ئێمە لە تۆرە کۆمەڵایەتیەکان

ئابوری

ڕوونكردنەوە لەسەر ڕاگرتنی بەشەخۆراكی هاووڵاتیان دەدرێت

خەڵك- بەشی هەواڵ
وەزارەتی بازرگانی حكومەتی فیدڕاڵ ئەو هەواڵانە ڕەتدەكاتەوە، كە لە میدیاكان و تۆڕە كۆمەڵایەتییەكان بڵاوكراونەتەوە سەبارەت بە ڕاگرتنی بەشەخۆراكی مانگانەی هاووڵاتیان.

بەپێی بەیاننامەیەك، كە لەلایەن وەزارتی بازرگانی عیراقەوە بڵاوكراوەتەوە، وەزارەتەكەیان بەردەوام دەبێت لەسەر دابینكردنی مەوادەكانی بەشەخۆراكی مانگانەی هاووڵاتیان بۆ پاشماوەی مانگەكانی ئەمساڵ، ئەمەش بە پشتبەستن بە یاسای بودجەی ساڵی 2019 كە پارەی پێویستی بۆ تەرخانكراوە.

ڕاشیگەیاندووە، وەزارەتی بازرگانی لەمساڵدا 10 بەشی ماددەی ئاردی داناوە (3 بەش ماوە) و 8 بەشی بۆ زەیتی خۆراك و شەكر داناوە، كە دوو بەشی ماوە و 6 بەشی بۆ ماددەی برنج داناوە، كە دوو بەشی ماوە دابەش بكرێت.

وەزارەتی بازرگانی عیراق دەڵێت: “ئەو هەواڵانەی ناوبەناو لەبارەی بڕینی بەشەخۆراكەوە بڵاودەكرێنەوە، دوورن لە ڕاستییەوە و ئامانج لێیان بەلاڕێدابردن و چەواشەكردنی ڕای گشتییە”.

ڕۆژی شەممە لە لێدوانێكیدا بۆ (خەڵك)، شەوكەت محەمەد، بەڕێوەبەری دابەشكردنی خۆراك لە سلێمانی ڕایگەیاند، بەردەوامن لە دابەشكردنی بەشە خۆراكی مانگانە بەسەر هاووڵاتیاندا و لە ئێستادا بەشە خۆراكی مانگی هەشت دابەشدەكرێت.

وتیشی، “لە ساڵانی پێشوو شەش بەش لە ساڵێكدا دابەش دەكرا، ئێستا بە فەرمی بۆمان كراوە بە هەشت بەش و باس لەوەشدەكرێت لەمساڵدا بكرێتە نۆ بەش واتە ئەمساڵ بەشەخۆراكی نۆ مانگ دابەش بكرێت”.

ئابوری

چەند بڕیارێك بۆ دابەشكردنی نەوت لە سلێمانی و ڕاپەڕین و گەرمیان دران

خەڵك- بەشی هەواڵ
لیژنەی وزە و سامانە سروشتییەكان لە ئەنجوومەنی پارێزگای سلێمانی لەگەڵ هەردوو بەڕێوەبەرایەتی نەوت و كانزاكانی سلێمانی و گەرمیان كۆدەبێتەوە و چەند بڕیارێك بۆ دابەشكردن ئەو نەوتەی حكومەتی عیراق دابینی دەكات، دەردەكەن.

میدیا شێخ ئەحمەد، ئەندامی ئەنجوومەنی پارێزگای سلێمانی بۆ (خەڵك) ڕایگەیاند، كە ئەمڕۆ 20ی تشرینی دووەم بە ئامادەبوونی جیبَگری سەرۆكی ئەنجوومەنی پارێزگا، لیژنەی وزە و سامانە سروشتییەكان لەگەڵ هەردوو بەڕێوەبەرایەتی نەوت و كانزاكانی سلێمانی و گەرمیان كۆبووینەوە.

وتیشی، “لە كۆبوونەوەكەدا ئاماژە بە بڕ و ڕێژەی ئەو نەوتەی دابینكراوە بۆ هەردوو پارێزگای سلێمانی و هەڵەبجە و ئیدارەكانی گەرمیان و ڕاپەڕین كراوە و بڕیار دراوە دابەشكردنەكە بەشێوەیەك بێت ساڵی پار لە چی مەڵبەندێك كۆتایی هاتبێت لەو جێگایەوە دەست دەكرێت بە دابەشكردنی” .

ڕاشیگەیاند، بڕیاردرا بەڕێژەی جیاواز نەوتی سپی دابین بكرێت بۆ دانیشتووانی ئیدارەی گەرمیان بەپێی ڕێژەی ئەو بڕە نەوتەی، كە ڕۆژانە دەگاتە سلێمانی و دەنێردرێت بۆ گەرمیان و لە لایەن بەڕوەبەرایەتی نەوت و كانزاكانی گەرمیانەوە دابەشدەكرێت .

سەبارەت بە نرخی ئەو بڕە نەوتە، كە ٤٦ هەزار دینارە بۆ هەر بەرمیلێك نەوت، ئاماژەی بەوەدا ، كە نرخەكەی لە لایەن سەرۆكایەی ئەنجوومەنی وەزیرانەوە دانراوە و ئیدارە خۆجێییەكان ئاگاداری نین.

سەبارەت بە كوالێتی و شیاوی ئەو بڕە نەوتەی دابەش دەكرێت، ئاشكرای كرد، بڕیار دراوە بە بەردەوامی پشكنینی بۆ بكرێت و لیژنەی وزەی ئەنجوومەنی پارێزگا و لیژنەی هەردوو بەڕێوەبەرایەتیەكە سەردانی ناوچە جیاوازەكان دەكەن بەمەبەستی وەرگرتنی نموونە و پشكنین بۆ كردنی لە تاقیگەی تایبەتمەند.

