ئێمە لە تۆرە کۆمەڵایەتیەکان

ئابوری

“لە پاڵێوگەكانی هەرێمەوە نەوت بۆ عیراق دەڕوات”
بڕیارەكەی حكومەتی هەرێم بۆ دابەشكردنی نەوت جێبەجێ‌ نەكراوە

خەڵك – بەشی هەواڵ
حكومەتی هەرێم لە دوو كۆبوونەوەدا باسی لە پێدانی بەرمیلێك نەوتی سپی كردووە بۆ ماڵان و تا ئێستا بڕیارەكە جێبەجێ‌ نەكراوە، سەرۆكی لیژنەی وزە و سەرچاوە سروشتیەكانی ئەنجوومەنی پارێزگای سلێمانیش دەڵێت: “تاكەی ئێمە چاوەڕێی حكومەتی عیراقی بین بۆ پێدانی بەرمیلێك نەوت”.

وەرزی سەرما نزیك دەبێتەوە، هێشتا ئەو بەرمیلە نەوتە دەست بە دابەشكردنی نەكراوە، كە حكومەتی هەرێم لە دوو كۆبوونەوەی خۆیدا بڕیاری لەسەردا، حكومەتی عیراقیش بە بیانوی جیا جیا نەوتی سپی ڕەوانەی هەرێم ناكات.

كەریم عەلی، سەرۆكی لیژنەی وزە و سەرچاوە سروشتیەكانی ئەنجوومەنی پارێزگای سلێمانی بە (خەڵك)ی ڕاگەیاند، هەفتەی پێشوو لەگەڵ پارێزگاری سلێمانی كۆبووینەوە لەبارەی پێدانی ئەو بەشە نەوتەی، كە بڕیارە لە عیراقەوە بۆ هەرێم بێت، ئەویش هیچ كاتێكی دیاری نەكرد.

وتیشی، “چاوەڕوانی لە حكومەتی عیراق و ڕێكارەكانی دابەشكردن و كێشەی سیاسی لەگەڵ هەرێم و بارودۆخی ڕێگاوبان ساڵانە دەكرێنە بیانو بۆ ئەوەی بەشە نەوتی هەرێم ڕەوانە نەكرێت”.

ڕاشیگەیاند، هەر دوو پاڵاوگەی كەڵەك و بازیان نەوتی عیراق دەپاڵێون و ڕەوانەی عیراقی دەكەنەوە، دەبوو حكومەتی هەرێم كاری لەسەر ئەوە بكردایە ئەو نەوتەی هاووڵاتیانی لە ڕێگەی ئەو دوو پاڵاوگەیەوە دابین بكردایە، كە لە توانایدایە دابینی بكات.

ئاماژەی بۆ ئەوەشكرد، لە ئێستادا عیراق دەستی كردووە بە دابەشكردنی نەوتی سپی بۆ پارێزگاكانی ناوەڕاست و باشووری عیراق، بەڵام تا ئێستا هیچ بڕێك بۆ شارەكانی هەرێم ڕەوانە نەكراوە.

ئابوری

وتەبێژی حكومەت بۆ (خەڵك) باسی مووچە و خانەنشینی دەكات

خەڵك- بەشی هەواڵ
وتەبێژی حكومەتی عیراق ڕایگەیەنێت، لە سەرەتای دەستپێكردنی تەوژمی خۆپیشاندانەكان، حكومەت لەسەر چەند ڕێڕەوێك دەستیكردووە بە كاركردن بۆ چاكسازی، بە تایبەتیش لەڕووی داڕشتنی ئەو یاسایانەی، كە پەیوەندییان بە بنەما و كرۆكی پڕۆسەی سیاسییەوە هەیە لە وڵات، وێڕای خستنەگەڕی هەوڵەكانی بۆ كەمكردنەوەی مووچەی بەرپرسە باڵاكان.

سەعد حەدیسی، وتەبێژی حكومەتی عیراق بە (خەڵك)ی ڕاگەیاند، “لە چوارچێوەی چاكسازییەكاندا، حكومەتی عیراق دەستیكردووە بە داڕشتنی پرۆژە یاسایەك بۆ هەمواركردنی یاسای هەڵبژاردنەكان و لەگەڵ داڕشتنی یاسایەك بۆ چاودێریكردنی سەرچاوەی موڵك و سامانی گەورە بەرپرسان، لەگەڵ ڕەوانەكردنی پڕۆژە یاسای خانەنشینی یەكگرتوو، كە هەلی زیاتری كاركردن و دامەزراندن بۆ لاوان و بێكاران و خاوەن بڕوانامەكان دەڕەخسێنێت”.

بە وتەی سەعد حەدیسی، “پرۆژە یاسای خانەنشینی یەكگرتوو، كە ئێستا لەبەردەستی پەڕلەمانە ئەگەر پەسەند بكرێت، دەبێتە مایەی چارەسەكردنی زۆرێك لە كێًشەكانی پەیوەست بە بێكاری و دەبێتە مایەی ڕەخساندنی هەلێكی گەورە بۆ دامەزراندنی ژمارەیەكی زۆری هاووڵاتیان”.

وتەبێژی حكومەتی عیراق، ئاماژەی بە پێكهێنانی چەند لیژنەیەكی تایبەتیش كرد،”بۆ كەمكردنەوەی مووچەی گەورە بەرپرسان بۆ نیو هێندەی ئێستای مووچەكانیان، لەگەڵ ڕەوانەكردنی كاندیدەكان بۆ ئەنجوومەنی ڕاژەی فیدڕاڵی، كە هەموو پڕۆسەكانی تایبەت بە وەزیفەی گشتی و مەرجەكان و پێوەرەكان و میكانیزمەكانی پێشكەشكردنی بۆ ئەنجوومەنەكە لەخۆدەگرێت و ناوی ئەو كاندیدەكانیش لەلایەن پەڕلەمانەوە پەسەندكراوە”.

