ئێمە لە تۆرە کۆمەڵایەتیەکان

عێراق

ئێران، ناوی ئەو وڵاتانەی دەستیان لە خۆپیشاندانەكانی عیراقدا هەیە ئاشكرادەكات

خەڵك-بەشی هەواڵ

پسپۆڕێكی سیاسی ئێرانی ڕایدەگەیەنێت، ئەمریكییەكان لە بنكەی عەین ئەسەد لە پارێزگای ئەنبار ژوورێكی عەمەلیاتیان پێكهێناوە، كە نوێنەرایەتی سعودیە، ئیمارات، ئیسڕائیل و بەعسییەكان بەشدارییان تێدا كردووە.

میدیاكانی ئێران بڵاویان كردەوە، سەعدوڵڵا زارعی،پسپۆڕی سیاسی ڕۆژهەڵاتی ناوەڕاست ڕایگەیاند، لە وڵاتێكی وەك عیراق، بوونی چەند هەزار كەسێكی ناڕازی لە بەغدای پایتەخت بە ئاسایی دادەنرێت، بەڵام ئەوە نائاساییە بە خۆپێشاندانی 20 هەزار كەسی لە تەواوی عیراق پیشان بدرێت و دەڵێن گەلی عیراق بە تەواوی ڕاپەڕینی كردووە و ڕووماڵكردنی پێچەوانە و نادرووستی ڕووداوەكان پیشان دەدەن، كە ئامانجی خۆپێشاندانەكان تەنیا داواكاری نییە، بەڵكو چەندین پرسی پشتەوەی دەرگا داخراوەكانی تێدا خراوەتەڕوو.

وتیشی، “ئەمریكییەكان كاتێك لە هەڵبژاردنەكان و پێكهێنانی حكومەتی نوێی عیراق شكستیان هێنا، دەستیاندایە پیلانێكی نوێ تا ئەوە بە حكومەتەكەی عەبدولمەهدی بڵێن ئەگەر داواكارییەكانیان مسۆگەر نەبێت دەرفەتی سەقامگیری بۆ چالاكییەكانی حكومەت نادەن و بەئاشكرا حكومەتی عیراقیان كردۆتە ئامانج”.

ئاشكراشیكرد، ئەمریكییەكان بە ئاشكرا پاڵپشتی لە ڕووداوەكانی عیراق دەكەن و لە بنكەی عەین ئەسەد لە پارێزگای ئەنبار ژوورێكی عەمەلیاتیان پێكهێناوە، كە نوێنەرایەتی هەریەك لە وڵاتەكانی سعودیە، ئیمارات، ئیسڕائیل و بەعسییەكانیشی تێدایە.

عێراق

بەرهەم ساڵح هۆشداری دەدات

خەڵك – بەشی هەواڵ
سەرۆك كۆماری عیراق بەبۆنەی ساڵیادی چلەی ئیمام حسێن (س.خ) ڕایدەگەیەنێت، هەموو ساڵێك لەم ڕۆژەدا ئازادیخوازەكان بەرەو باوكی ئازادی ئیمام حسێن هەنگاو دەنێن، دەشڵێت: “ئەم بۆنە پیرۆزە یەكیخستوین بۆ بەرەنگاربوونەوەی ئاڵەنگاری و ئاستەنگەكان، كە وڵاتەكەمان و گەلەكەمان ڕووبەڕووی دەبێتەوە لەم دۆخە زریاناوییەی ناوچەكەدا”.

بەرهەم ساڵح، سەرۆك كۆماری عیراق لە پەیامێكیدا بەبۆنەی ساڵیادی چلەی ئیمام حسێن ڕایگەیاند، ئیمام حسێن، (سەلامی خوای لەسەر بێت) فێری كردین چۆن زاڵ بین بەسەر ئاستەنگ و جیاكارییەكان و بەرگری لە خۆكردن و لە نیشتمان و مرۆڤایەتی و پێویستە بڵێین، كە چۆن داواكاری خۆی دەربڕی و دەنگی بڵند كرد بۆ ئەوەی چاكسازی بكرێت.

