ئێمە لە تۆرە کۆمەڵایەتیەکان

ئابوری

حكومەتی هەرێم بڕیارێكی بۆ دامەزراندن دەركرد

خەڵك- بەشی هەواڵ
كۆبوونەوەی ئەنجوومەنی وەزیرانی هەرێمی كوردستان كۆتایی هات و چەند بڕیارێكی دەركرد، كە یەكێك لە بڕیارەكان تایبەت بوو بە دامەزراندنی سێ یەكەمەكانی زانكۆ حكومییەكان بۆ ساڵی خوێندنی ٢٠١٥-٢٠١٦ لە دامەزراوەكانی هەرێم.

حكومەتی هەرێمی كوردستان لە ڕاگەیەنراوێكدا ئاماژەی بەوەكردووە، كە بڕیاریان داوە بە دامەزراندنی سێ یەكەمەكانی زانكۆ حكومییەكان بۆ ساڵی خوێندنی ٢٠١٥-٢٠١٦ لە دامەزراوەكانی هەرێم.

دەقی ڕاگەیەنراوەكە:
ئەمڕۆ چوار شەممە ٢٠١٩/١٠/١٦ ئەنجوومەنی وەزیرانی هەرێمی كوردستان بە سەرپەرشتی مەسرور بارزانی، سەرۆكی ئەنجومەنی وەزیرانی هەرێمی كوردستان و ئامادەبوونی قوباد تاڵەبانی، جێگری سەرۆكی ئەنجومەن كۆبووەوە.

لە سەرەتای كۆبوونەوەكەدا، گفتوگۆ دەربارەی بابەتی دامەزراندنی سێ یەكەمەكانی زانكۆ حكومییەكان كرا بۆ ساڵی خوێندنی ٢٠١٥-٢٠١٦. لەمبارەیەوە دوای ئەوەی ئارام محەمەد وەزیری خوێندنی باڵا و توێژینەوەی زانستی راپۆرتێكی پێشكەشكرد. ئەنجومەنی وەزیران بڕیاریدا بە دامەزراندنیان وەك قۆناخی یەكەمی دامەزراندنی یەكەمەكان.

دواتر بێگەرد تاڵەبانی وەزیری كشتوكاڵ و سەرچاوەكانی ئاو پڕۆژەیەكی دەربارەی بەبازاڕكردنی ناوخۆیی گەنمی بەرهەمهێنراو لە هەرێمی كوردستان خستەڕوو. سەرۆكی ئەنجومەنی وەزیران ئاماژەی بەوەدا كە گرنگیدان بە كەرتی كشتوكاڵ یەكێكە لە ئەركە لە پێشینەكانی كارنامەی كابینەی نۆیەمی حكومەتی هەرێمی كوردستان بە جۆرێك كە پێویستە كار لە سەر دابینكردنی ئاسایشی خۆراك بكەین و هەوڵیش بدەین بازاڕ بۆ بەرهەمە كشتوكاڵییە ناوخۆییەكانی هەرێمی كوردستان بدۆزینەوە. ئەنجومەنی وەزیران لەمبارەیەوە بڕیاریدا چەند وەزارەت و فەرمانگە و دەستەیەكی حكومەت رابسپێرێت بۆ لێكۆڵینەوەی زیاتر لەبارەی پرۆژەكە بۆ ئەوەی بڕیاری پێویستی لەبارەوە بدرێت.

ئەنجومەنی وەزیران هەروەها گفتوگۆی دەربارەی چەند گرفتێكی پەیوەندیدار بە وەزارەتی پیشەسازی و بازرگانی كرد كە لەلایەن كەمال موسلیم وەزیری پیشەسازی و بازرگانی پێشكەش كراو لایەنە پەیوەندیدارەكان راسپێردران بۆ چارەسەركردنیان.

لە كۆتاییدا وەزیری هەرێم بۆ كاروباری پەرلەمان ڤاڵا فەرید كورتەیەكی دەربارەی پرۆژە یاسای ماددە هۆشبەرەكان پێشكەشكرد. وەزیرە پەیوەندیدارەكان راسپێردران لە داهاتوویەكی نزیكدا را و سەرنجی خۆی دەربارەی ئەو ماددانە بخەنەڕوو كە پەیوەندیدارن بە كاروباری وەزارەتەكانیان تا لە نزیكترین دەرفەتدا بنێردرێت پەرلەمان بكرێت.

