ئێمە لە تۆرە کۆمەڵایەتیەکان

کوردستان

ڕێواز فایەق: ڕای لایەنەكان لەسەر نووسینەوەی دەستوور ئەرێنییە

خەڵك – بەشی هەواڵ

سەرۆكی پەرلەمانی كوردستان لەگەڵ كونسوڵی ئەمریكا لەهەولێر پرسی نووسینەوەی دەستووری هەرێم و دروستكردنی كۆدەنگی نیشتمانی و بودجەی 2020ی عیراقی تاووتوێ‌ كرد.

ئەمڕۆ 16ی ئەیلولی 2019، رێواز فایەق سەرۆكی پەرلەمانی كوردستان لەگەڵ ستیڤن فەیگن كونسلۆی گشتی ئەمریكا لە هەولێر، كۆبووەوە و لە كۆبوونەوەكەدا سەرۆكی پەرلەمان بەوردی تیشكی خستەسەر ئەو پێشهات و ڕووداوانەی كە لەكوردستان و عیراقدا ڕوودەدەن.

ڕێواز فایەق ڕوونیشیكردەوە كە سەردانەكانیان بۆ لای هێز و لایەنە سیاسییەكان بۆ دروستكردنی كۆدەنگی نیشتمانییە، لەسەر مەسەلەی نووسینەوەی دەستوور، بۆ هەرێمی كوردستان، لەبەرئەوەی بە گوێرەی دەستووری عیراق كە ساڵی 2005 خەڵكی عیراق دەنگیان بۆ داوە، هەرێمی كوردستان دەتوانێت دەستووری تایبەتی خۆی هەبێت.

سەرۆكی پەرلەمان وتیشی، لەئەنجامی سەردانەكانماندا ڕا و بۆچوونی لایەنە سیاسییەكانمان وەرگرتووە كە تا ئێستا زۆربەیان ئەرێنی و باشن.

ڕێواز فایەق لەبەشێكی تری وتەكانیدا بەوردی تیشكی خستەسەر هەموو ئەو پێشێلكارییە دەستووریانەی كە ئەنجومەنی نوێنەرانی عیراق و حكومەتی عیراق دەرهەق بەهەرێمی كوردستانیان كردووە، بەتایبەت لە دەرچوواندن و تێپەڕاندنی یاسای هەڵبژاردنی ئەنجومەنی پارێزگاكان، هەروەها یاسای كارگێڕی دارایی و ئامادەكاری بۆ پەسەندكردنی یاسای خزمەتی شارستانی، كە ئێستا ڕاپۆرتەكە ئامادەكراوە بۆ دەنگدان لەسەری.

سەرۆكی پەرلەمانی كوردستان وتیشی، نامەیەكم محەمەد حەلبوسی بۆ سەرۆكی ئەنجومەنی نوێنەرانی عیراق ناردووە كە ئەم پڕۆژە یاسایە نەخاتە دەنگدانەوە، لەبەرئەوەی پێچەوانەی دەستوورە.

لە تەوەرێكی تری وتەكانیدا سەرۆكی پەرلەمان سەبارەت بەبودجەی 2020 ڕوونكردنەوە و شیكارییەكی وردی خستەڕوو كە تێیدا باسی قەرزاری هەرێمی كوردستانی كرد بەرامبەر كۆمپانیاكانی دەرهێنانی نەوت بەهۆی دابەزینی نرخی نەوت لەسەر ئاستی جیهاندا كە ئەم قەیران و دابەزینە حكومەتی عیراقیشی گرتووەتەوە، بەڵام لەبەرئەوەی ئێستا هەڵبژاردنی پارێزگاكان نزیك بووەتەوە لایەنە عیراقییەكان بابەتی بودجەی هەرێمی كوردستان وەك موزایەدەیەكی سیاسی بەكاردێنن بۆ ڕاكێشانی سۆزی خەڵك و بەدەستهێنانی دەنگ.

