ئێمە لە تۆرە کۆمەڵایەتیەکان

کوردستان

شایان عەسكەری: دەبێت كونسوڵی توركیا داوای لێبوردن بكات

خەڵك- بەشی هەواڵ
ئەندامێكی پەڕلەمانی كوردستان لەسەر قسەكانی كونسوڵی توركیا لە هەولێر دێتە دەنگ و دەڵێت: “دەبێت داوای لێبوردن بكات”.

ئەمڕۆ كونسوڵی توركیا لە هەولێر لە كۆنگرەیەكی ڕۆژنامەوانیدا هێزەكانی “پەكەكە و یەپەگە و هەسەدەی بە گروپی تیرۆرستی” وەسف كرد و پشتگیری سوپای وڵاتەكەی كرد لە هێرشكردنە سەر خاكی ڕۆژئاوای كوردستان.

لای خۆیەوە، شایان عەسكەری، ئەندامی پەڕلەمانی كوردستان لە فراكسیۆنی گۆڕان لە هەژماری خۆی لە فەیسبووك لەژێر ناونیشانی (وەڵامێك بۆ كونسوڵی توركیا لە كوردستان) ڕایگەیاند، “ھەبونت لە ھەرێمی كوردستان، بتەوێ یا نەتەوێ دانپێنانە بە ھەبونی كیانێكی كوردی و ھەرێمێكی كوردی، بەرێزت لە كوردستان دانیشتویت و دەرگات لەسەر پشت بۆ كراوەتەوە، كەچی خوشك و براكانمان لە ڕۆژئاوا ناو دەنێی تیرۆریست”.

ڕاشیگەیاندووە، “بەكام پێوەر ئەوان تیرۆریستن، لە كاتێكا ئێوە مناڵەكانمان دەكوژن، بەكام پێوەر ئەوان تیرۆریستن، لە كاتێكا ئێوە خاكی ئێمە داگیر دەكەن، بەكام پێوەر ئەوان تیرۆریستن، لە كاتێكا ئێوەن پشتی داعشتان گرت”.

ئەو پەڕلەمانتارەی گۆڕان جەختیشی كردووە، “پێویستە بە زوترین كات داوای لێبوردن بكەیت”.

 

جیهان

سیناتۆرێكی كۆمارییەكان: نازانین توركیا دۆستە یان دوژمن

خەڵك – بەشی هەواڵ

سیناتۆریكی كۆمارییەكانی ئەمریكا دووپاتی دەكاتەوە، تا ئێستا نازانن توركیا دۆستی ئەمریكایە یان دوژمن.

جۆن نیڵی كەنەدی، سیناتۆری كۆمارییەكان لە ئەنجومەنی پیرانی ئەمریكا، ڕایگەیاندووە:” تاكو ئێستا نازانن توركیا دۆستی ئەمریكایە، یان دوژمن”.

ئەو سیناتۆرەی كۆمارییەكان ڕونیشكردووەتەوە:” دەبێت ئەردۆغان سەرۆكی توركیا ئەوە یەكلابكاتەوە”.

جۆن نیڵی كەنەدی باسی لەوەشكردووە:” توركیا لەلایەكەوە خۆی بەدۆست دەزانێت، بەڵام دەچێت دژە مووشەكی ئێس لە سەرۆك پوتن دەكڕێت، ئەمە كاریگەری خراپی لەسەر چەكی ئەمریكا دەبێت”.

هەروەها ئەو سیناتۆرەی كۆمارییەكان لە ئەنجومەنی پیرانی ئەمریكا لەبارەی كێشەی باكووری سوریا و هێرش كردنی توركیا بۆ سەر كوردەكان، دەڵێت:”گوشاری ترەمپ بەهەڕەشەكردنی لاوازكردنی ئابووری توركیا وایكرد ئەردۆغان ئاگربەست ئەنجام بدات”.

بەردەوام بە لە خوێندنەوە

ئابوری

هەولێر.. لەسەرەتای ئەمساڵەوە هاووڵاتیان بە بڕی 200 ملیۆن دینار سزادراون

خەڵك – بەشی هەواڵ

قائیمقامی هەولێر ڕایدەگەیەنێت، لەسەرەتای ئەمساڵەوە تائێستا بەهۆی سەرپێچی و پابەندنەبوونەوە، بڕی 200 ملیۆن دینار سزای هاووڵاتییان دراوە.

