ئێمە لە تۆرە کۆمەڵایەتیەکان

کوردستان

بزووتنەوەی گۆڕان: ڕۆژئاوا تەنیا نییە

خەڵك – بەشی هەواڵ

بزووتنەوەی گۆڕان لەبارەی لەشكركێشییەكانی توركیا بۆ ڕۆژئاوای كوردستان ڕاگەیەنراوێكی بڵاوكردەوە.
بزووتنەوەی گۆڕان لە ڕاگەیەنراوەكەدا ئاماژەبەوەدەكات:”ڕۆژئاوا تەنیا نییە”، ئێمە لە بزووتنەوەی گۆڕان، سەرباری ناڕەزایەتیی توندمان بۆ ئەو هێرشە دوژمنكارییە و پشتگیریی تەواومان بۆ خەبات و مافی ڕەوای گەلەكەمان و دانیشتووانی ڕۆژئاوا، لەهەمان كاتدا داوا لەسەرجەم هێزە سیاسییەكانی كوردستان و حكومەتی هەرێم و عیراق و جەماوەر دەكەین، كە لەم ساتەوەختە هەستیارەدا پشت و پەنای ڕۆژئاوا بن و بەهەمو شێوازێكی خەباتی دیپلۆماتی و سیاسی و مەدەنی و جەماوەری ئەو پشتگیرییەی خۆیان پێشان بدەن و هەرێمیش هەمو جۆرە كۆمەكێك بۆ هاووڵاتیانمان لە ڕۆژئاوا فەراهەم بكات”.

بزووتنەوەی گۆڕان ڕاشیدەگەیەنێت:”هاوكات داوای دەست پێكردنی كەمپینی جەماوەری بەرفراوان دەكەین هەم بۆ ناڕەزایەتی دەربڕین دژ بەو داگیركارییە و هەمیش بۆ پشتگیری ماددی و مەعنەوی گەلەكەمان لە ڕۆژئاوا. داواش لە ڕەوەندی كوردی دەكەین بە هەموو شێوازێكی مەدەنی خۆپیشاندان و ناڕەزایەتی دەربڕن و یارمەتیی خێرا بۆ ڕۆژئاوا كۆ بكەنەوە”.

 

دەقی ڕاگەیەنراوەكە:

بەیاننامەی بزووتنەوەی گۆڕان

رۆژئاوا تەنیا نیە

جێبەجێكردنی ئۆپەراسیۆنە سەربازیەكانی توركیا بۆ سەر رۆژئاوای كوردستان بە توندی ئیدانە دەكەین و بڕوامان وایە ئەم پڕۆسەیە نەك خزمەت بە سەقامگیری سیاسیی لە ناوچەكە ناكات، بەڵكو دەبێتە هۆی قوڵبونەوەی كێشەكان و كارەساتی مرۆیی و، ئاوارەبونی سەدان هەزار خەڵكی سیڤیل بەدوای خۆیدا دەهێنیت، هاوكاتیش دەرفەتێك دەبێت بۆ خۆرێكخستنەوەی شانە نوستوەكانی داعش و
بەهێزكردنەوەی گروپە تیرۆریستییەكان لەناوچەكە و شكاندنی ئیرادەی نەتەوەیەكی ئازا كە بەخوێنی خۆیان بەرگرییان لە ئازادییەكانیان كردوە.

رۆژئاوای كوردستان كە قوربانییەكی زۆریان داوە بۆ پاراستنی خاكەكەیان لەچنگی گروپە تیرۆریستیەكان و لەبری هەمو جیهان شەڕی داعشیان كردوە، شایەنی قەرەبوكردنەوە و لالێكردنەوەی كۆمەڵگای نێودەوڵەتین، نەك پەلاماردانی توركیا و جێبەجێكردنی پڕۆسەی داگیركاری، ئەمەش بەرپرسیارێتیی ئەنجومەنی ئاسایش و نەتەوە یەكگرتووەكان و هاوپەیمانانی دژی داعشە، كە رێ لە پڕۆسەی داگیركاریی دەوڵەتی تورك بگرن و رێگربن لە ئەگەرە نەخوازراوەكان كە روبەڕوی كورد و پێكهاتەكانی دیكەی ئەو ناوچانە دەبنەوە.

