ئێمە لە تۆرە کۆمەڵایەتیەکان

کوردستان

چاودێری‌ پاسەكانی گواستنەوەی خوێندكاران دەكرێت

خەڵك- بەشی هەواڵ

ئەو پاس و تەكسییانەی خوێندكاران دەگوازنەوە دەبێت تەواوی رێنماییەكانی هاتوچۆ و مەرجی سەلامەتی و لایەنی پەروەردەیی جێبەجێ بكەن، بەپێچەوانەوە سزای مادی هەتا لێسەندنەوەی مۆڵەتی كاركردن دەدرێن.

ماڵپەڕی قائیمقامیەتی سلێمانی نوسویەتی”لیژنەی سەرپەرشتی گواستنەوەی منداڵانی باخچە و خوێندكاران لە ماڵەوە بۆ خوێندنگا و بە پێچەوانەوە كە سەر بە لیژنە هاوبەشەكانی قائیمقامیەتی سلێمانییە، بەبەردەوامی و رۆژانە لە چەند كاتێكی جیاوازدا چاودێری ئەو پاس و تەكسییانە دەكات كە هاتوچۆ بە خوێندكاران دەكەن و رێگە نادات لە رووی نرخ و چۆنێتی گواستنەوەوە بەدەر لە رێنماییەكان كار بكەن.”

چالاك سەڵاح نوێنەری هاتوچۆ و سەرۆكی لیژنەكە رایگەیاند، بەپێی كۆنوسێك كەبەبەشداری لایەنە پەیوەندیدارەكان لە قائیمقامیەتی سلێمانی واژوو كراوە رێنمایی بۆ تەواوی ئەو ئۆتۆمبێلانە دەرچووە كە هاتوچۆ بە خوێندكاران لە خوێندنگە و باخچەكانی ساوایان و بە حكومی و ناحكومییەوە دەكەن.

وتیشی” رێگە نادرێت هیچ ئۆتۆمبێلێك له ژمارەی كوشنەكان زیاتر خوێندكار هەڵبگرێت و نرخی گواستنەوەكانیش دیاریكراوە، ئەمە سەرەڕای ئەوەی پێویستە ئۆتۆمبێلەكە مەرجی توندوتۆڵی تێدا بێت و لە روی یاساییەوە هیچ كێشەیەكی نەبێت.”
لە بارەی نرخی گواستنەوەشەوە ئەوەی ئاشكرا كرد كە:
– ئەو خوێندنگا و باخچانەی لە سنوری گەڕەكەكانی خۆیانن نرخی گواستنەوەیان بە پاس لە (15 – 20) هەزار و بۆ تەكسی لە (25 – 30) هەزار دینار دەبێت بۆ هەر مانگێك.
– ئەو خوێندنگا و باخچانەی كە دەكەونە دەرەوەی سنوری گەڕەكەكانی خۆیان، بەڵام لەناو شەقامی بازنەیی مەلیك مەحموددان بۆ پاس (20 – 30) هەزار و بۆ تەكسی (25 – 35)هەزار دیناردا دەبن بۆ هەر مانگێك و بەپێی دورونزیكی نرخەكان كەم و زیاد دەكات.

لیژنەی سەرپەرشتی گواستنەوەی منداڵانی باخچە و خوێندكاران لە ماڵەوە بۆ خوێندنگا و بە پێچەوانەوە سەر بە لیژنە هاوبەشەكانی قائیمقامیەتی سلێمانییە و لە نوێنەری هاتوچۆ و ئاسایش و گواستنەوە و پەروەردە و چاودێری بازرگانی پێكهاتووە و بۆ گلەیی و رەخنە لە هەر پاسێك یان ئیدارەی خوێندنگەیەك كە تێبینی ئەوە كرابوو بەدەر لە رێنماییەكان كار دەكات، دەتوانرێت لە رێگەی پەیجی قائیمقامیەتی سلێمانی یان ژمارە موبایلی لیژنە هاوبەشەكانەوە (07708677777) سكاڵا بكرێت.

جیهان

مەزڵوم كۆبانێ‌ وەڵامی ئەردۆغان دەداتەوە

خەڵك – بەشی هەواڵ

فەرماندەی گشتی هێزەكانی سوریای دیموكرات ڕایدەگەیەنێت، سەرۆكی توركیا دیمۆگرافیای ناوچە داگیركراوەكان دەگۆڕێت.

