ئێمە لە تۆرە کۆمەڵایەتیەکان

کوردستان

پێشەنگای “زانیار لە كاسۆمۆڵ” ماكیاژی ساختە و مەترسیداری بە ژنان فرۆشتووە


خەڵك- بەشی هەواڵ

بەهۆی فێڵكردن و گرانفرۆشی تێیدا، لیژنەهاوبەشەكانی قائیمقامیەتی سلێمانی دەستیان بەسەر جۆرە ماكیاژێكدا گرت زیان بەپێستی خانمان دەگەیەنێت، شوێنەكە داخرا و خاوەنەكەیشی ڕووبەڕووی یاسا دەكرێتەوە.

لەلایەن لیژنەی سێی سەربەلیژنە هاوبەشەكانی قائیمقامیەتی سلێمانیەوە و لە پێشانگای “زانیار” دەست بەسەر جۆرە ماكیاژێكی جوانكاری خانماندا گیراوە بەهۆی فێڵكردن و گرانفرۆشی شوێنەكە داخرا، لەروی تەندروستیشەوە بەركەوتنی بە روناكی ماكیاژەكە زیان بە پێستی خانمان دەگەیەنێت.

لە ڕاگەیەندراوێكدا قائیمقامیەتی سلێمانی نوسیویەتی”پێشانگای زانیار لە كاسۆمۆڵ ئەوجۆرە ماكیاژە كە لەبازاڕ پێی دەوترێت (ئەساس) كردۆتە ناو تیوبێكی شوشە و بەلەزگەیەكی چاپكراو كردویەتی بە ماكیاژێكی ماركە و بەنرخێكی (25) هەزار دینار بە خانمانی فرۆشتووە، لەكاتێكدا نرخە راستەقینەكەی خۆی تەنها سێ هەزار دینارە، ئەمەش فێڵی بازرگانی (غش تجاری)یە و یاسا سزای خۆی بۆ ئەنجامدەرانی دیاریكردووە.”

هەروەها هاتووە”لەروی تەندروستیشەوە، بۆ ئەوەی كارلێك لەنێوان پێكهاتەی ماكیاژەكە لەگەڵ روناكی روونەدات كۆمپانیای بەرهەمهێنەر ماكیاژەكە كردوەتە ناو دەفرێكی رەنگ رەشەوه تا زیان بە بەكارهێنەرانی نەگەیەنێت‌ بەڵام بەهۆی كردنە ناو تیوبێكی شوشەوە لەلایەن خاوەنی پێشانگای زانیار ئۆكسان رودەدات و پێستی خانمان توشی حەساسیەت، پەڵە، زیپكە و سوربوونەوە دەكات و زیان بە تەندروستیان دەگەیەنێت.”

بەفەرمانی قائیمقامی سلێمانی و لەلایەن لیژنەهاوبەشەكانەوە پێشانگای زانیار داخرا و خاوەنەكەشی روبەروی رێكاری یاسایی دەكرێتەوه.‌

کوردستان

ئەگەری قەدەغەی هاتووچۆ هەیە
دوو تووشبووی دیكەی كۆرۆنا لە هەولێر دیاریكران


خەڵك- بەشی هەواڵ
وەزارەتی تەندروستی حكومەتی هەرێم ئاشكرای دەكات، كە دوو تووشبووی دیكەی كۆرۆنا لە هەولێر دەستنیشان كراون.

وەزارەتی تەندروستی حكومەتی هەرێم لە ڕاگەیەنراوێكدا ئاماژەی بەوەكردووە، لە بەردەوامی پشكنینەكان و گەڕان بەدوای گومانلێكراوان و تووشبووان، دوو تووشبووی دیكەی ڤایرۆسی كۆڕۆنای نوێ COVID-19 لە پارێزگای ھەولێر دەستنیشانكران.

ڕاشیگەیاندووە، پیاوێك تەمەن ٣٨ ساڵ دانیشتووی گوندی (ابو جردە)ی سەر بە ناحیەی گوێر،ِ كە نیشانەكانی نەخۆشی ھەبووە، تووشبووی دووەم پیاوێكی تەمەن ٢٩ ساڵ دانیشتووی ناحیەی عەنكاوەیە.

لای خۆشیەوە، د. سامان بەرزنجی، وەزیری تەندروستی هەرێم لە لێدوانێكدا ڕایگەیاندووە، ئەگەر رەوشەكە بەم شێوەیە بەردەوام بێت و رێژەی تووشبووان بەرز ببێتەوە، ناچارین پلانی نوێ دابنێین و رێكاری نوێ بگرینەبەر، رەنگە یەكێك لە رێكارەكانیش قەدەخەی هاتووچۆ بێت، بەڵام تائێستا ئەو بڕیارە نەدراوە

بەردەوام بە لە خوێندنەوە

کوردستان

شوانێك بەهۆی “غلۆر” بوونەوەی بەرد گیانی لەدەستدا


خەڵك-ئارام سەردار
بەڕێوەبەرایەتی بنكەی بەرگری شارستانی سۆران ڕایدەگەینێت، بەهۆی بەركەوتنی بەرد بەسەری، شوانێك گیانی لەدەستدا.

