ئێمە لە تۆرە کۆمەڵایەتیەکان

ئابوری

حكومەت لە مافی پلەبەرزكردنەوەی فەرمانبەران بێدەنگەی كردووە

خەڵك- بەشی هەواڵ
حكومەتی هەرێم مافی پلەبەرزكردنەوەی فەرمانبەران، كە 4 ساڵە ڕاگیراوە ناداتەوە و هیچ بەرپرسێكی حكومەتیش ئامادە نییە قسەی لەسەر بكات.

لە سەرەتای ساڵی 2016ەوە و لەگەڵ بڕیاری پاشەكەوتی مووچە، ئەنجوومەنی وەزیرانی هەرێمی كوردستان بڕیاریدا بە ڕاگرتنی پلەبەرزكردنەوەی فەرمانبەران، كە مافێكی فەرمانبەرانە و بەپێی یاسا ڕێكخراوە، تا ئێستاش هیچ بڕیارێك بۆ دەستپێكردنەوەی نییە.

چەند فەرمانبەرێك بۆ (خەڵك) ئاماژەیان بەوەكرد، كە چەند ساڵێكە مافی پلەبەرزكردنەوەیان هەیە، بەڵام بەهۆی ڕاگرتنی ئەو مافە یاساییەوە لەلایەن حكومەتەوە پلەیان بەرزنەكراوەتەوە.

ئاماژەیان بەوەشكرد، لە ژیانی وەزیفیدا ئەگەر پلەبەرزكردنەوە نەبێت فەرمانبەر هەر بە مووچەی كەم دەمێنێتەوە و پلەكەشی بەرزنابێتەوە بۆ ئەو پلەیەی، كە بە یاسا بۆی دیاریكراوە، بۆیە داواكارین حكومەت بە بڕیارەكانیدا بچێتەوە وەك چۆن ئەركەكانی سەر شانی فەرمانبەرانی وەك پێش قەیرانەكە لێ‌ كردۆتەوە و دۆخی وەزیفی ئاسایی بۆتەوە، بەهەمان شێوە مافەكانی فەرمانبەرانیش ئاسایی بكاتەوە.

بۆ بەدواداچوونی ئەو پرسە (خەڵك) چەند جارێك پەیوەندی كرد بە ئاوات شێخ جەناب، وەزیری دارایی و ئالان حەمەسەعید، وەزیری پەروەردە و د. جوتیار عادل، وتەبێژی حكومەتی هەرێم و ئومێد سەباح، سەرۆكی دیوانی ئەنجوومەنی وەزیران، بەڵام وەڵامی پەیوەندییەكانیان نەدایەوە.

لای خۆشیەوە، سەرچاوەیەكی دارایی بۆ (خەڵك) ئاماژەی بەوەكرد، كە تا ئێستا هیچ بڕیارێك لە ئەنجوومەنی وەزیران دەرنەكراوە بۆ دەستپێكردنەوەی پلەبەرزكردنەوەی فەرمانبەران، چونكە ئەوە لە دەسەڵاتی ئەوانە و هەر ئەوانیش دەبێت فەرمان بۆ دەستپێكردنەوەی دەربكەن.

ڕاگرتنی پلەبەرزكردنەوەی فەرمانبەرانی ڕاژەی شارستانی لەكاتێكدایە، كە پلەبەرزكردنەوەی هێزەكانی پێشمەرگە و هێزەكانی ناوخۆ نەوەستاوە.

حكومەتی هەرێم بیانووی بۆ ڕاگرتنی پلەبەرزكردنەوەی فەرمانبەران و پاشەكەوتی مووچە، بوونی قەیرانی دارایی بوو، بەڵام لە سەرەتای ئەمساڵەوە حكومەتی هەرێم كۆتایی هاتنی قەیرانی دارایی ڕاگەیاند و كۆتایی بە پاشەكەوت هێنا، بەڵام تا ئێستا پلەبەرزكردنەوەی بۆ فەرمانبەران نەكردۆتەوە.

ئابوری

ئێران 50%ی قەرزی كارەبا لە عیراق وەردەگرێتەوە

خەڵك – بەشی هەواڵ

یاریدەدەری وەزیری وزەی ئێران ڕایدەگەیەنێت: ڕێژەی 50%ی ئەو قەرزانەیان وەرگرتووەتەوە كە لە بری كارەبا بۆ عیراقیان هەناردەكردووە.

هەمایۆن حائری یاریدەدەری وەزیری وزەی ئێران لە لێدوانێكی ڕۆژنامەوانیدا ڕایگەیاند، پڕۆسەی هەناردەكردنی كارەبا بۆ عیراق بەردەوامە و لە دواین سەردانی وەزیری وەزەی ئێرانیش بۆ عیراق گرێبەستی هەناردەكردنی كارەبا بۆ ئەو وڵاتە بۆ 2 ساڵی تر درێژ كراوەتەوە.

