ئێمە لە تۆرە کۆمەڵایەتیەکان

وتار

داگیرکاریەک بە پێش چاوی هەموو دوونیاوە


لوقمان مستەفا

هەر وەک هەمووان ئاگادارین سوپای تور کیا بە هاوبەشی لەگەڵ هاوشێوەکانی داعش و بە پشتیوانی ناڕاستەوخۆی ناتۆ لەسەرووی هەموویشیانەوە ڕێکەوتنی بازرگانی و مامەڵەکردن بە خوێنی مناڵانی کوردەوە لە لایەن ئەمەریکاو تورکیای چاچنۆکەوە، تورکیاو چەتەکانی دەستیان کرد بە ئۆپراسیۆنێکی سەربازی چڕ،لە ژێرناو نیشانی (کانی ئاشتی) کە سەرەتا ئامانج لێی بریتی بوو لە چونە ناوخاکی سوریاوە بە قوڵای (30 بۆ ٣٢)کم لە سنوری ڕۆژئاوای کوردستانەوە، بەڵام ئەصڵی نیەتەکەیان چاوی چنۆکی و تەماعیانە بۆ داگیرکردنی تەواوی ڕۆژئاوای کوردستان،کە لە لێدوا نەکانی ئەم دواییەی ئۆردۆگان ودارودەستەکەیەوە ئەم چاوجنۆکیە پشتڕاستکرایەوە.ڕەنگە لە ئێستادا نەتوانن داگیر کاریە کەیان  بەتەواوی سەربگرێ،بەڵام ئەوە لە ستراتیجیاندایە.
تورکیا هەمیشە یەکینەکانی پاراستنی گەل کە بەشێِکی سەرەکی هێزە کانی سوریای دیموکرات پێکدەیەنن بەوە تۆمەتبار دەکات کە ئەوان بەشێکن لە پارتی کرێکارانی کوردستان کە پارتێکی کوردییە و لە قۆناغی خەباتی رزگاری نەتەوەیی ونیشتیمانیدایە دژی تورکیا، ئەمە لە کاتێکدا یەکینەکانی پاراستنی گەل ئاماژە بەوە دەکەن کە ئەوان هیچ پەیوەندییەکی راستەوخۆیان لەگەڵ پارتی کریکارانی کوردستان نیە.بەڵام لەگەڵ ئەوەشدا نەیان شاردۆتەوە کە بەڕێز( ئۆج ئالان )بە سونبوولی نەتەوەیی دەزانن.
بەڵام…. تورکیا بێ گوێدانە یاسا و بنە ما نێودەوڵەتێکان،هێرشی بەر بڵاوی دەست پێکرد،هەروەک ئاشکرایە لەپاش جەنگی جیهانی دووەمەوە بە تایبەتی لەدوای دەرکردنی بڕیاری نەتەوەیەکگرتوەکانەوە بەدەق یاساغی کردووە کە هیچ ووڵاتێک بۆی نیە دەست درێژی بکاتە سەر ووڵاتێکیترو کوشت وبڕی خەڵکەکەی بکات،بەڵام لە ئاست نەتەوەیەکی مەزڵوم و بێکەس کەڕوو لال و کوێرن.
ڕێکخروای نەتەوە یەکگرتووەکان رێکخراوێکی  جیھانی نێونە تەوەیی‌یە، کە بیرۆکەی درووست بوونی دەگەرێتەوە بۆ ١٢ ئۆگستی ١٩٤١   واتە دوای کۆتایی هاتنی جەنگی جیهانی دووەم. مەرجەکانی رێکخراوی نەتەوە یەکگرتوەکان بەمەبەست لێی:-
–  ئاشتی و ئاسایشی تێونەتەوەیی، بۆ پاراستنی ئاشتی لەسەر ئاستی جیھانیی بۆ پێشخستنی پەیوەندی‌یەکی برادەرانە لەنێونەتەوەکان.
– یارمەتی دانی نەتەوەکان بۆ کارکردن لەگەل یەکدا بۆ باشترکردنی باری گوزەرانی هەژاران ،سەرکەوتن بەسەرنەخوێندەواری ونەخۆشی وبرسیەتی یەکتر.وە بۆ ھاندانی ڕێزبۆماف وئەرکی  ببێ بە مەڵبەندێک بۆ یارمەتی دانی نەتەوەکان بۆ گەیشتن بەم ئامانجانە.