كێشەی كورد، بە شەڕ و داگیركاری و ئۆپەراسیۆنی زەمینی و ئاسمانی چارەسەر ناكرێت، رێگەی ئاشتییانە و گرتنەبەری لێكتێگەیشتن كلیلی چارەسەری كێشەكانی ناوچەكەیە. ئەم دۆخە وادەخوازێت هەمو لایەك بە گیانی بەرپرسیارێتی سیاسی و ئەخلاقی و مرۆیی مامەڵە لەگەڵ كەیسی رۆژئاوای كوردستان بكەن و ئەگەرەكانی جەنگ و ماڵوێرانی و خوێنڕشتن و كارەساتی مرۆیی دور بخەنەوە.

ئێمە لە بزوتنەوەی گۆڕان، سەرباری ناڕەزایەتیی توندمان بۆ ئەو هێرشە دوژمنكارییە و پشتگیریی تەواومان بۆ خەبات و مافی رەوای گەلەكەمان و دانیشتوانی رۆژئاوا، لەهەمان كاتدا داوا لەسەرجەم هێزە سیاسییەكانی كوردستان و حكومەتی هەرێم و عێراق و جەماوەر دەكەین، كە لەم ساتەوەختە هەستیارەدا پشت و پەنای رۆژئاوا بن و بەهەمو شێوازێكی خەباتی دیبلۆماسی و سیاسی و مەدەنی و جەماوەری ئەو پشتگیرییەی خۆیان پێشان بدەن و هەرێمیش هەمو جۆرە كۆمەكێك بۆ هاوڵاتیانمان لە رۆژئاوا فەراهەم بكات. هاوكات داوای دەست پێكردنی كەمپینی جەماوەری بەرفراوان ئەكەین هەم بۆ ناڕەزایەتی دەربڕین دژ بەو داگیركاریەو هەمیش بۆ پشتگیری مادی و مەعنەوی گەلەكەمان لە رۆژئاوا. داواش لە رەوەندی كوردی ئەكەین بە هەمو شێوازێكی مەدەنی خۆپیشاندان و ناڕەزایەتی دەربڕن و یارمەتیی خێرا بۆ رۆژئاوا كۆ بكەنەوە.

بزوتنەوەی گۆڕان
(9/10/2019)

کوردستان

منداڵە بریندارەكەی ڕۆژئاوای كوردستان ڕەوانەی فەرەنسا كرا

خەڵك- بەشی هەواڵ

لەسەر ئەركی مەسعود بارزانی، سەرۆكی پارتی دیموكراتی كوردستان”محەمەد حەمید” منداڵە بریندارەكەی ڕۆژئاوای كوردستان، لە دهۆكەوە گەیەنرایە هەولێر و پاشان لە ڕێگەی فڕۆكەخانەی هەولێرەوە ڕەوانەی فەرەنسا كرا بۆ وەرگرتنی چارەسەر.

محەمەد حەمید لە چەند ڕۆژی ڕابردوودا بەهۆی هێرشی فڕۆكەكانی توركیاوە برینداربووە و لێكۆڵینەوەی لەسەر دەكرێت، چونكە گومانی ئەوە دەكرێت بە چەكی قەدەغەكراو برینداركرابێت.

بەردەوام بە لە خوێندنەوە

کوردستان

ئارایشتگەى”دیناگوڵ” لە سلێمانی داخرا

خەڵك- بەشی هەواڵ

بەهۆی پابەند نەبوون بەجێبەجێكردنی مەرج و رێنماییەكانی كاركردن، لیژنە هاوبەشەكانی قائیمقامیەتی سلێمانی ئارایشتگەى”دیناگوڵ”ى  لە شاری سلێمانی داخست.