یاریدەدەری وەزیری وزەی ئێران ئاماژەی بەوەشكرد، 50% شایستە دارایییەكانی هەناردەكردنی كارەبایان لە عیراق وەرگرتووەتەوە ‌و بڕیارە بە میكانیزمێكی نوێ‌ لە ڕێگەی مامەڵەی بانكییەوە، ئەو بەشەی تری ماوە وەریبگرنەوە.

یاریدەدەری وەزیری وزەی ئێران ئەوەشی خستەڕوو، هەناردەكردنی بڕی كارەبا بۆ وڵاتانی دراوسێ‌ بەردەوام گۆڕانكاری بەسەردا دێت ‌و بەپێی وەرزەكانی هاوین‌ و زستان جیاوازی هەیە.

پێشتریش حكومەتی ئێران ڕایگەیاندبوو، عیراق لە پێشەنگی وڵاتانەدایە كارەبا لە ئێرانەوە هاوردە دەكەن‌ و لە كاتژمێرێكدا 6 ملیار و 652 ملیۆن كیلۆ وات كارەبای ئێرانی بۆ هەناردەكراوە.

بەردەوام بە لە خوێندنەوە

ئابوری

ژمارەی فەرمانبەرانی عیراق 4 ملیۆنی تێپەڕاند

خەڵك- بەشی هەواڵ
ژمارەی فەرمانبەرانی عیراق 4 ملیۆن كەس تێدەپەڕێنێت و پەڕلەمانتارێك لە لیژنەی دارایی دەڵێت: “ساڵی داهاتوو هیچ پلەیەك بۆ دامەزراندن نابێت”.

ئەحمەد جبوری، ئەندامی لیژنەی دارایی لە پەڕلەمانی عیراق لە لێدوانێكی ڕۆژنامەوانیدا ئاشكرای كردووە، ژمارەی فەرمانبەرانی عیراق زیاتر لە 4 ملیۆن فەرمانبەرە‌ و بەراورد بە ژمارەی دانیشتوان ژمارەی پێوانەیی لەسەر ئاستی وڵاتانی عەرەبی‌ و كیشوەری ئاسیا تۆماركردووە.

ڕاشیگەیاندووە، زۆری ژمارەی فەرمانبەران كاردانەوەی نەرێنی هەبووە لەسەر سیستمی ئابووری‌ و دارایی وڵات، بەتایبەت، كە ئێستا وڵات بە قەیرانێكی قوڵی داراییدا تێدەپەڕێت بەهۆی بڵاوبوونەوەی ڤایرۆسی كۆرۆنا و دابەزینی نرخی نەوتەوە.

ئەو پەڕلەمانتارە ئاماژەی بەوەشكردووە، پێشبینی دەكەین بۆ ساڵی 2021 هیچ جۆرە پلەیەك بۆ دامەزراندن لە دامەزراەكانی حكومەت دانەنرێت، چونكە ژمارەیەكی زۆر فەرمانبەری زیادە لە فەرمانگەكاندا هەیە.

بەردەوام بە لە خوێندنەوە

ئابوری

هاوردەكردنی نزیكەی 30 بەرهەمی كشتوكاڵی قەدەغە كرا

خەڵك – بەشی هەواڵ
وەزارەتی كشتوكاڵی عیراق ڕایدەگەیەنێت، لەماوەی ڕابردوودا هاوردەكردنی زۆرێك لە بەرهەمی كشتوكاڵی‌ و ئاژەڵی قەدەغە كردوە و پلانیشی هەیە پاڵپشتی بەرهەمی ناوخۆیی‌ و هانی جووتیاران بدات بۆ زیادكردنی بەرهەمی ناوخۆیی.

وەزارەتی كشتوكاڵی عیراق لە ڕاگەیەنراوێكدا بڵاویكردەوە، كۆنتڕۆڵكردنی دەروازە سنوورییەكان لە چەند ڕۆژی ڕابردوودا لەلایەن سەرۆك وەزیران هەنگاوێكی بنچینەییە لە رێڕەوی بنیاتنانی دەوڵەت ‌و كۆنتڕۆڵكردنی دەروازەی سنوورییەكان خاڵێكی گۆڕانكارییە بۆ پارێزگاریكردن لە بەرهەمی ناوخۆیی.

ڕاشیگەیاندووە، لە ئێستادا لەسەرتاسەری وڵات هاوردەكردنی 28 بەرهەمی كشتوكاڵی ‌و ئاژەڵی قەدەغەكراوە و ڕێگەش بە هاوردەكردنی ئەو بەرهەمە كشتوكاڵیانە نادرێت، كە لە ناوخۆدا بەرهەمی زۆرە، پلانیش هەیە بۆ پاڵپشتیكردنی بەرهەمی ناوخۆیی‌ و هاندانی جووتیاران‌.

ئەوەشخراوەتەڕوو، عیراق لە ئێستادا هیچ ڕێككەوتنێكی نەكردووە بۆ هاوردەكردنی بەرهەمی كشتوكاڵی، بەڵكو تەنها ڕێككەوتن بۆ كڕینی ئامێر‌ و كەرەستەی كشتوكاڵی كراوە.

بەردەوام بە لە خوێندنەوە

کوردستان