە، چونكە بەربەستێكی قورس نییە كە نەگەنە رێككەوتن، بۆیە گفتوگۆكان دەست پێدەكەنەوە بۆ ئەوەی ھەردوولا بگەنە رێككەوتن”.

جێگری سەرۆكی ئەنجومەنی نوێنەرانی عیراق دەشڵێت: “بەھۆی پشووی پەرلەمان و تووشبوونی ژمارەیەكی زۆری پەرلەمانتار و فەرمانبەرانی پەرلەمانی عیراق بە ڤایرۆسی كۆرۆنا، تا 1/9 ناتوانین دەست بە كۆبوونەوەكان بكەینەوە، بە تایبەت لەبارەی كێشەكانی نێوان ھەرێم و بەغدا”.

بەردەوام بە لە خوێندنەوە

عێراق

“ئەگەر پلانی نێودەوڵەتی نەبێت، كازمی لە چاكسازییەكانی سەركەوتوو دەبێت”

خەڵك-تەنیا هەورامی

 

سەرۆكی بزاڤی چاكسازی و گەشە ڕایدەگەیەنێت، ئەو كارەی كازمی دەستیپێكردووە قورسە، بەڵام سوورە لەسەر جێبەجێكردنی چاكسازییەكانی لە عیراق.

دوای دەستبەكاربوونی موستەفا كازمی وەك سەرۆك وەزیرانی عیراق، دەیەوێت بەشێك لە بودجەی بەهەدەردراوی عیراق بگێڕێتەوە بۆ خەزێنە دەوڵەت و بەو هۆیەشەوە چەندین چاكسازی لە دەروازە سنوورییەكان تاكو بڕینی مووچەی هەزاران فەرمانبەری دوو مووچە دەست پێكردووە.

د.محەمەد بازیانی سەرۆكی بزاڤی چاكسازی و گەشە بە (خەڵك)ی ڕاگەیاند، كازمی لەسەرەتای هاتنییەوە خۆی بە شەهیدی زیندوو ناوبردووە و پێشبینی ئەوەش دەكات لەهەر كاتێكدا تیرۆر بكرێت.
وتیشی”ئەو كارەی كازمی دەستیداوەتێ قورسە، بەڵام بەردەوامە لەسەر ئەوەی ئەو چاكسازیانە بكات، بەتایبەت دەروازە سنوورییەكان كە لەوێوە گەندەڵی زۆر هەیە بەكوردستانیشەوە”.
ئاماژەی بۆ ئەوەش كرد، دەسەڵاتدارانی كوردیش دەڵێن ئامادەیمان هەیە و هەماهەنگی دەكەین.
ئاشكراشیكرد، وەكو ئەوەی سەرۆكی دەزگایەكی هەواڵگری عیراق بووە، زانیاری لەسەر گەندەڵكاران هەیە و سەركەوتوو دەبێت، بە مەرجێك ئەگەر پلانی نێودەوڵەتی ڕێگر نەبێت.
ڕوونیشیكردەوە، ئەم پیاوە كاری زۆری كردووە و دڵم خۆشە بەو چاكسازیانە، بەڵام لە داهاتوودا وەك باس دەكرێت دەبێتە دیكتاتۆرێك یان نا، بەدڵنیاییەوە دیكتاتۆرەكان هەموویان بەو شێوەیە دروست دەبن و خزمەتی خەڵك دەكەن لە كۆتایدا بڕیارەكانیان لە بەرژەوەندی خۆیان دەبێت، ئەویش پەیوەستە بە گەلی عیراقەوە.

بەردەوام بە لە خوێندنەوە

عێراق

داهاتی خاڵێكی سنووری عیراق تەنها لە یەك ڕۆژدا، زیاتر لە 2 ملیار دینارە

خەڵك-بەشی هەواڵ

 

دەستەی‌ دەروازە سنوورییەكانی‌ عیراق ڕایدەگەیەنێت، داهاتی‌ ڕۆژانەی‌ بەندەری‌ ئوم قەسر تەنیا لە یەك ڕۆژدا لە دوو ملیار دینار زیاترە.

دەستەی‌ دەروازە سنوورییەكانی‌ عیراق لە ڕاگەیەنراوێكدا ئاماژە بۆ ئەوە دەكات، داهاتی‌ ڕۆژی‌ 13ی‌ ئەم مانگە لە بەندەری‌ ئوم قەسر لە پارێزگای‌ بەسرە دوو ملیار و 126 ملیۆن دینار بووە.
ئاشكراشیكرد، داهاتەكە بەجۆرێك بووە بەشی‌ زۆری‌ لە ڕێگەی‌ سەپاندنی‌ گومرگەوە بووە لەسەر ئاڵۆگۆڕی‌ بازرگانی‌ و ئەوەی‌ دیكەی‌ لە ڕێگەی‌ باجەوە بەدەستهاتووە.

جەخت لەوەش دەكات، داهاتەكە زیاد بووە و ئەو زیادبوونەیش لە ئەنجامی‌ جێبەجێكردنی‌ سەرجەم ڕێكار و یاساكانی‌ چاودێریی‌ و وردبینی‌ و پشكنینی‌ ئەمنی‌ بەدیهاتووە، بەتایبەتی‌ لەدوای‌ گەیشتنی‌ ڕێنماییەكانی‌ مستەفا كازمی‌ سەرۆك وەزیرانی عیراق لە بواری‌ چاكسازی‌ لە داهاتی‌ دەروازە سنوورییەكاندا.

ئەمەش لەكاتێكدایە، دوای بوونی بە سەرۆك وەزیران دەیەوێت سەرجەم خاڵە سنوورییەكان بخاتەوە ژێر ڕكێفی حكومەتی عیراقی و لیژنەیەكی چاودێری سەرپەرشتییان بكات.

بەردەوام بە لە خوێندنەوە

کوردستان