بەردەوام بە لە خوێندنەوە

ئابوری

پەروەردە گشتاندنێك بۆ مامۆستایانی گرێبەست دەردەكات

خەڵك-ئارام سەردار

بەڕێوەبەرایەتی پەروەردەی چۆمان لە گشتاندنێكدا ئاگاداری مامۆستایانی گرێبەست دەكاتەوە، كەوا هەفتەی داهاتوو سەردانی بەڕێوەبەرایەتیەكەیان بكەن بۆ پڕكردنەوەی فۆڕمی زانیاری.

بەڕێوەبەرایەتی پەروەردەی چۆمان لە گشتاندنێكدا، كە وێنەیەكی دەست (خەڵك) كەوتووە ڕایگەیاندووە، سەرجەم مامۆستایانی گرێبەست ڕۆژی یەك شەممە ( ۲٤ / ۱۱ / ۲۰۱۹) تاوەكو ڕۆژی سێ شەممە ( ۲٦ / ۱۱ / ۲۰۱۹ ) سەردانی دیوانی پەروەردە بكەن بە مەبەستی پڕكردنەوەی فۆڕمی زانیاری مامۆستایانی گرێبەست.

ئاماژە بەوەشكراوە، لەكاتی هاتنیان وێنەیەكی ڕەنگا و ڕەنگی تازە واتا كۆن نەبێت لەگەڵ كۆپی ناسنامە یان كارتی نیشتیمانی بێنن.

بەڕێوەبەرایەتی پەروەردەی چۆمان جەختیشی كردۆتەوە، مامۆستای گرێبەست خۆی لە پەروەردە ئامادە بێت.

بەپێی بڕیاری ئەنجوومەنی وەزیرانی هەرێم مامۆستایانی گرێبەست دەكرێنە هەمیشەیی.

بەردەوام بە لە خوێندنەوە

ئابوری

لەسەر بڕینی دەرماڵەی فەرمانبەران بێدەنگی شكێنرا

خەڵك- بەشی هەواڵ
ئەندامێكی لیژنەی دارایی لە پەڕلەمانی كوردستان پلانی حكومەتی هەرێم بۆ بڕینی دەرماڵەی فەرمانبەرانی چەند وەزارەتێك ئاشكرادەكات و دەشڵێت: “پێویستە خەڵك هۆشیاربێتەوە و ئاگاداری نیازی حكومەت بێت”.

سەرۆك ئازاد گەڵاڵی، ئەندامی پەڕلەمانی كوردستان لە فراكسیۆنی یەكێتی بۆ (خەڵك) ڕایگەیاند، لەبری ئەوەی فەرمانبەران پاداشت بكرێن بە كردنەوەی پلە بەرزكردنەوە لە پای بڕینی مووچە و نیو مووچە، بەداخەوە ئەم حكومەتە بە ناو چاكسازخوازە قەرزارە، ھاتووە بە ناوی پڕۆژەی چاكسازی بریاری داوە بە سزادانی كۆمەڵی خەلكی كوردستان و مووچەخۆرانی كەرتی گشتی لە ڕێگەی برینی دەرماڵەی مامۆستا و كارمەندانی زانكۆ و كارمەندانی تەندروستی و لێكۆلەرەوەی داد و ژمێریاران و وردبینان و تەكنیككاران و فەرمانبەرانی وەزارتی كارەبا، لە پاڵ ئەم توێژانەشدا ھەوڵێك ھەیە بۆ بڕینی دەرماڵەی خواردنی ھێزەكانی پۆلیس و وەزارتی ناوخۆ.

ڕاشیگەیاند، كە هەمووان بێدەنگ بوون لەو حكومەتە و كەس ناوێرێت قسە بكات، بۆیە پێویستە هاووڵاتیان هۆشیار ببنەوە و لە نیازی حكومەتی هەرێم تێبگەن.

سەبارەت بە هەڵوێستی فراكسیۆنی یەكێتی وتی، “سەرەتا من ئەمەم خستۆتەڕوو تاوەكو هاووڵاتیان ئاگاداری نیازی حكومەت بن و دواتر فراكسیۆنی یەكێتی هەر هەڵوێستێكی هەبێت خۆی ڕایدەگەیەنێت، چونكە ئەگەر بەو شێوەیەبێت كەس قبوڵی ناكات”.

جەختیشی كردەوە، كە لە پەڕلەمانی كوردستان ناهێڵین ئەوە تێپەڕێت و وتیشی، “با چاكسازی لە مووچەی پلە باڵاكان و خانەنشینی پلە باڵاكان و نەوت بكرێت و هەمووان دەنگی پێ‌ دەدەین، نەك فەرمانبەرانی ماندوونەناس”.

لای خۆشیەوە، سەلمە فاتیح، ئەندامی پەڕلەمانی كوردستان لە فراكسیۆنی یەكێتی لە هەژماری خۆی لە فەیسبووك ڕایگەیاند، چەند ساڵە حكومەت بە چەندین بڕیار دەرماڵە دەدات بە مووچەخۆران ئێستاش دەیەوێت ئەو دەرماڵانە ببڕێت لە چوارچێوەی پڕۆژە یاسای چاكسازی، بەڵام بڕیار بە بڕیار هەڵدەوشێتەوە ئەگەر حكومەت دەرماڵەی پێ نادرێ بۆ ئۆباڵی دەخاتە سەر شانی پەڕلەمان”.

جەختیشی كردەوە، ئێمە لەگەڵ چاكسازین لەگەڵ بڕینی دەرماڵە نین.

بەردەوام بە لە خوێندنەوە

کوردستان