ئێمە لە تۆرە کۆمەڵایەتیەکان

کوردستان

“ژمارەیەك بەرپرسی وەزارەتی سامانە سروشتیەكان دەستگیر كران”


خەڵك – بەشی هەواڵ
ئەندامێكی پەڕلەمانی عیراق لە لیژنەی وزە و سەرچاوە سروشتیەكان ڕایدەگەیەنێت، لە لایەن دەستەی دەستپاكی هەولێرەوە بانگ كرام بۆ ئەوەی شاهێدبم لەو كەیسەی، كە لەئێستادا بازرگانێكی نەوت و ڕاوێژكارێكی وەزرارەتی سامانە سروشتیەكان و بەڕێوەبەرێكی گشتی لەو وەزارەتە لەسەری دەستبەسەر كراون، دەشڵێت: “ئەو كاتەی سووتەمەنی كوالێتی خراپ هێنراوە هەوڵدراوە بەپاڵپشتی ئەمانە بهێنرێتە هەرێمی كوردستان، بەڵام بووینەتە ڕێگر لەپێشیان و گەڕاندوماننەوە”.

غالب محەمەد، ئەندامی پەڕلەمانی عیراق لە لیژنەی وزە و سەرچاوە سروشتیەكان لە هەژماری تایبەتی خۆی لە فەیسبووك ڕایگەیاندووە، ‏‎كاتێك لە ئەنجوومەنی پارێزگا بووین بەڵێنی ئەوەمان پێدان دەبێت حەقی سووتانی فیول پەمپی ئۆتۆمبێلەكانتان بكەینەوە لەو كەسانەی لەپێناو بەرژەوەندی خۆیاندا ئێوەیان تووشی زەرەر و زیانی مادی دەكرد.

دەشڵێت: “هەمیشە شەڕمان دەكرد بۆ ئەوەی سووتەمەنی كوالێتی خراپ، بەتایبەت بەنزین نەهێنرێتە سنوری پارێزگاكەمان ئەویش لەپێناو پاراستنی سەر و ماڵی هاووڵاتیان و بڵاونەبوونەوەی چەند نەخۆشیەك، كە مەترسیدارن و بەهۆی بەنزینی كوالێتی خراپەوە بڵاودەبنەوە”.

ڕاشیگەیاندووە، ئێستا‎ پاش ئەوەی كۆمەڵێك بەڵگە دراوەتە دەستەی دەستپاكی هەولێر، بەندە بانگ كرام، دوێنێ لە كەلارەوە ڕۆشتم بۆ هەولێر بۆ ئەوەی شاهێدبم لەو كەیسە، كە لەئێستادا بازرگانێكی نەوت و ڕاوێژكارێكی وەزارەتی سامانە سروشتیەكان و بەڕێوەبەرێكی گشتی لە وەزارەتی سامانە سروشتیەكان دەستبەسەر كراون، كە ئەوكات سووتەمەنی كوالێتی خراپ هێنراوە و هەوڵدراوە بەپاڵپشتی ئەمانە بهێنرێتە هەرێمی كوردستان، بەڵام ئێمە بووینە ڕێگر لەپێشیان و گەڕاندوماننەوە.

ئاماژەی بۆ ئەوەشكردووە، لەئێستاشدا دوو بەرپرسی باڵای وەزارەتی سامانە سروشتیەكان دەستگیركراون و ناوی بەرپرسی باڵای دیكەش هێنراوە، كە دەبێت لێكۆڵینەوەی لەگەڵ بكرێت و بازرگانێكیش دوای (١٤) ڕۆژ بەكەفالەت ئازادكراوە و لەشكرێكی دیكەش لەپشتیانەوەیە دەبێت گوڵەچنە بكرێن و پیسەكانیان جیا بكرێنەوە.

دەشڵێت: “من ئێستا خۆشحاڵم و قەدرم هەیە بۆ ئەو دادوەرە و دەستەی دەستپاكی هەولێر هاتۆتە خەت و دەیەوێت پارێزەری مافی بەشخوراوان بێت و دەیەوێت مافیا و گەندەڵەكان لە زینداندا تەمبی بكات، ئەوەی لەتوانای ئەواندابێت كردویانە، ئەم هەفتەیە كەیسەكە دەگوازرێتەوە بۆ دادگای هەولێر بۆ دادگایی كردنیان و بڕیاردان لەسەریان، هیوادارم دادگای هەولێر بەبێ لایەنانە و دوور لەبیركردنەوەی تەسكی حیزبی بڕیار بدات و سەربەخۆیی خۆی بپارێزێت و بەرپرسە باڵاكانی حكومەتیش دەستوەردان نەكەن تێیدا، چونكە بەوتەی خۆیان ناوی ئەم كابینەیە كابینەی خزمەت و چاكسازییە”.