ماڵپەڕی قائیمقامیەتی سلێمانی لە ڕاگەیەنراوێكدا نوسیویەتی”لیژنەی ئارایشتگەكانی سەر بە لیژنە هاوبەشەكانی قائیمقامیەتی سلێمانی بەهۆی نەبونی مۆڵەتی كاركردن ئارایشتگەی “دیناگوڵ”یان لە شاری سلێمانی داخست”

گۆنا سەردار سەرۆكی لیژنەی ئارایشتگەكانی سەر بە لیژنەهاوبەشەكانی قائیمقامیەتی سلێمانی رایگەیاند، لە ئەنجامی گەڕان و بەدواداچونەكانی لیژنەكەیان بۆ چۆنیەتی جێبەجێكردنی مەرج و رێنماییەكانی كاركردن لە ئارایشتگەكاندا و دوای چەند جارێك ئاگاداركردنەوەی ئارایشتگای “دیناگوڵ” بۆ بەدەستهێنانی مۆڵەتی فەرمی كاركرن، بەڵام بەهۆی پابەندن نەبونی خاوەنی ئارایشتگاكە بەهۆی نەبونی مۆڵەت لەسەر فەرمانی قائیمقامی سلێمانی بڕیاری داخستنی ئارایشتگەكە دراو ئەمڕۆ سێ شەممە 22 تشرینی 2019 لەلایەن لیژنەهاوبەشەكانی قائیمقامیەتی سلێمانیەوە داخرا.

بەردەوام بە لە خوێندنەوە

کوردستان

كەجەكە لەسەر كوژرانی سەركردەیەكی لەئەزمڕ داوای ڕوونكردنەوە لەیەكێتی دەكات

خەڵك – بەشی هەواڵ

كەجەكە لەسەر كوژرانی سەركردەیەكی خۆی لەچیای ئەزمڕ لەشاری سلێمانی داوای ڕوونكردنەوە لەیەكێتیی نیشتیمانیی كوردستان و پەرلەمانی كوردستان و حكومەتی هەرێم دەكات.

كەجەكە لەڕاگەیەندراوێكیدا ڕایدەگەیەنێت، پێویستە ئەم كۆمەڵكوژییەی كە لە سلێمانی پێكهاتووە، لەسەرتادا یەكێتی نیشتیمانی كوردستان، پاشان لەلایەن پەرلەمانی هەرێمی كوردستان و حكومەتی هەرێمەوە ڕوون بكرێتەوە و ئاشكرای بكەن بۆ ڕای گشتی.

 

ئەمڕۆ دەزگای ئاسایشی هەرێمی كوردستان(سلێمانی) ڕاگەیەندراوێكی بڵاوكردەوە، كە دوو كادری باڵای پەكەكە لەچیای ئەزمڕ بەفڕۆكەی بێفڕۆكەوانی توركیا كوژراون.

 

دەقی پەیامەكەی كەجەكە:

لە ڕۆژی ١٥ی ئەم مانگەدا، هەڤاڵانی ئێمە سەیدخان ئایاس ناسراو بە دەمهات عەگید، كە لە باشوری كوردستان بۆ یەكێتی نەتەوەیی و لە دژی ئەو داگیركارییەی دەوڵەتی داگیركەریی تورك لە ڕۆژئاوا دەیكات خەباتی دەكرد، هەروەها ئەسەر ئرماك ناسراو بە جەمیل ئامەد، كە كەمئەندامی سەنگەر بووە، بەهۆی كێشەی تەندروستییەوە لە سلێمانیی بووە، بە پشتیوانی هێزە نێودەوڵەتییەكان و هاوكارە نۆكەرەكانی دەوڵەتی تورك بە ئامانج كراون و شەهید كراون، هەردوو هەڤاڵی ئێمە بەهۆی سیاسیی و نەتەوەیی و دیپلۆماتیی و تەندروستییەوە لە باشوری كوردستان بوون لە شاری سلێمانی.

