ئێمە لە تۆرە کۆمەڵایەتیەکان

ئابوری

كاتی دەوام و نرخی دایەنگەكان لە سلێمانی‌ دیاریكرا

خەڵك- بەشی هەواڵ

بەپێی‌ ئەو بەرنامە و پلان‌ و بڕیارانەی‌ لە بەشی‌ دایەنگەكانی‌ بەڕێوەبەرایەتی‌ گشتی‌ چاودێری و گەشەپێدانی كۆمەڵایەتی سلێمانی دەرچووە، دایەنگە حكومییەكانی‌ سنوری‌ پارێزگای‌ سلێمانی‌ لە شەممە بۆ پێنج شەممە و ڕۆژانە لە كاتژمێر (7.30)ى سەرلەبەیانی‌ بۆ (4.00)ی‌ پاشنیوەڕۆ كراوەن ‌و منداڵ لەخۆدەگرن، بۆ دایەنگە ناحكومییەكانیش هەمان دەوامە و زیاتریش لەسەر بنەمای‌ خواستی‌ هاووڵاتیان ‌و تا كاتژمێر (3.30) لەسەر هەمان بڕە پارەی‌ مانگانەیە و لە دوای‌ ئەو كاتەوە بۆ هەر كاتژمێرێك دەوامی‌ زیادە تەنها یەك هەزار دینار وەردەگیرێت.

عومەر گوڵپی‌، بەڕێوەبەری‌ گشتی‌ چاودێری‌‌ و گەشەپێدانی‌ كۆمەڵایەتی‌ لە پارێزگای‌ سلێمانی‌ ڕایگەیاند، لە سنوری‌ پارێزگای‌ سلێمانی‌ نزیكەی‌ ٧٦ دایەنگەی‌ حكومی‌ و ناحكومی‌ و نیمچە حكومیمان هەیە، بۆ ئاسانكاری‌ دەوامی‌ دایكان‌ و باوكان‌ و پشتیوانیكردنیان دەواممان بەجۆرێك ڕێكخستووە، كە خواستی‌ ئەوانی‌ تێدا ڕەچاو كراوە و لە كاتژمێر (7.30) هەر ڕۆژێكی‌ هەفتە دەوام دەستپێدەكات تا (4.00) بۆ دایەنگە حكومییەكان ‌و تا (3.30) بۆ دایەنگە ناحكومییەكان، سەبارەت بە حكومییەكان لە دوای‌ كاتژمێر (٤)ەوە پێویستی‌ نامێنێت بە دایەنگە، بەڵام بۆ دایەنگە ناحكومییەكان ئەگەر دایك‌ و باوك خواستیان هەبوو بۆ دوای‌ ئەو كاتژمێرە ئەوە ئێمە ڕێگەیان پێ دەدەین تا كاتژمێر (٧)ی‌ ئێوارە دەوام بكەن ‌و لە پاش كاتژمێر (3.30) تەنها یەك هەزار بۆ هەر كاتژمێرێك وەردەگیرێت.

هەر لەبارەی‌ جیاكاری ‌‌و شێوازی‌ وەگرتنی‌ منداڵ، بەڕێوەبەری‌ گشتی‌ ڕوونیدەكاتەوە، كە دایەنگەكان پابەندن بە وەرگرتنی‌ هەر منداڵێك بەبێ جیاوازی و ڕێگە پێدراو نییە دایەنگە ژوور و شوێن تایبەت بكات بە پاساوی‌ كەمئەندامی‌ یان دواكەوتنی‌ ژیریی‌ یان دواكەوتن لە قسە یان هەر كێشەیەكی‌ تر، خۆ ئەگەر حاڵەتێك هەبێت لە منداڵێكدا و جێگەی‌ سەرنج بێت ئەوە پێویستە لیژنەی‌ پزیشكی‌ دەستنیشانی‌ بكات‌ و بڕیار بدات ئەو منداڵە ناگونجێت لە دایەنگە وەربگیرێت ئەوەش بۆ پاراستنی‌ بەرژەوەندی‌ منداڵەكە یان منداڵەكانی‌ تر، ئەگەرنا دایەنگەكان بۆ هەموو منداڵێكە بەبێ جیاوازی ‌‌و ئەركی‌ دایەنگەیە كاربكات بۆ گەشەپێدانی‌ ژیری ‌‌و تواناكانیان لە هەموو ڕوویەكەوە ئەگەر منداڵێك كیشەیەكی‌ هەبێت پێویستە دایەنگە كاربكات بۆ چارەسەر كردنی‌ ئەو كێشەیە بە هاوكاری‌ خێزان ‌و دایك ‌و باوكی‌ منداڵەكە.