هەروەها هۆکارێکیتری ڕێگری کردن لە وجۆرە هێرشانە بۆ سەر ووڵاتان  .. دامەزراندنی جاڕنامەی گەردونی مافەکانی مرۆڤ بوو،‌کە ئامانج لێی:-
پارێزگاری له‌ مافی مرۆڤ و به‌رگری له‌ ڕوودانی شه‌ڕێکی تری وه‌ک شه‌ری دووی جیهانی، که‌ پتر له‌ 60 میلیون ئینسانی تێدا کوژرا، هه‌روه‌ها بۆ ئه‌وه‌ی جیهانێکی نوێ، له‌ سه‌ر بناغه‌ی ئازادی و یه‌کسانی و ڕێزگرتنی مافی مرۆڤ دابمه‌زرێ و ته‌نگ و چه‌ڵه‌مه‌کانی نێوان گه‌لان و ده‌وڵه‌تان له‌ ڕێگای وتوووێژ و حاکمییه‌تی یاساوه‌ چاره‌سه‌ر بکرێ.
له‌ یاسای نێو نه‌ته‌وه‌یی دا، حوکمی ئه‌م بانگه‌وازه‌، له‌ سه‌ره‌وه‌ی یاسای هه‌موو ئه‌م وڵاتانه‌یه‌ که‌ ژێره‌که‌یان ئیمزا کردوه‌.
هەروەها  گەشەسەنی بیرۆکەی دیمۆکراسی و دامەزراندنی چەندین ڕێکخراوی مرۆیی وەک ( جاڕنامەی گەردوونی مافەکانی مرۆڤ )وایان کرد تواناو هێزی ووڵاتە  چاوچنۆکەکان بۆ سەر نەتەوە ژێردەستەکان بوەستێنن. ، کە لە جاڕنامەکەدا لەمادەی – ٢١  بە سێ خاڵ ئاماژەی پێکردووە:-
١ ) ھەموو کەسیک مافی ئەوەی ھەیە کە لە کارو باری بەریوە بەرایەتی گشتی ولاتی خۆی ، بەشیوەی راستەو خو یان لە رێگەی ھەلبژاردەنی نوینەرانێک کە ئازادانە ھەلبژێردراون بەشداری بکات.
٢ ) ھەموو کەسیک مافی ھەیە بە یەکسانیی ھەلومەرجەکان، کاروباری گشتیی وڵاتی ھەبێ.
٣ ) ئیرادەی گەڵ ،بنچینە و سەرچاوەی دەسەلاتی حکومەتە. ئەم ئیرادەیە دەبی بە شێوەی ھەلبژاردن بیتە ئاراوە کە  بە پێی راستگۆیی و بەشیوەی نەھینی یان ھاو‌شیوەکانی بەریوە بچیت کە ئازادی دەنگدانی تیدا مسۆگەر دەکات.
لەگەڵ بوونی ئەم هەموو یاساو بڕیارانە کە وەک میتۆد ودەق ئامادەگی هەیە،بەڵام،، مەخابن لە ئەرزی واقع یەک بڕگەو مادەی لەبەرژەوەندی گەلانی بن دەستی ستەم لێکراوی وەک گەلی کورد لێ جێبەجێ نەکراوە    ئەوا ڕۆژئاوای کوردستان،بە پێش چاوی ئەو ڕێخراوانەو هەموو دونیاوە تورکیا وهاوپەیمانەکانی هێرشی بۆسەر خاک و دانیشتوانەکەی ڕۆژ ئاوای کوردستان دەست پێکردووە زاڵمانە کوو شت وبڕی خەڵکی سڤیل کردو تاهەنووکەش بەردەوامە، کە لەلایەن هەندێ ووڵاتانی ئەندام لەناتۆپشتیوانی دەکرێت کە هەندێ لەو ووڵاتانە خۆیان بە پارێزەر و داڕێژەری  ئەو یاساو بڕیارانە دەزانن بۆ ڕێگرتن لەدەست درێژی وپاراستنی مافی نەتەوەکان.! هێرشەکەیان هاوکار لەگەڵ هێزە بەناو ئیسلامی یە کۆنەپەرستەکانی ناوچەکەو وەکو هاوشێوەکانی داعش بە هەمووجۆرە چەکێکی مۆدیرن بەر بوونەتە گیانی خەڵکی بێتاوان. سووربوونی هێزە سەرەکی یە نێودەوڵەتی و هەرێمی یەکانیش هۆکاری سەرەکین لەم تراژیدیایەی ئێستادا کە کۆمەڵگای مرۆڤایەتیان بەرەونائارامی تەواوو بردووە و ڕوبەڕوی کوشت وبڕو قات وقڕی کردۆتەوە لەسەرانسەری دونیاو ناچەکە بەتایبەتی.