دەشڵێت: “ئەمساڵیش چلە بە خێر دێنینەوە، هەمووان ئومێدە دەكەین، كە ویستمان یەكبخات بۆ پارێزگاری كردن لە نیشتمانەكەمان و پابەندبوون بە چاكسازی و بەگژداچوونەوەی گەندەڵی، كە خێر و بێری بۆ نیشتمان و مرۆڤ تیادا بێت”.

ڕاشیگەیاندووە، پابەند و نزیك دەبین لە گەنجەكانمان و داواكاری و مافە ڕەواكانیان بە هەند وەردەگرین وەك چۆن پابەندین بە ئاسایش و ئارامی بۆ ئەوەی داواكاری هاووڵاتییەكانمان بەرەو بەدیهێنانی دادپەروەری و ژیانێكی شكۆمەند جێ‌بەجێ‌ بكەین، لەم ساڵیادە مەزنەدا جەخت دەكەینەوە، كە هیچ ڕێگەیەكی دیكەمان لە بەردەم نییە جگە لە ڕێگەی بنیادنان و چاكسازی نەبێت لە وڵاتەكەماندا.

دەقی وتاری سەرۆك كۆمار:
بەناوی پەروەردگاری بەخشندە و میهرەبان
هەموو ساڵێك، لەم رۆژەدا، ئازادیخوازەكان بەرەو باوكی ئازادی ئیمام حسێن سەلامی خوای لێبێت هەنگاو دەنێن. ئەوان پێكەوە بە یەك دڵ و ویستی نیشتمانی و بیروڕایەكی قوڵەوە هاوتەریب لەگەڵ بەها پیرۆزەكان بە كرنوشەوە هەنگاوەكانیان دەنێن كە یەكانگیری و پێكەوەیی ئەوان بەهێزتر دەكات، هەمو ساڵێك ئەو پەیامە دووپات دەكەنەوە كە بەرەو حسێن سەلامی خوای لێ‌ بێت ریز دەبەستن وەك ئیمامێك كە نمونە و سیمبولی هەژاران و نەداران و سەكۆیەكە بۆ رەنجەدەرانی نیشتمانی.

ئیمام حسێن سەلامی خوای لەسەر بێت فێریكردین چۆن زاڵ بین بەسەر ئاستەنگ و جیاكارییەكان و بەرگری لە خۆكردن و لە نیشتمان و مرۆڤایەتی و پێویستە بڵێین كە چۆن داواكاری خۆی دەربڕی و دەنگی بڵند كرد بۆ ئەوەی چاكسازی بكرێت.

مرۆڤ و نیشتمان بەها بەرزە پیرۆزەكان ئامانجی مەزنن كە شۆڕشی حسێن سەلامی خوای لێ‌ بێت خوڵقاوە لە نێو ژیانی شۆڕشگێران و ئازادیخوازاندا.

ئەم ئەو ئیمامەیە كە لە ویژدانی عێراقییەكاندایە بە بێ‌ جیاوازی پێكهاتە و ئاینەكانیان، بەم شێوەیە عاشورا و دواتریش ساڵانە چلە دەكرێتەوە كە بریتیە لە بە زیندو راگرتنی بەهاكانی حسین و بەهای پاڵەوانێتی و بەهای بیر و ویژدان لە پێناو چاكە و خۆشەویستی و ئاشتیدا.

ئەم ساڵیش چلە بە خێر دێنینەوە، هەمووان ئومێدە دەكەین كە ویستمان یەكبخات بۆ پارێزگاریكردن لە نیشتمانەكەمان و پابەندبوون بە چاكسازی و بەگژداچونەوەی گەندەڵی كە خێر و بێری بۆ نیشتمان و مرۆڤ تیادا بێت.

ئەم بۆنە پیرۆزە یەكیخستوین بۆ بەرەنگاربوونەوەی ئاڵەنگاری و ئاستەنگەكان كە وڵاتەكەمان و گەلەكەمان رووبەرووی دەبێتەوە لەم دۆخە زریاناوییەی ناوچەكەدا.

پارێزگاری لە وڵاتەكەمان دەكەین و جەخت دەكەینەوە لە پێویستی چڕكردنەوەی هەوڵەكان بەرەو چاكسازی.

