ئێمە لە تۆرە کۆمەڵایەتیەکان

کوردستان

“لامەركەزی ڕادەگەیەنین و عیراق پشتگیری دەكات”
بەرپرسێكی یەكێتی: ئەگەر پارتی بێمنەت بێت دۆخەكە باش نابێت


خەڵك – بەشی هەواڵ
بەرپرسێكی باڵای یەكێتیی نیشتمانیی كوردستان ڕایدەگەیەنێت، لە ئێستادا خەڵك و جەماوەری سلێمانی گلەییەكی زۆریان هەیە بەوەی شارەكەیان سزای سیاسی دەدرێت و پشتگوێ خراوە، دەشڵێت: “ئەگەر چارەسەری كێشەكان نەكرێت و پارتی بێمنەت بێت، دۆخەكە باش نابێت”.

بەرپرسێكی باڵای یەكێتی، كە نەیویست ناوەكەی بڵاوبكرێتەوە بە (خەڵك)ی ڕاگەیاند، خەڵكی سلێمانی و جەماوەر باوەڕێكیان لا دروست بووە، كە سلێمانی پشتگوێ خراوە و سزای سیاسی دەدرێت، یەكێتیش ئەو باوەڕەی بە زۆری لا دروست بووە و كاری لەسەر دەكات.

وتیشی، “یەكێتی لەماوەی ڕابردوودا خۆی بەشەریك زانیوە لە پرسی حكومڕانی ئەم هەرێمە، بەڵام ئێستا هەستێكی لا دروست بووە، كە خۆی بەشەریك نازانێت و لە ئێستادا زۆری سەركردایەتی یەكێتی لەگەڵ ئەو ڕایەن و پشتیوانی دەكەن و كەمینەن ئەوانەی داوای تێپەڕاندنی دۆخەكە دەكەن”.

ڕاشیگەیاند، ئەگەر دۆخەكە بەو شێوەیە بەردەوام بێت و پارتی بێ منەت بێت، ئەوە ڕەنگە یەكێتی هەر بەو شێوەیە چاوەڕێ نەكات، كە لە ئێستادا عیراقیش پشتیوانی لەو ڕایەی یەكێتی دەكات و لە ڕووی یاساییشەوە ڕەنگە بۆ هەرێم باش نەبێت.

ئاماژەی بۆ ئەوەشكرد، عیراق ئارەزووی ئەوەی هەیە قەوارەی هەرێم نەمێنێت و تاكە ڕێگر و بەربەستی بەردەستی دەستوورە، چونكە لە بڕگەكانی كۆتایی دەستوور هاتووە ئەگەر سێ پارێزگا ڤیتۆیان بەكارهێنا لەسەر هەمواری دەستور ئەوە دەستكاری ناكرێت.

ئاشكراشیكرد، ئەگەر دۆخەكە بەردەوام بێت ئەوا هەولێر و دهۆك بەتەنها دەمێننەوە و ئەو كات دەستور لەلایەن لایەنە عیراقیەكانەوە، كە باوەڕیان بە فیدڕاڵی نەماوە داوای هەموار كردنەوەی دەكەنەوە و ڕێگری بەردەمی نامێنێت.

ئەو بەرپرسەی یەكێتی جەختیشی كردەوە، كە دەبێت دەسەڵاتەكانی حكومەت شۆڕبكرێتەوە و لامەركەزی پارێزگاكان بچەسپێنرێت.

ئەمە لەكاتێكدایە، كە لە ڕۆژی پێنج شەممەی ڕابردوو لە بازگەی سماقوڵی ڕێگری كرا لە چوونی مەحمود سەنگاوی، ئەندامی مەكتەبی سیاسی یەكێتی بۆ هەولێر و بەو هۆیەوە پەیوەندییەكانی ئەو دوو حزبە گرژی تێكەوت و شەوی هەینی تەقە لە بارەگای لقی 4ی پارتی لە سلێمانی كرا و شەوی شەممەش لە هەولێر تەقە لە بارەگای سێ‌ كۆمیتەی یەكێتی كرا.

کوردستان

تەندروستی هەرێم: 66 تووشبووی تری ڤایرۆسی كۆرۆنا لە سلێمانی دەستنیشان كران


خەڵك – بەشی هەواڵ

وەزارەتی تەندروستی هەرێم لە ڕاگەیەنراوێكدا ڕایگەیاند: لە بەردەوامی پشكنینەكان و گەڕان بەدوای گومانلێكراوان و تووشبووان، 66 تووشبووی تری ڤایرۆسی كۆرۆنای نوێ COVID-19 لە پارێزگای سلێمانی دەستنیشانكران.