ئەوەشی راگەیاند: لەڕاستیدا ناكرێت بودجە و قوتی خەڵكی كوردستان بكرێتە قوربانی ئەم پرۆسە كاتیەی هەڵبژاردن لە عیراق، لەبەرئەوەی خەڵكی كوردستان هەرگیز جارێكی تر بەرگەی قەیرانی دارایی ناگرێت و هاوكات داوایكرد كەوا كونسوڵگەری ئەمریكا رۆڵی خۆیان ببینن، لە گەیاندنی پەیامی خەڵكی كوردستان بۆ حكومەتی عیراقی.

لای خۆیەوە، ستیڤ ڤەیگن كونسوڵی گشتی ئەمریكا لە هەولێر ڕایگەیاند، سوپاسگوزارە بۆ خستنەڕووی هەموو ئەو وردەكاریانەی كە سەرۆكی پەرلەمان پێشكەشیكردن و بەڵێنیدا كە ڕۆڵی ئەرێنی دەگێڕن لەنێوان پەرلەمانی كوردستان و ئەنجومەنی نوێنەرانی عیراق لە چارەسەركردنی پرسە هەڵواسراوەكانی نێوان هەردوولا.

کوردستان

بەڤیدی..داواكاری گشتی چالاكییەكانی ساڵی ڕابردوو ئاشكرا دەكات

خەڵك-بەشی هەواڵ

سەرۆكی داواكاری گشتی ڕایدەگەیەنێت، داواكاری گشتی دەزگایەكی چاودرێری زۆر گرنگە لە هەرێمی كوردستان و بەتایبەت لە میانی پاراستنی مافی مرۆڤ و مافی دەوڵەت.

ئازاد حەسەن سەرۆكی داواكاری گشتی لە كۆنفڕانسێكی ڕۆژنامەوانیدا ڕایگەیاند، هەوڵمان دا داوكاری گشتی بكەینە خزمەتكاری مافی گشتی و توانیومانە بەرەنگاری گەندەڵ و گەندەڵكاران ببینەوە لە ڕێگای تۆماركردنی داوا لەسەریان بە ڕێككەوتن لەگەڵ دەستەی نەزاهە و شارەوانییەكان.

وتیشی”چۆن لە شاخ پێشمەرگەكان بەرگریان لە كوردستان دەكرد و خۆیان دەكردە قوربانی، دەبێت بە هەمان هەناسە كار بكەین بۆ بەگژاچوونەوەی گەندەڵ و گەندەڵكاران”.

ئاماژەی بۆ ئەوەش كرد، پڕۆتۆكۆڵمان لەگەڵ دەستەی نەزاهە واژوو كردووە بۆ ئەوەی بتوانین كار بكەین لە بواری نەهێشتنی گەندەڵی و پاراستنی مافی مرۆڤ و بەڵێن دەدەینە كابینەی نۆیەمی حكومەت كە بە كابینەی چاكسازی دەناسرێت درێغی نەكەین لە بەگژاچوونەوەی گەندەڵ و گەندەڵكاران.
س.ع

بەردەوام بە لە خوێندنەوە

کوردستان

وردەكاری پلانی پارتی بۆ كۆنگرە ئاشكرادەبێت

خەڵك-بەشی هەواڵ

ئەندامێكی سەركردایەتی پارتی دیموكراتی كوردستان ڕایدەگەیەنێت، كۆنگرەی ئەمجارەی پارتی دەبێتە كۆنگرەیەكی نەوعی و خوێنی نوێ دێتە ناو سەركردایەتی پارتی.

دوای چەندین ساڵ لە وادەی خۆی، دوێنێ سەركردایەتی پارتی بڕیاریدا ئەمساڵ كۆنگرە ببەستێت، هەرچەندە بڕیار بوو لە كۆتایی ساڵی ڕابردوو كۆنگرەكەی ئەنجام بدایە.

