ئێمە لە تۆرە کۆمەڵایەتیەکان

ئابوری

“پڕۆسەكە گوماناوییە”
خەڵك؛ دواین بڕیار سەبارەت بە نرخی عەریزەنووسەكان بڵاودەكاتەوە

خەڵك- بەشی هەواڵ
دوابەدوای گرانكردنی نرخی عەریزەنووسین لە فەرمانگە دادنووسیەكان بۆ 25 هەزار دینار، ناڕەزایی فراوان دروست بوو لەسەر پڕۆسەكە و بەهۆیەوە نرخەكەی بۆ 15 هەزار دینار كەمكرایەوە، ئەندامێكی ئەنجوومەنیش دەڵێت: “ئەوە گومانەكە قوڵدەكاتەوە” و جەختیشدەكاتەوە، كە پڕۆسەكە ڕەتدەكەنەوە و داوامان لە حكومەت كردووە هەڵیبوەشێنێتەوە.

ئەمڕۆ سێ‌ شەممە 10ی ئەیلول، ئەنجوومەنی پارێزگای سێمانی لەسەر فراوانكردنی سنوری گوندی (بێستان سووری گەورە) لە شارەدێی تانجەرۆ و گرێبەستی بە ئەلیكترۆنی كردنی عەریزە لە فەرمانگە دادنووسیەكان كۆبووەوە.

ڕێكەوت زەكی، ئەندامی ئەنجوومەنی پارێزگای سلێمانی بۆ (خەڵك) ئاماژەی بەوەكرد، كاری بە ئەلیكترۆنی كردنی عەریزە لە فەرمانگە دادنووسیەكان سێ‌ لایەنی هەیە، كە یەكێك لە لایەنەكانی ئەرێنیە، چونكە ئێمە بەتەواوی لەگەڵ ئەوەین كاروبارەكانی حكومەت بكرێتە ئەلیكترۆنی تاوەكو كات و پارە بەفیڕۆدان كەم ببێتەوە و كاری سەر كاغەز و ڕۆتین نەمێنێت.

ڕاشیگەیاند، بەڵام دوو لایەنی دیكەی پڕۆسەكە گوماناوین، كە ئەوانیش پڕۆسەی سپاردنی كارەكەیە بەو كۆمپانیایە، كە بە شەفافی و كەمكردنەوەی نهێنی نەبووە و هەروەها نرخی كاركەش، كە 25 هەزار دیاری كراوە ئەوەش زۆر زۆرە.

ڕوونیشی كردەوە، پێدانی ئەو كارە پڕۆسەیەكی شەفاف نییە و گوماناوییە، چونكە وەك لە فەرمانەكەی سەرۆكایەتی ئەنجوومەنی وەزیران لە كابینەی پێشوو دەردەكەوێت ئەو كۆمپانیایە پڕۆپۆزەڵی داوەتە وەزارەتی داد و ئەوانیش بەرزیان كردۆتەوە بۆ ئەنجوومەنی وەزیران و ئەوانیش لای خۆیانەوە ڕازی بوون، كە ئەوەش شتێكە نابێت هەر كۆمپانیایەك پڕۆژەیەكی هەبوو بیدرێتێ‌، بەڵكو ئەبێ‌ بەڕێگا یاسایی و ئسوڵیەكاندا بڕوات، كە كەمكردنەوەی نهێنی و كێبڕكێیە.

ڕێكەوت زەكی وتیشی، “نرخەكەشی تێبینی زۆری لەسەرە، كە 25 هەزار دینار پارەیەكی خەیاڵی زۆرە و بەهەدەردانە، لە هەمان كاتدا كەمكردنەوەكەشی قسەی لەسەرە، كە ڕەنگە بۆ دامركاندنەوەی ڕای گشتی بووبێت، بەڵام وادیارە بەو 15 هەزار دینارەش قازانجێكی زۆر دەكات و هەروەها لەسەر چی بنەمایەكیش ئەو كەمكردنەوەیەی كردووە”.

ئاماژەی بەوەشكرد، ئێمە پێشنیازمان كرد بۆ حكومەت لەبەر ئەو هۆكارانە پڕۆسەكە ڕابگرێت.

جەختیشی كردەوە، كە حكومەت ژمارەیەكی زۆر كادر و فەرمانبەری هەیە، كە چۆن پڕۆسەی بایۆمەتری مووچە بەو قورسییەوە ئەنجام درا بەبێ‌ خەرج كردنی پارە بۆ لایەنی تر و هەر بە فەرمانبەران كرا، ئاوا دەكرێت ئەو پڕۆسەیەش بدات بە فەرمانبەران.

ئەو ئەندامەی ئەنجوومەنی پارێزگای سلێمانی ئاشكراشی كرد، كە داوامان كردووە حكومەت خۆی بە فەرمانبەران ئەو پڕۆسەیە ئەنجام بدات و ئەگەر هەر نەشكرا بە پڕۆسەی یاساییدا بڕوات لەڕێگەی كەمكردنەوەی نهێنییەوە، كە ئێستا زۆر كۆمپانیا هەیە دەڵێن بە 3 هەزار و 5 هەزار و 7 هەزار دینار كارەكە دەكەن.

ئابوری

ئەمڕۆ مووچەی ئەم شوێنانە دابەش دەكرێت

خەڵك- بەشی هەواڵ

بڕیارە ئەمڕۆ چوارشەممە مووچەی وەزارەتی كار و كاروباری كۆمەڵایەتی و خاوەن پێداویستی تایبەت دابەش بكرێت.

