ئێمە لە تۆرە کۆمەڵایەتیەکان

ئابوری

یاسین مەحمود: شەقامی 100 مەتری سلێمانی وەبەرهێنان دەخاتە قۆناغێكی نوێوە

خەڵك-بەشی هەواڵ

وتەبێژی یەكێتی وەبەرهێنەرانی كوردستان ڕایدەگەیەنێت، دروستكردنی شەقامی 100 مەتری شاری سلێمانی بواری وەبەرھێنان دەخاتە قۆناغێكی نوێوە و دەشڵێت: “جێگری سەرۆك وەزیران زۆر گرنگی بەو پڕۆژەیە دەدات”.

بڕیارە لە ماوەیەكی نزیكدا شەقامی 100 مەتری شاری سلێمانی بچێتە بواری جێبەجێكردنەوە و بەپێی زانیارییەكانی (خەڵك) بە سێ قۆناغ پڕۆژەكە جێبەجێ دەكرێت و یەكێكە لە پڕۆژە گەورە و ستراتیژییەكانی شاری سلێمانی.

یاسین مەحمود، وتەبێژی یەكێتی وەبەرھێنەرانی كوردستان بە (خەڵك)ی ڕایگەیاند، درووستكردنی شەقامی 100 مەتری شاری سلێمانی زۆر گرنگە و بڕیارە بە سەرمایەی خەمڵێنراوی 300 ملیۆن دۆلار بەشی تاسڵوجە-عەربەت لە چەند مانگی داهاتوودا بكەوێتەكار و بە تەواوبوونیشی بواری وەبەرھێنان لە پارێزگای سلێمانی دەخاتە قۆناغێكی نوێوە.

وتیشی، “لەئێستادا گەورەترین كێشەی وەبەرھێنەرانی سلێمانی ئەوەیە، كە شوێنێكی گونجاو نییە خزمەتگوزاری پێدا تێپەڕێت و بتوانین وەبەرھێنانی تێدابكەن، چونكە لە ڕابردوودا شەقامەكانی 30 مەتری و 40 مەتری و 60 مەتری سلێمانی ھەبووە و ھەمووی بووە بە وەبەرھێنان و ئێستا بوار نەماوە بۆ وەبەرهێنان”.

ئاشكراشیكرد، بە تەواوبوونی شەقامی 100 مەتری زیاتر لە ملیارێك دۆلار وەبەرھێنان زیاد دەبێت و دەتوانرێت چەندین پڕۆژەی وەبەرھێنان جێبەجێ بكرێت، چونكە نێوان شەقامی 60 مەتری و 100 مەتری پانتاییەكی فراوانە و پڕ دەبێت لە خزمەتگوزاری و چەندین پڕۆژەی وەبەرهێنانی تێدا ئەنجام دەدرێت.

ئاماژەی بۆ ئەوەشكرد، قوباد تاڵەبانی، جێگری سەرۆكی ئەنجوومەنی وەزیران زۆر گرنگی بە پڕۆژەكە دەدات و دەیەوێت ئەمساڵ ئەو شەقامە بكەوێتە بواری جێبەجێكردنەوە.

ئابوری

دابەشكردنی نەوت دەستی پێكرد و نرخەكەی هەرزان دەبێت

خەڵك- بەشی هەواڵ
دوای گەیشتنی نەوت لە بەغداوە لە سنووری ئیدارەی ڕاپەڕین دابەشكردن دەستی پێكرد، ئەمڕۆش لە هەڵەبجە دەستی پێكرد و بەوهۆیەوە نرخەكەی لە بازاڕی ئازاد هەرزان دەبێت.

نوخشە ناسح، قائیمقامی ناوەندی هەڵەبجە ڕایگەیاند، ئەمڕۆ یەك شەممە ٢٠١٩/١١/١٧ لە پارێزگای هەڵەبجە دەستكرا بە دابەشكردنی نەوت بەسەر هاووڵاتیاندا.

لای خۆشەوە، ئاوات محەمەد، سەرپەرشتیاری دابەشكردنی سووتەمەنی ھەڵەبجە بە (خەڵك)ی ڕاگەیاند، دەست دەكرێت بە دابەشكردنی بەرمیلێك نەوت بۆ ئەمساڵ و دابەشكردن لە گەڕەكی زەمەقی دەروازەی سنوری شارەوانی هەڵەبجە دەست پێدەكات.

ئاشكراشی كرد، بۆ هەر بەرمیلێك بڕی 46 هەزار دینار وەردەگیرێت و بە پێی كارتی زیرەك ماڵ بەماڵ دابەشدەكرێت.

پێشتریش، د. هەڤاڵ ئەبوبەكر، پارێزگاری سلێمانی ڕایگەیاندبوو، دەستیان بە دابەشكردنی نەوت كردووە، وەك سەرەتاش لە شارەدێی (حاجیاوا) دەستی پێكراوە.

هاووڵاتییەك-یش، كە كاری فرۆشتنی نەوت لە بازاڕی ئازاد دەكات بۆ (خەڵك) ئاماژەی بەوەكرد، لەگەڵ گەیشتنی نەوت لە عیراقەوە بۆ شارەكانی هەرێم و دەستكردن بە دابەشكردنی، خواستی هاووڵاتیان كەمبۆتەوە لەسەر كڕینی نەوت و بەوهۆیەوە بەرمیلێك نەوت 5 هەزار لە نرخەكەی دابەزیوە.