لای خۆشیەوە، هیوا سەعید، بەرپرسی بەشی دایەنگەكانی بەڕێوەبەرایەتی گشتی ڕایگەیاندووە، بەردەوام لە ڕێگەی لیژنە و بە شێوازی جیاجیا بەدواداچوون بۆ كاری دایەنگەكان و ژیانی منداڵان دەكرێت و بەشی دایەنگەكان جەخت دەكاتەوە لەسەر پابەندی سەرجەم دایەنگەكان بە سیستمی دایەنگەكان دەرچوو لە ئەنجومەنی وەزیران و ڕێنمایی دایەنگەكان دەرچوو لە وەزارەتی كار و كاروباری كۆمەڵایەتی، لەسەر بنەمای ئەو بەدواداچوونانەش هەر دایەنگەیەك لێپێچینەوەی لەگەڵ دەكرێت كاتێك پابەند نییە و دایەنگە پابەندەكانیش سوپاس دەكرێن.

ڕاشیگەیاندووە، ئەگەر هاووڵاتیانیش كێشەیان لەگەڵ دایەنگەیەك هەبوو یان پێویستیان بە زانیاری زیاتر بوو دەتوانن بە سەردان یا لە ڕێگەی پەیوەندی تەلەفۆنیەوە زانیاری زیاتر لە بەشی‌ دایەنگەكان لە بەڕێوەبەرایەتی‌ گشتی‌ وەرگرن یان بۆ ئەوەی بەدواداچوون بۆ كێشەكەیان بكرێت.

ئابوری

ئەحمەد حاجی ڕەشید: هیچ ڕێككەوتنێك لە نێوان هەرێم و بەغدا نەكراوە و پارەش نانێردرێت

خەڵك – بەشی هەواڵ
پەرلەمانتارێكی كورد ڕەتیدەكاتەوە كە تا ئێستا بەغدا و هەرێمی كوردستان ڕێككەوتبن و دەشڵێت: دەنگۆی ڕەوانەكردنی 300 ملیار دینار بۆ هەرێم دوورە لە ڕاستییەوە.

ئەحمەد حاجی ڕەشید ئەندامی لیژنەی دارایی لە پەڕلەمانی عیراق لە لێدوانێكی بۆ بەشی كوردی دەنگی ئەمریكا ڕایگەیاند “ئه‌وه‌ی من ئاگادار بم تائێستا حكومه‌تی هه‌رێم و حكومه‌تی به‌غداد نه‌گه‌یشتوونه‌ته‌ هیچ ڕێكه‌وتنێك، وه‌ هیچ ڕێكه‌وتنێك له‌سه‌ر پاره‌ نه‌كراوه‌ ئه‌وه‌ی كه‌هه‌رێمی كوردستان باسی لێوه‌كردووه‌ كه‌ گوایه‌ دوای جه‌ژن 300 ملیار دینار ده‌نێردرێت له‌ئه‌نجامی ڕِێكه‌وتنێكدا، به‌بڕوای من ته‌نها جۆرێكه‌ له‌ دڵخۆش كردنی خه‌ڵك وه‌ جۆرێكه‌ له‌ (بانگەشە) بۆ ئه‌و ئازارانه‌ی كه‌ هه‌یه‌ له‌هه‌رێمی كوردستان و ئه‌و چاوه‌ڕوانیانه‌ی كه‌ هه‌یه‌ له‌ هه‌رێمی كوردستان ئه‌گه‌رنا ئه‌و بنه‌ما سه‌ره‌كیانه‌ی كه‌ ناردنی پاره‌ی لێوه‌ به‌ئه‌نجام ده‌گه‌یه‌نرێت كه‌بریتییه‌ له‌یاسای بودجه‌ تائێستا یاسای بودجه‌مان نییه‌، وه‌ بریتییه‌ له‌یاسای به‌ڕێوه‌بردنی دارایی، له‌ یاسای به‌ڕێوه‌بردنی دارایی له‌مادده‌ی 27 بڕگه‌ی 5 دا باس له‌وه‌ ده‌كات كه‌ ئه‌گه‌ر پارێزگا و هه‌رێمه‌كان نه‌وت ڕاده‌ست نه‌كه‌ن ئه‌وا به‌هیچ شێوه‌یه‌ك پشكیان نابێت له‌ داهاتی عیراقدا ئه‌و داهاته‌ش ده‌بێت له‌چوارچێوه‌ی بودجه‌دا بێت چونكه‌ له‌مادده‌ی 14 له‌هه‌مان یاسا باس له‌وه‌ ده‌كرێت كه‌ ناكرێت له‌گه‌نجینه‌ی ده‌وڵه‌ت هیچ پاره‌یه‌ك خه‌رج بكرێت به‌بێ ئه‌وه‌ی دیاری بكرێت واته‌ لایه‌نی یاسادان بڕیار له‌سه‌ر ئه‌و پاره‌یه‌ ده‌دات. ئه‌وه‌ی كه‌ باس ده‌كرێت ته‌نها ده‌نگۆیه‌كه‌ وه‌ تائێستا نه‌گه‌یشتونه‌ته‌ هیچ ڕێكه‌وتنێك . بڕوام وایه‌ هه‌رێمی كوردستان بۆئه‌وه‌ی بتوانێت ڕۆژه‌كان به‌سه‌ر به‌رێت بۆ ئه‌وه‌ی جۆرێك له‌ ئومێد بدات به‌ چاوه‌ڕوانیه‌كانی هاوڵاتیان ئه‌و ده‌نگۆیانه‌ بڵاوده‌كاته‌وه‌ ئه‌گه‌رنا تائێستا هیچ جۆره‌ ڕێكه‌وتنێك نه‌كراوه‌ ئه‌وه‌ی من ئاگاداربم.”

