ئێمە لە تۆرە کۆمەڵایەتیەکان

جیهانی

یونایتد و ئینته‌رمیلان له‌سه‌ر گواستنه‌وه‌ی “نینۆ ماراڤیا” ڕێکه‌وتوون و ژماره‌ (٧)ی بۆ ته‌رخان کراوه‌!

خه‌ڵک سپۆرت

سه‌رچاوه‌ ئه‌وروپیه‌کان به‌ به‌ڵگه‌ی لێدوانه‌کانی ئۆلی گۆنار سۆڵشایه‌ر دووپاتی ده‌که‌نه‌وه‌، گواستنه‌وه‌ی ئه‌لێکسیز سانچێز له‌ یانه‌ی مانچسته‌ر یونایتده‌وه‌ بۆ ئینته‌رمیلان کۆتایی هاتووه‌.

تۆڕی “سکای سپۆرت” له‌زاری سه‌رچاوه‌ ناوخۆییه‌کانی یانه‌ی ئینته‌رمیلانه‌وه‌ ئاشکرای کردووه‌، له‌چه‌ند ڕۆژی ڕابردوودا نوێنه‌رانی یانه‌ی مانچسته‌ر یونایتد و ئینته‌رمیلان له‌سه‌ر گواستنه‌وه‌ی ئه‌لێکسیز سانچێز گه‌یشتونه‌ته‌ ڕێکه‌وتن و به‌پێی ڕێکه‌وتنی نێوانیان یاریزانه‌که‌ بۆ ماوه‌ی وه‌رزێک به‌شێوه‌ی خواستن درێسی نێراتزۆری ده‌پۆشێت، له‌دوای ئه‌و واده‌یه‌ش یانه‌ شین و ڕه‌شه‌که‌ی ئیتاڵیا مافی ئه‌وه‌ی پێده‌درێت گواستنه‌وه‌که‌ بکات به‌ هه‌میشه‌یی.

له‌به‌رامبه‌ردا سانچێز داوای درێسی ژماره‌ (٧)ی له‌ نوێنه‌رانی نێراتزۆری کردووه‌ و ڕاسته‌وخۆ نوێنه‌رانی یانه‌ ئیتاڵیه‌که‌ ڕه‌زامه‌ندیان نیشانداوه‌ و به‌ڵینیان پێداوه‌ چه‌ندین ئیمتیازاتی تری پێببه‌خشن.

له‌م باره‌یه‌وه‌ ئۆلی گۆنار سۆڵشایه‌ری ڕاهێنه‌ری یونایتد ڕایگه‌یاندووه‌ :” واده‌ی گواستنه‌وه‌کان ماوه‌ی دوو هه‌فته‌ی ماوه‌، ئه‌گه‌رێک بۆ گواستنه‌وه‌ی سانچێز هه‌یه‌، هه‌ندێک یانه‌ گرنگیان پێداوه‌،. با بزانین له‌ داهاتوودا  چی رووده‌دات، له‌وه‌ زیاتر ناتوانم هیچ زانیاریه‌کی ترتان پێبده‌م”.

“سکای سپۆرت” جه‌خت له‌وه‌ ده‌کاته‌وه‌، که‌ له‌ ڕێکه‌وتنی نێوان دوو یانه‌ی کڕیار و فرۆشیار بڕیاردراوه‌ سێشه‌ممه‌ی داهاتوو سانچێز له‌ میلانۆ پشکنینی پزیشکی ئه‌نجام بدات و بۆنده‌که‌شی تا دووی مانگی داهاتوو به‌فه‌رمی یه‌کلایی بکرێته‌وه‌.

جیهانی

بایرن میونشن پێکانی کۆڵەکەی یانەکەی بۆ ماوەی چوار هەفتە ڕاگەیاند

خەڵک سپۆرت

یانەی بایرن میونشنی ئەڵمانی لەڕووبەڕوبونەوەکانی چوار هەفتەی داهاتوودا لەتواناکانی ڕۆبەرت لیڤاندۆڤیسکی هێرشبەری پۆڵەندی بێبەش دەبێت.

