ئێمە لە تۆرە کۆمەڵایەتیەکان

کوردستان

ئێران هێزێكی زۆر لە سنوورەكانی هەرێم مۆڵ دەدات

خەڵك-بەشی هەواڵ

بەرپرسی كۆمسیۆنی نیزامی حزبی دیموكراتی كوردستانی ئێران ڕایدەگەیەنێت، كۆماری ئیسلامی ئێران بۆ پارێزگاری لە مانەوەی خۆی هێز ڕەوانەی ڕۆژهەڵاتی كوردستان دەكات.

بەپێی زانیارییەكان، ماوەیەكە ئێران هێزێكی زۆری سەربازی ڕەوانەی ناوچە سنوورییەكانی نێوان باشوور و ڕۆژهەڵاتی كوردستان كردووە و مانۆڕی سەربازیشی لە ماكۆ ئەنجامداوە، ئەگەری هێرشكردنیشی بۆسەر ناوچەی كێلەشین لە ئارادایە ئەویش بەهۆی بوونی بنكەی حزبەكانی ڕۆژهەڵات لە ناوچەكە.

كاوە بەهرامی بەرپرسی كۆمسیۆنی نیزامی حزبی دیموكراتی كوردستانی ئێران بە (خەڵك)ی ڕاگەیاند، كۆماری ئیسلامی ئێران هێزەكانی بەتازەیی نەهێناوەتە ئەو ناوچانە، بەڵكو لە مێژە ئەو هێزانەی لەوێ جێگیر كردووە، بەڵام لەم دوو ساڵەی كۆتاییدا هێزێكی زیاتری هێناوە و لەم چەند مانگەی كۆتاییش هێزەكانی زیاتر كردووە.

وتیشی”هێنانی ئەو هێزانە بۆ دوو مەبەستە، یەكەم لەبەرئەوەی دۆخی ئێران لەناوخۆی كوردستان زۆر ناجێگیرە، ئەویش بۆ سەقامگیری خۆی و مانەوەی خۆی هێزێكی هێناوە و بڵاویكردوەتەوە، كێشەیەكی دیكەشی ئەوەیە كە پەیوەندی بە دەرەوەی ئێران و پەیوەندی بە چەكی ئەتۆم و ئەمریكاوە هەیە”.
ئاماژەی بۆ ئەوەش كرد، بەدڵنیاییەوە بوونی پَشمەرگەش لەناچە سنوورییەكان مەترسییەكی گەورەیە، بۆیە بەردەوام هێزەكانی زیاد دەكات بۆ ئەوەی بتوانێت سەقامگیرییەك بۆ خۆی دروست بكات و مەترسییەكانی دەرەوەش بڕەوێنێتەوە.
ئاشكراشیكرد، ئێمە بەردەوام چاودێری دۆخەكە دەكەین، بەڵام بۆمان ڕوون نەبوەتەوە بۆ پەلاماری ئێمەیە یان نا، هەرچەندە پێشتر پەلاماری داوە و بۆردومانی باشووری كوردستانی كردووە و زیانی زۆری داوە.

کوردستان

سبەینێ‌ لە سلێمانی گەڕەكێك بێ‌ كارەبا دەبێت

خەڵك- بەشی هەواڵ
لیژنەی سەرپەرشتیاری پڕۆژەی تۆڕی زیرەكی كارەبا لە سلێمانی ئاگاداری هاووڵاتیانی دانیشتووی گەڕەكی بەختیاری دەكات، كە سبەینێ‌ بەهۆی بەستنی پێوەری زیرەكەوە بێ‌ كارەبا دەبن.

لیژنەی سەرپەرشتیاری پڕۆژەی تۆڕی زیرەكی كارەبا لە سلێمانی لە ڕاگەیەنراوێكدا ئاماژەی بەوەكردووە، ئاگاداری دانیشتوانی گەڕەكی (بەختیاری) نزیك بەڕێوەبەرایەتی گشتی شارەوانیەكان، فیدەری (۱۹) دەكەین، سبەینێ پێنج شە‌ممە (6/8/2020) پێوەری زیرەكی كارەبایان بۆ دەبەسترێت.