وتیشی: “پێموایه‌ عیراق هه‌وڵی ماندوو كردنی هه‌رێم ده‌دات بۆ ئه‌وه‌ی به‌ ته‌واوی مانا ته‌سلیم ببێت به‌و ئیراده‌یه‌یه‌ی كه‌ له‌ئێستادا حكومه‌ته‌كه‌ی كازمی و ، كازمی ده‌یانه‌وێت چونكه‌ ئه‌و هه‌ڵه‌ كوشنده‌یه‌ی كه‌ سیاسیه‌كانی هه‌رێم ئه‌نجامیاندا پشتگیری كازمی-یان كرد به‌بێ ئه‌وه‌ی هیچ كاغه‌زێكی نوسراو له‌نێوانیاندا هه‌بێت ڕاسته‌وخۆ له‌ڕێگه‌ی سه‌رۆكی هه‌رێمه‌وه‌ وه‌ به‌پشتگیری هه‌موو هێزه‌ سیاسییه‌ كوردییه‌كان پشتگیریان له‌ دانانی موسته‌فا كازمی كرد كه‌ئه‌وه‌ خۆی بۆ خۆی هه‌ڵه‌یه‌كی كوشنده‌بوو، وه‌ ئێستا كازمی و حكومه‌ته‌كه‌ی هه‌وڵی گه‌مه‌یه‌ك ده‌ده‌ن له‌گه‌ڵ هه‌رێمی كوردستاندا بۆ ئه‌وه‌ی دوا هه‌ڵوێستی هه‌رێم یان دوابه‌رگری هه‌رێم كۆتایی پێبێت و ئاماده‌ بێت هه‌موو ئه‌و ئه‌جێندانه‌ی كه‌ عیراق ده‌یه‌وێت هه‌رێم جێبه‌جێیبكات له‌ ڕاده‌ستكردنی نه‌وت و ڕاده‌ستكردنی خاڵه‌ سنورییه‌كان له‌ جێبه‌جێكردنی هه‌موو بڕیارانه‌ی كه‌ له‌ناو یاسا كارپێكراوه‌كانی عیراقدا هه‌یه‌، بۆیه‌ به‌بڕوای من له‌ ئێستادا عیراقیش ده‌ستی ده‌ستی به‌ هه‌رێمی كوردستان ده‌كات.”

ئەحمەد حاجی ڕەشید ڕوونیشیكردەوە كە “هه‌رێمی كوردستان ئاماده‌ نییه‌ نه‌وت ڕاده‌ستی كۆمپانیای سۆمۆ بكات، بۆیه‌ حكومه‌تی عیراقیش ئاماده‌ نییه‌ هیچ بڕه‌ پاره‌یه‌ك بنێرێت ئه‌وه‌ خاڵی جه‌وهه‌رییه‌. بابه‌تی خاڵه‌ گومرگیه‌كان ده‌سه‌ڵاتی هاوبه‌شه‌ له‌ ده‌ستووردا ، هه‌رێم ئاماده‌یه‌ ئه‌و هاوبه‌شه‌ به‌كار بهێنێت به‌ڵام له‌به‌رئه‌وه‌ی له‌ خاڵه‌ گومرگیه‌كاندا به‌شێوه‌یه‌كی گشتی یه‌كلابۆته‌وه‌ بۆ كۆمپانیا حیزبیه‌كان كه‌ له‌وێ كار ده‌كه‌ن ، بۆیه‌ هه‌رێمی كوردستان ئاماده‌یی تێدایه‌ كه‌ دیوانی چاودێری دارایی بێته‌ ئه‌وێ به‌ڵام دواجار ڕێك نه‌كه‌وتوون له‌سه‌ر ئه‌و بابه‌ته‌ی كه‌ بڕی ئه‌و پاره‌یه‌ی كه‌ بۆهه‌رێمی كوردستان ده‌نێردرێت چه‌نده”‌.

