ئێمە لە تۆرە کۆمەڵایەتیەکان

عێراق

ڕەتیدەكاتەوە هیزی چەكدارییان هەبێت
عەسائیب بۆ (خەڵك): ئەوانەی داوای هەڵوەشاندنەوەمان دەكەن شكستخواردوون

خەڵك-ئیدریس جەبار
عەسائیبی ئەهلی حەق كە لەلایەن قەیس خەزعەلییەوە سەرۆكایەتی دەكرێت پێیوایە، ئەوانەی داوای هەڵوەشاندنەوەیان دەكەن، شكستخواردوون و لەئاستی بەرگریكردن لە وڵاتدا نیین، ڕەتیشدەكاتەوە هێزی چەكدارییان لە دەرەوەی دامەزراوەی سەربازی عیراقیدا مابێت.

محەمەد بەلداوی، پەرلەمانتاری فراكسیۆنی سادیقوی سەر بە عەسائیبی ئەهلی حەق لە پەرلەمانی عیراق، لە لێدوانێكی تایبەت بە (خەڵك) ڕایگەیاند:”عەسائیبی ئەهلی حەق و فراكسیۆنی سادیقون، لەئێستادا بەشێكن لە پرۆسەی سیاسی، عەسائیب هێزە چەكدارەكەی لەنێو حەشدی شەعبیدایە كە بەشێكە لە دامەزراوەی سەربازی عیراقی، سەركردە سەربازییەكانیش یان چوونەتە ڕیزی مەكتەبی سیاسی، یان لەنێو حەشدی شەعبیدا دەستبەكارن، ئەوان لەئێستادا وەك لایەنێكی سیاسی تۆماركراو كاردەكەن و خاوەنی كورسی 15 پەرلەمانیین”.

سەبارەت بە داواكارییەكانیش بۆ هەڵوەشاندنەوەی عەسائیبی ئەهلی حەق، بە وتەی بەلداوی:”پەیوەندی بە دوو لایەنەوە هەیە، لایەنی یەكەم لەلایەن ئەوانەوە بانگەشەی بۆ دەكرێت كە شار و ناوچەكانیان لەكاتی خۆیدا ڕادەستی داعش كردووە و هەڵاتوون، یان لەلایەن ئەوانەوەیە كە وڵاتییان جێهێشتووە، یان لەو دەمەی ئێمە لە دژی تیرۆریستانی داعش شەڕمان دەكرد و سەركەوتنمان بەدەست دەهێنا، ئەوان لە ڕیزەكانی داعشدا بوون، بۆیە بانگەشە و داواكارییەكانیان هیچ بەهاەیەكی نییە، ئەوان لەئێستادا وەك عەسائیب، باڵی سەریازییان نەماوە، بەڵكو بزوتنەوەیەكی سیاسیین و لەوانە زۆر كاریگەرترن كە ئەو جۆرە قسانە دەكەن”.

محەمەد بەلداوی دەڵێت:”ئەوانەی داوای هەڵوەشاندنەوەی عەسایب و نوجەبا دەكەن، گەر شەرم و شكۆیان هەبوایە و ڕێزییان لە وڵاتی خۆیان بگرتایە، نەدەبوو لەمڕۆدا دژ بەو دەنگە شەریفانە بوەستن كە داوای ڕاگرتنی هێرش و پەلامارەكان دەكەن لە دژی دامەزراوەكانی وڵاتەكەیان، گەر لەمڕۆدا داوای بەرپەرچدانەوە نەكرێت، سبەینێ‌ سەركردە سیاسییەكان و فراكسیۆنەكان و نیشتمانپەروەرەكان دەكرێنە ئامانج، ئەوانی داوای هەڵوەشاندنەوەی ئێمە دەكەن، هەموو بەها مرۆیی و نیشتمانییەكانیان لەدەستداوە و ناكرێت بە ئێمە بەراورد بكرێن كە بەوپەڕی لەخۆبوردن و قوربانیدانەوە بەرگری لە خاكی نیشتمان دەكەین”.

پێشتر میسال ئالوسی، سەرۆكی حزبی ئومەی عیراقی، لە لێدوانێكی ڕۆژنامەوانیدا ڕایگەیاندبوو”هەڕەشەكانی عەسائیبی ئەهلی حەق و نوجەبا، بۆ بەئامانجگرتنی هێزەكانی ئەمریكا یان بەرژەوەندییەكانی ئەمریكا لە عیراق، پێویستە بە هەند وەربگرێن، چونكە ئەو میلیشیایانە و ئەوانەی تر، توانایان هەیە ئازارێكی گەورە بە عیراق و میوانەكانی عیراق و هاوپەیمانەكانی بگەیەنن”.

بە وتەی ئالوسی” ئەو گروپانە بایەخ بە بوونی دەوڵەتی عیراقی نادەن، و بڕوایان بە بوونی دەوڵەتی ئیسلامی ئێرانی هەیە و پێیانوایە عیراقیش لە چوارچێوەی سنوری ئەو دەوڵەتەدایە”.

پێشتر هەردوو بزوتنەوەی عەسائیبی ئەهلی حەق و نوجەبا ڕایانگەیاندبوو كە هێزەكانی ئەمریكا و بەرژەوەندییەكانی وڵاتەكە لە عیراقدا دەكەنە ئامانج، ئەمەش دوای ئەوەی بارەگا و جبەخانەكانی سەر بە حەشدی شەعبی لە عیراقدا كرانە ئامانج.

