لە ڕۆژی ٥ ی ئادارەوە ڕاوكردنی ماسی بەهەموو شێوەیەك لە هەرێمی كوردستان قەدەغە دەكرێت.
ئەمڕۆ هەینی هێمن كەمەرخان ئەفەندی، وتەبێژی بەڕێوەبەرایەتی پۆلیسی دارستان و ژینگەی پارێزگای سلێمانی لە كۆنگرەیەكی ڕۆژنامەوانیدا ڕایگەیاند، لە ڕۆژی ٥ ی ئادارەوە ڕاوكردنی ماسی بەهەموو شێوەیەك لە هەرێمی كوردستان قەدەغە دەكرێت.
راشیگەیاند، سەرجەم هێزەكانمان لەو بەروارەوە لەسەر دەریاچە و ڕووبارەكان جێگیر دەكەین و داواكارین سەرجەم هاوڵاتیان پابەندبن بە ڕێنماییەكان و لەو ماوەیەدا بەهیچ شێوەیەك ڕاوی ماسی نەكەن.
ئاماژەی بەوەشكرد، بە پێی ڕێنمایی ڕێگەپێدراو لە ڕۆژی ١٥- ٦- ٢٠٢٣ ڕاوكردنی ماسی ئاسایی دەیێتەوە و لەهەموو كاتێكدا ڕاوكردنی ماسی بە بەكارهێنانی تەزووی كارەبا، ژەهر، هەموو جۆرە تەقەمەنیەك و تۆری وورد، بەهەموو شێوەیەك قەدەغەیە و سەرپێچیكاران ڕووبەڕووی سزا دەبنەوە .
دواشی لە هاووڵاتیان كرد پابەندی ماوەی قەدەغەكردنی راوەماسی بن و سەرپێچی بڕیارەكە نەكەن.
حكوومەتی هەرێمی كوردستان لە وەرزی گەراداناندا بۆ گەشەكردنی زیاتری بەرهەمی ماسی بۆ ماوەی سێ مانگ ڕاوەماسی قەدەغە دەكات.