ئابوری

یاسایەكی پەڕلەمان ناڕەزایی لێ‌ دەكەوێتەوە
خەڵك؛ بڕی پارە و وردەكاری تاپۆكردنی خانووە زیادەڕۆكان بڵاودەكاتەوە

خەڵك – بەشی هەواڵ
یاسای تاپۆكردنی خانووە زیادەڕۆكان، كە لە پەڕلەمانی كوردستان دەرچووە ناڕەزایی هاووڵاتیانی لێ‌ دەكەوێتەوە و بە “نادادپەروەرانە” وەسفی دەكەن و ئەندامێكی لیژنەی كاروباری یاسایی لە پەڕلەمانی كوردستان ڕایدەگەیەنێت، یاسای تاپۆكردنی زیادەڕۆكان تەنها بۆ خانووە یان ئەوانەی هێشتا تەواو نەكراون، واتە بۆ زەوی نیە.

ڕۆژان محەمەد كەریم، ئەندامی لیژنەی كاروباری یاسایی لە پەڕلەمانی كوردستان بە (خەڵك)ی ڕاگەیاند، بەپێی یاسای تاپۆكردنی خانووە زیادەڕۆكان، تەنها لەناوچە زیادەڕۆكان خانووی تەواوكراو یان ئەوانەی هەیكەلن و بەشێكیان تەواو نەكراون دەگرێتەوە و زەوی ناگرێتەوە.

وتیشی، “بەرامبەر تاپۆكردنی ئەو خانووە زیادەڕۆیانە لە پارێزگاكان بڕی (15-30) هەزار و شارۆچكەكان (10-15) هەزار و شارەدێیەكان لە نێوان (5-8) هەزار دینار بۆ هەر مەتر دووجایەك دیاریكراوە، هەروەها لە یاساكەدا ڕەچاوی هەندێك شوێن و یەكەی نیشتەجێبوون كراوە، كە پێشتر لەلایەن ڕژێمی پێشووە ڕووخێنراوە یان بەهەر هۆكارێكی دیكە زیانیان بەركەوتووە و بۆتەوە بە زەوی، ئەوانە بەهەمان شێوە تاپۆ دەكرێن”.

ڕاشیگەیاند، ئەو زەویانەی لە گەڕەكێكدا هەموو بۆتە خانوو تەنها ئەو زەویە یان چەند پارچە زەویەك ماوە، ئەگەر خاوەنەكەی بەڵگەنامەی پێویستی لەسەری هەبوو، كە زەویەكەی بەناوەوەیە ئەوا بۆ تاپۆكردنی ئەو زەویە ڕێژەی 50%ی نرخی ڕاستەقینەی لێ وەردەگیرێت، ئەوجا تاپۆ دەكرێت.

لای خۆشیانەوە ژمارەیەك هاووڵاتی لە سلێمانی بۆ (خەڵك) ڕایانگەیاند، كە لە ساڵانی سەردەمی قەیرانی دارایی زەوییان لە ناوچە بێ‌ تاپۆكان كڕیوە بەو پێیەی لە شارەوانی (فۆڕم)ی هەیە و بەهۆی قەیرانەوە نەتوانراوە بیكەن بەخانوو، بەڵام لە یاسا نوێیەكەدا تاپۆكردنی زەویەكان نایانگرێتەوە.

ڕاشیانگەیاند، كە ئەو زەویانە كەوتوونەتە سنووری شارەوانیەكان و هیچ كێشەیەكیان نییە و لە شارەوانی فۆڕمیان بۆ كراوە و بەناویانەوەیە، بەڵام یاسا نوێیەكە ڕێگەیان پێ‌ نادات تاپۆی بكەن و ئەوانەشی لەناو گەڕەكێكن و تاپۆكردنەكە دەیانگرێتەوە پارەیەكی زۆر وەردەگرن بەرامبەر تاپۆكردنی، كە 50%ی نرخی زەویەكەیە.

دەشڵێن: “ئەوە نادادپەروەریە بەرامبەرمان، چونكە ئەگەر زەویەك لەو ناوچانە بایی 20 هەزار دۆلار (2 دەفتەر) بێت دەبێت بۆ تاپۆكردن بڕی (یەك دەفتەر دۆلار) بدەین”.

بەردەوام بە لە خوێندنەوە

ئابوری

پەڕلەمان بڕیار لەسەر هەڵوەشاندنەوەی مووچەی پلەباڵاكان دەدات

خەڵك- بەشی هەواڵ
سەرۆكی پەڕلەمانی عیراق ڕایدەگەیەنێت، سبەینێ‌ دەنگ دەدرێت لەسەر سێ‌ یاسا و ئیمتیازی دارایی پلەباڵاكان هەڵدەوەشێنرێنەوە.