لەو بڕوایەشدایە كە هەرێمی كوردستان “هەڵەیەكی كوشندە”ی كرد كاتێك بێ هیچ مەرجێك پشتیوانی بۆ مستەفا كازمی دەربڕی.

بەردەوام بە لە خوێندنەوە

ئابوری

عیراق ئاستی بەرهەمهێنانی نەوت كەمدەكاتەوە

خەڵك – بەشی هەواڵ
وەزارەتی نەوتی عیراق بەڵێن دەدات كە 400 هەزار بەرمیل لە بەرهەمهێنانی نەوتی ڕۆژانە كەمبكاتەوە.

ئیحسان عەبدولجەبار وەزیری نەوت پەیوەندییەكی تەلەفۆنی لەگەڵ عەبدولعەزیز سەلمان وەزیری وزەی سعودیە ئەنجام دا و تێیدا باسیان لە بوژانەوەی بازاڕی نەوت و پابەندبوون بە ڕێككەوتنی ئۆپیك لەسەر دابەزاندنی ئاستی بەرهەمهێنانی نەوت كرد.

وەزیری نەوتی عیراق جەختیكردەوە لەوەی لەسەرەتا ئەم مانگەوە تا كۆتایی مانگی ئەیلولی داهاتوو، 100% پابەند دەبێت بە ڕێككەوتنەكەی ئۆپیكەوە.

ئیحسان عەبدولجەبار ئەوەشی خستەڕوو كە عیراق لە ماوەی ئەم دوو مانگەدا ڕۆژانە 400 هەزار بەرمیل نەوت كەمدەكاتەوە.

بەردەوام بە لە خوێندنەوە

ئابوری

عیراق، مەرزە گەورەكە لەگەڵ سعودیەدا دەكرێتەوە

خەڵك- بەشی هەواڵ
سەرچاوەیەكی باڵا لە ئیدارەی خۆجێی لە پارێزگەی ئەنبار ڕایدەگەیەنێت، بەمزوانە مەرزی سنوری عەرعەر لەگەڵ سعودیە بۆ یەكەمجار لەو دەمەی ڕێكخراوی تیرۆریستی داعش دەستی بەسەر ڕووبەرێكی فراوانی پارێزگەكەدا گرتبوو، دەكرێتەوە.

ئەمڕۆ پێنج شەممە، سەرچاوەیەكی باڵا لە ئیدارەی خۆجێی پارێزگەی ئەنبار بە میدیاكانی عیراقی ڕاگەیاند:”لەم چەند ڕۆژەی دواییدا و لەم مانگە، مەرزی سنوری عەرعەر لەگەڵ سعودیە لە خۆرئاوای ئەنبار دەكرێتەوە، دوای ئەوەی تەواوی قۆناغەكانی كارەكان لەهەردوو مەرزەكەدا تەواوكران”، ئاماژەی بە دەربڕینی ئامادەیی هەردوو لایەنی عیراقی و سعودیش كرد بۆ كردنەوەی ئەو مەرزە بەڕووی ئاڵوگۆڕی بازرگانی لەنێوان هەردوو وڵات.

سەرچاوەكە دەڵێت”كردنەوەی مەرزی عەرعەر، دەبێتە مایەی چالاككردنی جوڵەی ئابوری نێوان عیراق و سعودیە و گەڕانەوەی پەیوەندییە بازرگانییەكانی نێوان هەردوو وڵات، ئیدارەی خۆجێی ئەنباریش بە هەماهەنگی لەگەڵ هێزە ئەمنییەكان، لایەنی سعودی لە زامنكردنی تەواوەتی ڕێگەی نێودەوڵەتی خێرا، ئاگاداركردووە”.

بەردەوام بە لە خوێندنەوە

کوردستان