ئێمە لە تۆرە کۆمەڵایەتیەکان

کوردستان

حكومەتی هەرێم لەسەر قەدەغەكردنی دراما توركیەكان بێدەنگە

خەڵك – بەشی هەواڵ
هێشتا وەزارەتی ڕۆشنبیری حكومەتی هەرێم هیچ بڕیارێكی بۆ قەدەغەكردنی دراما توركییەكان دەرنەكردووە، كە لە ئێستادا جگە لەداواكاری وەزارەتی ئەوقاف بۆ ڕاگرتنی ئەو درامایانە، كە “شیرازەی خێزانی كورد لەناو دەبەن”، خۆپیشاندەرانیش بۆ پشتیوانی لە ڕۆژئاوا داوای ڕاگرتنی دەكەن.

بابەكر دڕەیی، بەڕێوەبەری گشتی ڕۆشنبیری سلێمانی بە (خەڵك)ی ڕاگەیاند، ڕاگرتنی ئەو درامایانە لەدەستی وەزارەتی ڕۆشنبیریدایە، هەر بڕیارێك بگاتە دەستمان وەك خۆی جێبەجێی دەكەین، هەرچەندە پرسی ڕاگرتنی ئەو جۆرە درامایانە لە ڕێگەی بەڕێوەبەرایەتی چاپەمەنیەكان و ڕاگەیاندنەوە دەبێت.

وتیشی، “ئێمە بەردەوام پشتیوانی لە ڕۆژئاوا دەكەین و وەك تاكیش لە ناو هەموو گردبوونەوە و خۆپیشاندانەكان ئامادەییمان هەیە، بۆ پشتیوانی ڕۆژئاوا هەرچی بكرێت هەر كەمە”.

هاوكات (خەڵك) بۆ بەدواداچوونی پرسی دەركردنی بڕیارێك بۆ ڕاگرتنی دراما توركییەكان لە كەناڵەكانی باشووری كوردستان بە ئاسمانی و ناوخۆییەوە چەند جارێك پەیوەندی كرد بە حەمەی حەمەسەعید، وەزیری ڕۆشنبیری حكومەتی هەرێم، بەڵام وەڵامی پەیوەندییەكانی نەدایەوە.

لای خۆشیەوە، فەرهەنگ گۆمەشینی، وتەبێژی وەزارەتی ڕۆشنبیری بۆ (خەڵك) ڕایگەیاند، كە مۆڵەتی وەرگرتووە و هیچ لێدوانێكی لەوبارەیەوە نەدا.

بۆ پشتیوانی لە ڕۆژئاوای كوردستان و ئیدانەكردنی هێرشە داگیركارییەكانی توركیا بۆ سەر كوردانی ئەو پارچەیە لەسەرجەم شار و شارۆچكەكانی هەرێمی كوردستان ڕۆژانە خۆپیشاندان دەكرێت و داوای ڕاگرتنی دراما توركییەكان دەكرێت، لەگەڵ داواكاری بەشێك لە هاووڵاتیان بۆ بایكۆت كردنی كڕینی شتمەك و كاڵای توركی.

کوردستان

وەزارەتی ناوخۆی هەرێم داواكارە پەكەكە و توركیا شەڕی خۆیان ببەنە دەرەوەی عیراق

خەڵك – بەشی هەواڵ

وەزارەتی ناوخۆی هەرێم ڕاگەیەندراوێكی سەبارەت بە بۆردوومانەكەی ئەمڕۆی سیدەكان بڵاوكردەوە.

لە ڕاگەیەنراوەكەدا وەزارەتی ناوخۆی هەرێمی كوردستان داوا لە پەكەكە و توركیا دەكات “شەڕ و ململانێی خۆیان ببەنەوە دەرەوەی خاكی هەرێمی كوردستان و عێراق و چیتر خەڵكی ئێمە نەكەنە قوربانیی ئەو ململانێیە.

