ئێمە لە تۆرە کۆمەڵایەتیەکان

کوردستان

حكومەتی هەرێم دەربارەی ڕۆژئاوای كوردستان پەیامێك بۆ توركیا دەنێرێت

خەڵك- بەشی هەواڵ
حكومەتی هەرێمی كوردستان لە كشانەوەی سوپای ئەمریكا لە ڕۆژئاوای كوردستان نیگەرانە و ڕایدەگەیەنێت، كە لەوانەیە دۆخێك دروست بكات ببێتە هۆی گەڕانەوەی داعش و ئاوارەبوونی ژمارەیەكی زۆری خەڵك.

حكومەتی هەرێمی كوردستان لە ڕاگەیەنراوێكدا ئاماژەی بەوەكردووە، داوا لە توركیا دەكەین وەك ئەندامێكی هاوپەیمانی نێودەوڵەتی لە شەڕی دژ بە تیرۆر، هیچ هەنگاوێك نەهاوێژێت كاریگەری نەرێنی لەو پێشكەوتنە بكات كە لە شەڕی دژی داعش بە دیهاتووە و مەترسی لە كۆنترۆڵ دەرچوونی چەكدارە تیرۆریستە دەستگیركراوەكان هەبێت.

دەقی ڕاگەیەنراوەكە:
حكومەتی هەرێمی كوردستان نیگەرانی زۆری خۆی دەردەبڕێت بەرامبەر بڕیاری كشاندنەوەی هێزەكانی وڵاتە یەكگرتووەكانی ئەمەریكا لە ناوچەی ئارامی باكووری رۆژهەڵاتی سوریا و ئەو راپۆرتانەی باس لە ئەگەری هێرشی تاكلایەنەی توركیا بۆ ئەو ناوچەیە دەكەن.

حكومەتی هەرێمی كوردستان داوا لە توركیا دەكات وەك ئەندامێكی هاوپەیمانی نێودەوڵەتی لە شەڕی دژ بە تیرۆر، هیچ هەنگاوێك نەهاوێژێت كاریگەری نەرێنی لەو پێشكەوتنە بكات كە لە شەڕی دژی داعش بە دیهاتووە و مەترسی لە كۆنترۆڵ دەرچوونی چەكدارە تیرۆریستە دەستگیركراوەكان هەبێت.

دەرەئەنجامەكانی هەر گرژبوون و پێشهاتێكی سەربازی، كاریگەری بۆ دەرەوەی سنووری سوریاش دەبێت و لەوانەیە دۆخێك دروست بكات ببێتە هۆی گەڕانەوەی داعش و ئاوارەبوونی ژمارەیەكی زۆری خەڵك. بۆیە زۆر پێویستە هەموو لایەنەكانی كێشەكە، بە هێزە كوردییەكانیشەوە، لە رێگەی گفتوگۆ و دایەلۆگەوە دۆخەكە هێور بكەنەوە.

حكومەتی هەرێمی كوردستان دووپاتی دەكاتەوە، پێویستە كێشەكان رێگەچارەیەكی سیاسی گشتگیریان بۆ بدۆزرێتەوە كە مافەكانی هەموو هاووڵاتییانی سوریا و لە نێویشیاندا كورد پارێزراو بن.

هەرێمی كوردستان لە شەڕی دژی تیرۆریستانی داعش قوربانییەكی زۆری داوە و ئێستاش میوانداری ملیۆنێك و سەد هەزار ئاوارە و دەربەدەر دەكات كە زۆربەیان لە دەست ئەو قەیرانەوە پەنایان بۆ هەرێمی كوردستان هێناوە. ئەركی كۆمەڵگەی نێودەوڵەتیشە رێگا لە دروستبوونی لێشاوێكی دیكەی ئاوارەبوون بگرێت.

حكومەتی هەرێمی كوردستان لە كاتێكدا بەردەوام لە نزیكەوە چاودێری دۆخەكە دەكات، لە رێگەی چەندین كەناڵیشەوە كار لەسەر ئەو پرسە دەكات.