ریکلام

وتار

خۆپیشاندان مافه‌ سه‌ره‌تاییه‌كه‌ی هاووڵاتی


قوته‌یبه‌ فازڵ

 

به‌شێكی به‌رچاوی دونیا ئه‌مڕۆ به‌ بارودۆخێكی دژوار و هه‌ستیاردا گوزه‌ر ده‌كات و زۆربه‌ی وڵاتانی جیهان به‌ ده‌ست په‌تای ڤایرۆسی كۆرۆناوه‌ گیرۆده‌ن و ئابووریان تووشی داڕمان و هه‌ره‌س بوه‌ته‌وه‌ و هاوڵاتیانیش له‌ بارێكی ده‌روونی نا جێگیردا ژیان ده‌گوزه‌رێنن .

هه‌رێمی كوردستانیش سه‌ره‌ڕای بوونی ترس له‌ تارمایی كۆرۆنا هاوڵاتیان به‌ ده‌ست ده‌یان كێشه‌ی كه‌ڵه‌كه‌ بووه‌ وه‌ ده‌نالێنن له‌ سه‌رووی هه‌موو كێشه‌كانیشه‌وه‌ كێشه‌ی ئابووری پشتی هاوڵاتیانی چه‌ماندوه‌ته‌وه‌ .

نه‌بوونی ڕێگه‌ چاره‌یه‌كی گونجاو له‌ لایه‌ن حكومه‌ته‌وه‌ وای كردووه‌ كه‌ ته‌واوی خه‌ڵكی شه‌پۆلی ناڕه‌زایی ده‌رببڕن ولێره‌ و له‌وێش ده‌نگۆی گردبوونه‌وه‌ و خۆپیشاندانی مه‌ده‌نیانه‌ به‌رز بوه‌ته‌وه‌ .

خۆپیشاندان كه‌ سه‌ره‌تاییترین مافی هاوڵاتیه‌ به‌شێكه‌ له‌ مافی ( ئازادی ڕاده‌ربڕین ) و به‌شداری سیاسی، وه‌ یه‌كێكه‌ له‌ مافه‌ سروشتیه‌كانی مرۆڤ كه‌ جاڕنامه‌ی گه‌ردوونی مافه‌كانی مرۆڤ له‌ ساڵی (1948) جه‌ختی لێكردوه‌ته‌وه‌، به‌ڵام مه‌خابن له‌ هه‌ندێك وڵاتاندا ئه‌م مافه‌ به‌ ته‌واوی قه‌ده‌غه‌ كراوه‌ و له‌ هه‌ندێك وڵاتیش ڕێگری له‌ ئه‌نجامدانی ده‌كرێت .

پێویسته‌ ئه‌وه‌ش بڵێین كه‌ خۆپیشاندان جیاوازه‌ له‌ بایكۆت و شۆڕش و ڕاپه‌ڕین، خۆپیشاندان داواكردنی سه‌ره‌تاییترین مافی هاوڵاتیانه‌ و پێویسته‌ ده‌سه‌ڵاتداران به‌و چاوه‌وه‌ بۆ خۆپیشانده‌ر بڕوانن .

زۆربه‌ی كات كه‌ هاوڵاتی هیچ ده‌رفه‌تێكی نامێنێت و هیچ ڕێگه‌ چاره‌یه‌ك بۆ كێشه‌كانی نادۆزێته‌وه‌، كه‌س گوێی پێنادات ده‌یان گرفتیش یه‌خه‌ی ده‌گرێت ده‌سه‌ڵات بێباك ده‌بێت له‌ داواكانی ناچار ده‌بێت په‌نا بباته‌ به‌ر خۆپیشاندان و هاتنه‌ سه‌ر شه‌قامه‌كان به‌ مه‌به‌ستی ناچار كردنی ده‌سه‌ڵات بۆ گوێگرتن و وه‌رگرتنه‌وه‌ی مافه‌كان.