بایرنی ئەڵمانی لەیاریی چوونی قۆناغی ١٦ی خولی یانە پاڵەوانەکانی ئەوروپا بە ئەنجامی سێ گۆڵی بێوەڵام بەرامبەر یانەی چێڵسی ئینگلیزی بردنەوەی بەدەستهێنا، بەهۆی ئەم ئەنجامەشەوە ئەگەرەکانی سەرکەوتنیان بۆ قۆناغی چارەکی کۆتایی بەهێزە، بەڵام ئەوەی هاندەرانی خەمبارکردووە پێکانی ڕۆبەرت لیڤاندۆڤیسکی پۆڵەندییە.

ماڵپەڕی یانە باڤارییەکە لەبارەی پێکانی “لیڤاگۆڵ”ەوە ڕاگەیاندراوێکی بڵاوکردۆتەوە، تیایدا بەفەرمی پێکانی هێرشبەرەکە پشتڕاست دەکەنەوە و وادەی چارەسەر و حەوانەوەی یاریزانەکەشیان بۆ ماوەی مانگێک (چوار هەفتە) خەمڵاندووە، کە بڕیارە لە ١٠ ڕۆژی داهاتوودا دوای حەوانەوە مەشقە جەستەییەکان دەستپێبکاتەوە.

لەو ماوەیەدا هێرشبەرە ناودارەکەی بایرن چەندین ڕووبەڕوبونەوەی خولی ناوخۆی ئەڵمانیا لەدەست دەدات و ئەگەرێکی بەهێزە لە یاریی گەڕانەوەی قۆناغی ١٦ی چامپیۆنزلیگ نەتوانێت بەشداری بکات.

لیڤاندۆڤیسکی لەم وەرزەدا ئاستێکی ناوازەی پێشکەشکردووە و هاوشانی ئێرلینگ هالاندی نەرویجی هێرشبەری یانەی بوروسیا دۆرتمۆند بە تۆمارکردنی ١٠ گۆڵەوە گۆڵکاری خولی یانە پاڵەوانەکانە، هەروەها بە تۆمارکردنی ٢٥ گۆڵ لوتکەی ڕیزبەندی گۆڵکارانی خولی ئەڵمانیای گرتووە.

بەردەوام بە لە خوێندنەوە

جیهانی

کۆرۆنا لە بەرشلۆنە تۆمارکرا و یورۆی ٢٠٢٠ مەترسی دواخستنی لەسەرە

خەڵک سپۆرت

یەکەم حاڵەتی توشبوون بە ڤایرۆسی کۆرۆنا لە هەرێمی کەتەلۆنیای ئیسپانیا تۆمارکراوە و بەهۆی بارودۆخی ئیتاڵیاوە بەرپرسێک ئاماژە بە دواخستنی یورۆی ٢٠٢٠ دەکات.

سێ شەممەی ڕابردوو دەزگا تەندروستییەکانی هەرێمی کەتەلۆنیا ئاشکرایان کرد، کە لەگەڵ دەرکەوتنی چوار حاڵەتی توشبوون بە ڤایرۆسی کۆرۆنا لە ئیسپانیا، حاڵەتێکی نوێ لە شاری بەرشلۆنە تۆمارکراوە و کۆی گشتی توشبووان لە وڵاتی ماتادۆرەکان بۆ پێنج حاڵەت بەرزبووەتەوە.

ڕۆژنامەی “موندۆ دیپۆرتیڤۆ”ی لەم بارەیەوە ئاماژەی کردووە، کە لەحاڵی تەشەنەکردنی ڤایرۆسەکەدا ئەگەر زۆرە ڕووبەڕوبونەوەی یانەکانی ئەو هەرێمە “کەتەلۆنیا” بەبێ هاندەر بۆ ماوەیەک ئەنجام بدرێت کە ئەوەش کاریگەری دارایی و وەرزشیی لەسەر یانەکانی بەرشلۆنە و ئیسپانیۆل بەتایبەتی دەبێت.

لەلایەکی ترەوە، یوڤا میکێلی جێگری سەرۆکی یەکێتی تۆپی پێی ئەوروپا ئاشکرای کردووە، حاڵی حازر یەکێتیەکە چاودێری بارودۆخی وڵاتی ئیتاڵیا دەکەن کە ڤایرۆسی کۆرۆنا تیایدا تەشەنەی کردووە.