کوردستان

داوا لە هاووڵاتیانی پێنجوێن دەكرێت خۆیان بپارێزن
قائیمقامی پێنجوێن: كەیسی كۆرۆنا لەناو پێنجوێن تۆماركراوە


خەڵك – بەشی هەواڵ

قائیمقامی پێنجوێن ڕایدەگەیەنێت:”كەیسی كۆرۆنا لەناو پێنجوێن تۆماركراوە و چەند كەیسێكی تریشیان هەیە لەپشكنینی یەكەمدا وا دەردەكەوێت هەڵگری ڤایرۆسەكەبن”.

زانا ڕەحمان ڕەحیم قائیمقامی پێنجوێن، لە ڕاگەیەنراوێكدا ڕایگەیاند:”لەم چەند ڕۆژەی ڕابردوودا پەتایەك لەناو پێنجوێندا بڵاوبووەتەوە و بەشێك لە هاووڵاتیانی خۆشەویست تووشی بوون، بەداخەوە كەیسی كۆرۆناش لەناو پێنجوێن تۆماركراوە و چەند كەیسێكی تریشمان هەیە كە لەپشكنینی یەكەمدا وا دەردەكەوێت هەڵگری ڤایرۆسی كۆرۆنابن”.

قائیمقامی پێنجوێن ئاماژەبەوەشدەدات:”چیمان لەتوانادا بێت بۆ ڕێگریكردن لە بڵاوبوونەوەی ڤایرۆسەكە ئەنجامی دەدەین، بەڵام بەهۆی نەمانی متمانەی بەشێك لە خەڵك بە حكومەتی هەرێمی كوردستان و سەختی بارودۆخی ژیانی هاووڵاتیان لەڕوویی ئابورییەوە و سەرقاڵ بوونی بەشێك لەهاووڵاتیان بە كاری كشتوكاڵكردنەوە وەك پێویست ناتوانین ڕێكارەكانی خۆپارێزی جێبەجێ بكەین”.

زانا ڕەحمان ڕەحیم قائیمقامی پێنجوێن داواشی لە هاووڵاتیان قەزاكەی كرد:”تا دەتوانن خۆیان بپارێزن و ڕێنماییە تەندروستییەكان جێبەجێ بكەن و مەترسی ڤایرۆسی كۆرۆنا بەجددی وەربگرن و لەكاتی هەستكردن بەدەركەوتنی نیشانەكانی ڤایرۆسەكە سەردانی نەخۆشخانە بكەن”.

بەردەوام بە لە خوێندنەوە

کوردستان

پۆلیسی هەڵەبجە: لە خورماڵ هاووڵاتییەك بە گوللە برینداركرا


خەڵك – بەشی هەواڵ

وتەبێژی بەڕێوەبەرایەتی پۆلیسی پارێزگای هەڵەبجە ڕایدەگەیەنێت: ئێوارەی ئەمڕۆ هاووڵاتییەك لە خورماڵ بە گوللە برینداركراوە.

ڕائد بەرزان عوسمان محەمەد وتەبێژی بەڕێوەبەرایەتی پۆلیسی پارێزگای هەڵەبجە ڕایگەیاند: كاتژمێر 7ی ئێواری ئەمڕۆ هەینی لە نزیك گوندی تەكیەی سەر بە شارەدێی خورماڵ، تەقە لە هاووڵاتییەك بەناوی (ڕ.ت.ع) تەمەن 38 ساڵ پیشەی كاسب، كرا و دوو گوللە بەر دەست و قاچی كەوتووە و برینداربووە.

ڕائد بەرزان عوسمان محەمەد ئەوەشیخستەڕوو: پەڕاوی لێكۆڵینەوە بۆ ڕووداوەكە لە بنكەی پۆلیسی خورماڵ ڕێكخراوە و بەدواداچوون بۆ ئاشكراكردنی بكەری تاوانەكە دەكەن.

بەردەوام بە لە خوێندنەوە

کوردستان

تەندروستی هەرێم: كۆی گشتی تووشبووان بە ڤایرۆسی كۆرۆنا گەیشتە ٥٧٥ كەس


خەڵك – بەشی هەواڵ

وەزارەتی تەندروستی هەرێم لە ڕاگەیەنراوێكدا ڕایگەیاند: لەماوەی ٢٤ كاتژمێری ڕابردوودا (١١٤٧) پشكنین ئەنجام دراوە لەسەر ئاستی هەرێمی كوردستان (٥٨٥) هەولێر، (٢٦٠) سلێمانی، (٣٠٢) دهۆك. دەرەنجام (٩) تووشبووی نوێ تۆمار كرا.

تەندروستی هەرێم ڕوونیشیكردووەتەوە: كۆی گشتی تووشبووان بە ڤایرۆسی كۆرۆنای نوێ COVID-19 لە هەرێمی كوردستان (٥٧٥) تووشبوو، لەنێویاندا (٥) مردن هەیە و (٤٠٩) نەخۆش چاكبووەتەوە و ئێستا تەنها (١٦١) نەخۆش لەژێر چاودێری پزیشكیدان.