هەرچەندە حكومەتی هەرێم لە مانگی ئەیلولی ڕابردوو بڕیاریدا پێش هاتنی وەرزی سەرما و زستان دابەشكردنی نەوت دەست پێ‌ بكات و هەر خێزانێك بەرمیلێك نەوتی پێ‌ بدات، بەڵام تا ئێستا هیچ بڕە نەوتێكی دابەش نەكردووە، بەڵام حكومەتی عیراق نەوت بە نرخێكی هەرزان بۆ هاووڵاتیانی هەرێم دابین دەكات، كە بۆ بەرمیلێك 31 هەزار دینارە و لە هەرێم دەدرێت بە 46 هەزار دینار، كە وەك دەوترێت ئەو بڕە زیادەیە بۆ كرێی گواستنەوەیە.

بەردەوام بە لە خوێندنەوە

ئابوری

جارێكی دیكە تمەن لە بازاڕەكانی هەرێم دابەزی

خەڵك – بەشی هەواڵ
گرانبوونی نرخی بەنزین لە تەواوی شارەكانی ئێران بەهای تمەنی ئێرانی هاڕە پێ كردووە و ئێوارەی ئەمڕۆ یەك شەممە بۆ ماوەی دوو ڕۆ لەسەر یەك بەهای ئەو دراوە ئێرانییە دابەزی.

ئیبراهیم غەفور، خاوەنی نووسینگەی نەشوان لە بازاڕی دۆلارەكەی سلێمانی بە (خەڵك)ی ڕاگەیاند، بەیانی لەكاتی كردنەوەی بازاڕ 100 دۆلار بە ملیۆنێك 225 هەزار بەدەستی و 235 هەزار تمەن بەحەواڵە مامەڵەی پێوەكرا.

وتیشی، “جارێكی دیكە بەشێوەیەكی چاوەڕوان نەكراو تمەن هاڕەی كرد بە جۆرێك 100 دۆلار بوو بە ملیۆنێك و 240 هەزار بەدەستی و 260 هەزار بە حەواڵە، ئیتر هێڵەكانی ئینتەرنێت لە ئێران نەمان و پەیوەندی بۆڕسە پچڕا”.

ڕاشیگەیاند، لەكاتی داخستنی بازاڕ 100 دۆلار بە 120 هەزار و 850 دینار مامەڵە پێوەكردنی داخرا، لە كاتێكدا بەیانی 120 هەزار و 700 دینار بوو.

بەردەوام بە لە خوێندنەوە

ئابوری

حكومەتی هەرێم بەڵێنەكەی بۆ دابەشكردنی نەوت جێبەجێ‌ نەكردووە

خەڵك- بەشی هەواڵ
بەڵێنەكەی حكومەتی هەرێمی كوردستان بە دابەشكردنی نەوتی سپی تائێستا جێبەجێ‌ نەكراوە و بەغداش بڕیاریداوە 50 ملیۆن لیتر نەوت ڕەوانەی هەرێمی كوردستان بكات و ڕۆژانە بڕێكی دیاریكراو دەنێرێت، بەڵام تائێستا لە هیچ شوێنێكی ناو سلێمانی دابەش نەكراوە.

مەهدی مەحمود، سكرتێری ئەنجوومەنی پارێزگای سلێمانی بە (خەڵك)ی ڕاگەیاند، پشكی هەرێمی كوردستان كەمكراوەتەوە و كراوە بە 50 ملیۆن لیتر، كە بڕیارە لە ماوەی 110 ڕۆژدا تەواو بكرێت.

وتیشی، “ڕۆژانە چەند تەنكەرێك دەنێردرێن بۆ هەرێمی كوردستان و لەو بڕەش 228 هەزار لیتر دەنێردرێت بۆ سنوری پارێزگای سلێمانی، كە زۆر كەمە و دەكرێتە كۆگاكانەوە و چاوەڕوانی ئەوەدەكرێت ببێت بە بڕێكی پێویست و دابەش بكرێت”.

سەبارەت بەوەی لە كوێوە دەستپێدەكرێت، ناوبراو وتی، “چەند بۆچوونێك هەیە، بەوەی لە كوێوە وەستاوە ساڵی پێشوو لەوێوە دەستپێبكاتەوە یان لە ناوچە ساردەكانەوە، بەڵام لە هەموو حاڵەتەكاندا نابێت شوێنێك دوو بەرمیل وەربگرێت و شوێنێكی تر وەری نەگرێت”.

مانگی ئەیلولی ئەمساڵ حكومەتی هەرێمی كوردستان بڕیاریدا بەرمیلێك نەوت بدرێت بە هەر خێزانێك بۆ ئەمساڵ، بەڵام تائێستا بڕیارەكە جێبەجێ‌ نەكراوە.

(خەڵك) بۆ زانیاری زیاتر پەیوەندی بە جوتیار عادل، وتەبێژی حكومەتی هەرێمەوە كرد، بەڵام وەڵامی پەیوەندییەكەی نەدایەوە.

بەردەوام بە لە خوێندنەوە

کوردستان