له‌ ئێستای كوردستاندا ئه‌و كێشانه‌ی تاكی كورد پێوه‌ی گیرۆده‌یه‌ گرنگترینیان له‌ چه‌ند خاڵێكی سه‌ره‌كیدا خۆی ده‌بینێته‌وه‌ :

  • نه‌بوونی مووچه‌
  • گرانی بازاڕ و شتوومه‌ك
  • نه‌بوونی داد په‌روه‌ری
  • نه‌بوونی هه‌لی كار

وه‌ چه‌ندین كێشه‌ی تریش، به‌ڵام ئه‌م چه‌ند خاڵه سه‌ره‌كیترین خاڵی داواكاری تاكی كورده‌ به‌ گشتی و خۆپیشانده‌ره‌ به‌ تایبه‌تی .

من لێره‌دا جه‌خت له‌وه‌ ده‌كه‌مه‌وه‌ كه‌ ئه‌م خاڵانه‌ داواكاری سه‌رجه‌م خه‌ڵكی كوردستانه‌ داواكاری چین و توێژێكی دیاریكراو نیه‌، داواكاری ئۆپۆزسیۆن نیه‌ دژ به‌ ده‌سه‌ڵات داواكاری تابووری پێنجه‌م  و خه‌ڵكانی پیلان گێری ده‌ره‌وه‌ نیه‌، خۆپیشانده‌رانیش داوای سه‌روه‌ری یاسا ده‌كه‌ن داوا ده‌كه‌ن یاسا بۆ هه‌مووان وه‌ك یه‌ك بێت، داوا ده‌كه‌ن سه‌روه‌ت و سامانی ئه‌م وڵاته‌ بۆ خه‌ڵكی سته‌مدیده‌ و به‌ش مه‌ینه‌تی ئه‌م هه‌رێمه‌ بێت، داوا كردنی مووچه‌ مافی مووچه‌ خۆرانه‌، دۆزینه‌وه‌ی هه‌لی كار و دامه‌زراندنی ده‌رچوانی زانكۆ و په‌یمانگاكان ئه‌ركی حكومه‌ته‌، ڕێكخستنی بازاڕو ڕێگریكردن له‌ گرانی نرخ له‌ ئه‌ستۆی حكومه‌تدایه‌ .

داواكردنی ئه‌م مافانه‌ ئه‌ركی هاوڵاتیانه‌ و جێبه‌جێكردنیش له‌ ئه‌ستۆی حكومه‌ت و ده‌سه‌ڵاتداراندایه‌، به‌ داواكردنی ئه‌م مافانه‌ هیچ كه‌س نابێته‌ خائین و وڵات فرۆش به‌ داواكردنی ئه‌م مافانه‌ هیچ كه‌س نابێته‌ ڕێگر و له‌ ڕێ لاده‌ر .

هیچ مه‌نتیق نیه‌ كه‌سانێك كه‌ داوای ئه‌م مافانه‌ ده‌كه‌ن ( ته‌خوین ) بكرێن وه‌ك گێره‌ شێوێن و ئاژاوه‌ گێر سه‌یر بكرێن، پێویسته‌ له‌ بری ته‌خوین كردن بیر له‌ ڕێگه‌چاره‌ی گونجاو بكرێته‌وه‌ بۆ داواكاریه‌كانیان كه‌ داواكاری سه‌رجه‌م چین و توێژه‌كانی شه‌قامی كوردیه‌ .

به‌ دڵنیاییه‌وه‌ گوێنه‌گرتن بۆ ئه‌و داواكاریانه‌ و ڕێگری كردن له‌ خۆپیشاندانی مه‌ده‌نیانه‌ له‌وانه‌یه‌ ئاكامی خراپ و ده‌ره‌نجامی نه‌خوازراو به‌ دوای خۆیدا بهێنێت كه‌ هه‌م ده‌سه‌ڵات و هه‌م هاوڵاتیش تیایدا زه‌ره‌رمه‌ند ببن .