هەردوو هەڤاڵی ئێمە لە سلێمانیدا بە ئۆپەراسیۆنێكی سەربازیی ئاسمانیی شەهید كراون، ئەم هێرشە جارێكیتر پیشانی دەدات كە گەلەكۆمەی نێودەوڵەتی لە دژی كوردان لەهەمان كاتدا لە چوارپارچەی كوردستان بەڕێوەدەچێت، ئەو هێزە نێودەوڵەتیی و ئەوانەی كە بوونەتە هاوكاری ئەم هێرشە، ئیرادەی ئازاد و هۆشیاری و ڕێكخستنی كوردی ئازادیان كردووەتە ئامانج.

هەرگیز گومان لەوەدا نییە ئەم گەلەكۆمەیە كە لەلایەن دەوڵەتی توركی فاشیستەوە پێكهاتووە لەلایەن هەندێك هێزی هەرێمیی و نۆكەران و سیخوارنەوە هاوكاریان كراوە، ئەو هێزانە خەباتی سیاسیی، كۆمەڵاتی، دیپلۆماتی و ڕێخراوەیی كوردیان كردووەتە ئامانج و ویستوویانە گەلی ئێمە بەبێ ئیرادە و نوێنەر بهێڵنەوە، پێویستە ئەم كۆمەڵكوژییەی كە لە سلێمانی پێكهاتووە، لەسەرتادا یەكێتی نیشتیمانی كوردستان، پاشان لەلایەن پەرلەمانی هەرێمی كوردستان و حكومەتی هەرێمەوە ڕوون بكرێتەوە و ئاشكرای بكەن بۆ ڕای گشتی، ئەم كۆمەڵكوژییە لەسەر هەڤاڵانی ئێمە لە هەرێمی ژێر بەرپرسیارییەتی حكومەتی هەرێمی كوردستاندا پێكهاتووە، بۆیە پێویستە ئەم كۆمەڵكوژییە نەكە قوربانیی بەرژەوەندیی هیچ حزبێك و پەیوەندیی و بەرژەوەندییە هەرێمییەكان.

لەم چوارچێوەیەدا پێویسەتە كۆمەڵكوژییەكە لێكۆڵینەوەی لەسەر بكرێت و ئۆپەراسیۆنێكی بەمشێوەیە شاراوە و دەرەوەی مرۆڤایەتیی و نایاسیی دەوڵەتی توركی فاشیست كە بەرپرسیاری ئەم كۆمەڵكوژییەیە ڕەتبكرێتەوە و شەرمەزار بكرێت، پێویستە ئاشكرایبكەن كە دەوڵەتی تورك ئەم هێرشەی لەڕێگەی ئاسمانییەوە پێكهێناوە، پێویستە ئاشكرای بكەن كە ئاسمانی هەرێمەكە چۆن بنپێ كراوە و لەلایەن كێ وە بنپێكراوە.

هەم ئێمە و هەم گەلەكەمان لە چاوەڕوانی ئەوەدایە، كە ئەم هێرشە سیاسیی و كۆمەڵكوژییە لە زووترین كاتدا ڕوونبكرێتەوە.

وەكو دەزاندرێت دەوڵەتی توركی فاشیت بەهەمان ڕێباز و پەیوەندییە گڵاوكانی خۆفرۆشان و سیخوڕان هەڤاڵانی ئێمەی دیكە كە خەباتیی نەتەوەیی و دیپلۆماتی تیرۆر دەكرد.

ئاشكرایە، كە ئەم هەڤاڵانەی ئێمە و هەڤاڵانی دیكەی ئێمە كە لەڕابردوودا شەهیدكراون لە چوارچێوەی هەمان پیلانی هاوشیوەدا بە ئامانج گیراون.

ئەم كۆمەڵكوژییە لە كاتێكدایە، كە هاوكاتە كە دەوڵەتی توركی داگیركەر هێرشی كردووەتەسەر ڕۆژئاوای كوردستان، ئەمەش دوپاتیدەكاتەوە، كە كورد لەهەر شوێنێك بێت لەلایەن دەوڵەتی توركەوە دەكرێنە ئامانج و ڕووبەڕووی لەناوبردنیان دەكەنەوە.

