ئێمە لە تۆرە کۆمەڵایەتیەکان

کوردستان

“كار بۆ پەراوێزخستن و بێنرخكردنی زمانی كوردیی دەكرێت”

خەڵك-بەشی هەواڵ

زیاتر لە 200 پسپۆڕ و ڕۆژنامەنوس و ڕۆشنبیر ئاشكرایدەكەن، پێویستە زمانی كوردی گرنگی پێ بدرێت و چیتر شەرم لە زمانی دایك نەكرێت وەك پێوەرێكی سەرەكی لە ناوەندەكانی خوێندندا.

ئەو كەسانە كە لە ڕاگەیەندراوێكدا كە خۆیان بە دڵسۆزانی زمانی كوردیی ناساندووە ئاماژە بۆ ئەوە دەكەن، لەكاتێكدا بە ئاشكرا دەبینین و هەستدەكەین، لێرەولەوێ، بە شێوازی جۆراوجۆر، بە بەرنامە كار بۆ پەراوێزخستن و بێنرخكردنی زمانی كوردیی دەكرێت، ئێمە بە ئەركی سەر شانی خۆمانی دەزانین بە توندی ڕووبەڕووی ئەو هەوڵانە ببینەوە و گێڕانەوەی رێز و شكۆ بۆ زمانەكەمان بكەینە شائامانجی ئەم قۆناغەمان.

دەقی نامەیەكی كراوە بۆ ڕایگشتیی
سەبارەت بە مەرجدانانی (زمانی كوردیی) بۆ وەرگرتن لە خوێندنی باڵا

دوای ئەوەی لە ماوەی ڕابردوودا، نوسەر و ئەكادیمیی (پ.ی.د.هێمن مەجید) لە ڕێگەی سۆشیاڵ میدیاوە پێشنیاریكرد: “پێویستە (زمانی كوردیی) بە پلەی (زۆر باش) بكرێتە مەرجی سەرەكی وەرگرتنی خوازیارانی (خوێندنی باڵا)، لە كۆی كۆلێژ و بەشەكاندا، بە بێ جیاوازیی!”، ئێمەش وەك كۆمەڵێ دڵسۆزی (زمانی كوردیی) لە: (ئەكادیمیی، نوسەر، ڕۆژنامەنوس، ڕۆشنبیر و چالاكی مەدەنیی) لە ناوەوە و دەرەوەی هەرێمی كوردستان بوینە هاوڕا و پاڵپشتی پێشنیارەكەی بەڕێزیان و بۆ ماوەی چەند ڕۆژێك لە سۆشیاڵ میدیا هەڵمەتێكمان لەوبارەیەوە وەڕێخست.
ئێستاش، پێمان باشە لە هەنگاوێكی دیكەدا، كەمێك بابەتەكە وردتر بكەینەوە و لەم نامە كراوەیەدا، هۆكار و ئامانجی پڕۆژەكە و هەنگاوەكانی ئایندە ڕوونبكەینەوە.

بەر لە هەر شت، دەبێ خۆمان لەو ڕاستییە نەبوێرین، كە (زمان) یەكێكە لە ناسنامە سەرەكییەكانی هەر نەتەوەیەك و پایەیەكی گرنگی دروستكردن و لەسەرپێوەستانی دەوڵەتە. كەواتە گرنگیدان بەو رەگەزە جێبایەخە و پاراستن و گەشەپێدانی لە هەر كۆمەڵێكدا، وێڕای نیشانەی هۆشیاریی گشتیی، بەجێهێنانی ئەركێكی نەتەوەیی، نیشتمانیی، ئاكاریی و ئەكادیمییە.

لەو سۆنگەیەشەوە و لەكاتێكدا بە ئاشكرا دەبینین و هەستدەكەین، لێرەولەوێ، بە شێوازی جۆراوجۆر، بە بەرنامە كار بۆ پەراوێزخستن و بێنرخكردنی (زمانی كوردیی) دەكرێت، ئێمە بە ئەركی سەر شانی خۆمان دەزانین بە توندی روبەڕوی ئەو هەوڵانە ببینەوە و، گێڕانەوەی رێز و شكۆ بۆ زمانەكەمان بكەینە شائامانجی ئەم قۆناغەمان.

