ئێمە لە تۆرە کۆمەڵایەتیەکان

کوردستان

ڕێنمایی نوێ‌ بۆ ڕێكخستن و شێوازی كاركردنی تەكسی دەرچوو

خەڵك – بەشی هەواڵ
وەزیری گواستنەوە و گەیاندنی حكومەتی هەرێمی كوردستان ڕایدەگەیەنێت، لەماوەی شەش مانگدار ِێكخستنەوەی كاروباری تاكسیەكان لە هەرێم ئەنجام دەدرێت، دەشڵێت: “گرنگی بڕیارەكە لەوەدایە كەس ناتوانێت تاكسی كەسی دیكە بەكاربهێنێت”.

ئانۆ جەوهەر، وەزیری گواستنەوە و گەیاندنی حكومەتی هەرێمی كوردستان ڕایگەیاندووە، هەر پارێزگایەك لۆگۆی تاكسی تایبەت بە خۆی دەبێت و لە پارێزگایەكی دیكە ناچێت، شۆفێرانی تاكسی دەچنە بەڕێوەبەرایەتییەكانی هاتووچۆ لە هەرێمی كوردستان و فۆڕمێك وەردەگرن، كە بە فۆڕمی زانیاری ناسراوە و تێیدا سەرجەم زانیارییەكانی خۆی پڕدەكاتەوە.

وەزیری گواستنەوە و گەیاندن بۆ (ترافیك ئێف ئێم)ی هاتووچۆی سلێمانی باسی لەوەشكردووە، شۆفێری تاكسی پێویستە بچێتە بنكەی ئاسایشی گەڕەكەكەی و ئاسایش تێبینی خۆی لەلایەنی ئەمنییەوە لەسەر شۆفێرەكە بنووسێت، پاشان ئەو شۆفێرە دەچێتە بەڕێوەبەرایەتی بەڵگەی تاوان، لەوێش دوای ئەوەی سەلمێنرا ئەو شۆفێرە لەڕووی بەڵگەی تاوانەوە هیچ كێشەیەكی نییە، ڕەوانەی بەڕێوەبەرایەتی هاتووچۆی پارێزگاكەی خۆی دەكرێت.

ڕاشیگەیاندووە، بەڕێوەبەرایەتییەكانی هاتووچۆ دوای تەواوبوونی ڕێكارەكان، شۆفێری تاكسییەكە دەنێرنە لای ئەو كۆمپانیایەی لۆگۆی تاكسیەكان دابین دەكات، لەوێش كارتی زانیاری بۆ دروست دەكرێت، كە وێنەی شۆفێرەكە و ژمارەی مۆبایلی شۆفێرەكە و ژمارەی ئۆتۆمبێلەكەش نووسراوە، بەهەمان شێوە لەكوشنی پشتەوەش هەمان زانیاری هەیە و جێگیركراوە، كە گرنگییەكەی لەوەدایە كەس ناتوانێت تاكسی كەسی دیكە بەكاربهێنێت.

ئاماژەی بۆ ئەوەشكردووە، لەماوەی شەش مانگدا دەبێت بڕیارەكە جێبەجێ بكرێت، دوای ئەو وادەیەش هەر شۆفێرێك ئەو كارتی زانیارییەی نەبوو هەروەها لۆگۆی وەرنەگرتبوو، لەلایەن تیمەكانی هاتووچۆوە ڕێكاری یاسایی بەرامبەر دەگیرێتەبەر.

وەزیری گواستنەوە ئاشكراشیكرد، دوای ئەو ماوەیە سەرجەم فۆڕمەكان دەكرێنە داتابەیسێك و پێشكەشی وەزارەتی ناوخۆ دەكرێت، ئەوانیش بەراوردی پێدەكەن لەگەڵ داتابەیسی خۆیان، ئەوكاتە ئەگەر لێكچوون هەبوو، ئەوا ڕاستەوخۆ ناوەكە دەردەهێنرێت.

کوردستان

رووداوێـــكی هاتووچـــۆ لە هەڵەبجە قوربــــانی لێــــدەكەوێتەوە

خەڵك- بەشی هەواڵ
ڕووداوێكی هاتووچۆ لە فولكەی تەپەتۆڵەكە لە هەڵەبجە ڕوو دەدات و بەهۆیەوە ژنێك بریندار دەبێت.

بەپێی زانیارییەكانی (خەڵك) ئێوارەی ئەمڕۆ دوو شەممە، ڕووداوێكی هاتووچۆ لە فولكەی تەپەتۆڵەكە لەنێوان ئۆتۆمبێلێــكی جـــۆری تــۆیــۆتــا لاندكــرۆزەر و تۆیــۆتا كــــرۆلای تــەكسی ڕوویـــداوە.