بەپێی ڕاگەیەنراوێكی بەڕێوەبەرایەتی بنكەی بەرگری شارستانی سۆران لەپارێزگای هەولێر، كە وێنەیەكی بۆ (خەڵك) نێردراوە تێیدا هاتووە، ئێوارەی دوێنی ٢٥ / ٥ / ٢٠٢٠ ئاگادار كراینەوە، كە شوانكارێكی تەمەن ١٣ ساڵانە خەڵكی گوندی ماویلیان، بەهۆی غلۆربونی بەرد لە ژێر پێی ئاژەڵان بەردێك بەر سەری كەوتووە دەستبەجێ گیانی لەدەستداوە.

ڕاشیگەیاندووە، ئەو شوانكارە ناوی (ب. م. ش) و لەگەڵ مامی بووە لە چیای هەندرێن.

ڕوونیشكراوەتەوە، تیمی بنكەكەیان گەیشتنە شوێنەكە بۆ هاوكاری كەسوكاری و خەڵكی گوند بۆ هێنانه خوارەوەی تەرمی ناوبراو لە چیای هەندرێن و گەیاندنی بە پزیشكی دادی لە سۆران.

بەردەوام بە لە خوێندنەوە

کوردستان

دامەزرێنەرێكی گۆڕان: وەكو پارتی و یەكێتی سەیری گۆڕان دەكەین
“كاك نەوشیروان لە كۆتا قۆناغەكانی ژیاندا زۆر پەشیمان بووە لە زۆر شت”


خەڵك- بەشی هەواڵ
یەكێك لە هەڵسوڕاوەكانی پێشووی گۆڕان و كەسایەتییەكانی نزیك لە ڕێكخەری كۆچكردووی بزووتنەوەكە، كە یەكێك لە دامەزرێنەرانی ئەو حزبە بووە لە دەرەوەی وڵات ئاشكرای دەكات، كە نەوشیروان مستەفا لە كۆتا قۆناغەكانی ژیاندا زۆر پەشیمان بووە لە زۆر شت و دەشڵێت: “گۆڕان دەبێت بە هێزێكی پاشكۆی دەسەڵات ئەگەر گۆڕانكاری لەخۆیدا نەكات”.

د.چیا عەباس نوری، یەكێك لە هاورێ و كارەكتەرە نزیكەكانی نەوشیروان مستەفا و هەڵسوڕاوی پێشوو، هەروەها یەكێك لەدامەزرێنەرانی دیاری بزوتنەوەی گۆڕان لەدەرەوەی وڵات، كە پێشتر ڕایانگەیاند، لەبزوتنەوەی گۆڕان جیابوونەتەوە لەگەڵ كۆمەڵێك گۆڕانخواز ڕەوتێكی نویان ڕاگەیاند لەژێر ناوی “ئایندەی نیشتمان”.

د.چیا عەباس لە چاوپێكەوتنێكی بۆ (دەنگی كوردی ئەمریكا) وتی، ” لەناو ئێمە لە ساڵی 2018 و پاش ئەوەی كەوا داكشانی دەسەڵاتدارانی گۆڕان و لادانیان لە پرنسیپەكان و ئاراستەیەكمان دروستكرد بەناوی ئاراستەی پڕۆ گۆڕان واتە پرۆژەیەك بوو بۆ گۆڕانكاری و چاكسازی لە گۆڕان پەیوەندیمان لەگەڵدا كردن و قسەمان لەگەڵدا كردن و سەركردایەتیەكانمان بینیین، هەموویان پشت گوێ خستین، بەیەك وشە پێیان وتین ئێمە گوێتان لێ ناگرین، دەبن بە پارتی، دەبن بەیەكێتی بڕۆن ببن بەوە، ئێمە بێ خەم و بێ باكیین لەوە ئێمە هەر تەحەمول و ئاراممان هەبوو، ڕاگەیاندنەكانمان بڵاو كردووە، خۆمان ڕێكخستبوو وەك ئۆپۆزیسیۆنێك لەناو گۆڕاندا، بە كۆمەڵێك دامەزراوە و ژووری تایبەتی و كۆمەڵێك پەیوەندی تایبەت هەموو ئەمانەمان لەدەرەوە دروست كردبوو، بەڵام لەگەڵ ناوەوە-ش كۆمەڵێك پەیوەندی تۆكمە و توندوتۆڵمان لەگەڵ كۆمەڵێك لە هەڵسوڕاوە ناڕازییەكان دروستكرد بوو، كە گوێیان نەگرت گەیشتینە ئەو ئەنجامەی، كە ئەمانە هیچ مەجالی ئەوەی تێدا نیە چاكسازی تێدا بكرێت، ئیتر بۆچی ئاسنی سارد بوكتین؟”.

سەبارەت بەوەی ئایا بەنیازن (ئایندەی نیشتمان) بكەنە حیزب ؟ د.چیا عەباس دەڵێت: ” نەخێر، حیزب لە كوردستاندا باوی نەماوە، بۆنی حیزبت لێ بێت خەڵك نەفرەتت لێ دەكات”.