عێراق

وردبینی لە ژمارەی فەرمانبەرانی هەرێمدا دەكرێت

خەڵك – بەشی هەواڵ

ئەنجومەنی‌ نوێنەرانی‌ عیراق بە فەڕمی داوای‌ لە دیوانی‌ چاودێری‌ دارایی عیراق كرد، وردبینی لە ژمارەی فەرمانبەرانی هەرێمی كوردستان دەستپێبكات.

میدیا عیراقییەكان نووسراوێكیان بڵاویانكردووەتەوە تیایدا، حەسەن كەعبی جێگری یەكەمی سەرۆكی ئەنجومەنی‌ نوێنەران داوای لە دیوانی چاودێری دارایی عیراق كردووە، بە زووترین كات وردبینی لە ژمارەی فەرمانبەرانی هەرێمی كوردستان دەستپێبكات.

نووسراوە كە ڕۆژی 16ی‌ ئەیلولی‌ 2019 ئاڕاستەی‌ سەرۆكی‌ دیوانی‌ چاودێری‌ دارایی عیراق كراوە تیایدا ئاماژە بەوەدراوە، بەوپێیەی‌ لە بودجەی گشتی عیراقدا مووچەی فەرمانبەرانی هەرێمی كوردستان خەرج دەكرێت، پێویستە لەلایەن دیوانی چاودێری دارایی عیراقەوە وردبینی‌ ژمارەی‌ فەرمانبەرانی هەرێم بكرێت.

بەردەوام بە لە خوێندنەوە

عێراق

“سێ‌ ملیۆن ئێرانی بەشداریی زیارەتی چلەی ئیمام حسێن دەكەن”

خەڵك- بەشی هەواڵ

نوێنەری ڕابەری باڵای ئێرانی بۆ كاروباری حەج و زیارەت ڕایدەگەیەنێت، لانی كەم سێ‌ ملیۆن ئێرانی خۆی بۆ بەشداریی لە مەراسیمی زیارەتی چلەی ئیمام حسێن لە كەربەلا ئامادەكردووە.

ئاژانسی (فارس)ی ئێرانی لە زاری عەبدولفەتاح نەواب، نوێنەری ڕابەری باڵای ئێرانی بۆ كاروباری حەج و زیارەت بڵاویكردەوە”لە میانی كۆبوونەوەی لیژنەی كلتوری و ڕێنماییەكانی سەر بە لیژنەی چلەی ئیمام حسێن، ڕاوبۆچوونی ڕابەری شۆڕشی ئیسلامی، تەئكید لەسەر پێویستی ڕێزگرتن لە گەلی عیراقی كردووەتەوە، بەو پێیەی خزمەتكاریی ئیمام حسێنن (د.خ)”.

بە وتەی نەواب”گەلی عیراق كە عاشقی پێشكەشكردنی خزمەتە بە زیارەتكارانی ئیمام حسێن درودی خودای لێبێت، بەڵام زۆر هەستیارن، بۆیە لەبەر ئەوەی ئێمە دوژمنان چاویان تێبڕیوین و دەیانەوێت نێوانی ئێران و عیراق تێكبدەن، پێویستە بایەخ بە پێگەی گەلی عیراق بدرێت”.

نوێنەری ڕابەری باڵای ئێرانی بۆ كاروباری حەج و زیارەت دەڵێت”میوانداریكردنی سێ‌ ملیۆن زیارەتكار كارێكی مەزنە، بۆیە پێویستە ڕێز لە مەرجەعەكانی عیراق و بە تایبەت ئایەتوڵڵا سیستانی بگیرێت و ڕەچاوی ڕێنماییەكانی سەماحەتی بكرێت لە بەرنامەی زیارەتی چلەی ئیمام حسێن”.

بەردەوام بە لە خوێندنەوە

عێراق

بەوێنە، 40 تەرمی نەناسراو لە كەربەلا ژێرخاكدەنرێن

خەڵك- بەشی هەواڵ
سەرچاوەیەكی ئەمنی عيراقى،  ئاماژە بە ژێرخاكنانی 40 تەرمی نەناسراو دەكات لە كەربەلا و ڕایدەگەیەنێت، ئەو تەرمانە پێشتر لە فەرمانگەی پزیشكی دادوەریی بەغدا بوون.

ئەمڕۆ سێ‌ شەممە، سەرچاوەیەكی ئەمنی بە ماڵپەڕی (سۆمەریە نیوز)ی ڕاگەیاندووە”40 تەرمی نەناسراو لە گۆڕستانی (وادی السلام) لە كەربەلا ژێرخاكنران”.

بە وتەی سەرچاوەكە”ئەو تەرمانە پێشتر لە فەرمانگەی پزیشكی دادوەریی بەغدا بوون و بەپێی فەرمانی دادوەریی ژێرخانران”.

لە دوای ساڵی 2003 بەهۆی تێكچوونی ڕەوشی ئەمنی و ناكۆكی تایەفەگەریی و هێرش و پەلاماری گروپە توندڕەوەكان، كوشتن و بڕین و بێسەروشوێنكردن لە ناوچە جیاجیاكانی عیراق بەشێوەیەكی بەرچاو ڕوویان لە زیادبوون كرد، لەم ماوەیەی دواییشدا ڕێكخراوی خاچی سوری نێودەوڵەتی، عیراقی بە وڵاتی زۆرترین بێسەروشوێنكراوان لە جیهاندا لەقەڵەمدا.

 

بەردەوام بە لە خوێندنەوە

کوردستان