ئێمە لە تۆرە کۆمەڵایەتیەکان

ئابوری

تەمەنی خانەنشینی فەرمانبەران كەمدەكرێتەوە
(خەڵك) زانیاری نوێ‌ لەسەر یاسای خانەنشینی ئاشكرادەكات


خەڵك- بەشی هەواڵ
شانەی بەدواداچوونی حكومی لە حكومەتی فیدڕاڵ ڕایدەگەیەنێت، ئەنجوومەنی وەزیران پێشنیاری هەمواری یاسای خانەنشینی لەڕووی تەمەنەوە بەرزكردۆتەوە، تا تەمەنی یاسایی خانەشینی بۆ پیاوان و ژنان بكرێتە 60 ساڵ، ئەندامێكی لیژنەی دارایی پەڕلەمانی عیراقیش، لایەنە ئەرێنی و نەرێنییەكانی ئاشكرا دەكات.

شیروان میرزا، ئەندامی لیژنەی دارایی لە پەڕلەمانی عیراق لە لێدوانێكیدا بۆ (خەڵك) ڕایگەیاند، “بەپێی یاسای خانەنشینی یەكگرتوو لە عیراق، تەمەنی یاسایی خانەشینی 63 ساڵە، هەر فەرمانبەرێك تەمەنی بگاتە 63 ساڵ لەلایەن حكومەتەوە خانەنشین دەكرێت، هەروەها لەسەرو 50 ساڵیشەوە، فەرمانبەر ئەگەر خزمەتی 15 ساڵی هەبێت دەتوانێت داوای خانەنشینی بكات بۆخۆی، واتا لە 63 ساڵیدا ناچارییە و لە سەروو تەمەنی 50 ساڵیش ئارەزوومەندانەیە، بەڵام جیاوازی لەو مووچەیە هەیە، كە وەریدەگرن”.

بە وتەی ئەندامەكەی لیژنەی دارایی پەڕلەمانی عیراق، “پێشنیاری هەهواركردنی یاساكە بۆ كەمكردنەوەی تەمەنی خانەنشین بوون بۆ 60 ساڵ، لێكەوتەی ئابوری هەیە، بەو پێیەی بارگرانی لەسەر دەزگای خانەنشینی زیاد دەكات، تەمەنی خزمەتی هاووڵاتی بۆ حكومەت كەمدەكاتەوە، بەو پێیەی هاووڵاتی كاتێك لە تەمەنی 23 ساڵیدا دادەمەزرێت و لە تەمەنی 63 ساڵیدا خانەنشین دەكرێت، ئەو كاتە 37 ساڵ خزمەت دەكات، ئەمەش وادەكات خانەنشین زیاد ببێت و لە هەمان كاتدا خزمەت كەمدەبێتەوە، بۆیە بارگرانی لەسەر حكومەت و دەزگای خانەنشینی زیاد دەكات”.

شیروان میرزا دەڵێت: “هەرچەندە سندوقی دراوی نێودەوڵەتیش سەرنجی لەسەر ئەم پێشنیارە هەیە، بەڵام گەر حكومەت بەرنامەی هەبێت لەجێی خانەنشینەكان كەسانی نوێ‌ دابمەزرێنێت، وەك هەوڵێك بۆ كەمكردنەوەی ڕێژەی بێكاری لە وڵات، ئەوا پێدەچێت پێشنیاری هەمواری یاسای خانەنشینی لەلایەن پەڕلەمانەوە دەنگی لەسەر بدرێت و پەسەند بكرێت”.

هاوكات بەپێی زانیارییەكانی (خەڵك) لە پڕۆژە هەمواری یاسای خانەنشینی یەكگرتووی عیراق پێشنیار كراوە كەمترین مووچەی خانەنشینی 600 هەزار دینار بێت.

ئابوری

نرخی نەوت دابەزی


خەڵك-بەشی هەواڵ

 

نرخی‌ نەوت لەبازاڕەكانی‌ جیهان بەراورد بە ڕۆژانی ڕابردوو دابەزینی تۆمار كرد.