دەشڵێت: “سبەینێ لە كاتژمێر (7 ی بەیانی بۆ 12ی نیوەڕۆ) كارەبای نیشتمانی و مۆلیدەیان نابێت، واتە مۆلیدەی ئەهلی سەر ئەو فیدەرە نابێت كار بكەن‌، ئەوەش لە پێناو سەلامەتی گیانی تیمەكانی كارەبا و هاووڵاتیان خۆیان”.

جەختیشی كردۆتەوە، بەستنی پێوەرەكە بێ بەرامبەر و هیچ بڕە پارەیەك لە هاووڵاتی وەرناگیرێت و خەرجییەكەی لەسەر حكومەتە.

ڕوونیشی كردۆتەوە، لە پێناو پاراستنی ئامێرە كارەباییەكان ئێوارە پێش لێدانەوەی كارەبا بۆ یەكەمجار هەموو ئامێرە كارەباییەكانیان بكوژێننەوە و دواتر لەدوای یەك هەڵیان بكەنەوە .

بەردەوام بە لە خوێندنەوە

کوردستان

لە نزیك پردی كۆبانێ‌ ئۆتۆمبێلێك ئاگری گرت

خەڵك- بەشی هەواڵ
هاتووچۆی سلێمانی ڕایدەگەیەنێت، كە لە نزیك پردی كۆبانێ‌ ئۆتۆمبێلێك لە جۆری تایبەت ئاگری گرتووە، بەڵام زیانی گیانی نەبووە.

بەڕێوەبەرایەتی هاتووچۆی سلێمانی لە ڕاگەیەنراوێكدا ئاماژەی بەوەكردووە، ئێوارەی ئەمڕۆ چوار شەممە ئۆتۆمبێلێك لەجۆری شۆفرلێت بلایزەر، لەسەر شەقامی بازنەیی مەلیك مەحمود نزیك پردی كۆبانێ ئاگری گرت و سووتا.

ڕاشیگەیاندووە، زیانی گیان بەدواوە نەبووە، تەنها زەرەری ماددی بەر ئۆتۆمبێلەكە كەوتووە.

بەردەوام بە لە خوێندنەوە

کوردستان

تووشبوانی كۆرۆنا زیادیان كردووە
پارێزگایەكی هەرێم ئاماژە بە سەپاندنەوەی قەدەغەكردنی هاتووچۆ دەكات

خەڵك- بەشی هەواڵ
پارێزگاری دهۆك ڕایدەگەیەنێت، پارێزگاكەیان پەنادەباتەوە بەر قەدەغەكردنی هاتووچۆ، گەر ژمارەی تووشبوانی كۆرۆنا ڕوو لە زیادبوون بكەن.

عەلی تەتەر، پارێزگاری دهۆك لە میانی سەردانێكیدا بۆ هەردوو قەزای ئاكرێ‌ و بەردەڕەش لە كۆنفرانسێكی ڕۆژنامەوانیدا داوای لە هاووڵاتیان كرد “پابەندبن بە ڕێنماییە تەندروستییەكان و بڕیارە حكومییەكان بۆ بەرگرتن لە بڵاوبوونەوەی زیاتری ڤایرۆسی كۆرۆنا”.

عەلی تەتەر، هۆشداریدا لەبارەی”گرتنەبەری سزای توند دژ بەوانەی سەرپێچی ڕێنماییەكان دەكەن”.

پارێزگاری دهۆك دەڵێت: “ئیدارەی پارێزگەكە پەنادەباتەوە بەر قەدەغەكردنی هاتووچۆ بۆ ماوەیەكی دیاریكراو، گەر ژمارەی تووشبوانی ڤایرۆسی كۆرۆنا ڕوو لە زیادبوون بكات”.

تائێستا ژمارەی ئەوانەی لە پارێزگەی دهۆك تووشی ڤایرۆسی كۆرۆنا بوون گەیشتۆتە 801 كەس و لەو نێوەندەشدا 6 كەس گیانیانلەدەستداوە و 376 كەسی تر چاكبوونەتەوە.

كۆی گشتی ژمارەی تووشبوان بە ڤایرۆسی كۆرۆنا لە هەرێمی كوردستان گەیشتۆتە 15173 كەس كە 586 كەسیان گیانیانلەدەستداوە و 9551 كەسی تر نەخۆشییەكەیان پەڕاندووە و چاكبوونەتەوە، 5036 كەسی تر تائێستا لە نەخۆشخانەدان و چارەسەر وەردەگرن.

بەردەوام بە لە خوێندنەوە

کوردستان