پابەند و نزیك دەبین لە گەنجەكانمان و داواكاری و مافە رەواكانیان بە هەند وەردەگرین وەك چۆن پابەندین بە ئاسایش و ئارامی بۆ ئەوەی داواكاری هاووڵاتییەكانمان بەرەو بەدیهێنانی دادپەروەری و ژیانێكی شكۆمەند جێ‌ بەجێ‌ بكەین.

لە چلەی شەهیدبوونی حسێن سەلامی خوای لێ‌ بێت دەستی ھەموو ئەو كەسانە دەگوشین كە داوای چاكسازی دەكەن ھەروەھا دەستی گەنجەكانمانیش كە داوای مافەكانیان دەكەن و ئاڵای عێراق بەرز دەكەنەوە، دەستی هێزە ئەمنییەكانمان دەگوشین لە پارێزگاریكردن و بەرگریكردنیان لە دامەزراوە گشتی و تایبەتەكان.

یادی لەدەستدان و شەهیدبوونی خۆپیشاندەران و بەرگریكاران لە هێزە پاڵەوانەكانمان دەكەینەوە و لە یادیان ناكەین، بە ویژدان و رێزە و دەروانینە قوربانیدانی خانەوادەكانیان.

لە یادی سەرداری شەهیداندا هەموو جۆرە كوشتن و چەوساندنەوە و لە باربردنێك رەت دەكەینەوە.

لەم ساڵیادە مەزنەدا جەخت دەكەینەوە كە هیچ رێگەیەكی ترمان لە بەردەم نییە جگە لە رێگەی بنیادنان و چاكسازی نەبێت لە وڵاتەكەماندا.

گەلی عێراق شایستەی باشترن.

ئەركی ئێمەیە ریزەكان یەكبخەین و ئیلهام وەربگرین لە شۆڕشی ئیمام حسێن و سەركەوتن بۆ چەوساوە و خێر لە خۆنەدیوەكان بەدەست بێنین.

سەركەوتنیش بۆ عێراق

سڵاو سەلامی پەروەردگارتان لێ‌ بێت.

بەردەوام بە لە خوێندنەوە

عێراق

كێشەكانی كوردستانیش بەدەرناكات
سائیرون: هەموو كێشەكانی عیراق و ناوچەكە دەستی دەرەكی لە پشتە

خەڵك- بەشی هەواڵ
پەرلەمانتارێكی هاوپەیمانی سائیرون ڕایدەگەیەنێت، هەموو كێشەكانی عیراق و ناوچەكە دەستی دەركییەكان لە پشتەوەیە، بەو كێشانەش كە لە هەرێمی كوردستان دروستدەبن.

حەسەن جەلال، پەرلەمانتاری هاوپەیمانی سائیرون لە پەرلەمانی عیراق، بە (خەڵك)ی ڕاگەیاند”هەموو ئەو كێشانەی لە عیراق و ناوچەكەدا هەن، دەستی ئەمریكا و ئیسرائیل و ئەو وڵاتانەن كە لەگەڵیاندا ڕێكەوتوون، ئەوەی لە عیراقیش ڕوودەدات لە هیچ وڵاتێكی جیهان ڕووینەداوە، بە هەمان شێوە هەرێمی كوردستانیش هەر گیرۆدەی ئەو كێشانەیە كە دەستی دەرەكییان لە پشتە”.

بە وتەی پەرلەمانتارەكەی سائیرون”هەرێمی كوردستان نەك هەر بەشێكە لە عیراق، بەڵكو تەواوكەریی عیراقە و هەموان لەیادمانە كە چۆن دوو ساڵ لەمەوبەر پیلانێك لە دژی كوردستان بەڕێوەچوو، بۆیە لەئێستادا هەموان پێویستمان بە یەكڕیزی و یەك دەنگی هەیە”.

حەسەن جەلال لە میانی قسەكانیدا، بەدووری نەزانی لەڕێی ڕێكەوتنێكی دەرەكییەوە، جارێكی تر هەوڵ بۆ گێڕانەوەی داعش و گروپە تیرۆریستییەكان بدرێت بۆ عیراق.