عەلی حوسێن ئەندامی سەركردایەتی پارتی دیموكراتی كوردستان بە میدیای فەڕمی حزبەكەی ڕاگەیاند، بڕیاردراوە ئەمساڵ كۆنگرەی 14ی پارتی ئەنجامبدرێت و لیژنەیەكی باڵا دروست كراوە بۆ دانانی ئالیەتی ئەنجامدانی كۆنگرە.
وتیشی”لیژنەكە لەمەكتەبی سیاسی و ئەنجومەنی سەركردایەتی پێكهاتووە و چەندین لیژنەی تر دروست دەكرێت، بۆ ئەم مەبەستەش ڕای ئەندامانی ئەنجومەنی سەركرایەتی وەرگیراوە و لیژنەكە دیاری دەكات كەی كۆنگرە ئەنجامبدرێت”.

ئاماژەی بۆ ئەوەش كرد، كۆنگرەی پارتی بەپێی هەلومەرجی ئێستا دەبێت و گۆڕانكاری لەپەیڕەو و پڕۆگرامی پارتی دەكرێت، هاوكات بەرچاومان ڕوونترە بۆ ئێستای عیراق و هەرێم و ناوچەكە و هەوڵدەدەین كۆنگرەی ئەمجارە نەوعی بێت.

ڕوونیشیدەكاتەوە، خوێنی تازە دێتە ناوسەركردایەتی پارتی، و پارتی حزبی هەموو توێژەكانە بە كورد و ئەوانەی لەكوردستانیش دەژین.
س.ع

بەردەوام بە لە خوێندنەوە

کوردستان

دەستووری سووریا بەبێ بەشداری لایەنە سەرەكییەكان دەنووسرێتەوە

خەڵك-بەشی هەواڵ

ئەندامێكی نوێنەرایەتیی ڕێڤەبەری خۆسەری ڕۆژئاوا لەباشووری كوردستان ڕایدەگەیەنێت، ئەو دەستوورەی بڕیارە بۆ سوریا بنووسرێتەوە هەمووی گاڵتەپێكردن و كات كوشتنە.

هەرچەندە سوریا تاكو ئێستا دەستوەردانی دەرەكی تێدایە و بە بەردەوامی شەڕی نێوان وڵاتە زلهێزەكان و هاوپەیمانەكانیان بوونی هەیە و ڕۆژانە هاوڵاتیانی سڤیل دەبنە قوربانی، بەڵام وڵاتانی زلهێز دەیانەوێت بە ئەجێندای خۆیان دەستورێك بۆ سوریا بنووسرێتەوە.

فەتحوڵڵا حوسەینی ئەندامی نوێنەرایەتیی ڕێڤەبەری خۆسەری ڕۆژئاوا لەباشووری كوردستان بە (خەڵك)ی ڕاگەیاند، دەبێت حاڵەتێكی دامەزراو و ئارام لەو وڵاتە هەبێت و چارەسەری سیاسی هەبێت، پەڕلەمان و حكومەتێكی هەڵبژێردراو بوونیان هەبێت، ئەوكاتەدەتوانرێت دەستور بنووسرێتەوە، ئەو دەستوورە بۆ گاڵتەپێكردن و كوشتنی كاتە و هیچی تر نییە.
وتیشی”بڕیارە دەستوری سوریا لە ساڵی 2022 بنوسرێتەوە، ئێستا زووە باسی دەستوور بكرێت، چونكە بەشێك لە جوگرافیای گەورەی وەكو كورد لێی بەشدار نین، هێزی سەرەكی لێی بەشدار نییە، ئەمە ڕێككەوتنی ئێرانی و توركی و ڕووسییە، تەنانەت سوریاش پێوەی پابەند نییە”.
ئاماژەی بۆ ئەوەش كرد، هیچ لایەنێك بەو دەستوورە پابەند نییە، كاتێك هێزە گەورە و بچوكەكان پابەند دەبن بە دەستوورەوە كە بەشدار بن و چارەسەری سیاسی بێتەدی و دەستوەردان و شەڕ و ئاژاوە ناوخۆییەكان كۆتاییان پێبێت، ئەگەرنا لە كوێ دەتوانرێت دەستوور بنووسرێتەوە.

بەردەوام بە لە خوێندنەوە

کوردستان