هەر لە چوارچێوەی چاكسازییەكانی حكومەتی عیراق، حەدیسی وتی، “هەوڵەكانیش بۆ نەهێشتنی دوو مووچەیی یان زیاتر لەلایەن حكومەتەوە دەستیپێكردووە، لەڕێی زامنكردنی دابەشكردنی داهاتەكان بەسەر عیراقییەكاندا، بەهەمان شێوە لەڕێی گەڕاندنەوەی ئەو پارانەی لەڕێی یاسا نوێیەكانەوە دەستەبەر دەكرێن، كار بۆ دانانی سندوقێك دەكرێت، كە لێوەی مووچە بۆ هەموو ئەوانە دەبڕدرێتەوە، كە هیچ داهاتێكیان نییە و سەرچاوەی دابینكردنی بژێوی ژیانیان بۆ نەڕەخساوە”.

بەردەوام بە لە خوێندنەوە

ئابوری

حكومەتی هەرێم بڕیارێك لە بەرژەوەندی فەرمانبەران دەردەكات

خەڵك- بەشی هەواڵ
حكومەتی هەرێمی كوردستان لە ڕێگەی سێ وەزارەتەوە، مۆڵەتی خوێندنی فەرمانبەران ڕێكدەخاتەوە و ڕاوێژكارێكی حكومەتیش چەند زانیارییەك لەمباریەوە ئاشكرا دەكات.

بەپێی فەرمانێكی سەرۆكایەتی ئەنجوومەنی وەزیرانی كوردستان، كە لە 27ی 10 دەرچوووە، بڕیاری ئەوە دراوە، كە لە ڕێگەی هەرسێ وەزارەتی پلاندانان، دارایی، خوێندنی باڵا و بە هەماهەنگیی سەرۆكایەتی ئەنجوومەنی وەزیران، ڕێنمایی نوێ بۆ مۆڵەتی خوێندن دەربكرێت.

جەختیش كراوەتەوە، ئەو لیژنەیە ڕێنمایی و میكانیزمی تایبەت بە چۆنیەتیی پێدانی مۆڵەتی خوێندن لەبەر ڕۆشنایی یاسا و ڕێنماییە كارپێكراوەكان دەردەكات.

نەزهەت ساڵح، ڕاوێژكار لە سەرۆكایەتی ئەنجوومەنی وەزیرانی هەرێمی كوردستان بە هەفتەنامەی (باس)ی ڕاگەیاندووە، ئەنجوومەنی وەزیران لە ڕێگەی وەزارەتەكانی خوێندنی باڵا و دارایی و پلاندانان، ڕێنمایی نوێ دادەڕێژێتەوە، بۆ ئەوەی میكانزمی تازە بۆ پێدانی مۆڵەتی خوێندن پەیڕەو بكرێت.

ڕوونیشی كردەوە، تاوەكو دەرچوونی میكانزم و ڕێنمایی نوێ، مۆڵەتی خوێندن بە هەموو جۆرێك ڕاگیراوە.

بەپێی زانیارییەكانی (باس) ئەو فەرمانبەرانەی بۆ وەرزی خوێندنی ئەمساڵ مۆڵەتیان پێدراوە، كێشەیان نابێت و مۆڵەتیان پێ دەرێت.

ئەنجوومەنی وەزیران پێشووتر بڕیاری دابوو، بۆ پێدانی مۆڵەتی خوێندنی فەرمانبەران، بەپێی ماددە 50ی یاسای خزمەتی شارستانی مامەڵە بكرێت، كە بەپێی ماددەكە، وەزیری پەیوەندیدار بە ڕەزامەندی وەزیری دارایی، بۆی هەیە بۆ ماوەی دوو ساڵ بە مووچەی تەواو مۆڵەتی خوێندن بداتە فەرمانبەر، بەو مەرجەی سێ ساڵ خزمەتی تەواوی كردبێت، هەروەها ئەوەی پێنج ساڵ خزمەتی هەبێت بۆی هەیە دوو ساڵی تریش مۆڵەت وەربگرێت، مۆڵەتەكەشی بۆ خزمەتی خانەنشینی و خزمەتەكانی تر ئەژمار دەكرا.

بەردەوام بە لە خوێندنەوە

ئابوری

حكومەتی عیراق نەوت بەبێ‌ بەرامبەر دەدات بە ئاوارەكان

خەڵك- بەشی هەواڵ

تالب حسێن، بەرێوەبەری بەرهەمەكانی نەوت لە عیراق ڕایگەیاند، مانگانە 50 لیتر نەوت دەنێرن بۆ ئاوارەكان و بڕی 200لیتر نەوتیش دەدەن بەو كەسانە بەبێ‌ بەرامبەر.

ناوبراو ئاماژەی بەوەكردووە، ئەو ئاوارانەی لە كەركوك و موسڵ و شارەكانی هەرێمی كوردستانن، بڕی 200 لیتر نەوتیان بۆ دەنێرن، بەبێ‌ وەرگرتنی پارە.

هەروەها مانگانە بڕی 50 لیتر نەوتی دیكەیان بۆ دەنێرن، بەشێوەی پاڵپشتیكراوی حكومەت.

بەردەوام بە لە خوێندنەوە

کوردستان