پێشتر حاكم زاملی سەركردە لە ڕەوتی سەدر ڕایگەیاندبوو”بەپێی ڕێكەوتنێكی نێوان ئەمریكا و توركیا و ڕوسیا، هەوڵ دەدرێت جارێكی تر ڕێكخراوی تیرۆریستی داعش بگێڕدرێتەوە بۆ عیراق”.

بەردەوام بە لە خوێندنەوە

عێراق

نامەیەكی ڕەوانەكردووە
ئۆپیك لەبارەی هەناردەی نەوتی هەرێمی كوردستانەوە عیراق ئاگاداردەكاتەوە

خەڵك-بەشی هەواڵ
ئەندامێكی لیژنەی نەوت و وزە لە پارێزگەی بەسرە ڕایدەگەیەنێت، ڕێكخراوی وڵاتانی هەناردەكردنی نەوت (ئۆپیك)، لەبارەی هەناردەی نەوتی هەرێمی كوردستانەوە نامەیەكی بۆ عیراق ناردووە، لە نامەكەشدا ئاماژە بەو ڕێژە زیادە نەوتە كراوە كە لەدەرەوەی چوارچێوەی كۆمپانیای بەبازاڕكردنی نەوتی عیراقی (سۆمۆ)، هەناردەكراوە.

عەلی شەداد فارس، ئەندامی لیژنەی نەوت و وزە لە ئەنجومەنی پارێزگەی بەسرە، بە (خەڵك)ی ڕاگەیاند:”لەگەڵ ئەوەی هەرێمی كوردستان پابەندی یاسای بودجەی فیدراڵی نییە بە ڕادەستكردنی 250 هەزار بەرمیل لە ڕۆژێكدا بە بەغدا، دەركەوتووە كە هەرێمی كوردستان لە دەرەوەی چوارچێوە یاساییەكان، ڕۆژانە بڕی 500 هەزار بەرمیل نەوت هەناردە دەكات بەبێ‌ ئاگاداریی حكومەتی فیدراڵ “.

بە وتەی عەلی شەداد”بەپێی ئەو ڕێكەوتنەی لەنێوان ئەندامانی ڕێكخراوی ئۆپیكدا كراوە، دەبێت عیراق ڕۆژانە 3 ملیۆن 200 هەزار بەرمیل نەوت هەناردە بكات، بەڵام بڕی 3 ملیۆن و 650 هەزار بەرمیل نەوت لەسەر عیراق حیسابە كە هەناردە دەكرێت، واتا ڕۆژانە لە هەرێمی كوردستانەوە بڕێكی زیاتر لە ڕێژەی دیاریكراو هەناردە دەكرێت و هەرێم بەبێ‌ ئەوەی نەوتی هەناردەكراوی ڕادەستی بەغدا بكات، هاوبەشە لە نەوتی فرۆشراوی بەسرە”.

ئەو ئەندامەی لیژنەی نەوت و وزەی پارێزگەی بەسرە دەڵێت”عیراق لە 16ی تشرینی یەكەمی 2019 لەلایەن ڕێكخراوی ئۆپیكەوە پرسیاری لێكراوە سەبارەت بە هۆكارەكانی پابەندنەبوونی هەرێمی كوردستان بە هەناردەكردنی نەوت و هەناردەكردنی لە دەرەوەی چوارچێوەی سۆمۆ”.

عەلی شەداد پێیوایە”هەرێمی كوردستان لە دەرەوەی یاسا و ڕێنماییەكانی حكومەتی فیدراڵ نەوت هەناردە دەكات و ئەمەش كاریگەریی نەرێنی بۆسەر سیاسەتی نەوتی عیراق دەبێت لە دەرەوەی وڵات، پرسیارەكەی ئۆپیكیش لە عیراق، لەبارەی هۆكارەكانی هەناردەی نەوتی كوردستانە لە دەرەوەی سۆمۆ كە ڕێژەكەی و داهاتەكەشی نادیارە”.

دوو شەممەی ڕابردوو، لیژنەی نەوت و وزە ڕایگەیاندبوو، دادگای فیدراڵی سكاڵایەكی لە دژی هەرێمی كوردستان قبوڵ كردووە كە تایبەتە بە پابەندنەبوونی هەرێم بە بڕگەكانی یاسای بودجەی 2019.

 

بەردەوام بە لە خوێندنەوە

کوردستان