هەر بەپێی زانیارییەكان، بــەهـــۆی ڕووداوەكەوە سەرنشینێكی ژن بریندار بوو و زیانێكی زۆری ماددیش بەر ئۆتۆمبێلەكان كەوتووە.

بەردەوام بە لە خوێندنەوە

کوردستان

پارتی بۆ خۆپیشاندەرانی عیراق: پێشمەرگە بۆ ھەموو عیراقییەكان قەڵغان بووە

خەڵك- بەشی هەواڵ
پارتی دیموكراتی كوردستان ڕوونكردنەوەیەك بۆ خۆپیشاندەرانی عیراق بڵاودەكاتەوە و ڕایدەگەیەنێت، هەندێك كەسی تێكدەر لەدژی پێشمەرگە پڕوپاگەندەی ژەھراوی بڵاودەكەنەوە و دەشڵێت: “ھێزی پێشمەرگە بەشێكە لە سیستمی بەرگری عیراق و برای ئێوەن”.

مەكتەبی سیاسی پارتی لە ڕوونكردنەوەكەدا ئاماژەی بەوەداوە، ئاگاداری هەوڵی هەندێ خەڵكی سەرلێشێواوی تێكدەر بن كە بۆ لەباربردن و تێكدانی ئاشتیی كۆمەڵایەتی و دروستكردنی مەترسی بۆ سەلامەتیی نیشتمان، لەدژی پێشمەرگە پروپاگەندەی ژەھراوی بڵاو دەكەنەوە، ئەویش لە ڕێگەی تێكەڵكردنی ناوی برا پێشمەرگەكانتان لە بەرپرسیارێتی لەو بابەتانەی لە خۆپێشاندانەكان ڕوویانداوە.

ڕوونكردنەوەیەك لە مەكتەبی سیاسیی پارتی دیموكراتی كوردستان.

بەشێك لە ڕۆڵەكانی گەلی عیراق بە خۆپێشاندان و داواكردنی مافەكانیان لە چوارچێوەی ناسنامەی ھاووڵاتیبوون و لەپێناو باشتركردنی ھەلومەرجی ئێستای عیراق، مافێك پەیڕەو دەكەن كە دەستوور فەراھەمی كردووە.
ئێمە لە پارتی دیموكراتی كوردستان ڕێز و پێزانینمان ھەیە بۆ ھەموو ھەوڵ و كۆششی جەماوەریی ئاشتیخوازانەی سەرجەم چین و توێژەكان كە لە گۆڕەپانەكانی خۆپێشاندان كۆبوونەتەوە، بە پێویستمان زانی سەرنجی خوشك و براكانمان كە خاوەن مافی دەستوورین رابكێشین بۆ ئەوەی ئاگاداری هەوڵی هەندێ خەڵكی سەرلێشێواوی تێكدەر بن كە بۆ لەباربردن و تێكدانی ئاشتیی كۆمەڵایەتی و دروستكردنی مەترسی بۆ سەلامەتیی نیشتمان، لەدژی پێشمەرگە پروپاگەندەی ژەھراوی بڵاو دەكەنەوە، ئەویش لە ڕێگەی تێكەڵكردنی ناوی برا پێشمەرگەكانتان لە بەرپرسیارێتی لەو بابەتانەی لە خۆپێشاندانەكان ڕوویانداوە.
پێشمەرگە بە مێژووی دوور و درێژی نیشتمانی خۆی بۆ ھەموو عیراقییەكان قەڵغان بووە و ھەموویانی پاراستووە و بە شەھیدە سەربەرزەكانییەوە قوربانی و وەفاداری پێشكەش كردووە بۆ ئەوەی گەلی عیراق بە ھەموو پێكھاتەكانی لە پێشەنگی گەلانی ئازادیخواز و پێشكەوتنخوازدا بێت، ھێزی پێشمەرگە بەشێكە لە سیستمی بەرگری عیراق و برای ئێوەن، پێشمەرگە زۆر لەوە دوورە كە بە پێچەوانەی ویژدان و خواستی نیشتمان ناو و رێبازەكەی لەكەدار بكرێت.
لەبەر ئەوە دوژمنانی یەكریزی نیشتمانی بە ئامانجی بەلارێدابردنی ڕێڕەوی ڕووداوەكان و بۆ خزمەتی بەرژەوەندییە گوماناوییەكانیان، ھەوڵی بەخشینی تۆمەتی درۆزنانە دەدەن. ئێمەیش پەیمان دەدەین كە گەلەكەمان بە هەموو هێزكانییەوە بۆ ڕووبەڕووبوونەوەی ھەموو ئەوانەی كە ھەوڵی تێكدانی یەكریزیی نیشتمانی دەدەن، لە ئامادەباشیدا دەبێت.

