ئێمە لە تۆرە کۆمەڵایەتیەکان

کوردستان

یەكێتی هەڵوێستی خۆی لەبارەی كشانەوە لە حكومەت ڕاگەیاند

خەڵك- بەشی هەواڵ
بەرپرسێكی یەكێتیی نیشتمانیی كوردستان هەڵوێستی حزبەكەی لەبارەی پاشەكشەكردن لە حكومەتی هەرێم ئاشكرا دەكات و ئاماژە بەو كۆبوونەوانەش دەكات، كە لەماوەی چەند ڕۆژی داهاتوودا لەگەڵ پارتی دیموكراتی كوردستان و بزوتنەوەی گۆڕان سازدەكرێن.

سەعدی ئەحمەد پیرە، ئەندامی مەكتەبی سیاسیی یەكێتی بە ماڵپەڕی فەرمی پارتی ڕاگەیاندووە، “ئەگەر یەكێتی بیەوێت لە حكومەت بكشێتەوە خۆی قسە دەكات، ئەو زانیارییانەی لە هەندێك شوێن و سۆشیال میدیا لەبارەی كیشانەوەی یەكێتی بڵاودەكرێنەوە، هیچ پەیوەندییەكیان بە یەكێتییەوە و نییە، كشانەوەی یەكێتی لە حكومەتی هەرێمی كوردستان هیچ بنەمایەكی نییە و دوورە لە ڕاستییەوە.”

سەعدی پیرە دەڵێت: “بڕیارە لە ڕۆژانی داهاتوودا پارتی و یەكێتی كۆ ببنەوە و دوای كۆبوونەوەی پارتی و یەكێتیش كۆبوونەوەیەكی سێ قووڵی لە نێوان پارتی و یەكێتی و گۆڕاندا بەڕێوە دەچێت، لە كۆبوونەوەكانیشدا ڕەوشی حكومەت و ئەو پرسانەی تا ئێستا ماون و لە ماوەكانی ڕابردوودا ساردییەك كەوتە نێوان پارتی و یەكێتی باس دەكرێن”.

بەرپرسەكەی یەكێتی بەپێویستیشی زانیوە، ئەو بابەتانە قسەیان لەسەر بكرێت و كۆتایی بەو پرسانە بهێنرێت، كە ساردییان خستۆتە نێوان پارتی و یەكێتی.

ئەندامەكەی مەكتەبی سیاسی یەكێتی ڕایگەیاندووە، “هەنگاوێكی هاوبەش هەیە بۆ پشتیوانیكردنی حكومەت و ڕێكخستنەوەی كارەكانی، دەشبێت هەڵوێستی هاوبەش هەبێت بۆ ئەوەی بە هەموومان پشتیوانی حكومەتی هەرێمی كوردستان بین”.

جیهان

ئیدارەی خۆسەریی: دەستووری داهاتووی سوریا بەر لەوەی لە دایكبێت مردووە

خەڵك – بەشی هەواڵ

ئیدارەی خۆسەریی باكوور و ڕۆژهەڵاتی سوریا ڕایدەگەیەنێت، پابەندی ئەو دەستوورە نابن كە لە ئێستادا و بە بێ بەشداری نوێنەرانی ئەوان لە جنێڤ ئامادەكاری بۆ نووسینەوەی دەكرێت.

ئیدارەی خۆسەریی باكوور و ڕۆژهەڵاتی سوریا لە ڕاگەیەنراوێكدا بە ئاماژەدان بە بەردەوامی پەراوێزخستنیان لە كارەكانی نووسینەوەی دەستووری داهاتووی سوریا كە لە جنێڤ بە بەشداری بەشێك لە نوێنەرانی ئۆپۆزسیۆن و نوێنەرانی حكومەتی دیمەشق بەڕێوەدەچێت، ڕایگەیاندووە، ئەو دەستوورە بەر لەوەی لە دایكبێت مردووە، چونكە دەستوورێكی جیاكارانەیە و بەشێكی سەرەكی لە پێكهاتەكانی باكوور و ڕۆژهەڵاتی سوریا نادیدەگیراون.

ئیدارەی خۆسەریی باكوور و ڕۆژهەڵاتی سوریا ئەوەشیخستووەتەڕوو، پەراوێزخستنی پێكهاتەكانی باكوور و ڕۆژهەڵاتی سوریا لە كاتێكدایە نوێنەرانی گروپە توندڕەوەكان و كەسانی سەر بە داعش و بەرەی نوسڕە لە ئامادەكردنی دەستووردار بەشداریان پێكراوە.

ئیدارەی خۆسەریی باكوور و ڕۆژهەڵاتی سوریا جەختی لەوەشكردووەتەوە، پابەندی دەستوورێكی لەو جۆرە و بڕیاری هیچ كۆبوونەوەیەك نابن كە تیایدا بەشدار نەبن و ڕاشیگەیاندووە، بەردەوام دەبن لە هەوڵەكانیان لە پێناوە بونیاتنانی سوریایەكی یەكگرتووی، فرەیی و ناناوەندی (اللامركزی).