نەبەز عەبدولحەمید قائیمقامی هەولێر لەلێدوانێكی ڕۆژنامەوانیدا ڕایگەیاند، وەك قائیمقامییەتی قەزای ناوەندی هەولێر، سەرپەرشتی 28 لیژنە دەكەن، كە ڕۆژانە كاری چاودێری هەموو سێكتەرەكان دەكەن.

قائیمقامی هەولێر ئاماژەی بەوەشدا، “لە یەكەم ڕۆژی ئەمساڵەوە تائێستا زیاتر لە 200 ملیۆن دینار سزای ئەو شوێنانە دراوە، كە سەرپێچییان كردووە، بە سەدان تۆن خۆراك و دەرمان دەستیان بەسەرداگیراوە، سەدان شوێن داخراون، كافتریاكانی كە بەدەر لە ڕێنماییەكان كرابوونەوە و شوێنی قوماركردن بوون داخران، لیژنەكانمان بەردەوامن و پێویستمان بە هاوكاری هاووڵاتیان هەیە، ئەگەر تێبینی یان هەر شوێنێك هەیەتی ئەوا ئاگادارمان بكاتەوە”.

لە بەشێكی تری وتەكانیدا نەبەز عەبدولحەمید ئاماژەی بەوەكرد، دەیانەوێت شێوازی نووسینی تابلۆكان ڕێكبخەنەوە و بەو هەڵانەدا بچنەوە، كە لە نووسینی تابلۆكاندا هەیە.

قائیمقامی هەولێر وتیشی،”ئاگاداری گەشتوگوزار كراوەتەوە لەكاتی نوێكردنەوەی مۆڵەت، پێداچوونەوە بۆ تابلۆكان بكرێت و پێویستە بە زمانێكی كوردی پاراو بنووسرێت و ئەوەش مەرجی سەرەكی نوێكردنەوەی مۆڵەتە”.

بەردەوام بە لە خوێندنەوە

کوردستان

پۆلیسی گەرمیان: بەهۆی دەستڕێژی گوللەوە لە كفری كەسێك كوژرا و سێ كەسی تریش برینداربوون

خەڵك – بەشی هەواڵ

بەڕێوەبەری ڕاگەیاندنی پۆلیسی گەرمیان ڕایدەگەیەنێت، لە شارەدێی سەرقەڵای سەر بە شارۆچكەی كفری چوار بریندار هێنرانە بەشی فریاكەوتنی شەهید هەژار لەكەلار كەبەهۆی بەركەوتنی گوللەوە بریندارببوون، دواتریش كەسێكیان گیانیلەدەستدا.

عەلی جەمال قدووری بەڕێوەبەری ڕاگەیاندنی پۆلیسی گەرمیان لە ڕاگەیەندراوێكدا ئاماژەی بەوەدا،”ئێوارەی ڕۆژی شەممە لە شارەدێی سەرقەڵای سەر بە شارۆچكەی كفری چوار بریندار هێنرانە بەشی فریاكەوتنی شەهید هەژار لە كەلار كەبەهۆی بەركەوتنی فیشەكەوە بریندارببوون، دوای چارەسەری خێرا یەكێك لەبریندارەكان بەهۆی سەختی برینەكەیەوە گیانی لەدەستدا و دووانیان ڕەوانەی نەخۆشخانەی سلێمانی كران”.

بەڕێوەبەری ڕاگەیاندنی پۆلیسی گەرمیان ڕاشیگەیاندووە،”بەوتەی بریندارەكان كێشەی كۆمەڵایەتییان هەیە و ئێوارەی ڕۆژی شەممە لەنێو شارەدێی سەرقەڵا دەستڕێژی گوللە لەئۆتۆمبێلەكەیان كراوە”.

عەلی جەمال قدووری ئەوەشی خستەڕوو، “لەئێستادا پۆلیس دەستی بەلێكۆڵینەوە كردووە چەندین بەڵگە لەشوێنی ڕووداوەكە كۆكراوەتەوە و فەرمانی دەستگیركردن بۆ چەند تومەتبارێك دەرچووە و پۆلیس گەڕانی بەدوای تۆمەتباراندا دەستپێكردووە”.

بەردەوام بە لە خوێندنەوە

کوردستان