مەكتەبی سیاسی
پارتی دیموكراتی كوردستان
٢٠١٩/١١/١٨
ھەولێر

بەردەوام بە لە خوێندنەوە

کوردستان

پێشنیازی یاسای ماف و ئەركی نەخۆش ئاڕاستەی حكومەت دەكرێت

خەڵك- بەشی هەواڵ
لیژنەی كاروباری تەندروستی و ژینگە و مافی بەكاربەر پێشنیازی یاسایەك دەكات بۆ مافی پاراستنی مافی نەخۆش و دیاری كردنی ئەركەكانی و ڕەوانەی حكومەتی هەرێمی دەكات بە مەبەستی وەرگرتنی ڕا و سەرنجیان.

بەپێی ڕاگەیەنراوێكی پەڕلەمانی كوردستان، بەمەبەستی تاووتوێكردنی پێشنیازی یاسای ماف و ئەركی نەخۆش و چەند پرسێكی دیكە، ئەمڕۆ دوو شەمە 2019/11/18، لیژنەی كاروباری تەندروستی و ژینگە و مافی بەكاربەر لە پەڕلەمانی كوردستان بەسەرپەرشتی د.سەباح مەحمود، سەرۆكی لیژنە و ئامادەبوونی جێگری سەرۆكی لیژنە و بڕیاردەر و ئەندامان و ڕاوێژكارانی لیژنەكە كۆبووەوه.

سەرەتای كۆبوونەوەكە سەرجەم ئەو نوسراو و سكاڵا و داواكارییانەی ئاراستەی لیژنەكە كرابوون خوێندرانەوە و دوای گفتوگۆ كاری پێویستیان لەسەركرا و ئاڕاستەی لایەنی پەیوەندیدار كران بەمەبەستی بەدواداچوون و چارەسەركردنیان.

هەر لەكۆبوونەوەكەدا بڕیاری دروستكردنی لیژنەیەكی لاوەكی درا، كە لە داهاتوویەكی نزیك سەردانی پارێزگای سلێمانی بكەن و لەگەڵ بەڕێوەبەرایەتی گشتی تەندروستی ئەو پارێزگایە و ژمارەیەك لەنەخۆشخانەكان و دامەزراوە تەندروستیەكان بەسەربكەنەوە بۆ لەنزیكە ئاگاداربوون لە كارەكان و یاداشت كردنی كێشە و كەموكوڕییەكان بەمەبەستی دۆزینەوەی میكانیزمی گونجاو بۆ چارەسەركردنی كێشەكان، هاوكات لیژنەكە سەردانی فڕۆكەخانەی سلێمانی دەكەن بۆ لە نزیكەوە ئاگاداربوون لە ڕەوشی كۆگای دەرمانی ئەو فڕۆكەخانەیە بۆ دڵنیابوون لە هەبوونی مەرجە تەندروستییەكان.

بەپێی ڕاگەیەنراوەكە، دواتر كۆبوونەوەیەكی هاوبەشی نێوان هەردوو لیژنەی كاروباری تەندروستی و ژینگە و مافی بەكاربەر لەگەڵ لیژنەی كاروباری یاسایی ئەنجامدرا بەمەبەستی گفتوگۆكردن لەسەر پێشنیازی یاسای ماف و ئەركی نەخۆش، كە لەدانیشتنەكانی ڕابردووی پەڕلەمان خوێندنەوەی یەكەمی بۆ كراوە و ئاڕاستەی هەردوو لیژنەی ناوبراو كراوە بەمەبەستی ئامادەكردنی ڕاپۆرتی هاوبەش لەبارەیەوە.

ئاماژە بەوەشكراوە، دوای گفتوگۆی ئەندامان بەكۆی دەنگی ئەندامانی هەردوو لیژنە بڕیاردرا لەڕێگەی سەرۆكایەتی پەڕلەمانەوە ئەم پێشنیازی یاسایە ئاڕاستەی حكومەتی هەرێمی كوردستان بكرێت بەمەبەستی دەوڵەمەندكردن و وەرگرتنی ڕاوبۆچوونیان و دوای گەڕانەوەی لەلایەن حكومەتەوە كۆبوونەوەی هاوبەشی لیژنەی تەندروستی و لیژنەی یاسایی ئەنجام دەدرێت و ڕاپۆرتی كۆتایی ئامادە دەكرێت و ئاڕاستەی سەرۆكایەتی پەڕلەمان دەكرێت بۆ خوێندنەوەی دووەم.

بەردەوام بە لە خوێندنەوە

کوردستان