ئاشكراشی كرد، “من لەگەڵ كۆمەڵێك لە برادەرانی تر لە دامەزرێنەرانی گۆڕان بووین لە دەرەوە، ئێمە زۆر نزیك بووین لە كاك نەوشیروان، گوێڕایەڵی ئەو بووین قسەمان لەگەڵیدا كردووە، هەموو شتێك بەتاوتوێ كردن و باسكردن بوو، من حەسودیان پێ نابەم، دەبێت خۆیان حەسودی بەخۆیان ببەن”.

ڕاشیگەیاند، من پێم وایە ئەمانە “ئیرسێكی” كاك نەوشیروان یان وەرگرتووە، ئەو ئیرسە مەعنەویە، سیاسیە، ماددیە. لەڕووی سیاسی و مەعنەویەوە خۆیان شەرعیەتیان بەخۆیان داوە و سەركردایەتیەكیان دروستكردووە، لەڕووی ترەوە حیزبی گۆڕانكاری و چاكسازی موڵكی كەس نیە، دەبێت بیسەلمێنی بەكردار، ئەگەر بەكردار نەیسەلمێنێت كە ئەهلی گۆڕانكاری و چاكسازیت تا ئێوارە هەر هاوار بكە، خەڵك باوەڕت پێ ناكات ئەوەش لەناو گۆڕاندا سەلمێنرا بەوەی لەدەنگەكانی گوڕاندا هات لە دوو هەڵبژاردندا. ئەگەر خەڵك باوەڕی بەوە هەبووایە، كە ئەمانە دەتوانن گۆڕانكاری و چاكسازی بكەن، خەڵك متمانەی پێیان دەبوو، بەڵام تا ئێستا ئەوە ڕووی نەداوە و ڕوو لەهاتنەخوارەوەی زیاترە، لەبەر ئەوە كەوتۆتە سەر ئەوان چۆن مامەڵە لەگەڵ خەڵكی و جەماوەر و دەنگی خۆیان و لەگەڵ ئەوانە چۆن متمانەدەكەن.”

وتیشی، “ئێمە وەكو گۆڕانخوازانی پێشوو، باوەڕمان وایە لەناو گۆراِنی ئێستادا هیچ چاكسازی و گۆڕانكاریەك ناكرێت، ئەوانە بوون بە بەشێك لە دەسەڵات و بوون بە پاشكۆیەكی دەسەڵات، هیچ هیوایەك نییە لەسایەی ئەمانە بتوانن ئایندەیەكی گەش بۆ ئەم میللەتە بەلایەنی كەم پێش بینی بكرێت”.

د.چیا عەباس، یەكێك لە هاورێ و كارەكتەرە نزیكەكانی نەوشیروان مستەفا و هەڵسوڕاوی دیاری پێشووی بزوتنەوەی گۆڕان لەدەرەوەی وڵات دەڵێت: “من لەو باوەڕەدام كاك نەوشیروان لە كۆتا قۆناغەكانی ژیاندا زۆر پەشیمان بووە لە زۆر شت، لە هەڵسەنگاندنی كۆمەڵێك خەڵك، لە چاوەڕوانیەكانی وە لەو بەرنامەیەی كە بۆ ئەوانی داڕشتبوو، بەڵام ئیتر ئەو لە دۆخێكی تەندروستی وابوو كە نەیدەتوانی زۆر شت بكات”.

د.چیا دەشڵێت: “كاك نەوشیروان لە گۆڕان پەشیمان نەبووە، پەشیمان بوو لەهەڵسەنگاندنی كۆمەڵێك لەو هاوكارانەی، لەوانەی كە مەجالی پێداون و گەشەی پێكردوون و بواری بۆ ڕەخساندوون بێنە پێشەوە و بەرپرسیارێتی وەربگرن و ببن بە واجیهەی گۆڕان، ئەوە لە ئەنجامی ئەزموونی خۆیدا بووە لەبەرئەوی بواری تەندروستی زۆر بەرەو خراپ بوون دەچوو، توانا و هێزی ئەوەی تیا نەمابوو، كە بەجددی چارەسەری ئەو دۆخە بكات”.

جەختیشی كردۆتەوە، بەلای منەوە گۆڕان دەبێت بە هێزێكی پاشكۆی دەسەڵات ئەگەر گۆڕانكاری لەخۆیدا نەكات و خاوەنی هەڵوێستی جددی خۆی نەبێت و نەگەڕێتەوە بۆ پرنسیپە ڕەسەنەكانی گۆڕان، وەكو هێزێكی بچوك دەمێنێتەوە. ئەو12 كورسیەی ئێستاشی كەم دەكاتەوە و نابێ بە هێزێكی كاریگەر بەداخەوە ئەوە لەسایەی دەسەڵاتدارانی گۆڕاندا ئەو دۆخە دروست بووە.

بەردەوام بە لە خوێندنەوە

کوردستان