بەپێی خشتەیەك كە پێشتر بڵاوكراوەتەوە، ئەمڕۆ مووچەی مانگی تەمموزی هەریەك لە كارمەندانی وەزارەتی كار و كاروباری كۆمەڵایەتی و خاوەن پێداویستی تایبەت دابەش دەكرێت.

دابەشكردنی مووچەی مانگی تەمموز لەكاتێكدایە كە لەمساڵدا مووچەی سێ‌ مانگ بە نادیاری ماوەتەوە.

بەردەوام بە لە خوێندنەوە

ئابوری

ئاگادارییەك بۆ مامۆستایانی گرێبەست

خەڵك- بەشی هەواڵ
بەڕێوەبەرێتی پەروەردەی قەرەداغ ئاگاداری مامۆستایانی گرێبەست دەكاتەوە، سبەینێ‌ سەردانیان بكەن بۆ نوێ‌ كردنەوەی گرێبەستەكانیان.

بەڕێوەبەرێتی پەروەردەی قەرەداغ لە ئاگادارییەكدا، كە وێنەی دراوە بە (خەڵك) ئاماژەی بەوەكردووە، “ئاگاداری ئەو مامۆستا بەڕێزانە دەكەینەوە، كە ناویان لە لیستی ھاوپێچدا ھاتووە سبەینێ چوار شەممە ڕێكەوتی ١٦-١٠-٢٠١٩ سەردانی دیوانی پەروەردەی قەرەداغ بكەن بە مەبەستی نوێكردنەوەی گرێبەستەكانیان”.

ڕاشیگەیاندووە، پێویستە بۆ نوێكردنەوەی گرێبەستەكانیان وێنەیەك (ئیستینساخ) لە پێناسی باری شارستانی یان كارتی نیشتمانی لەگەڵ خۆیان بهێنن.

بەردەوام بە لە خوێندنەوە

ئابوری

تەمەنی خانەنشینی فەرمانبەران كەمدەكرێتەوە
(خەڵك) زانیاری نوێ‌ لەسەر یاسای خانەنشینی ئاشكرادەكات

خەڵك- بەشی هەواڵ
شانەی بەدواداچوونی حكومی لە حكومەتی فیدڕاڵ ڕایدەگەیەنێت، ئەنجوومەنی وەزیران پێشنیاری هەمواری یاسای خانەنشینی لەڕووی تەمەنەوە بەرزكردۆتەوە، تا تەمەنی یاسایی خانەشینی بۆ پیاوان و ژنان بكرێتە 60 ساڵ، ئەندامێكی لیژنەی دارایی پەڕلەمانی عیراقیش، لایەنە ئەرێنی و نەرێنییەكانی ئاشكرا دەكات.

شیروان میرزا، ئەندامی لیژنەی دارایی لە پەڕلەمانی عیراق لە لێدوانێكیدا بۆ (خەڵك) ڕایگەیاند، “بەپێی یاسای خانەنشینی یەكگرتوو لە عیراق، تەمەنی یاسایی خانەشینی 63 ساڵە، هەر فەرمانبەرێك تەمەنی بگاتە 63 ساڵ لەلایەن حكومەتەوە خانەنشین دەكرێت، هەروەها لەسەرو 50 ساڵیشەوە، فەرمانبەر ئەگەر خزمەتی 15 ساڵی هەبێت دەتوانێت داوای خانەنشینی بكات بۆخۆی، واتا لە 63 ساڵیدا ناچارییە و لە سەروو تەمەنی 50 ساڵیش ئارەزوومەندانەیە، بەڵام جیاوازی لەو مووچەیە هەیە، كە وەریدەگرن”.

بە وتەی ئەندامەكەی لیژنەی دارایی پەڕلەمانی عیراق، “پێشنیاری هەهواركردنی یاساكە بۆ كەمكردنەوەی تەمەنی خانەنشین بوون بۆ 60 ساڵ، لێكەوتەی ئابوری هەیە، بەو پێیەی بارگرانی لەسەر دەزگای خانەنشینی زیاد دەكات، تەمەنی خزمەتی هاووڵاتی بۆ حكومەت كەمدەكاتەوە، بەو پێیەی هاووڵاتی كاتێك لە تەمەنی 23 ساڵیدا دادەمەزرێت و لە تەمەنی 63 ساڵیدا خانەنشین دەكرێت، ئەو كاتە 37 ساڵ خزمەت دەكات، ئەمەش وادەكات خانەنشین زیاد ببێت و لە هەمان كاتدا خزمەت كەمدەبێتەوە، بۆیە بارگرانی لەسەر حكومەت و دەزگای خانەنشینی زیاد دەكات”.

شیروان میرزا دەڵێت: “هەرچەندە سندوقی دراوی نێودەوڵەتیش سەرنجی لەسەر ئەم پێشنیارە هەیە، بەڵام گەر حكومەت بەرنامەی هەبێت لەجێی خانەنشینەكان كەسانی نوێ‌ دابمەزرێنێت، وەك هەوڵێك بۆ كەمكردنەوەی ڕێژەی بێكاری لە وڵات، ئەوا پێدەچێت پێشنیاری هەمواری یاسای خانەنشینی لەلایەن پەڕلەمانەوە دەنگی لەسەر بدرێت و پەسەند بكرێت”.

هاوكات بەپێی زانیارییەكانی (خەڵك) لە پڕۆژە هەمواری یاسای خانەنشینی یەكگرتووی عیراق پێشنیار كراوە كەمترین مووچەی خانەنشینی 600 هەزار دینار بێت.

بەردەوام بە لە خوێندنەوە

کوردستان