ئیتاڵیا یەکێکە لەو (١٢) وڵاتەی ڕووبەڕوبونەوەکانی یورۆی ٢٠٢٠یان تێدا ئەنجام دەدرێت و بێگومان هەر کێشەیەکی تەندرستی لەو وڵاتە کاریگەری لەسەر کۆی پاڵەوانێتیەکە دروست دەکات.

یوڤا میکێلی دەڵێت :” ئێمە لەقۆناغی چاوەڕوانیداین، چاودێری دۆخی هەموو وڵاتانی کیشوەرەکە دەکەین، پێویستە تۆپی پێ بەپێی بارودۆخ و شێوازی بەڕێوەچوونی ئەو وڵاتانە بەڕێبکات، ئەگەر بارودۆخەکە بەرەو خراپبوون بڕوات بێگومان ئێمەش ڕێڕەوی وەرزشیی کیشوەرەکە و پاڵەوانێتیەکان دەوەستێنین”.

بەردەوام بە لە خوێندنەوە

جیهانی

چاودێری وردی ڕێگا نایاساییەكانی گەڕانەوە بۆ هەرێمی كوردستان دەكرێت

خەڵك – بەشی هەواڵ

ئەمڕۆ لە دیوانی پارێزگای سلێمانی، بەسەرۆكایەتی د.هەڤاڵ ئەبوبەكر پارێزگاری سلێمانی، كۆبوونەوەی ژووری ئۆپراسیۆنی پارێزگا، بەئامادەبوونی بەڕێوەبەری گشتی فەرمانگە پەیوەندیدارەكان پەیوەست بە ڕێگریكردن و خۆپارێزیی لە بڵاوبوونەوەی ڤایرۆسی كۆرۆنا، بەڕێوەچوو.

لە كۆبوونەوەكەدا جەخت كرایەوە لەسەر هەموو بڕیارو ڕاسپاردەكانی كۆبوونەوەی ڕۆژی 25-2-2020ی ئەنجومەنی وەزیران و بڕیارو ڕێنمایی ‌و بەیانەكانی وەزارەتەكانی ناوخۆ و تەندروستی لە كۆبوونەوەی ڕۆژی 22-2-2020ی وەزارەتی ناوخۆ و ڕاسپاردەكانی كۆبوونەوەی ڕۆژی 23-2-2020ی پارێزگای سلێمانی بە سەرپەرشتیی جێگری سەرۆكی ئەنجومەنی وەزیران‌و كۆبوونەوەی ڕۆژی 24-2-2020ی فەرمانگە پەیوەندیدیدارەكانی پارێزگای سلێمانی بە سەرپەرشتیی پارێزگاری سلێمانی.

هاوكات، میكانیزمی پێویست بۆ جێبەجێكردنی بڕیارو بەیان ‌و ڕێنمایی ‌و ڕاسپاردەكان دیاریكران، هەڵسەنگاندنی تەواو بۆ ئەو ژمارە و خزمەتگوزاریی ‌و شوێن و چاودێری تەندروستی‌ و پاراستنی ئەو هاووڵاتیانەی لەچین و كۆماری ئیسلامیی ئێران و شارەكانی نەجەف و كەركوكەوە گەڕاونەتەوە، كران.

ڕێوشوێنی پێویست بۆ سەرپەرشتیكردن و چاودێریكردنی وردی دەروازە نێودەوڵەتی ‌و مەرز و بازگەكان بۆ بەردەوامبوونی ئاڵوگۆڕی بازرگانیی دیاریكران.

كراوەتەوە لەسەر داخستن‌ و چاودێریكردنی وردی ڕێگا نایاساییەكانی گەڕانەوە بۆ هەرێمی كوردستان، هەر هاووڵاتیەك لەو شوێنانەوە گەڕابێتنەوە بۆ هەرێمی كوردستان كە لەپێشەوە باسكران لەدوای 20-2-2020ەوە، بە هەر ڕێگاو ئامرازێك، پێویستە خۆیان بەدەزگا تەندروستیەكان بناسێنن، بەپێچەوانەوە ڕێكاری یاساییان لەبەرامبەردا دەگیرێتەبەر.