مەزڵوم عەبدی فەرماندەی گشتی هێزەكانی سوریای دیموكرات (هەسەدە) لە جریوەیەكدا لە تۆڕی كۆمەڵایەتی تویتەر بڵاویكردەوە، ئەوەی كە سەرۆكی توركیا ڕایگەیاندووە سەبارەت بە “نیشتەجێكردنی ملیۆنێك كەس لە سەرێكانی و گرێ‌ سپی گۆڕینی” كارێكی مەترسیدارە و ئامانج لێی گۆڕینی دیمۆگرافیایە.

مەزڵوم عەبدی ئاماژەی بەوەشداوە،”ئەمریكا و ڕوسیا بەرپرسیارن لە ڕێگری كردن لە گۆڕینی دیمۆگرافیای ناوچە داگیركراوەكان”.

فەرماندەی گشتی هەسەدە داواشی لە ئەمریكا و ڕوسیا كردووە:”پێویستە هەردوو وڵات بەڵێنەكانیان جێبەجێ بكەن سەبارەت بە گێڕانەوەی دانیشتووانی ناوچەكە كە بە بنەچە و خەڵكی ئەو ناوچانەن”.

بەردەوام بە لە خوێندنەوە

کوردستان

وەزیری ناوخۆ: جگە لە پاسپۆرت بەڕێوەبەرایەتییەكی تری فیدراڵی لە زاخۆ دەكەینەوە

خەڵك – بەشی هەواڵ

وەزیری ناوخۆی هەرێم ڕایدەگەیەنێت، جگە لە نووسینگەی پاسپۆرت، نووسینگەیەكی تری فیدراڵی لە زاخۆ دەكەنەوە.

ڕێبەر ئەحمەد وەزیری ناوخۆی هەرێم لە میانی كردنەوەی نووسینگەی پاسپۆرتی زاخۆ لە كۆنگرەیەكی ڕۆژنامەوانیدا ڕایگەیاند: “بەپێی ڕاسپاردەكانی سەرۆكی حكومەت بڕیارمانداوە، خزمەتگوزارییەكان بگەیەنینە هەموو ناوچەكان و مزگێنی بە خەڵكی زاخۆ دەدەین، كە بەڕێوەبەرایەتیی نشینگەش لە زاخۆ دەكەینەوە”.

وەزیری ناوخۆ ئاماژەی بەوەشدا: “لە ماوەیەكی نزیكدا بەڕێوەبەرایەتییەكە دەست بە كارەكانی دەكات، چونكە ئەم قەزایە سنوورییە و هاتوچۆییەكی زۆری تێدایە و پێویستی بەو بەڕێوەبەرایەتییە هەیە، هەم بۆ خەڵكی ئێمە و هەم خەڵكی بیانیش، ئەوانەی دێنە زاخۆ و پارێزگای دهۆك، كارەكانیان بەڕێوە ببەن”.

جێی ئاماژەیە، ئەمڕۆ سێ شەممە، بە ئامادەبوونی وەزیری ناوخۆی حكومەتی هەرێمو پارێزگاری دهۆك و نوێنەری وەزارەتی ناوخۆی حكومەتی ناوەند، نووسینگەی پاسپۆرتی زاخۆ كرایەوە.

بەردەوام بە لە خوێندنەوە

کوردستان

تیرۆریستێك لەسنوری كەركوك دەستگیركرا

خەڵك – بەشی هەواڵ

سەرچاوەیەكی ئەمنی لەهێزەكانی سوپای عیراق ئاشكرايكرد، لەبازگەی مەكتەبی خالدی سەر بە شاری كەركوك تیرۆریستێكی داواكراو دەستگیركرا.

سەرچاوەیەكی ئەمنی لەهێزەكانی سوپای عیراق، ڕایگەیاند:”ئەمڕۆ هێزەكانی لیوای 6ی مغاویری سوپای عیراق بەپێی ماددەی 4ی تیرۆر، تیرۆریستێكیان دەستگیركردووە”.

ئەو سەرچاوەیە ڕوونیشكردووەتەوە:”تیرۆریستەكە ویستویەتی لەبازگەی مەكتەب خالد تێپەڕێت، بەڵام بەپێی زانیاری وردی هەواڵگری ناسراوەتەوە و دەستگیركراوە”.

بەردەوام بە لە خوێندنەوە

کوردستان