ئێمە لە تۆرە کۆمەڵایەتیەکان

کوردستان

شاناز ئیبراهیم ئەحمەد: بەغدا و كەركوك و كوردستانتان لەدەستدا

خەڵك – بەشی هەواڵ
بەرپرسی ڕێكخستنەكانی دەرەوەی یەكێتیی نیشتمانیی كوردستان ڕایدەگەیەنێت، پەنجەی تۆمەتی ئێوە شتێكە و عەقڵ‌ و بیركردنەوەی ئێمەش شتێكی دیكە، بەردەوام ئەوەی ئێمە دەیڵێین‌ و دەینووسین شتێكە و ئەوەی ئێوەش لەسەر ئەرزی واقیع جێبەجێی دەكەن شتێكی دیكەیە.

شاناز ئیبراهیم ئەحمەد، بەرپرسی ڕێكخستنەكانی دەرەوەی یەكێتی لە سەر ڕێگری لە مەحمود سەنگاوی، ئەندامی مەكتەبی سیاسی حزبەكەی لە بازگەیەكی سماقوڵی لەهەژماری تایبەتی خۆی ڕایگەیاندووە، “كە دەمانگوت برادەرینە هەولێر داگیركراوە، دەتان فەرموو (یەكڕیزی نیشتمانی تێكدەدەین)، كە دەمانگوت برالە ڕۆژێك دێت ئەم بێدەنگیەتان بەرامبەر بە ڕێگریكردن لە گەڕانەوەی سەرۆكی پەڕلەمان بۆ هەولێر وەك چیرۆكەكانی عەزیز نەسین بەسەرخۆتان دێتەوە، دەتان فەرموو، كوڕی خۆمان ناكەین بەقوربانی كچی خەڵكی”.

دەشڵێت: “ئێستاش كاتی ئەوەیە ئێمە بڵێین دەك پیرۆزتان بێت پاكێج‌ و شەراكەت‌ و هاوبەشییە ڕاستەقینەكەتان، كە هەم بەغداد‌ و هەم كەركوك‌ و هەمیش كوردستانتان لەدەستدا، بەڵام دڵنیام دیسانەوە دەڵێن ئاخر خۆ گەڕەك‌ و گردێكمان هەر بەدەستەوە ماوە”.

ڕاشیگەیاندووە، ئێمە هەر دەڵێین‌ و ئێوەش هەر خەریكی پاساون، بۆیەش ڕۆژ بەڕۆژ نەك هەر هەولێر و بازگەكان، بەڵكو كوردستانیش دەبێتە هی خۆیان.

دەقی نووسینەكەی شاناز ئیبراهیم ئەحمەد:

پاكێجەكەتان جوانە بەڕێز
پەنجەی تۆمەتی ئێوە شتێكە و عەقڵ‌ و بیركردنەوەی ئێمەش شتێكی تر، بەردەوام ئەوەی ئێمە دەیڵێین‌ و دەینوسین شتێكە و ئەوەی ئێوەش لەسەر ئەرزی واقیع جێبەجێی دەكەن شتێكی ترە ، ئەوەی ئێمە دەیخوازین بۆ ئەوەی یەكێتی بكەینەوە بە یەكێـتییەكەی مام‌ و رابەری بزووتنەوەی رزگاریخوازی كوردستان شتێكە و ئەوەی ئێوەش دەتانەوێ بیكەنەوە بە رۆبۆتی دەستی ئەجێندا و خەیاڵپڵاوییەكانی ئەولا شتێكی ترە ..

كە ئێمە دەمانگووت هەولێر برادەرینە هەولێر داگیركراوە، دەتان فەرموو (یەكڕیزی نیشتمانی تێكدەدەین) ، كە دەمانگوت برالە رۆژێك دێت ئەم بێدەنگیەتان بەرامبەر بە رێگریكردن لە گەڕانەوەی سەرۆكی پەرلەمان بۆ هەولێر وەك چیرۆكەكانی عەزیز نەسین بەسەرخۆتان دێتەوە ، دەتان فەرموو “كوڕی خۆمان ناكەین بەقوربانی كچی خەڵكی”، كە گوتمان كاكە چیرۆكی یوسف كۆتایی هات‌ و ئێستا نۆبەی ڕێگرییە لە جێگری سكرتێری گشتی یەكێتی، فەرمووتان “لەوپەڕی تەباییداین”، كە گوتمان هەڤاڵ ئاخر خوا نەتگرێ فریای كادرانی یەكێتی بكەون لەو زۆنە داگیركرداوە و رۆژانە دەڕفێنرێن‌ و دەگیرێن‌ و لەماڵ‌ و حاڵی خۆیان دەردەكرێن‌ و روبەڕووی هەموو جۆرەكانی سوكایەتی دەكرێنەوە ، فەرمووتان “واز لەو چیرۆكە لاوەكیانە بێنن، ئێمە سەرقاڵی سازانین”