حكومەتی هەرێمی كوردستان
٢٠١٩/١٠/٨

کوردستان

توركیا: نامانەوێ یەك شەڕڤان لە مەنبج‌و كۆبانێ و قامیشلۆ بوونی هەبێت

خەڵك-بەشی هەواڵ

وەزیری دەرەوەی توركیا ئاشكرایدەكات، نامانەوێت هیچ ئەندامێكی یەپەگە لە ناوچەی ئارام بوونی هەبێت.

مەولود چاوش ئۆغلۆ، وەزیری دەرەوەی توركیا بە كەناڵی حەوتی وڵاتەكەی ڕاگەیاند، ڕۆژی سێشەممەی داهاتوو 22-10-2019 لەگەڵ ڕوسیا كۆدەبینەوە و تاوتوێی كشانەوەی شەڕڤانانی یەپەگە دەكەین لە ناوچەكانی مەنبج، كۆبانێ و قامیشلۆ.

وتیشی، “ڕِوسیا لە نیگەرانییەكانمان تێدەگات و نامانەوێت دوای 120 كاتژمێرە دیاریكراوەكە هیچ ئەندامێكی یەپەگە لەسەر سنوورەكانی توركیا بوونی هەبێت”.

ئاماژەی بۆ ئەوەشكرد، لە كاتی كشانەوەی شەڕڤانانی یەپەگە، سوپای توركیا لە ناوچەی ئارام دەبن و چاودێری هەنگاوەكانی دواتریش دەكەن.

لای خۆشییەوە مەسعود حەسۆ، نوێنەری ڕۆژئاوا لە هەرێمی كوردستان لە لێدوانێكی ڕۆژنامەوانیدا ڕایگەیاند، ئەوەی توركیا داوای دەكات تەنها كۆمەڵكوژییە دژی كورد و گۆڕینی دیموگرافیایە لە ڕۆژئاوای كوردستان، بۆیە توركیا مەبەستی سڕینەوەی پێكهاتەی كوردە.

سەبارەت بە كشانەوەیان لە سەرێكانی و قامیشلۆ و مەنبەج ناوبراو ئاشكرایكرد، ئەو شوێنانە ناوچەی خۆمانن، لەسەر ماڵ و حاڵی خۆمان دەركرێین بۆ كوێ بچین، ئەوە كەی ڕەوایە لەسەر ماڵی خۆت دەربكرێیت و خەڵكی تر لە جێگەت نیشتەجێ بكرێت، بۆیە ئەمە بەهیچ جۆرێك قابیلی قبوڵ نییە و هەسەدە بە خوێن نەبێت لەو ناوچانە ناكشێتەوە.

بەردەوام بە لە خوێندنەوە

کوردستان

ئەمریكا: سەربازەكانیان لە سوریا دەچنە ڕۆژئاوای عیراق

خەڵك – بەشی هەواڵ
وەزیری بەرگری ئەمریكا ڕایدەگەیەنێت، لەگەڵ هاوتا عیراقیەكەی سەبارەت بە پلان بۆ گواستنەوەی زیاتر لە 700 سەرباز لە سوریا بۆ نێو ڕۆژئاوای عیراق قسەی كردووە، دەشڵێت: “لە ژێر پلانی ئێستادا هەمووی ئەو سەربازانەی ئەمریكا، كە سوریا جێدێڵن بۆ ڕۆژئاوای عیراق دەڕون و لەشكرەكە درێژە بە كردارەكانی بۆ سەر داعش دەدات و ناهێڵێت داعش سەرهەڵبداتەوە”.