ئاژانسەكانی جیهان بڵاویانكردەوە، نرخی نەوت بۆ ئەمڕۆ دوو شەممە، 1ی‌ حوزەیرانی 2020 دابەزیوە، بەشێوەیەك نرخی‌ نەوتی برێنت بە 35 دۆلار و 55 سەنت لە بازاڕەكانی جیهان مامەڵەی پێوەكراوە و هاوكات نرخی بەرمیلێك نەوتی خاوی ئەمریكیش بە 35 دۆلارو 20 سەنت مامەڵەی پێوەكراوە.

هەڵكشان و داكشانی نرخی نەوت لەكاتێكدایە، ژمارەیەك لەو وڵاتانەی بۆ ڕووبەڕووبوونەوەی ڤایرۆسی كۆرۆنا سەرجەم كەرتە پیشەسازی و بازرگانییەكانیان وەستاندبوو، بەڵام لە ئێستادا و بەهۆی كەمبوونەوەی مەترسییەكانی كۆرۆنا، بەشێك لە چالاكییە ئابوورییەكانیان دەستپێكردووەتەوە، ئەمەش بووەتە هۆی بەرزبوونەوەی نرخی نەوت.

لە سەرەتای ئەم مانگەوە، نرخی نەوت ووردە ووردە بەرز دەبێتەوە، هەرچەندە هەندێك وڵات هۆشداری هاتنەوەی ڤایرۆسی كۆرۆنا بۆ وڵاتەكانیان دەدەن.

بەردەوام بە لە خوێندنەوە

ئابوری

خاوەنی ئارایشتگای نیگار لەسلێمانی لەسەر داخستنی شوێنەكەی چی دەڵێت؟


خەڵك – بەشی هەواڵ
خاوەنی یەكێك لە ئارایشتگا بەناوبانگەكانی سلێمانی لەدوای داخستنی ئارایشتگاكەی لەلایەن لیژنەكانەوە ڕایدەگەیەنێت، هەموو ڕێنماییەكانم جێبەجێ كردووە، نرخم هەرزانە بۆیە هاوپیشەكانم بێزارن لێم.

نیگار محەمەد عەزیز، خاوەنی ئارایشتگای نیگار لە سلێمانی بە (خەڵك)ی ڕاگەیاند، دەمێكە بەداخەوە كەسانێكی هاوپیشەم چاویان بەكارەكانی بەندە و ستافەكەم هەڵنایە بەوەی ئێمەش لەم ڕێگەیەوە خزمەتێك بە كوڕان و كچانی شارەكە بكەین، بەردەوام كەوتوومەتە بەر تانەی ئەوان، بەوەی من نرخم هەرزانە لەوانی دیكە چەند جار بە تەلەفۆن ئەوەیان بە خودی خۆم وتووە.

وتیشی، “تەنانەت پێم وتراوە 80 ئارایشتگا لە سلێمانی بەتەمای ئەوەین شكات لە تۆ بكەین بەوەی تۆ لە هەژمارە تایبەتەكەت لە سناپ چات داوا لە خانمان دەكەی، كریاتین و پڕۆتین نەكەن چونكە خراپە بۆ قژی خانمان ، بەس من ئەوە ڕاستیەكە دەبێت بە هاووڵاتیانی خۆم بڵێم چونكە دواجار هەر ئارایشتگاكان زیانیان بەردەكەوێت لە چارەسەر كردنی ئەو قژانە”.

ڕاشیگەیاند، من زۆر دژایەتی دەكرێم چەندین جار داوام لێكراوە و كاریشی لەسەر كراوە بۆ ئەوەی لە چالاكییەكانم بوەستم لە هەژمارەكەی خۆم لە سناپ چات، بەس من هەموو ئەوانەی ئارایشتگاكەم دادەخەن یان ئەوانەی دەیكەنەوە یان هەموو ئەوانەی لای من ئارایشت دەكەن و تەنانەت ئەوانەشی فرسەتیان نیە بێنە لای من هەموویانم خۆش دەوێت و بەردەوام لۆگۆی خۆشەویستیان بۆ دەنێرم.

دەشڵێت: “لە ڕێگەی سناپە ڕاستیەكەم ڕووبەڕووی ناڕەحەتیەكان دەبمەوە و دەیانەوێت بمشارنەوە، داوام لێ دەكەن، كە سناپەكەم دابخەم، بەڵام من بەردەوام دەبم و ڕاستیەكان بە هاووڵاتیان دەڵێم، كەچی باشە بۆیان و چی خراپە”.