تەندروستی هەرێم ئەوەشیخستووەتەڕوو: كۆی گشتی ئەو پشكنینانەی كە ئەنجامدراوە لە سەرەتای سەرهەڵدانی ڤایرۆسی كۆرۆنا (٧٣٢٦٩) پشكنین بووە.

 

دەقی ڕاگەیەنراوەكە:

ڕاگەیاندراوی وەزارەتی تەندروستی
ژمارە (٩٥)
سەبارەت بە نەخۆشی ڤایرۆسی كۆڕۆنای نوێ COVID-19 لە هەرێمی كوردستان، ڕێكارەكان بەردەوامن بەم شێوەیە:

1. كەرەنتین
تاوەكو ئەوڕۆ (١٢٠٧٥) هاووڵاتی “ئەوانەی كە لە دەرەوەی ووڵات گەڕانەتەوە وە ئەوانەی كە بەركەوتەی نەخۆشە چەسپێنراوەكان” كەڕەنتین كراون، لەئێستادا تەنها (٧٨٤) هاووڵاتی لە (٣٣) شوێنی جیاوازی كەرەنتین ماونەتەوە؛ (١٥٧) لە هەولێر، (٣٦) لە سلێمانی، (٥٩١) لە دهۆك. وە (١١٢٩١) هاووڵاتی لە كەرەنتین دەرچوونە و گەڕانەوەتە ناو خانەوادەكانیان دوای تەواو كردنی ماوەی ١٤ رۆژ وە ئەنجامدانی پشكنینی تاقیگەیی بۆیان وپشتراستكردنەوەی ئەوەی كە هەڵگری ئەو نەخۆشیە نین، لەگەڵ كەڕەنتین كردنی ژمارەیەكی تری هاووڵاتییان لە ٢٤ كاتژمێری ڕابردوودا كە كۆی گشتی (٤٤) هاووڵاتی بوو.

2. پشكنین
لەماوەی ٢٤ كاتژمێری ڕابردوودا؛ (١١٤٧) پشكنین ئەنجام دراوە لەسەر ئاستی هەرێمی كوردستان؛ (٥٨٥) هەولێر، (٢٦٠) سلێمانی، (٣٠٢) دهۆك. دەرەنجام (٩) تووشبووی نوێ تۆمار كرا بەم شێوەیەی خوارەوە:
پارێزگای هەولێر (٢) پۆزەتیڤ: (٢) پیاون تەمەنیان (٥٨)، (٣٥) ساڵ، لە شاری بەغداد گەڕاینەوە، تووشبووەكان دانیشتووی ناحیەی عەنكاوە و ئیمپایەر سیتین لە شاری هەولێر.
پارێزگای سلێمانی (٦) پۆزەتیڤ: (٥) پیاو تەمەنیان (٥١)، (٤٥)، (٤٤)، (٣٩)، (٣٨) ساڵ و ئافرەتێكی تەمەن (٦٣) ساڵ، تەنها یەك لە تووشبووان بەركەوتووی تووشبووانی پێشووە، پێنج تووشبووەكەی تر نیشانەی نەخۆشیان ھەیە و پشكنینیان پۆزەتیڤ دەرچووە، ھەموویان دانیشتووی ناو شاری سلێمانین.
پارێزگای دهۆك (١) پۆزەتیڤ: پیاوێكی تەمەن (٣٦) ساڵ پیشەی پاسەوان لە فڕۆكەخانەی بغداد، دانیشتووی قەزای سێمێل لە پارێزگای دھۆك، تووشبوەكە دوای گەڕانەوەی لە بەغداد پشكنینی تاقیگەیی بۆ كراوە و پۆزەتیڤ دەرچووە.

(كۆی گشتی ئەو پشكنینانەی كە ئەنجام دراوە لە سەرەتای سەرهەڵدانی ڤایرۆسی كۆڕۆنا (٧٣٢٦٩) پشكنین بووە)

3. ئاماری گشتی
كۆی گشتی تووشبووان بە ڤایرۆسی كۆڕۆنای نوێ COVID-19 لە هەرێمی كوردستان (٥٧٥) تووشبوو، لەنێویاندا (٥) مردن هەیە و (٤٠٩) نەخۆش چاكبووەتەوە، وە ئێستا تەنها (١٦١) نەخۆش لەژێر چاودێری پزیشكی دان.

وێڕای دەستخۆشی بۆ پزیشكان و كارمەندانی تەندروستی و هەموو تیمەكانی پزیشكی كە لە ئەركدان، جارێكی داوا دەكەین هاووڵاتیان پابەندبن بە ڕێنماییەكانی تەندروستی و دوركەوتنەوە لە شوێنی قەڵەبالغ و دانانی ماسك و دەستكێش، وە لەكاتی پێویستدا پەیوەندی بكەن بە هێڵی گەرمی ژمارە (١٢٢).

وەزارەتی تەندروستی
حكومەتی هەرێمی كوردستان
٢٩ی ئایاری ٢٠٢٠

بەردەوام بە لە خوێندنەوە

کوردستان