ڕژێمی دەوڵەتی توركی فاشیست بەشێوەیەكی بە پیلان و سیستماتیك لەناوبردنی كوردان بەڕێوەدەبەن، هەروەها لە چوارپارچەی كوردستاندا هەموو كەسیایەتیی و ڕێكخستنەكانی كورد كە بۆ ئیرادەو هۆشیاریی و بەرخۆدانی هاوبەش كاردەكەن دەكاتە ئامانج.

دەوڵەتی توركی فاشیست بەم كۆمەڵكوژییە ئیرادەو ڕۆحی یەكێتیی نەتەوەیی كە لە دژی داگیركارییە لەسەر ڕۆژئاوا لە چوارپارچەی كوردستان بەڕێوەدەبرێت دەكاتە ئامانج.

هەردوو هەڤاڵی ئێمە، بە خەباتی سیاسیی و نەتەوەییان هەمیشە ویستوویانە كە یەكێتی كورد پێكبێت و بەهێز ببێت.

دەوڵەتی توركی فاشیست هێزێكە لە هەموو شوێنێكی جیهان دژی كوردان بكوژ و قڕكەرە، زیهنییەتێك كە لەساڵی ٢٠١٣ ژنانی كوردی شۆڕشگێڕی كۆمەڵكوژ كرد چیبێت زیهنییەتێكە كە لە سلێمانیی ئەم دوو هەڤاڵەی ئێمەی شەهید كرد.

لە دژی ئەم كۆمەڵكوژییەی كورد، ژن و گەلی ئێمە لە چوارپارچەی كوردستان و هێزە دیموكراتەكان وەڵامی پێویست دەدەن و دەبێت بیدەن.

گەلی ئێمەی باشوری كوردستان گەلێكە كە بە ساڵانە ئازاری سەختیان بینیوە، بە ئەنفال و كۆمەڵكوژیی هەڵەبجەدا تێپەڕیون، بە هەڵوێستی خۆیان و بەئیرادەی خۆیان لە دژی هیچ هێزێك سەریان دانەنواندووە، پێویستە لە دژی ناحەزانی سەدەی ٢١ـیەمین دا كە لەلایەن دەوڵەتی توركی مشەخۆرەوە بوونەتە سیخوڕ و لەدژی گەلی خۆیان بەكاردەهێنرێن، بەڕۆحی نەتەوەیی لەدژی ئەو كەسانە بووەستنەوە و هیچ مافێكی ژیان نەدەنە ئەو خۆفرۆش و سیخوڕانە.

لە سەرەتادا هێزە سیاسییەكانی باشوری كوردستان، هەروەها پێویستە هەموو كوردێك لە دژی ئەم شەهادەتە بە پێشخستنی یەكێتی نەتەوەیی و خاوەنداریكردن لە شەهیدان وەڵام بدەنەوە و وەڵامی هەرەگرنگ بۆ ئەم كۆمەڵكوژییەوە ئەوەیە یەكێتی نەتەوەیی پێش بخەن و خاوەنداریی لە شەهیدان بكەن.

مەراسیمی بەخاكسپاردن لە ٢٣-١٠ لە سلێمانی بەڕێوەدەچت، ئێمە بانگ لە تەواویی گەلەكەمان و هیزە سیاسییەكان دەكەین، كە بەشداریی مەراسیمەكە بكەن و هەڵوێست پیشان بدەن.

ئێمە جارێكیتر پەیوەست بوونی خۆمان بە شەهیدانەوە ڕادەگەیەنین، لە سەرەتادا سەرەخۆشی و سەرساخی لە بنمەڵەی دەمهات عەگید و جەمیل ئامەد و ڕێبەر ئاپۆ دەكەین، جارێكیتر بەڵێن دەدەینە شەهیدان و گەلەكەمان كە ئاواتی هەڤاڵانمان بەدی بهێنین و تێكۆشانێك كە ئەوان لەپێناویدا گیانی بەخشی بگەیەنینە سەركەوتن.

بەردەوام بە لە خوێندنەوە

کوردستان