گوتمان سازانی چی لەسایەی ئەو هەموو سوكایەتی‌ و دەردەسەرییە، دیسانەوە فەرمووتان “ئێمە پرۆژە‌ و خەونی هاوبەشمان هەیە و دەتانەوێت تێكی بدەن”، دیسانەوە هەر كۆڵمان نەداو ووتمان “خزمینە یەكێتی لەكولەكەی تەڕیشدا نەماوە ، دیسانەوە فەرمووتان “ئاژاوە دەنێیتەوە”، گوتمان دەی دوا دەرفەتە بە بە هێزی‌ و شكۆ و هێزەوە بەشداری دانوستان‌ و گفتوگۆكان بكەن، كەچی ئێوە هەر بە خەیاڵپڵاوی خۆتانەوە، ووتتان “شاندەكەمان لە پاكێجدا پسپۆڕە”

خۆ پێمان ووتن‌ و گوتمان بیكەنە ڕای خوا یەكێتی مەشكێنن‌ و بچووكی مەكەنەوە لەبەردەم پارتی فەرموتان “دەبینە شەریك‌ و هاوبەشی راستەقینە” ، خوا دەست بە باڵتانەوە نەگرێت خۆ پێمان گوتن ئاخر رەدوكەوتوومان زۆرە و نەخۆشی زەردویی لەناو جەستەی بەشێكدا بڵاوبۆتەوە‌ و تازووە سزایان بدەن، كەچی ئێوە گوتتان “چیرۆكی سەمەرە بۆ هەڤاڵان هەڵدەبەستی”، گوتمان براینە كەركوك مەخەنە پاكێجەوە، هەندێك هێندە زەرد هەڵبڕزكان پێیانوابوو مورافەعەی دووەم دەكەن‌ و كوردایەتی‌ و كەركوك دەگێڕنەوە و ووتیان “تۆ شوێن مەحاڵ دەكەویت”، ئێستاش كاتی ئەوەیە ئێمە بڵێین دەك پیرۆزتان بێت پاكێج‌ و شەراكەت‌ و هاوبەشییە راستەقینەكەتان، كە هەم بەغداد‌ و هەم كەركوك‌ و هەمیش كوردستانتان لەدەستدا، بەڵام دڵنیام دیسانەوە دەڵێن”ئاخر خۆ گەڕەك‌ و گردێكمان هەر بەدەستەوە ماوە”. ئێمە هەر دەڵێین‌ و ئێوەش هەر خەریكی پاساون، بۆیەش رۆژ بەرۆژ نەك هەر هەولێر و بازگەكان بەڵكو كوردستانیش دەبێتە هی خۆیان.

شاناز برایم ئەحمەد
١٩-٩-٢٠١٩

ژینگە

كەشناسی هەرێم: پێشبینی دەكرێت ڕۆژی شەممە سەرەتای باران بارین دەستپێبكات

خەڵك – بەشی هەواڵ

بەڕێوەبەرایەتی كەشناسی و بومەلەرزەزانی هەرێم ڕایدەگەیەنێت، لە ئەنجامی كاریگەری نزمە پاڵەپەستۆی كەنداوی عەرەبی پێشبینی دەكرێت لە ئێوارەی ڕۆژی شەممە سەرەتای باران بارین بە شێوەیەكی پچڕ پچڕ لە ناوچەكانی ڕۆژئاوای هەرێم دەست پێبكات.

بەڕێوەبەرایەتی كەشناسی و بومەلەرزەزانی هەرێم ئاماژەبەوەشدەكات، لە ڕۆژی یەكشەممە لە تەواوی ناوچەكانی هەرێم نمە بارانی پچڕ پچڕ دەبارێت و پلەكانی گەرما لەگەڵ خۆی نزم دەكاتەوە، لە ناوچە شاخاوییە سنوورییەكان باران بارین زیاتر دەبێت پێشبینی دەكرێت لە هەندێ ناوچە لە كاتی باران بارین هەورە تریشقەشی لەگەڵ بێت.

بەڕێوەبەرایەتی كەشناسی و بومەلەرزەزانی هەرێم ئەوەش دەخاتەڕوو، ڕۆژی دووشەممە ئاسمانی هەرێم نیمچە هەور دەبێت وە كاریگەری باران بارین كەم دەبێت.

بەردەوام بە لە خوێندنەوە

جیهان

نێچیرڤان بارزانی: پێشهاتەكان مەترسی جددی لەسەر سەرهەڵدانەوەی داعش دروست دەكەن

خەڵك – بەشی هەواڵ

نێچیرڤان بارزانی سەرۆكی هەرێمی كوردستان، لە كۆنفرانسێكی ڕۆژنامەوانی هاوبەشدا، لەگەڵ جان ئیف لۆدریان وەزیری دەرەوەی فەڕەنسا ڕایگەیاند، لە كۆبوونەوەیاندا دوایین پێشهاتەكانی ناوچەكەیان تاووتوێكرد، بەتایبەتیش هێرشەكانی سەر ڕۆژئاوای كوردستان (باكووری ڕۆژهەڵاتی سوریا).

