ئێمە لە تۆرە کۆمەڵایەتیەکان

کوردستان

بكوژی هەڤرین خەڵەف و هاووڵاتیە كوردەكانی ڕۆژئاوا ئاشكراكرا

خەڵك- بەشی هەواڵ
وتەبێژی هێزەكانی سوریای دیموكرات (هەسەدە) ڕایدەگەیەنێت، حاتم ئەبو شەقرا بكوژی هەفرین خەلەف و هاووڵاتیانی مەدەنی ڕۆژئاوای كوردستانە.

مستەفا بالی، وتەبێژی هەسەدە لە تویتێكدا ئاماژەی بەوەكردووە، “حاتم ئەبو شەقرا 9 هاووڵاتی مەدەنی ڕۆژئاوای كوردستانی بە چەكی ئێم فۆڕ كوشتووە، جگە لەوەش بكوژی هەڤرین خەڵەف، سەرۆكی پارتی داهاتووی سوریاشە”.

ئاشكراشی كردووە، “حاتم ئەبو شەقرا پێشتر یەكێك بووە لە چەكدارەكانی ڕێكخراوی قاعیدە و ئێستاش لە ڕیزی سوپای بەناو نیشتیمانی سوریایە، كە لەلایەن دەوڵەتی توركیاوە پشتگیریان دەكرێت، ئەوەش لەكاتێكدایە ئەو هێزە بانگەشەی ئاشتی و ئارامی لە ناوچەكە دەكات”.

ماوەی هەفتەیەكە هێرشی داگیركاری سوپای توركیا و چەكدارە ئۆپۆزسیۆنەكانی سەر بە توركیا بۆ سەر خاكی ڕۆژئاوای كوردستان دەستی پێكردووە و بەهۆیەوە ژمارەیەك شەڕڤان و هاووڵاتی شەهید و بریندار بوون.

جیهان

برێت ماكگۆرك: ئەو 15 پرسیارەی كە ترەمپ دەیەوێت ئاڕاستەی ئەردۆغانی بكات، بەڵام نایكات

خەڵك – بەشی هەواڵ

لەگەڵ ئەوەی، ڕەجەب تەیب ئەردۆغان سەرۆك كۆماری توركیا لە كۆشكی سپییە و لەگەڵ دۆناڵد ترەمپ سەرۆكی ئەمریكا كۆدەبێتەوە، برێت ماكگۆرگ نێردەی پێشووی سەرۆكی ئەمریكا بۆ شەڕی دژی داعش لە هەژماری تایبەتی خۆی لە تۆڕی كۆمەڵایەتی توویتەر نووسیویەتی، 15 پرسیار هەن كە لەوانەیە ترەمپ بیەوێت ئاڕاستەی ئەردۆغانی بكات، بەڵام نایكات.

برێت مەكگۆرك ئەو 15 پرسیارەی ترەمپی بۆ ئەردۆغان بەمشێوەیە ڕیزكردووە:

– بەغدادی چۆن لە خانوویەكی سەلامەت و لەنێو ئەو هەموو توونێلە ئامادەكراوە بە دووری پێنج كیلۆمەتر لە سنووری ئێوە دەژیا؟

– بۆچی جێگرەوەی دووەمی بەغدادی لە جەرابلس دۆزرایەوە كە شارۆچكەیەكی بچووكی سەر سنووری ئێوەیە و لەژێر كۆنتڕۆڵی ئێوەیە؟

– كاتێك داواتكرد ئەمریكا 30 كیلۆمەتر هەسەدە لە سنوورەكانت دووربخاتەوە، دەتزانی كە بەغدادی بەدووری پێنج كیلۆمەتر لە سنوورەكەتەوە لەگەڵ خێزانەكەی دەژیا؟

– بۆچی ئەو ناوچانەی سوریا كە تۆ دەتەوێت كۆنتڕۆڵیان بكەی یا لەژێر دەسەڵاتی تۆدابن هەمیشە دەبنە پێگەی سەلامەت بۆ سەركردەكانی قاعیدە و داعش؟