لەم ئاستانەشدا، دەزانین كارەكەمان هەنگاوی جیاواز و فرەلایەنی گەرەكە، چونكە مەترسیی لاوازكردن و بێبەهاكردنی زمانەكەمان زۆر و هەمەجۆرن، بەڵام ئێمە لەم قۆناغەدا تەنها لەم چمكەی خوێندنی باڵاوە دەست پێدەكەین، بەو ئومێدەی ئەمە ببێتە دەستپێكێكی سەركەوتوو لەپێناو پاراستن و گەشەپێدانی.

بە دیاریكراوی، مەبەستمانە لە ناوەندەكانی خوێندنی باڵاماندا، (زمانی دایك) بكرێتە چەقی بایەخپێدانەكان و چیتر نەكرێتە قوربانیی نەزانی و خۆبەكەمزانین و پاساوی لاواز و ئامانجی ترسناك!

وەكچۆن، كاتێك جەخت لەسەر ئەو خاڵە گرنگە دەكەینەوە، بایەخدان بە زانینی زمانی تر بۆ ئەكادیمییان ڕەتناكەینەوە و بە پێویستی دەزانین و نكۆڵی لە گرنگییەكەیشی ناكەین، بەڵام بە كارێكی نازانستی دەزانین كەوا ئەو گرنگیدانە لەسەر حسابی (زمانی كوردیی) بێت.

بۆیە، پێشمانوانیە جێبەجێكردنی وەها كارێك لە ڕووی كردەییەوە سەخت بێت، دور ناڕۆین بۆ وڵاتانی ئەمەریكا و ئەوروپا، هەر بە ڕوانینێك لە ئەزمونی وڵاتانی دەوروبەر بۆمان دەردەكەوێت، كە چەندە لە خەم و هەوڵی پاراستن و گەشەپێدانی زمانەكەیاندان.
ئەوەتا (ئێران) تاقیكردنەوەیەكی نێودەوڵەتی تایبەت بە لێهاتوییەكانی (زمانی فارسی) داناوە، (توركیا) بە هەمانشێوە بۆ (زمانی توركی). بە پێی زانیارییەكان لە (عیراق) هەوڵێكی لەوجۆرە هەیە سەبارەت بە (زمانی عەرەبی). هەروەك، ساڵی ڕابردوو، وەزارەتی خوێندنی باڵا و توێژینەوەی زانستیی عیراق بڕیارێكی لەوبارەیەوە دەركرد و چەند لایەنێكی ڕاسپارد بۆ ئامادەكردنی تاقیكردنەوەیەكی لەوشێوەیە و دواتر بەمەرجدانانی بۆ وەرگرتن لە خوێندنی باڵا (ماستەر، دكتۆرا).

كەواتە، ئێمەی كوردزمان، تاكەی شەرم لە بەكارهێنان، بایەخدان، پاراستن و گەشەپێدانی (زمانی دایك)ـمان بكەین؟!
تاكەی (زمانی كوردیی) نەكەینە زمانی ڕەسمیی پەروەردە، خوێندنی باڵا، ڕاگەیاندن، سیاسەت، ئابوریی و بازاڕ و … تاد؟!
ئاخر نەنگی و كارەساتێكی گەورەیە كورد بیت و مامۆستای زانكۆ بیت (زمانی دایك)ـت باش نەبێت! یان نەتوانیت پێنج خولەك بە كوردییەكی ڕەوان بدوێیت، یاخود پێنج دێڕ بە دروستیی بنوسیت!

بێگومان، ئەمە هەوڵێك دەبێت بۆ ئەوەی لانیكەم بزانرێت ئاستی ئەو ئەكادیمییە لە چوار لێهاتوییەكەی زمان (گوێگرتن، قسەكردن، خوێندنەوە، نوسین)ـی كوردی چۆنە، بەڵام ئەمەش هەروا سانا نییە، هەوڵی لێیڕاوانەی هەمو كوردێكی دڵسۆزی دەوێت. ئیدی ئەمە پرۆژەی هەموانە، چون لە بەرژەوەندیی گشتییدایە.