نێچیرڤان بارزانی ڕایگەیاند، بەشداریكردنی گروپە توندڕەوەكانی ئۆپۆزسیۆنی سوریا، نیگەرانییەكانی زیاتر كردووە و دەبنە هۆی كارەساتی مرۆیی و ئاوارەبوونی هاووڵاتییەكی زۆری ناوچەكە، ئەو ناسەقامگیرییە دەبێتە هۆی دووبارە سەرهەڵدانەوەی داعش.

نێچیرڤان بارزانی، دووپاتیشیكردەوە، دۆخەكە پێویستی بە هەوڵ و هەڵوێستی جددیتری كۆمەڵگەی نێودەوڵەتییە و ئامادەیی هەرێمی كوردستانیشی ڕاگەیاند و وتی: “بۆ سەقامگیری ناوچەكە هەر ئەركێك بكەوێتە ئەستۆی ئێمە ئامادەین جێبەجێی بكەین”.

لای خۆیەوە جان ئیف لۆدریان وەزیری دەرەوەی فەڕەنسا لە بارەی ناوەڕۆكی كۆبوونەوەی لەگەڵ سەرۆكی هەرێمی كوردستان، ئەوەی خستەڕوو، كە تاووتوێی بارودۆخی ناوچەكە و باكووری ڕۆژهەڵاتی سوریا “ڕۆژئاوای كوردستان” یان كردووە.

دووپاتی لەوەشكردەوە، بەهۆی ئەو هێرشانەی توركیا دۆخێكی ناسەقامگیری هاتووەتە ئارا لە ناوچەكە و دەرفەتی دووبارە سەرهەڵدانەوەی داعش دەدات.

وەزیری دەرەوەی فەڕەنسا، نیگەرانییەكانی وڵاتەكەشی خستەڕوو و وتی: “لە دۆخی ناوچەكە زۆر نیگەرانین و ئەمڕۆ هاتووم پێتان بڵێم پشتگیریتان دەكەم، هێشتا داعش شكستی نەهێناوە و هۆكارەكانی پێكهێنانی هاوپەیمانی نێودەوڵەتی دژی داعش، هێشتا ماوە”.

ئاماژەی بەوەشكرد، ئەوەی ئێستا لە باكووری سوریا دەگوزەرێت، مەترسییەكانی سەرهەڵدانەوەی توندڕەو و تیرۆریستانی زیاتر كردووە.

جان ئیف لۆدریان وەزیری دەرەوەی فەڕەنسا ئەوەشی خستەڕوو، كە لە گفتوگۆكان بەردەوام دەبن و هەڵسەنگاندنیش بۆ دۆخەكە دەكەن، ئەوەشی ڕاگەیاند، كە تەواوی وڵاتانی ئەندام لە یەكێتی ئەوروپا، بە باشی دەزانن كۆبوونەوەی هەماهەنگی هاوپەیمانی نێودەوڵەتی دژی داعش ئەنجام بدرێت و بە پێویستیشی دەزانێت كە هاوپەیمانی نێودەوڵەتی لە چالاكییەكانی خۆی لە دژی داعش بەردەوام بێت.

بەردەوام بە لە خوێندنەوە

جیهان

جێگری سەرۆكی ئەمریكا: توركیا ئۆپراسیۆنە سەربازییەكەی ڕادەگرێت

خەڵك – بەشی هەواڵ

جێگری سەرۆكی ئەمریكا ئاشكرایكرد، توركیا ئۆپراسیۆنەكەی ڕادەگرێت.

دوای كۆبوونەوەی لەگەڵ ڕەجەب تەیب ئەردۆغان سەرۆكی توركیا، مایك پێنس جێگری سەرۆكی ئەمریكا لە كۆنفڕانسی ڕۆژنامەوانیدا ڕایگەیاند، ئەمریكا و توركیا بۆ ئاگربەست لە سوریا ڕێككەوتن و توركیا ئۆپراسیۆنەكەی ڕادەگرێت.

ئەمەش لە كاتێكدایە، پێشتر ڕەجەب تەیب ئەردۆغان سەرۆكی توركیا ڕایگەیاندبوو:”بەهیچ شێوەیەك ئۆپراسیۆنە سەربازییەكانی بۆ سەر ڕۆژئاوای كوردستان و باكووری ڕۆژهەڵاتی سوریا ڕاناگرێت”.

بەردەوام بە لە خوێندنەوە

کوردستان