ئاژانسی (ئەسۆشیەتد پرێس) لە زاری مارك ئەسپر، وەزیری بەرگری ئەمریكا بڵاویكردەوە، كە لە ئێستادا وڵاتەكەی لە پلانیدایە هەمووی ئەو سەربازانەی ئەمریكا، كە سوریا جێدێڵن بۆ ڕۆژئاوای عیراق بڕۆن و لەشكرەكە درێژە بە كردارەكانی بۆ سەر داعش دەدات و ناهێڵێت داعش سەرهەڵبداتەوە.

ڕاشیگەیاندووە، لە گەڵ هاوتای عیراقییەكەی سەبارەت بە پلان بۆ گواستنەوەی زیاتر لە 700 سەرباز لە سوریا بۆ نێو ڕۆژئاوای عیراق قسەی كردووە.

ئاماژەی بۆ ئەوەشكردووە، ئەو سەربازانەی دەچنە عیراق دوو ئەركیان لە پێش دەبێت، یەكەم یارمەتی بۆ بەرگریكردن لە عیراق و ئەنجامدانی كرداری دژە داعش لە دەمێكدا بۆ هەنگاوەكانی دوایی دەچین.

ئەمە لەكاتێكدایە، ‌بەپێی ڕێككەوتنێكی نێوان دوو وڵات، لەئێستادا زیاتر لە 5 هەزار سەربازی ئەمریكی لە عیراق هەیە.

بەردەوام بە لە خوێندنەوە

کوردستان

ئاژانسی فەرمی سوریا: هەسەدە لە سەرێكانی كشایەوە

خەڵك- بەشی هەواڵ
میدیای فەرمی حكومەتی سوریا ڕایدەگەیەنێت، كەهێزەكانی هەسەدە لە سەرێ‌ كانی كشانەوە و شارەكە لەلایەن سوپای داگیركەری توركیا و چەكدارە هاوپەیمانەكانیەوە داگیر كرا.

هەردوو ئاژانسی (سانا)ی فەرمی و كەناڵی (اڵاخباریە) ڕایانگەیاند، كە هێزەكانی سوریای دیموكرات لە سەرێكانی بەتەواوی كشانەوە و سوپای توركیا و چەكدارە هاوپەیمانەكانی شارەكەیان داگیر كرد.

ئاماژە بەوەشكراوە، كە هێزەكانی هەسەدە بەرەو پارێزگای حەسەكە كشاونەتەوە.

بەڵام تا ئێستا لەلایەن فەرماندەیی هەسەدەوە هیچ ڕوونكردنەوەیەك بڵاونەكراوەتەوە.

لای خۆشیەوە ئاژانسی (هاوار) بڵاویكردەوە، كە كاروانێكی زۆری هاووڵاتیانی مەدەنی لە سەرێكانی-یەوە گەیشتونەتە حەسەكە و هاوكات بریندارانی سەرێكانی لەڕێگەی مانگی سووری كوردیەوە ڕزگار كران و گەیەنرانە نەخۆشخانەی قامیشلۆ.

پێشتریش مەزڵوم عەبدی، فەرماندەی هێزەكانی سوریای دیموكرات ڕایگەیاند، كە سوپای سوریا ئاستەنگ بۆ كشانەوەی هەسەدە دروست دەكەن و وتیشی، “ئەگەر توركیا پابەندی ئاگربەست نەبێت ئەوا وەك پیلانگێڕی تەماشای ڕێككەوتنەكە دەكەین”.

لە چەند ڕۆژی ڕابردوودا توركیا و ئەمریكا ڕێككەوتن لەسەر ئاگربەست لەباكووری سوریا و كشانەوەی هێزەكانی هەسەدە لەو ناوچانە لەماوەی 120 ڕۆژدا، بەڵام سوپای توركیا و چەكدارە توندڕەوە هاوپەیمانەكانی پابەند نەبوون و چەندین ناوچەیان بۆردومان كرد و بەهۆیەوە ژمارەیەك هاووڵاتی مەدەنی و شەڕڤان شەهید و بریندار بوون.

بەردەوام بە لە خوێندنەوە

کوردستان