بەردەوام بە لە خوێندنەوە

کوردستان

دەمیرتاش: تەندروستیم باش نییە

خەڵك – بەشی هەواڵ

هاوسەرۆكی پێشووی پارتی دیموكراتی گەلان (هەدەپە) كە ئێستا لە زینداندایە ڕایدەگەیەنێت، دەمێكە نەخۆشە و گرفتی تەندروستی هەیە، هێشتا نەخۆشییەكەیشی دەستنیشاننەكراوە.

سەڵاحەدین دەمیرتاش هاوسەرۆكی پێشووی پارتی دیموكراتی گەلان (هەدەپە) لە چاوپێكەوتنێكی ڕۆژنامەوانیدا لەگەل ڕۆژنامەی ئێڤرەنسەلی توركی ئاماژەی بەوەكرد:”بەداخەوە باری تەندروستیم زۆر باش نییە. هێشتا نەخۆشییەكەشم دەستنیشاننەكراوە، دەسەڵاتێكی ڕسوای كەوتوو، ڕزیو، لەبنهاتوو هەیە كە پشتیوانیی گەلی بە ڕێژەیەكی بەرز لەدەستداوە، كاتی ترسان و ڕەشبینی نییە”.

سەڵاحەدین دەمیرتاش كە لە ڕۆژی 4ی تشرینی دووەمی 2016ەوە لە زیندانی داخراوی جۆری ئێف لە ئەدیرنە دەستبەسەرە، ڕایگەیاند لە 26ی تشرینی دووەمی 2019ەوە ناوبەناو لە هۆشخۆی دەچێت و شتی بیردەچێتەوە، سەرەڕای پێشنیازی پزیشكان، لێپرسراوانی زیندان ڕێگر بووە لە گواستنەوەی بۆ نەخۆشخانە.

جێی ئاماژەیە، سەرەتای ئەم مانگە ئایگول دەمیرتاش، خوشكی سەڵاحەدین دەمیرتاش لە جریوەیەكدا لە تۆڕی كۆمەڵایەتی تویتەر ئاشكرایكرد، ڕۆژی 26/11/2019 سەڵاحەدین دەمیرتاش تووشی ئازاری سنگ و هەناسەتووندی بووەتەوە و ماوەیەكی زۆر بە بێهۆشی ماوەتەوە.

بەردەوام بە لە خوێندنەوە

کوردستان

پەڕلەمانتارێك: پەڕلەمان دڵداریەكی تاك لایەنە لەگەڵ حكومەتدا دەكات و حكومەتیش كوڕێكی سالارە

خەڵك – بەشی هەواڵ
ئەندامێكی پەڕلەمانی كوردستان ڕایدەگەیەنێت، فراكسیۆنە گەورەكانی پەڕلەمان پێكهێنەری سەرەكی حكومەتی هەرێمن، دەشڵێت: “دەبێت پەڕلەمان دژایەتی حكومەت بكات و چاودێری بكات، بەڵام ئەم پەڕلەمانەی ئێستا دڵداریەكی تاك لایەنە لەگەڵ حكومەتدا دەكات و حكومەتیش كوڕێكی سالارە”.

سیروان بابان، ئەندامی پەڕلەمانی كوردستان بە (خەڵك)ی ڕاگەیاند، كێشەی سەرەكی ئێستا پەڕلەمان لەوەدایە خاوەنی میدیایەكی سەربەخۆ نیە تا بەرگری لەخۆی بكات، لەكاتێكدا پەڕلەمان گەورەترین دەسەڵاتی ئەم هەرێمەیە، كەچی بۆتە شوێنی تانە و تەشەری سۆشیال میدیا.

وتیشی، “ئەبێت پەڕلەمانی ڕاستەقینە دوژمنی حكومەتەكەی بێت و بەردەوام لە هەموو ڕوویەكەوە چاودێری بكات، بەجۆرێك لە هەر شوێنێك كەموكورتی بوو وەك مار پێوەی بدات، نەك ئەو پەڕلەمانەی ئێستا نەرم و نیانن لەگەڵ حكومەت”.

ڕاشیگەیاند، فراكسیۆنە گەورەكانی پەڕلەمان لە ئێستادا پێكهێنەری سەرەكی حكومەت و كابینەی نۆیەمن، بۆیە ئەوەی ناوی ئۆپۆزسیۆنە كەمن، لە ئێستادا پەڕلەمان دڵداریەكی تاك لایەنە لەگەڵ حكومەت دەكات، بەڵام حكومەت كوڕێكی لاسارە.

ئاشكراشیكرد، لەم خوولەدا و لە دەستەی سەرۆكایەتی پەڕلەمان و هەندێكی زۆر لە هاوپیشەكانم دەیانەوێت بەجۆرێك ڕەفتار بكەن، دەسەڵات و بەرپرسەكانی حكومەت لە خۆیان ڕازی بكەن، كە ئەمەش نابێت.

بەردەوام بە لە خوێندنەوە

کوردستان