ئێمە لە تۆرە کۆمەڵایەتیەکان

کوردستان

كۆسرەت ڕەسوڵ: یەكێتی بەئەركی خۆی دەزانێت هاوكار و پشتیوانی خوشك و براكانی بێت لە هەموو كوردستان


خەڵك – بەشی هەواڵ

كۆسرەت ڕەسول عەلی جێگری سكرتێری گشتی یەكێتیی نیشتمانیی كوردستان بە یاوەری هەریەك لە ڕەفعەت عەبدوڵا و ئاسۆ مامەند ئەندامانی مەكتەبی سیاسی سەردانی مەڵبەندی ڕێكخستنی چەمچەماڵیان كرد و لەگەڵ لێپرسراوی مەڵبەند و ستافی مەڵبەندەكە كۆبووەوە.

لە كۆبوونەوەكەدا كۆسرەت ڕەسول عەلی جێگری سكرتێری گشتی یەكێتی نیشتمانیی كوردستان، باسی دۆخی كوردستان و ناوچەكە و دۆخی ڕۆژئاوای كوردستانی كرد و دووپاتیكردەوە كە پێویستە لەشكركێشییەكانی سەر ڕۆژئاوا ڕابگیرێ و چیتر ژن و منداڵ و خەڵكی سڤیل نەكرێنە قوربانی.

كۆسرەت ڕەسوڵ وتیشی: بۆ ئێمەی كورد زۆر قورسە كە دەبینین هاوپەیمانەكانمان پشت دەكەنە دۆستەكانی خۆیان و خەریكە ناوچەكە دەسپێرن بەدۆخێكی نەخوازراو، كە هیچ كەسێكمان ئومێدی بۆ ناخوازین و كاریگەری خراپ دەكاتە سەر داهاتووی ناوچەكە.

لەبەشێكی تری وتەكانیدا كۆسرەت ڕەسوڵ، باسی لەهەوڵەكانی یەكێتیی نیشتمانیی كوردستان بۆ ئاساییكردنەوەی دۆخەكە كرد و دووپاتی كردەوە كە یەكێتی بەئەركی سەرشانی خۆی دەزانێت هاوكار و پشتیوانی خوشك و براكانی بێت لە هەموو كوردستان، یەكێتیی نیشتمانیی كوردستان خەباتی كردووە و خەبات دەكات بۆ سەركەوتنی دیموكراسی و بەرەنگاربوونەوەی تیرۆر و بەدەستهێنانی مافە دیموكراتی و نەتەوەییەكانی گەلی كورد.

کوردستان

بۆ یادكردنەوەی ڕۆژی جیهانی منداڵان ڕوونكردنەوە دەدرێت


خەڵك-بەشی هەواڵ

 

بەڕێوەبەرایەتی ڕۆشنبیری منداڵانی سلێمانی ڕایدەگەیەنێت، ئەمساڵ یادكردنەوەیی ڕۆژی جیهانی منداڵان كەوتۆتە بارودۆخێكەوە، كە نەك منداڵانی كوردستان، بەڵكوو تەواویی منداڵانی جیهان و بگرە هەموو مرۆڤایەتی، گیرۆدەی ڤایرۆسێكی كوشندە و مەترسیدارەبە ناوی كۆرۆنا كە ئەمەش ئەوەمان لێدەخوازێت، هەموو تواناكانمان یەك بخەین، لە پێناو بەرەنگاربوونەوەی هەرچی زیاتری ئەو ڤایرۆسە و پاراستنی خۆمان و خێزان و منداڵەكانمان.

بەڕێوەبەرایەتی ڕۆشنبیری منداڵانی سلێمانی لە ڕاگەیەنراوێكدا ئاماژە بۆ ئەوە دەكات، پاراستنی منداڵەكانمان بە پابەندبوون بە ڕێنماییە تەندروستیەكان و جێبەجێكردنی، ڕێكارەكانی خۆپارێزی دەبێت.

ڕوونیشیدەكاتەوە، دەمانویست ئەمساڵ بە شێوازو چالاكی زیاتر و جۆراوجۆر و ڕەنگاوڕەنگتر، یادی ڕۆژی جیهانی منداڵان بكەینەوە، دەمانویست، بە نەمایشی بوكەڵە و خامەی ڕەنگینی منداڵانی شێوەكار و گۆرانی و موزیك و سەمای منداڵانە قاقاو و جوڵەی پر لە ژیانی منداڵاندا، یادی ڕۆژی جیهانی منداڵان بكەینەوە، بەڵام دۆخی كوردستان و كاریگەریەكانی ڤایرۆسی كۆرۆنا و نالەباری دۆخی ئابووری فەرمانبەران و دایكان و باوكان، ڕێگربوو لەو خەونەمان.