دەكرێ، ئەمە سەرەتای زۆر پڕۆژەی گەورە بێ لە هەمو كایە جیاوازەكان لەپێناو (زمانی كوردیی)ـدا.

دەكرێ بۆ ئایندە بكرێتە پڕۆژە یاسایەكی دروست و پێشكەشی پەڕلەمانی كوردستان بكرێت بۆ گفتوگۆ و دەوڵەمەندكردن و دواتر پەسەندكردنی. یان ببێتە هەوێنی بڕیارگەلی پێویست لەلایەن وەزارەتی خوێندنی باڵا و توێژینەوەی زانستیی هەرێمەوە.

هەرچۆنێك بێ، دڵنیاین، خەمێكی گشتییە و بەهەندوەرگرتنیشی سودی گشتیی و نەتەوەیی و نیشتمانیی لێدەكەوێتەوە.

دڵسۆزانی زمانی كوردیی
ئابی ٢٠١٩

کوردستان

فرسەت سۆفی ڕوونکردنەوە لەسەر ٥٠ هەزار دیناری پشکنینی بازگەکان دەدات

خەڵک – بەشی هەواڵ

 

نوسینگەى پارێزگاری هەولێر ڕایگەیاند، لەلایەن هەندێک کەس و میدیا، لێکدانەوەی هەڵەی بەمەست و بێمەبەست بۆ قسەکانی پارێزگاری هەولێر کراوە کە ئەمڕۆ لە کۆنگرەیەکی ڕۆژنامەوانی لەسەر هاتنە ژوورەوەی خەڵکی پارێزگاکانی دیکەی عێراق بۆ پارێزگای هەولێر کردنی.

نوسینگەی پارێزگاری هەولێر لەڕاگەیەندراوێکدا ڕایگەیاند، پارێزگاری هەولێر زۆر بەڕوونی ڕایگەیاند: “لەپێناو کارئاسانی هاتنە ژوورەوەی هاوڵاتییانی شارەکانی دیکەی عێراق جگە لە پارێزگاکانی هەرێمی کوردستان، ژووری ئۆپەراسیۆنی پارێزگای هەولێر بەهەماهەنگی لەگەڵ بەڕێوەبەرایەتی گشتی تەندروستی هەولێر، سەرقاڵی داڕشتنی میکانزمێکن بۆ ئەوەی ئەو خەڵکانە بتوانن بێنە ناو شاری هەولێر بەمەرجی ئەنجامدانی پشکنینی پزیشکی لەسەر ئەرکی خۆیان و بە نرخێکی گونجاو، ئەمەش هەم بۆ کارئاسانی هاوڵاتییان و هەمیش بۆ پەرەپێدانی جموجۆڵی بازرگانی و ڕانەوەستانی کاروکاسبی خەڵک”.

 

ئەوەش خراوەتەڕوو، بۆیە هەرچی دیکەی دەگوترێ بێجگە لەوەی کە باسکراوە دوورە لەڕاستی و مەبەست لێی تەنها بڵاوکردنەوەی چەواشەکاری و بەلاڕێدابردنی ڕاستییەکانە.

 

ڕوونکردنەوەیەک لە نووسینگەی پارێزگاری هەولێر

 