تەندروستی هەرێم ئەوەشیخستووەتەڕوو: تووشبووەكان 38 پیاو و 24 ئافرەت و 2 كوڕی گەنج و 2 منداڵن، 13 تووشبوو بەركەتووی تووشبووانی پێشوون و تووشبووانی تر نیشانەی نەخۆشییەكەیان هەیە.

تەندروستی هەرێم ڕوونیشیكردووەتەوە: سێ تووشبوو دانیشتووی شارۆچكەی چەمچەماڵ، دوو تووشبوو دانیشتووی شارۆچكەی پێنجوێن، یەك تووشبوو دانیشتووی شارۆچكەی دەربەندیخان و شەست تووشبووش دانیشتووی ناو شاری سلێمانین.

 

دەقی ڕاگەیەنراوەكە:

دەرەنجامی نوێ …

لە بەردەوامی پشكنینەكان و گەڕان بەدوای گومانلێكراوان و تووشبووان، شەست و شەش تووشبووی دیكەی ڤایرۆسی كۆڕۆنای نوێ COVID-19 لە پارێزگای سلێمانی دەستنیشانكران، سی و ھەشت پیاو و بیست و چوار ئافرەت و دوو كوڕی گەنج و دوو منداڵ، سێزدە تووشبوو بەركەتووی تووشبووانی پێشوون وە تووشبووانی تر نیشانەی نەخۆشیەكەیان هەیە.

سێ تووشبوو دانیشتووی قەزای چەمچەماڵ.
دوو تووشبوو دانیشتووی قەزای پێنچوێن.
یەك تووشبوو دانیشتووی قەزای دەربەندیخان.
شەست تووشبوو دانیشتووی ناو شاری سلێمانی.

وەزارەتی تەندروستی
٦ حوزەیران ٢٠٢٠

بەردەوام بە لە خوێندنەوە

کوردستان

پسپۆڕێكی دەروونی: باشتر وایە وەزارەتی تەندروستی ڕۆژانە یەكجار دەرئەنجامێكی گشتی كۆرۆنا بڵاوبكاتەوە


خەڵك – بەشی هەواڵ

د. ڕەوشت ڕەشید پزیشكی پسپۆڕی دەروونی دەربارەی بڵاوكردنەوەی دەرئەنجامەكانی ڤایرۆسی كۆرۆنا، پەیامێك ئاڕاستەی ڕاگەیاندنی وەزارەتی تەندروستی دەكات و ڕایدەگەیەنێت:”باشتر وایە ڕۆژانە یەك جار دەرئەنجامێكی گشتی بڵاوبكرێتەوە نەوەك لە ڕۆژێكدا چەند جارێك دەرئەنجامی نوێ بڵاوبكرێتەوە، بۆ ئەوەی سەر لە خەڵك نەشێوێت و خەڵك تووشی سترێس و دڵەڕاوكێی زیاد لە پێویست نەبن”.

 

دەقی پەیامەكەی د. ڕەوشت ڕەشید:

 

پەیامێك بۆ راگەیاندنی وەزارەتی تەندروستی دەربارەی بڵاوكردنەوەی دەرەنجامەكانی كۆرۆنا:

ماندوو نەبن.

ئاگادارین كە لەماوەی رابردوودا ئەركێكی زۆرتان كێشاو كەمتەرخەمیتان نەكردوە لە بلاوكردنەوەی هوشیاری و زانیاری دەربارەی نەخۆشی كۆرۆنا و راگەیاندنی داتا دەربارەی ژمارەی پشكنین و كەرەنتینكراوان و توشبووان. ئەم كارەتان جێگەی دەستخۆشیە. هاوكات چەندتێبینی و پێشنیارێكی بچوكم هەیە هیوادارم بە سنگێكی فراوان و بە مەبەستی سود بۆ هاوڵاتیان و توشبووان لێمانی قەبوڵ بكەن:

۱ـ باشتر وایە رۆژانە یەك جار دەرەنجامێكی گشتی بڵاوبكرێتەوە نەوەك لە رۆژێكدا چەند جارێك دەرەنجامی نوێ بڵاوبكرێتەوە، بۆ ئەوەی سەر لە خەڵك نەشێوێت و خەڵك توشی سترێس و دڵەراوكێی زیاد لە پێویست نەبن.

۲ـ باشتر وایە دەرەنجامەكان لە سایتی فەرمی وەزارەتی تەندروستی بڵاوبكرێنەوە نەوەك بە تەلەفۆن و نامەی نا فەرمی بدرێت بە كەناڵەكانی راگەیاندن یان سایتەكانی ئینتەرنێت، ئەمەش بۆئەوەی داتاكان بە هەڵە بڵاونەبنەوەو خەڵك توشی بێمتمانەیی نەبن.