محەمەد حەلبوسی، سەرۆكی پەڕلەمانی عیراق لە كۆبوونەوەی ئەمڕۆی پەڕلەمان ڕایگەیاند، كە سبەینێ‌ پەڕلەمان كۆدەبێتەوە بۆ پەسەندكردنی سێ‌ پڕۆژە یاسای.

ڕاشیگەیاندووە، كە دەنگ دەدرێت لەسەر یاسای هەڵوەشاندنەوەی ئیمتیازی دارایی بەرپرسانی دەوڵەتی عیراق و یاسای بەدەستهێنانی نایاسایی و هەمواركردنەوەی یاسای دەستەی دەستپاكی.

جەختیشی كردۆتەوە، كە كاتی لێپرسینەوە لە وەزیرانی پیشەسازی و كانزاكان لەگەڵ كشتوكاڵ دیاری دەكرێت.

بەردەوام بە لە خوێندنەوە

ئابوری

حكومەتی هەرێم بڕیارێكی دەربارەی فەرمانبەرانی گرێبەست دەركرد

خەڵك – بەشی هەواڵ
ئەنجوومەنی وەزیرانی هەرێمی كوردستان ڕایدەگەیەنێت، پشتیوانی لە پڕۆژەی چاكسازی وەزارەتی پێشمەرگە دەكات و دەشڵێت: “هەرێم سازش لە ماف و دەسەڵاتە دەستوورییەكان ناكات”، هاوكات بڕیاریدا بە پێكهڵنانی لیژنەیەك بۆ بەدواداچوونی بابەتی كارمەندانی گرێبەست.

ئەنجومەنی وەزیرانی هەرێمی كوردستان لە ڕاگەیەنراوێكدا، كە وێنەیەكی دەست (خەڵك) كەوتووە ڕایگەیاندووە، ئەمڕۆ چوار شەممە 13-11-2019 ئەنجوومەنی وەزیران بە سەرپەرشتی مەسرور بارزانی، سەرۆكی ئەنجوومەنی وەزیران و ئامادەبوونی قوباد تاڵەبانی، جێگری سەرۆكی ئەنجوومەن كۆبووەوە.

ڕاشیگەیاندووە، شۆڕش ئیسماعیل وەزیری كاروباری پێشمەرگە ڕاپۆرتێكی دەربارەی پێكهاتەی وەزارەت و میلاك و خەرجییەكان و هەنگاوەكانی پڕۆژەی چاكسازی لە بواری كاروباری پێشمەرگە خستەڕوو، ئەنجومەنی وەزیران بڕیاریدا لیژنەیەك بە سەرۆكایەتی سەرۆكی ئەنجوومەنی وەزیران و ئەندامێتی جێگری سەرۆك وەزیران و وەزیرانی ناوخۆ و كاروباری پێشمەرگە و دارایی و ئابووری بۆ بەدواداچوونی بڕگەكانی ڕاپۆرتەكەی وەزارەتی پێشمەرگە پێكبهێنرێت و دواتر بڕیاری پێویستی لەبارەوە بدرێت.

لە سەر پاراستنی دەسەڵات و مافە دەستوورییەكانی هەرێمی كوردستان ئاماژە بۆ ئەوەشكراوە، كە بە هیچ شێوەیەك سازشیان لە سەر ناكرێت.

ئەنجوومەنی وەزیران بڕیاریدا لیژنەیەك بۆ بەدواداچوونی بارودۆخی كارمەندانی گرێبەست پێكبهێنێت، بۆ ئەوەی دواتر دەرئەنجامی بەدواداچوونەكە بخاتە بەردەم ئەنجوومەنی وەزیران.

ئەمە لەكاتێكدایە، كە ئەمڕۆ پەڕلەمانی كوردستان كۆبووەوە و خوێندنەوە بۆ پڕۆژە بڕیاری تایبەت بە هەمیشەیی كردنی فەرمانبەرانی گرێبەست كرا و لە ڕاگەیەنراوێكیشدا دەڵێت: “وەڵامی حكومەت ئەرێنی بووە لەبارەی لەئەستۆگرتنی پاشخانی دارایی و دوو هەفتە دەدرێتە حكومەت بۆ وەڵامدانەوەی”.

بەردەوام بە لە خوێندنەوە

کوردستان