– لە چەند هەفتەی ڕابردوو وتت كە چەند كەسێكی نزیك لە بەغدادیت دەستگیركردوون لەنێویاندا ژنەكەی بەغدادی هەیە. بۆچی تا ئێستا ئەو كەسە داواكراوانەی جیهانت دەستگیرنەكردوون؟ ئەوانە چیان دەكرد لە توركیا؟

– ئەو 40 هەزار چەكدارە بیانییە چۆن ئاوا ئازادانە لەڕێگەی توركیاوە چوونە سوریا، كە بەشێكیان قاعیدەبوون و بوونە بڕبڕەی پشتی داعش؟

– بۆچی داواكانت بۆ داخستنی سنوور بەسەر داعش ڕەتكردەوە، كاتێك هەسەدە داعشی تێكشاند، سنوورەكانت بەسەر داعش داخست؟

– بۆچی گەڕانی هاوبەشت لەگەڵ پوتن و ڕوسیا لە سوریا قبوڵكرد، بەڵام ڕەتتكردەوە لە هەندێ ناوچە گەڕانی هاوبەش لەگەڵ سەربازانی ئەمریكا ئەنجامبدەی و سەربازانی ئێمەت خستە مەترسییەكی گەورە لە باكووری ڕۆژهەڵاتی سوریا كە دوو لەسەر سێی كەوتە دەست ڕوسیا و ئەسەد؟

– بۆچی هەوڵی چەند ساڵە و ملیۆنان دۆلاری ئەمریكی و جێگیركردنی باشترین پلانداڕێژی سەربازی لە ئەنقەرە بۆ ئەو گرووپەی ئۆپۆزیسیۆن بوو كە تۆ جەختت دەكردەوە هاوكارن لە شەڕی دژی داعش، دوایش دەركەوت كە زۆر توندڕەون تا سەربازانی ئەمریكایی هاوبەشیان لەگەڵدا بكات و لەگەڵیاندا هەست بە سەلامەتی بكەن؟

– بۆچی، هاوپەیمانێكی ناتۆ بووەتە گەورەترین زیندانی بۆ ڕۆژنامەوانان؟

– بۆچی حكومەتەكەت بە ئەنجامدانی مامەڵەی نایاسایی لەگەڵ ئێران بووە گەورەترین لە جیهان لەڕووی خۆ دزینەوە لە سزاكان و گیرفانی لێپرسراوە باڵاكانی توركیای پێ پڕبوو؟ ئەو هەموو ملیار دۆلارە بۆ كوێ ڕۆیشت؟

– كاتێك هەڕەشەی ناردنەوەی دوو بۆ سێ ملیۆن پەنابەر دەكەی بۆ باكووری ڕۆژهەڵاتی سووریا، ئەو خەڵكانەی كە لەوێ دەژین بۆ كوێ بڕۆن؟ لەگەڵ ترەمپ هاوڕای كە كوردەكان بتوانن لە ناوچە ڕەسەنەكانیان كۆچبكەن بۆ ناوچەكانی دوور لە كێڵگە نەوتییەكان؟

– بۆچی لە 6ی ئۆكتۆبەر دوابەدوای پەیوەندییە تەلەفۆنییەكەت لەگەڵ ترەمپ هەڕەشەی سەربازیشت لە باكووری ڕۆژهەڵاتی سوریا دەكرد و لە هەمان ڕۆژدا سیستمی مووشەكی ئێس 400ی ڕوسیایت بەدەستگەیشت، ئایا ئەمە بەڕێككەوت بوو؟

– بۆچی تەلەڤزیۆنی فەڕمی وڵاتەكەت “ئۆپراسیۆن”ی كوشتنی ژنە كوردێك (هەڤرین خەڵەف) بەرزدەنرخێنێت تا ئەوكاتەی زانرا كە “لە ڕاستیدا” ئەوە تاوانی جەنگە و تەواوی هەواڵەكان لەسەر ئەو كوشتنە ڕەشكرانەوە؟ هیچ كەسێك لەسەر ئەوە دراوەتە دادگا؟