۳ـ بلاوكردنەوەی داتا وەكو خۆی و راستگۆیانە كارێكی ئەخلاقیەو ئێمەش بەرز دەینرخێنین، بەڵام بڵاوكردنەوەی وردەكاریی دەربارەی كەسە توشبووەكان و پیشەیان و هەندێك جار ناویان ( بۆ نمونە بڵاوبوونەوەی ناوی پزیشكانی توشبوو) كارێكە دوورە لە بنەماكانی پاراستنی ماف و نهێنیەكانی نەخۆش و رەنگە ئەمە وا بكات خەڵكانێكی زۆر لەبەر ئاشكرابوونی ناوەكانیان نەرۆن بۆ پشكنین یان نەخۆشخانە. ( ئەگەر كەسەكە خۆی باسی كردو رایگەیاند ئەوە ئازادە بەڵام ناكرێت لە دەزگا فەرمیەكان ناویان بڵاوبكرێتەوە) . دیارە ئەم حاڵەتە زیاتر لە سۆشیەل میدیا و پەیجی پزیشكان و كارمەندانی تەندروستی دەبینرێت و رەنگە كاری راگەیاندنی وەزارەت بێت هەوڵبدات ئەو پەیج و لایەنانە ئاگادار بكاتەوە كە هیچ زەرور نیە ناو یان وردەكاری توشبووان بڵاو بكرێتەوە.

٤ـ لە سەرەتای هەموو دەرەنجامێك وشەی گومانلێكراوان بەكار دێت كە من پێم وایە ئەم وشەیە جۆرێك لە ستیگماو كاریگەریی دەروونیی خراپ لای خەڵك دروست دەكات بۆیە لابردنی ئەم وشەیە بە كارێكی باش دەبینم بەتایبەت كە لابردنی هیچ لە مانا ناگۆڕێت و ( دەستەواژەی گەڕان بەدوای توشبووان ) ماناكە دەبەخشێت و هیچ كەموكوڕیەكی نیە.

دووبارە هیوای سەلامەتی و سەركەوتنتان بۆ دەخوازم و ئومێدەوارم هەموو لایەك دوور بن لە دەردو بەڵا.

د. رەوشت رەشید
پزیشكی پسپۆری دەروونی

بەردەوام بە لە خوێندنەوە

عێراق

“كازمی بەڵێنیدا شایستە داراییەكانی ھەرێم بخاتە ناو بەرنامەی لەپێشینەی كابینەكەی”


خەڵك – بەشی هەواڵ

جێگری سەرۆكی ئەنجومەنی نوێنەرانی عیراق ڕایدەگەیەنێت:” مستەفا كازمی سەرۆك وەزیرانی عیراق بەڵێنیداوە بابەتی شایستە داراییەكانی ھەرێمی كوردستان و خەرجكردنی پارەی گەنمی جوتیاران بخاتە ناو بەرنامەی لەپێشینەی كابینەكەی”.

نووسینگەی ڕاگەیاندنی جێگری سەرۆكی ئەنجومەنی نوێنەرانی عیراق لە ڕاگەیەندراوێكدا ڕایگەیاند:  بەشیر حەداد جێگری سەرۆكی ئەنجومەنی نوێنەرانی عيراق، ئەمڕۆ شەممە،لەگەڵ مستەفا كازمی سەرۆك وەزیرانی عیراق كۆبووەتەوە و “لەكۆبوونەوەكەدا بابەتە گرنگەكانی ئێستای ناو گۆڕەپانی سیاسیی عیراق و مەترسییەكانی بڵاوبوونەوەی ڤایرۆسی كۆرۆنا و پەیوەندییەكانی نێوان ھەولێر و بەغدا، هەروەها پەلەكردن لە ھەڵگرتنی ھەنگاوەكان بۆ چارەسەركردنی كێشەكان تاووتوێكراون”.

نووسینگەی ڕاگەیاندنی جێگری سەرۆكی ئەنجومەنی نوێنەرانی عیراق جەختی لەوەش كردووەتەوە:”سەرۆك وەزیرانی عیراق بەڵێنیدا كە بابەتی شایستە داراییەكانی ھەرێمی كوردستان و خەرجكردنی پارەی گەنمی جوتیاران بخاتە ناو بەرنامەی لەپێشینەی كابینەكەی”.

بەردەوام بە لە خوێندنەوە

کوردستان