هەروەها هاتووچۆی پەناهەندە و ئاوارەكان بۆ شارەكانی تر قەدەغەیە و هەر كەسێك شوێنەكەی خۆی لە سنووری پارێزگای سلێمانی لەم ماوەیەدا بەجێ‌ بهێڵێت، ڕێی پێ نادرێت بگەڕێتەوە پارێزگای سلێمانی تا كاتێكی نادیار.

دوای بڕیاری سەرۆكی ئەنجومەنی وەزیران ‌و وەزارەتی دارایی، خەرجیی پێویست بۆ گشت پێداویستیە لۆجیستیی‌ و خزمەتگوزارییەكانی فەرمانگە پەیوەندیدارەكان لەڕێی پارێزگای سلێمانیەوە تەرخان كران و بەڕێوەبەری گشتی تەندروستی سلێمانی راسپێردرا بەپێی ئەو بودجەیەی تایبەتە بە كەلوپەلی تەندروستی ‌و هەڵمەتی هۆشیاری ‌و ڕاهێنان لە وەزارەتەكانی تەندروستی و داراییەوە تەرخان كراوە، كاری پێویست بكات بۆ دابینكردنی پێداویستیە تەندروستیەكان.

هەروەها قائیمقامیەتی قەزای مەڵبەندی سلێمانی و یەكە كارگێڕییەكانی سنوری پارێزگای سلێمانی و لیژنەكانی قائیمقامیەت راسپێردران، كە بەوردی و لێپرسینەوەی تەواوەوە ڕێ لە هەر قۆرخكاریی ‌و نرخ بەرزكردنەوە و كەلوپەل شاردنەوەیەك بگرن ‌و هەركەس سەرپێچی بكات بەتوندترین شێوە سزای یاسایی دەدرێت.

پرۆسەی پشكنینی زانستی تاقیگەیی لەلایەن بەڕێوەبەرایەتی گشتی تەندروستی سلێمانیەوە دەستی پێكراوە و لە ڕۆژانێكی نزیكدا دەتوانرێت پشكنینی تەواو بۆ هەر گومانلێكراوێك بكرێت، هەموو فەرمانگە پەیوەندیدارەكان لەڕێی لیژنەكانی قائیمقامیەتی سلێمانی و یەكە كارگێڕییەكانی ترەوە ڕاسپێردران بۆ ڕێگریكردن لەهەر كۆبوونەوە و چالاكی‌ و بۆنەو یادێكی گشتی، كە كۆبوونەوە و بەریەككەوتنی كۆمەڵایەتی تێدا ڕووبدات.

سەردانیكردنی نەخۆش‌ و ڕاگیراو و بەندكراوەكان تا كاتێكی نادیار قەدەغەیە.

قەدەغەكردنی نێرگەلەكێشان لەكافتریاو شوێنە گشتیەكاندا، داخستنی مەلەوانگەكان، ڕاگرتنی لایڤ میوزیك، هەر شوێنێكی تریش، كە فەرمانگە پەیوەندیدارەكان‌و لیژنەكانی قائیمقامیەت بەپێویستی بزانن دەگرێتەوە تا كاتێكی نادیار.

هاتنی گروپی گەشتیاریی و هاتنی گەشتیار لە كۆماری ئیسلامیی ئێران ‌و شارەكانی نەجەف و كەركوكەوە، تا كاتێكی نادیار قەدەغە دەكرێت، پێویستە هەموو دامەزراوە گەشتیارییەكان پابەندی تەواوی ئەم بڕیارە بن.

پێویستە هەموو كەسێك بەوردی ڕێنماییە فەرمییەكانی وەزارەتی تەندروستی ‌و بەڕێوەبەرایەتی گشتی تەندروستی سلێمانی پەیوەست بە خۆیان‌ و ماڵ ‌و شوێنی كاركردن ‌و شوێنە گشتیەكان پەیڕەو بكەن بۆ خۆپارێزی باشتر.

تەنها سەرچاوەی ڕاگەیاندنی زانیاری ‌و ئامارەكانی پەیوەست بەم پەتایە، وەزارەتی تەندروستی حكومەتی هەرێمی كوردستانەو هەر زانیاری‌ و واتەواتێكی نافەرمیی ڕووبەڕووی لێپرسینەوەی یاسایی دەكرێتەوە.

بەردەوام بە لە خوێندنەوە

کوردستان