داواش لە حكومەت و ڕێكخراوەكانی تایبەت بە منداڵان دەكات، هەوڵی زیاتر بدەن بۆ پاراستنی مافەكانی منداڵان و هێنانە ئارای ژیانێكی شایستە بۆیان، دوور لە هەراو زەنای سیاسەت و ئاڵۆزیەكان.

بەردەوام بە لە خوێندنەوە

کوردستان

گەنجێك لە سۆران بە گولـلە گیانی لە دەست دا

خەڵك – نزار مستەفا
گەنجێك لە شارۆچكەی سۆران بە هۆی گولـلەوە گیانی لە دەست دا.

شەمال دێواری وتەبێژی پۆلیسی سۆران بە تۆڕی میدیای (خەڵک)ی ڕاگەیاند کاتژمێر10ی شەوی رابردوو ئاگادار کرانەوە لە بوونی ڕووداوێك و دوای گەیشتنی هێزەكانیان بە شوێنی ڕووداوەكە دەركەوت گەنجێك گولـلەی بەركەوتووە.

ڕوونیشیكردەوە گەنجەكە ناوی “د ت ك” تەمەن 25 ساڵ بە هۆی سەختی برینەكەیەوە ڕەوانەی نەخۆشخانەی هەولێر كراوە، بەڵام لە نەخۆشخانە گیانی لە دەست داوە.

وتەبێژی پۆلیسی سۆران ڕاشیگەیاند كە بۆ خستنەڕووی چۆنێتی ڕووداوەكە پەڕاوی لێكۆڵینەوە ڕێكخراوە.

بەردەوام بە لە خوێندنەوە

کوردستان

توركیا؛ گەنجێك بە هۆی گوێگرتنی لە گۆرانی كوردی كوژرا


خەڵك – بەشی هەواڵ
گەنجێك بە هۆی گوێگرتنی لە گۆرانی كوردی لە ئەنقەرەی پایتەختی توركیا كوژرا.

بە پێی هەواڵێکی ئاژانسی میزۆپۆتامیا گەنجێکی ٢٠ ساڵ بە ناوی بارش چاکان کە خەڵکی ناوچەی پاتنۆسی ئاگری بوو گوێی لە گۆرانی کوردی گرتووە، بەڵام کاتژمیر ٢٢:٣٠ لە گەڕەکی ئالسانجاکی ناوچەی ئەتیمەسگوتی ئەنقەڕە هێرش کرایە سەری و چەقۆیەکیان لەدڵیدا و کوشتیان.

بەپێی ئەو زانیاریانەی کەلە خانەوادەکەی بەدەستهێنراوە، بارش چاکان لە ماڵەوە چووەتە دەرەوە بۆ ئەوەی سەردانی هاوڕێکانی لە پارکی گەل بکات، بەڵام لە ڕێگادا بەهۆی ئەوەی گوێی لە گۆرانی کوردی گرتووە، ڕووبەڕووی هێرشی ٣ کەس بووەتەوە.

باسی ئەوە دەکرێت ئەو کەسانەی هێرشیان کردووەتە سەر بارش چاکان و هاوڕێکانی خەڵکی شارەکانی یۆزگات، کرککالە و تۆکاتن. لەبارەی ناو و ناونیشانی هێرشبەران هیچ زانیاریەک بڵاونەکراوەتەوە.

لە ئەنجامی هێرشەکەدا چەقۆ لە دڵی بارش چاکان دەدرێت و لە شوێنی ڕووداوەکە گیان لەدەستدەدات. هەرسێ هێرشبەرەکە دوای ڕووداوەکە دەستگیرکراون.

دۆغان چاکان ڕایگەیاند، تەرمی ئامۆزاکەی بۆ نەخۆشخانە گواستراوەتەوە و ئەمڕۆ دوو شەممە بەخاکدەسپێردرێت، هەروەها باسی ئەوەشی کرد کە جارێکیتریش لەبەرئەوەی گوێی لە گۆرانی کوردی گرتبوو، بارش چاکان ڕووبەڕووی هێرشی نەژادپەرستی ببووەتەوە.

ANF

بەردەوام بە لە خوێندنەوە

کوردستان