 

 

بەردەوام بە لە خوێندنەوە

وتار

كۆرۆنا و حكومەت یەخەیان گرتوین


محەمەد فاتیح

تۆماركردنی زیاتر لە 100 حاڵەتی توشبون بە ڤایروسی كۆرۆنا لە سلێمانی، دەبێت وەكو حاڵەتێكی نائاسایی و كارەساتێكی مرۆیی هەژمار بكرێت، سكرتێری گشتی نەتەوە یەكگرتوەكان ئەنتۆنیۆ غۆتێرێش هۆشداریدا لەوەی قەیرانی كۆرۆنا وەكو بیانویەك بەكارنەهێنرێت بۆ سەركوتكردن و دەبێت حكومەتەكانی جیهان ئەوە بزانن، كە سەرچاوەی هەڕەشەكە ڤایرۆسەكەیە نەوەكو خەڵكی و دەبێت رێوشوێنەكان یاسایی و پێویست بن و هیچ جیاوازیەك و زیادەڕەویەكی تێدا بەدی نەكرێت.

ئەمەی ئەمڕۆ لە هەرێمی كوردستان رودەدات سەبارەت بە كۆرۆنا، زۆر لە قسەكانی سكرتێری گشتی نەتەوە یەكگرتوەكانەوە نزیكە و خەریكە گەمە بەكۆرۆنا دەكەن و تێكەڵی سیاسەتی دەكەن! دوای ئەوەی قەدەغەی هاتوچۆ لە رۆژانی جەژنی رەمەزان لە هەرێمی كوردستان راگەیەنرا، یەكەم رۆژی جەژن وەكو رۆژنامەنووسێك لەگەڵ برادەرێكم وتمان بزانین قەدەغەكە چۆن جێبەجێدەكرێت، سەرەتا  ئۆتۆمبێلێكی زۆرمان بەسەر شەقامەكانەوە بەدیكرد، دواتر كە گەیشتینە شوێنێكی گشتی و خاڵێكی پشكنین رایگرتین و ئاسایشەكە بە زەردەخەنەیەكەوە وتی “خێرە كاكە بۆ كوێ ئەچن؟، منیش وتم : با بزانین ئەم شوێنە گشتیە كراوەیە تاكو بچین خێزان و مناڵەكانمان بهێنین، ئەویش لە وەڵامدا بە پێكەنینەوە وتی: هەرچەندە قەدەغەی هاتوچۆیە، بەڵام ئەم شوێنە گشتییە كراوەتەوە و دەتوانن بڕۆن خێزان و منداڵەكانتان بهێنن!”.

كاتێكیش كە سەردانی ناو شوێنە گشتیەكەمان كرد، لە رۆژانی پێش كۆرۆنا قەرەباڵغتر بوو! برادەرێكی ترم كە نیشتەجێی ئیتاڵیایە پەیوەندی پێوەكردم و وتی “پێدەچێت كۆرۆنا رێژەكەی زۆربوبێت لە هەرێمی كوردستان و گەیشتوەتە حاڵەتی مەترسی، منیش وتم : بێگومان وایە، ئەویش لەوەڵامدا بەپێكەنینەوە وتی: بڕوابكە لای ئێوە زۆر گەورەكراوەتەوە، ئەگینا چۆن لەكاتی قەدەغەی هاتوچۆشدا رێگە بەخەڵك دەدەن هاتوچۆ بكات، لای ئێمە لەئیتاڵیا تاكو ئێستاش، كارەكان راگیراون و كەرەنتینە بەردەوامە، ئەوەی لای ئێمە كۆرۆنایە نەك ئەوەی لای ئێوە”.

چۆن سەریان لەم خەڵكەش شێواندوە و تەنانەت كۆرۆناشیان وەكو گەمەیەك بەكارهێناوە و هەندێك بەهەڕەشەیەكی راستەقینەی دەزانن و، هەندێكی تریش تەنها وەكو درۆیەكی گەورە!.