 

دەقی ڕاگەیەنراوەكە:

كاتژمێر 2:45 پاش نیوەڕۆی ئەمرۆ، سێ شەممە، رێكەوتی 11/8/2020 لە ناوچەی برادۆست كاتێك هێزەكانی پاسەوانی سنووری سەر بە حكومەتی فیدڕاڵی خەریكی پڕكردنەوەی ئەو بۆشاییە بوون كە لە خاڵە سنووریەكان دروستبووە بە مەبەستی دوورخستنی هەڕەشەی شەڕ لە دانیشتووانی ناوچەكە، لە لایەن فرۆكەیەكی لەشكری توركیاوە ئوتۆمبیلێكی هێزەكەی پاسەوانی سنوور دەكرێتە ئامانج وبەداخەوە دوو ئەفسەری هێزەكە شەهید دەبن بە ناوەكانی (عمید/ محەمەد ڕەشید سلێمان، فەرماندەی لیوای دووی پاسەوانیی سنوور) و(عقید/ زوبێر حالی تاجەدین ، فەرماندەی فەوجی سێی لیوای دووی پاسەوانیی سنوور). هەروەها (عقید/ حیسامەدین عەبدولڕەحمان حەسەن ) بریندار دەبێت.

لێرەدا دوپاتی دەكەینەوە كە پێویستە PKK و توركیا شەڕ و ململانێكانی خۆیان ببەنەوە دەرەوەی خاكی هەرێمی كوردستان وعیراق وچیتر خەڵكی ئێمە نەكەنە قوربانیی ئەو ململانێیە.

بەم بۆنە خەمناكەوە ، پرسە وسەرەخۆشی خۆمان ئاراستەی بنەماڵەی شەهیدەكان دەكەین ولە خوای گەورە دەپاڕێینەوە كە بە بەهشتی خۆی شادیان بكات و ھیوای چاكبوونەوەی خێراش بۆ بریندارەكان دەخوازین وخەڵكی خۆمان دڵنیا دەكەینەوە كە حكومەتی هەرێمی كوردستان وەك هەمیشە هەموو توانا و هەوڵەكانی خۆی دەخاتە گەڕ بۆ دوورخستنەوەی ئەم ململانێیە لە هەرێمی كوردستان.

وەزارەتی ناوخۆ
حكومەتی هەرێمی كوردستان
11/8/2020

بەردەوام بە لە خوێندنەوە

کوردستان

سەرۆكایەتی كۆمار لەسەر بۆردوومانەكەی ئەمڕۆی ناوچەی سیدەكان هاتە دەنگ

خەڵك – بەشی هەواڵ

سەرۆكایەتی كۆمار ئیدانەی بۆردوومانی فڕۆكەكانی توركیا دەكات، بۆ سەر ناوچەی سیدەكان لە هەرێمی كوردستان.

وتەبێژی فەڕمی سەرۆكایەتی كۆمار لە ڕاگەیەنراوێكدا، بۆردوومانی توركیا بۆ سەر ناوچەی سیدەكان ئیدانە دەكات و داوای كۆتایی هێنان بە پێشلكارییەكان دەكات بۆ سەر سەروەری عیراق.

وتەبێژی فەڕمی سەرۆكایەتی كۆمار جەختیش دەكاتەوە، پێشلكارییە سەربازییە بەردەوامەكانی توركیا بۆ سەر خاكی عیراق بە پێشێلكارییەكی مەترسیدار دادەنرێت بۆ سەروەری عیراق.

وتەبێژی فەڕمی سەرۆكایەتی كۆمار داواشیكرد، تەواوی پڕۆسە سەربازییەكان بوەستێنرێت كە زیان بە پەیوەندی نیازپاكی و دراوسێیەتی دەگەیەنێت، ھاوكات داواشدەكات پشت ببەسترێت بە دیالۆگ و لێكتێگەشتن بۆ چارسەركردنی كێشە سنوورییەكانی نێوان هەردوو وڵاتی دراوسێ.