ئاماژەی بۆ ئەوەشكرد، من ئەم سێ ڕۆژە ئارایشتگاكە داناخرێت تا بزانن من چۆن دەبم ئەو كات وتیان بیری لێدەكەینەوە، منیش پێیان دەڵێم كەس زەرەر ناكات و هەر بەردەوام دەبم لەسەر كارەكانی خۆم، هەموو هاووڵاتیانی شارەكەم خۆش دەوێت.

ئاشكراشیكردووە، بیانوی داخستنی ئارایشگاكەم ئەوەبووە بوكێك خەڵكی لەگەڵ هاتووە، گوایە لادانە لە ڕێنماییەكان، پێشتر وتیان تۆ دەبێت دوو كورسیت هەبێت، چوومە لای قائیمقام من 90 مەترم هەیە بە پێی ڕێنمایی هەر دوو مەتر و كورسیەك من دوو مەتر و نیوم دانا بەشی پێنج كورسی هەبوو”.

بەردەوام بە لە خوێندنەوە

ئابوری

نرخی كارتی ئینتەرنێت لە هەرێم هەرزان كرا


خەڵك- ئارام سەردار
وەزیری گواستنەوە و گەیاندنی حكومەتی هەرێم ڕایدەگەیەنێت، لە سبەینێوە لە هەرێمی كوردستان نرخی 25%ی ئینتەرنێت لە لایەن چەند كۆمپانیایەكەوە دادەبەزێنرێت و خێرایی ئینتەرنێتیش زیاد دەكرێت.

ئانۆ جەوهەر، وەزیری گواستنەوە و گەیاندنی حكومەتی هەرێمی كوردستان لەكۆنفڕانسێكی ڕۆژنامەوانیدا ڕایگەیاند، لەدەستپێشخەریەكدا داوامان كرد لەكۆمپانیاكانی ئینتەرنێت، كە خێرایی هێڵەكانیان زیاد بكەن و نرخی هێڵەكانیشیان كەم بكەنەوە، لەسەرەتای مانگی ئادار دوو كۆمپانیای گەورەی ئەنتەرنێت (فاستلینك و ftth فایبەر ئۆپتیك بۆ ماڵان) هاتنە پێشەوە، كە لە 1ی حوزەیران نرخەكانیان بەرٍێژەی لە 25% داببەزێنن و هاوكات بەڵێنیان داوە خێرایی هێڵەكان دوو هێندە بكەن.

ڕاشیگەیاند، ئومێدیش دەكەین كۆمپانیاكانی تریش بێنە پێشەوە و نرخەكانیان كەم بكەنەوە، بۆیە لەسبەی دوو شەممە بەڵێنەكان دەچنە بواری جێبەجێكردن، ئومێدەوارین كۆمپانیاكانی تریش بێنە پێشەوە تاوەكو هاوكاری هاووڵاتیانی هەرێم بكەین.

دەشڵێت: “چەندین سەرنج لەبارەی نرخی كارتەكانی زەین و كۆڕەك و ئاسیاسێل هاتوو بۆمان لەبارەی نرخی كارتەكانیان، ئەو نرخەی كارتەكانی مۆبایل، كە بەڕێژەی لە 20% زیادكراوە پەیوەستە بەحكومەتی عیراق، چونكە بەپێی یاسای بودجەی عیراق ساڵی 2015 دیاری كراوە و وەك باج، دەچێتە خەزێنەی عیراق، بەڵام ئێمە داوا دەكەین ئەو پارەیە بگەڕێتەوە بۆ خەزێنەی هەرێمی كوردستان تاوەكو بۆ خزمەتی هاووڵاتیانی هەرێم بەكاریبێنین و خەرج بكرێت”.

وتییشی، “لەمەودوا كرینی كارتی پلاستیكی نامێنێ، هاووڵاتی دەتوانێت لەڕێگەی فاست پەی ڕاستەوخۆ كارت بەنرخی ڕاستەقینە بكڕیت، بەبێ ئەوەی هیچ نرخێكی زیاتر كە لەلایەن فرۆشیارانەوە دەخرێتە سەری هاووڵاتی بیدات یان گرانتر بیكڕێت”.

بەردەوام بە لە خوێندنەوە

کوردستان