لە وڵاتە پێشكەوتوەكاندا كەمترین كەموكوڕی هەیە تاكو رەخنەی لێبگرن، بەڵام ئەگەر راپۆرت یان هەواڵ لەسەر هەر كەمتەرخەمییەك یان هەڵەیەكی سیاسی یان حكومی بڵاوببێتەوە، ئیتر ئەو وڵاتە دەخرۆشێت، تاكو ئەو كێشەیە چارەسەر دەكرێت، بەڵام حكومەتەكەی خۆمان وەكو كەڕ و ڵاڵ و نابینا وایە، رۆژی بە دەیان وتار و هەواڵ و راپۆرت لەسەر كەموكوڕی و كەمتەرخەمی و كێشە بڵاودەكەینەوە، كەچی دەڵێی نە بایان بینیوە نە باران!. ئێمە هەر بە تەنها كۆرۆنا یەخەی نەگرتوین، بەڵكو حكومەتی هەرێمیش دەستی ناوەتە بیناقاقامانەوە و خەریكە بمانخنكێنێت!، تاكو ئێستا هەر بیری لەوە نەكردوەتەوە چارەسەرێك بۆ هاونیشتمانیانی هەرێمی كوردستان بدۆزێتەوە، لەكاتێكدا رێژەی كۆرۆنا بەشێوەیەكی بەرچاو زیادی كردوە و دەبێت قەدەغەی هاتوچۆ بە جدی جێبەجێبكات، ئەی بژێوی و ژیانی هاونیشتمانیان ؟ ئەی حاڵ و گوزەرانی خەڵكی؟ ئەی خۆ ئەبێت چارەسەرێكتان پێبێت؟ ئێمە هاونیشتمانیانی هەرێمی كوردستانین و ئێوەش كاربەدەست و بەرپرسمانن، ئەی خۆ ناچین داوا لە ئەفریقا بكەین چارەسەریەكمان بۆ بدۆزێتەوە، چارەسەر دەبێت لای ئێوەبێت، هەروەك چۆن رازی نابن ئارامی هەرێم تێكبدەین، دەبێت ئێوەش ئاوا ئەو ئارامیە بپارێزن!. تاكو ئێستا دڵنیانەبوین و نەمانزانی، كۆرۆنای هەرێم حەقیقەتە یان گەمەی سیاسی و وەهم و خەیاڵە! ئای خوایە چۆن گیرمان خواردوە بە دەست كۆرۆنا و حكومەت و پەرلەمان و كاربەدەستان و بەرپرسانی هەرێمی كوردستانەوە!.

بەردەوام بە لە خوێندنەوە

وتار

ژەهر….. ئەوجا ئۆنلاینەکەی


رێبین بابەجان

سەرەتا پەرژینێکی بەرز لە نێوان بەڕێزتان و بێ ڕێزییەکانی ناو ئەم نووسینە بێت.

ماوەیەک لەمەوبەر، نیوەشەو بوو، لە فەیسبووک پیاوێک نووسیبووی بەرەبەیان خۆم دەکوژم. تێبینیم کرد کە تەنها نیو سەعاتێک بوو پۆستەکەی دانابوو بەڵام زیاد لە سێ هەزار کۆمێنتی بۆ هاتبوو!

من یەکسەر، بێ ئەوەی بزانم بە جدییەتی یان هەر هەڕەشەیە، کۆمێنتێکم بۆ نووسی پاڵپشت بە ئایەتێکی قورئانی لەسەر سزای خۆکوشتن، بە هیوای ئەوەی پاشگەزی بکاتەوە. تەنانەت شێوازێکی ریپۆرت کردن هەیە لە فەیسبووک کە تایبەتە بە مەترسی خۆکوشتن، ئەوەشم کرد.

ئینجا کە دەستم کرد بە کۆمێنت خوێندنەوە، تووشی شۆکێکی گەورە بووم و کەوتمە دۆخێکی دەروونی خراپەوە. ئەو شەوە تا نزیکەی کاتژمێر ٤ی بەرەبەیان بە سەدان کۆمێنتم خوێندەوە، باوەڕتان هەبێت کە ئەم بینی سەرو ٩٠ لە سەدی کۆمێنتەکان هاندان بوون بۆ خۆکوشتنی کابرا، خەریک بوو تێک ئەچووم!!!

“ـ ئەگەر پیاو بیت پەشیمان نابیتەوە.
ـ دەی بزانین وەکو حاکمەکە پیاویت.
ـ کاکە بۆ وا خستووتە درەنگ؟ خەومان یەت.
ـ من خەفەرم ئەمشەو، ناکرێت پێشی بخەیت؟”

بە دەیان شێوازی جیاواز هانیان دەدا بۆ خۆکوشتن!
بۆ زانیاریتان ئەسڵەن هۆکاری هەڕەشەی خۆکوشتنەکەشی هەر گاڵتەکردنی خەڵک بوو پێی بە هۆی ناونانی منداڵەکەیەوە!