دەقی ڕاگەیەنراوەكە:

بەتوندی ئیدانەی ئەو پیشێلكاریانە دەكەین كە توركیا لە رێگەی فرۆكەكانییەوە ناوچەی سیدەكانی لە هەرێمی كوردستان بۆردومان كردووە، ئەو پێشلكارییە سەربازییە بەردەوامانەی توركیا بۆ سەر خاكی عێراق بە پێشێلكارییەكی مەترسیدار دادەنرێت بۆ سەر خاكی عێراق و سەرپێچیەكی روون و ئاشكراشە بۆ یاسا و ڕێككەوتننامە نێودەوڵەتییەكان و پەیوەندی نیازپاكی دراوسێیەتی، ئێمە ئەم رەفتارە دوژمنكارانە سەرزەنشت دەكەین، كە بووە هۆی شەهیدكردنی ژمارەیەك هاووڵاتی بێتاوان و ئەفسەران لە هێزەكانی پاسەوانی سنوور، ھاوكات داوای دەست بەجێ راگرتنی ئەو دەستدرێژیانە و دیالۆگ و گفتوگۆ و لێكتێگەیشتن دەكەین، بۆ چارەسەركردنی كێشە سنوورییەكانی نێوان هەردوو وڵاتی دراوسێ و دۆزینەوەی رێگەچارەی ئاشتیانە كە ببێتە مایەی ئاسایش و سەقامگیری ناوچەكە.

شەهیدان بەر رەحمەتی یەزدان بكەون و ئارامی و سەبوریش بۆ كەس و كاریان و هیوای زوو چاكبوونەوەش بۆ بریندارەكان دەخوازین.

وتەبێژی فەرمی سەرۆك كۆمار
بەغداد 11 ئابی 2020

بەردەوام بە لە خوێندنەوە

کوردستان

(پەكەكە) وردەكاریی نوێ‌ لەبارەی هێرشەكەی توركیاوە ئاشكرادەكات

خەڵك- بەشی هەواڵ
پارتی كرێكارانی كوردستان (پەكەكە)، وردەكاریی نوێ‌ لەبارەی هێرشی فڕۆكە بێفڕۆكەوانەكانی توركیا بۆسەر كاروانی سەربازی هێزەكانی پاسەوانی سنور لە ناوچەیەكی سەر بە پارێزگەی هەولێر لە هەرێمی كوردستان ئاشكرادەكات.

كاوە شێخ موس، بەرپرسی پەیوەندییەكانی پارتی كرێكارانی كوردستان لە لێدوانێكیدا بۆ ماڵپەڕی (بغداد الیوم)ی عیراقی ڕایگەیاندووە”فڕۆكەیەكی بێفڕۆكەوانی توركیا كاروانێكی سەربازی عیراقی كردە ئامانج كە سەر بە هێزەكانی پاسەوانی سنور بووە و فەرماندەی لیوا و فەرماندەی فەوجى سێیەمی فەرماندەیی پاسەوانی سنوری لەخۆگرتبوو، لەگەڵ ژمارەیەك فەرماندە و ئەفسەری تر”.

بە وتەی كاوە شێخ موس”دەوڵەتی توركیای پیلانگێڕ، كاروانە سەربازییە عیراقییەكەی بۆردومان كرد، بەبێ‌ ئەوەی هیچ گەریلایەكی سەر بە پارتی كرێكارانی كوردستان لەگەڵ ئەو كاروانەدا بێت كە كرایە ئامانج”.

هەر ئەمڕۆ شانەی میدیای ئەمنی عیراقی، توركیای بە تێوەگلان لە هێرشەكەی باكووری پارێزگەی هەولێر تۆمەتبار كرد.

شانەی میدیای ئەمنی لە بەیاننامەیەكدا ڕایگەیاند”ئیدانەی دەستدرێژییەكەی توركیا دەكەین كە لەڕێی فڕۆكەی بێفڕۆكەوانەوە ئەنجامدرا و كاروانێكی سەربازی پاسەوانی سنوری لە ناوچەی سیدەكان كردە ئامانج و بووە مایەی شەهیدبوونی فەرماندەی لیوای دووی پاسەوانی سنوری ناوچەی یەك و فەرماندەی فەوجی سێ‌/ لیوای دوو و شۆفێری ئۆتۆمبێلەكەیان”.

بەردەوام بە لە خوێندنەوە

کوردستان