– بۆچی بەردەوام پێداگری لەسەر فراوانكردنی دسەڵاتی گرووپە توندڕەوەكانی وەك قاعیدە دەكەی كە بەرپرسیارن لە ئەنجامدانی تاوانی مرۆیی؟ ئایا هیچ لەم گرووپانە باكووری ڕۆژهەڵاتی سوریا چەكی ئەمریكایی بەكاردێنن؟ ئەم گرووپانە لە ئاسمانی ئەو ناوچانە چالاكن كە لەژێر كۆنتڕۆڵی ئەمریكان؟

بەردەوام بە لە خوێندنەوە

کوردستان

وێنە.. لە سۆران بەهۆی ڕووخانی دیوارێك كرێكارێكی خاوەن 6 منداڵ گیانی لەدەستدا

خەڵك – نزار مستەفا

ئێوارەی ئەمڕۆ لەیەكێك لە گەڕەكەكانی شارەدێی دیانا بەهۆی داڕووخانی دیوارێك كرێكارێك گیانی لەدەستدا.

عیماد كەنعان ڕێكانی بەڕێوەبەری بەرگری شارستانی سۆران بە ( تۆڕی میدیایی خەڵك)ی ڕاگەیاند:”ئێوارەی ئەمڕۆ 13/11/2049 ئاگاداركراونەتەوە بەبوونی ڕووداوی داڕووخانی دیوارێك لەگەڕەكی بەرگوانی سەر شارەدێی دیانای سەر بە شارۆچكەی سۆران و ژێر كەوتنی كرێكارێك، دەستبەجێ تیمەكانیان گەیشتنە شوێنی ڕووداوەكە و توانیان كرێكارەكە دەربهێنین، بەڵام بەهۆی سەختی بریندارەكەیەوە دەستبەجێ گیانی لەدەستدا و دواتر تەرمەكەی ڕەوانەی پزیشكی دادی كرا.

عیماد كەنعان وتیشی: كرێكارەكە ناوی (ئ.ق.س)ی لەدایكبووی سالێ‌ 1965 و خەڵكی شاری ئورمیەی ڕۆژهەڵاتی كوردستانە و خێزاندارە و خاوەنی 6 منداڵە، بەمەبەستی كاركردن هاتبوو بۆ باشوری كوردستان.

بەردەوام بە لە خوێندنەوە

کوردستان

“فەرمانی ئەنجامدانی تەقینەوەكانی قامیشلۆ لە توركیاوە دەرچووە”

خەڵك – بەشی هەواڵ

هێزەكانی ئاسايشى شاری قامیشلۆی ڕۆژئاوای كوردستان ئاشكرایدەكەن، ئەنجامدەری سەرەكیی تەقینەوەكانی ڕۆژی دووشەممەی ڕابردووی شاری قامیشلۆ دەستگیركراوە، كە فەرمانی لە كەسێكی دانیشتووی توركیا وەرگرتووە.

سەرچاوەكانی هەواڵ لە ڕۆژئاوای كوردستان بڵاویان كردەوە، هێزەكانی ئاسايشى شاری قامیشلۆی ڕۆژئاوای كوردستان كەسێكیان دەستگیركردووە، كە بە ئەنجامدەری سەرەكیی تەقینەوەكانی دووشەمەی ڕابردوو ناویهێنراوە و گرتەی كامێراكانی چاودێری یارمەتیدەر بوون لە دۆزینەوەیدا.

بەپێی زانیارییەكان، لەكاتی لێكۆڵینەوەدا ئەنجامدەری سەرەكیی تەقینەوەكانی قامیشلۆ دانی بەوەدا ناوە، كە چەند كەسێكی تر هاوكارییان كردووە لە ئەنجامدانی تەقینەوەكاندا.

هەروەها بەوتەی لێپرسراوانی هێزەكانى ئاسايشى قامیشلۆ، ئەنجامدەری سەرەكیی تەقینەوەكان فەرمانەكانی لە كەسێك وەرگرتووە، كە نیشتەجێی توركیایە.

جێی ئاماژەیە، ڕۆژی دووشەممەی ڕابردوو سێ تەقینەوە لەشاری قامیشلۆی ڕۆژئاوای كوردستان ڕوویاندا و بەهۆیانەوە شەش هاووڵاتیی مەدەنی شەهیدبوون و زیاتر لە 40 كەسی تریش برینداربوون.

بەردەوام بە لە خوێندنەوە

کوردستان