لەلایەن هەندێک کەس و میدیا، لێکدانەوەی هەڵەی بەمەست و بێمەبەست بۆ قسەکانی پارێزگاری هەولێر کراوە کە ئەمڕۆ لە کۆنگرەیەکی ڕۆژنامەوانی لەسەر هاتنە ژوورەوەی خەڵکی پارێزگاکانی دیکەی عێراق بۆ پارێزگای هەولێر کردنی.
پارێزگاری هەولێر زۆر بەڕوونی ڕایگەیاند: “لەپێناو کارئاسانی هاتنە ژوورەوەی هاوڵاتییانی شارەکانی دیکەی عێراق جگە لە پارێزگاکانی هەرێمی کوردستان، ژووری ئۆپەراسیۆنی پارێزگای هەولێر بەهەماهەنگی لەگەڵ بەڕێوەبەرایەتی گشتی تەندروستی هەولێر، سەرقاڵی داڕشتنی میکانزمێکن بۆ ئەوەی ئەو خەڵکانە بتوانن بێنە ناو شاری هەولێر بەمەرجی ئەنجامدانی پشکنینی پزیشکی لەسەر ئەرکی خۆیان و بە نرخێکی گونجاو، ئەمەش هەم بۆ کارئاسانی هاوڵاتییان و هەمیش بۆ پەرەپێدانی جموجۆڵی بازرگانی و ڕانەوەستانی کاروکاسبی خەڵک”، بۆیە هەرچی دیکەی دەگوترێ بێجە لەوەی کە باسکراوە دوورە لەڕاستی و مەبەست لێی تەنها بڵاوکردنەوەی چەواشەکاری و بەلاڕێدابردنی ڕاستییەکانە.

نوسینگەی پارێزگاری هەولێر
2020.7.13

بەردەوام بە لە خوێندنەوە

کوردستان

یەکێتی: ئیدارەی گەرمیان هەر پێداویستییەکی پزیشکی پێویستبێت بۆیان دابیندەکەین

خەڵک – بەشی هەواڵ

یەکێتیی نیشتیمانیی کوردستان لەگەرمیانەوە ڕایگەیاند، ئیدارەی گەرمیان هەر پێداویستییەکی پزیشکی پێویستبێت بۆیان دابیندەکەن.

میران محه‌مه‌د ئه‌ندامی مه‌كته‌بی سیاسی یه‌كێتیی نیشتمانیی كوردستان له‌ كۆنفرانسێكی ڕۆژنامه‌وانیدا لەگەرمیان ڕایگەیاند، ئیدارەى گەرمیان داوای هەر پێداویستییەکی پزیشکی و دەرمان و چارەسێک بکات، ئه‌گه‌ر له‌ ده‌ره‌وه‌ی وڵاتیش بێت وەک یەکێتیی نیشتیمانیی کوردستان بۆیان بەردەستدەخەن.

 

لاهور شێخ جەنگی و شاندێکی هاوبەشی، بەمەبەستى لەنزیکەوە ئاگابوون لەگرفتەکانی قەزاى کەلار و بەگشتی ئیدارەى گەرمیان چووە ئەوێ و مەبەستییەتى چارەسەری بەشێک لەگرفتەکانیان بۆ بکات.

 

ئەمە لەکاتێکدایە ماوەى چەند ڕۆژێکە چالاکوانان و خەمخۆرانی ئەو ناوچەیە هەڵمەتێکی کۆکردنەوەی کۆمەک و هاوکاریی تەندروستییان ڕاگەیاندووە، چونکە پێداویستى پزیشکی لەو قەزایە کەمە و گرفتى تەندروستی بۆ دروستکردوون.

بەردەوام بە لە خوێندنەوە

کوردستان

سبەینێ پشووی فەرمییە

خەڵک – بەشی هەواڵ

 

حکومەتى هەرێمی کوردستان لەڕاگەیەندراوێکدا ڕایگەیاند، سبەینێ ١٤ی تەمووز پشووی فەرمییە لەسەرجەم دامودەزگاکانى حکومەتى هەرێم.

 

لەو ڕاگەیەندراوەى حکومەتى هەرێمدا ئەوە هاتووە، ئەم پشووەی سبەینێ ١٤ی تەمووز تاقیکرنەوە نیشتیمانییەکان ناگرێتەوە، بۆیە بەپێی خشتەى تاقیکردنەوەکان سبەینێ سێ شەممە تاقیکردنەوەکان وەک خۆیان بەردەوامدەبن.

 

بەردەوام بە لە خوێندنەوە

کوردستان