پاش تێپەڕبوونی وادەی دانراو بۆ خۆکوشتنەکە، خوا رەحمی کرد و ئەو بەڕێزە خۆی نەکوشت. جا من نازانم پەشیمان بوویەوە یان هەر خۆی لە ئەسڵدا بە تەمان ئەبوو خۆی بکوژێت بەڵام خۆنەکوشتنەکەی ئەو خەڵکەی ئەوەندەی تر هار کرد و دوور لە ڕووتان وەک سەگ دەستیان کرد بە رشانەوە بە کابرادا! ڕێک ئەتگووت بلیتیان کڕیوە بە تەماشاکردنی فلیمی خۆکوشتنەکەی و پارەکەیان فەوتاوە!!

هێندە کۆمێنی ڕیسواکردن و جنێودان بۆ ئەو کەسە نووسرا، باوەڕتان هەبێت چەند لە پێش وادەکە ئەترسام خۆی بکوژێت، دە ئەوەندە لە دوای وادەکە ئەترسام لە داخی ئەو کۆمێنتانە خۆی بکوژێت!

هاوڕێیانی ئازیز،
بە بۆچوونی من ئیحتمالە کۆمێنتی جوان دوو ڕوویی و خۆدەرخستن و ماستاو و موجامەلەی تێدابێت، بەڵام ئەو کۆمێنتانەی کە بێڕێزیکردنن و هاندانن بۆ خراپە، هەمیشە دەروازەیەکن بۆ بینینی ناخی راستەقینەی کەسەکان. جا ئەگەر ئەم بۆچوونەم ڕاست بێت ئەوا قوڕێکی خەست بۆ ئەم میللەتە گیراوەتەوە، هەر بۆ خۆشمان نا بەڵکو بۆ چەندین نەوەی داهاتووش.

ئازیزان،
من باسی ئەوانە ناکەم کە لەسەر ناکۆکی سیاسی و کۆمەڵایەتی و ئاینی بە شێوازێکی توند لەگەڵ یەکتر ئەدوێن، مەبەستی من دەروون نەخۆشەکان. ئاخر کە پەیجێک هەواڵی دزێک دائەنێ، بۆ زۆرینەی کۆمێنتەکان دەست خۆشی لە دزەکە بکەن، یان کە کابرا دەستدرێژی کردۆتە سەر کچێک چۆن بە سەدان وەحشی پاساوی بۆ بهێننەوە، ئەی کە کابرا تەعزێیەتی، ماڵی وێران بووە، کاسپییەکەی زەرەری کردووە، یان قسەیەکی پەروەردەیی کردووە چۆن ئەبێت یەک دنیا (زیندەوەری_باش_پەروەردە_نەکراو) جنێو و ئیمۆجی پێکەنینی بۆ دابنێن، ئەمە لە کوێی بەها و ڕەوشتی بەرزدا جێی دەبێتەوە؟!

خۆشەویستان،

وەک لەو کۆمێنتان ئەی سەرەوە تێبینیتان کردووە، زۆربەی کات کۆمێنتە بێڕێزییەکان پێکەنیناوی دەنوێنن، بەڵام دەبێت بیرمان بێت لە ناخدا زەهراوین.
زۆر جار حەزێکمان تێدا دروست دەبێت کە (هەزەلی) بین، بەڵام هەزەلی بوون ئەوە ناهێنێت خەڵک بخەینە گریان، مەگەر ئەو کەسانەی کۆمێنتی ژەهراویی ان بۆ دەنووسین دایک و باوک و کەس و کار و هاوڕێیان نییە. باوەڕتان هەبێت زۆربەی جار کۆمێنتە زەهراوییەکان ئازاری کەسەکە نادات بەڵام منداڵەکانی تووشی گرێ و گۆڵی دەروونی دەکات، جا زەردەخەنەیەک ئەوە دەهێنێت؟! تکایە با هەوڵ بدەین خۆمان و ئازیزانمان نەکەونە ئەو تەڵەیەوە، ئەگەر کەوتیشن لە تەڵەکە دەریان بهێنین نەک بە لایک و کۆمێنت خۆشمان بچینە پاڵیان.

هیوادارم پارێزراو بن لە هەموو ژەهرێک و لە ڤایرۆسە خراپەکانیش، لە حەجمی کۆڤید نۆزدەوە تا حەجمە گەورەکەی، ئەوەی کە بەقەدەر زەلامێکە…

بەردەوام بە لە خوێندنەوە

کوردستان