ئێمە لە تۆرە کۆمەڵایەتیەکان

کوردستان

یاساناسێك: ئەوەی توركیا بەرامبەر كورد و پەكەكە دەیكات جینۆسایدە

خەڵك- بەشی هەواڵ
پسپۆڕێكی یاسایی ڕایدەگەیەنێت، ئەوەی توركیا و ئێران بەرامبەر بە كورد دەیكەین لە هەر چوار پارچەی كوردستان جینۆسایدە و دەشڵێت: “دەبوو حكومەتی هەرێم لیژنەیەكی بۆ داوای مافی گشتی كەسوكاری شەهیدان و ئەنفالكراوان پێكبهێنایە و داوای قەرەبووی لە بەغدا بكردایە”.

ئاوارە حسێن، مامۆستای زانكۆ و توێژەری یاسایی لە میانی بەشداری كردنی لە بەرنامەی (یاسا و خەڵك) كە لە ڕۆژانی شەممە لە (ڕادیۆی خەڵك)ەوە پێشكەش دەكرێت ڕایگەیاند، جینۆساید تاوانێكی سەربەخۆیە و یاسای تایبەتی هەیە و بریتیە لە كرداری كوشتن و ئەشكەنجەدان و ناچاركردنی قوربانیان بە ڕاگواستنی گروپێكیان بەمەبەستی لەناوبردنی هەموویان یان بەشێكیان، جا ئەگەر ئەو گروپە جیاوازبن لە نەژاد یان ئاین یان نەتەوە یان ڕەگەزییەوە.

ڕاشیگەیاند، ئەوەی ڕژێمی بەعس كردوویەتی بەرامبەر بە كورد لە هەڵەبجە و ئەنفال و بارزانیەكان و چەندانی دیكە بە جینۆساید هەژمار دەكرێت، چونكە لەڕووی نەتەوەییەوە عەرەب كوردی چەوساندۆتەوە لەڕووی ڕاگواستن و كوشتنەوە.

ئاشكراشی كرد، بەجینۆساید ناساندنی ئەو تاوانانەی بەرامبەر بە كورد كراون لەلایەن دادگای باڵای تاوانەكانی عیراقەوە، كە دوای ڕژێمی بەعس پێكهاتووە لێكەوتەی یاسایی دەبێت و كەسوكاری قوربانیەكان دەتوانن بچن لە دادگا شارستانیەكان سكاڵا تۆمار بكەن و قەرەبووی خۆیان وەربگرن.

ئەو یاساناسە دەشڵێت: “دەبوو پشتبەست بەو یاسایانە حكومەتی هەرێم لیژنەی وەرگرتنی مافی گشتی پێكبهێنایە و داوای قەرەبووی بۆ كەسوكاری قوربانیەكان لە بەغدا بكردایە، بەڵام كە نەیكردووە هەر هاووڵاتییەكیش دەتوانێت خۆی سكاڵا تۆمار بكات و داوای قەرەبوو بكات”.

ئاشكراشی كرد، كە لە ئێستاشدا جینۆساید دژی كورد لەلایەن توركیاوە لە باشوور و باكور و ڕۆژئاوای كوردستان و لەلایەن ئێرانەوە لە ڕۆژهەڵاتی كوردستان بەردەوامە.

وتیشی، “پاساو هێنانەوە بۆ جینۆساید تاوانە، چۆن دەبێت بەرپرسانی هەرێم پاساو بۆ هێرشەكانی توركیا و ئێران بهێننەوە، كە دەڵێن بۆیە توركیا تۆپباران دەكات، چونكە هێزێكی كوردی (پەكەكە) هێرش دەكاتە سەر توركیا، كە ئەو پاساوە هەڵەیە و تاوانە”.

هاوكات ئەو پسپۆڕە یاسایی و مامۆستای زانكۆیە ڕەخنە لە بڕیارەكەی پەڕلەمانی كوردستان دەگرێت بۆ بەجینۆساید ناساندنی ئێزدیەكان و دەڵێت: “پەڕلەمان كەوتۆتە هەڵەوە و نەدەبوو وشەی كۆمەڵكوژی بەكاربهێنێت، بەڵكو وشەی جینۆسایدی بەكاربهێنایە بەسبوو، هەروەها نەك ڕۆژێك بۆ ئێزدیەكان بەڵكو ڕۆژێك بۆ جینۆسایدی هەموو كورد دیاری بكرایە و بڕیارێك دەرنەچووایە، بەڵكو یاسایەكی تەواو كامڵی پێ‌ دەربكرایە”.

ئابوری

بڕی هاوردەی گۆشتی سوور و مریشك و ماسی بۆ سلێمانی دیاریكرا

خەڵك – بەشی هەواڵ
بەمەبەستی ڕاگرتنی هاوسەنگی و زیاد نەبوونی نرخ هاوردەی بەروبوومی پەلەوەری دیاری دەكرێت و جێگری بەڕێوەبەری كشتوكاڵی سلێمانی ڕایدەگەیەنێت، ٥٠٠ تۆن ماسی، ٥٠٠ تۆن مریشكی بەستوو بەپێی پشكنینی تەندروستی و ٥٠٠ تۆن گۆشتی سوور و ١٠هەزار سەر ئاژەڵی زیندوو بۆ مانگی شوبات هاوردە دەكرێت.

قایمقامیەتی ناوەندی سلێمانی لە ڕاگەیەنراوێكدا، كەوێنەیەكی دەست (خەڵك) كەوتووە ڕایگەیاندووە، ئەمڕۆ یەك شەممە 26-1-2020 لە دیوانی قائیمقامیەت ئاوات محەمەد، قائیمقامی سلێمانی لەگەڵ لیژنەی دیاریكردنی بەروبومی ئاژەڵی و پەلەوەری پارێزگای سلێمانی كۆبوویەوە، پاش هەڵسەنگاندن بۆ ئاستی بەرهەمهێنانی بەروبومی ناوخۆیی، بڕیاردرا پێداچونەوە بەبڕی ئەو بەروبووم و پێداویستیانەدا بكرێت، كە هاوردەی پارێزگای سلێمانی دەكرێن.

ڕزگار حمد خدر، جێگری بەڕێوەبەری بەڕێوەبەرایەتی كشتوكاڵی سلێمانی ڕایگەیاند، بەلەبەرچاووگرتنی هاوسەنگی ڕاگرتن لە نێوان بەرهەمی ناوخۆ و هاوردەكراو و بەرزنەبوونەوەی نرخی بەرهەمی پەلەوەر لەسەر هاووڵاتیان، لیژنەكە بڕیاری لەسەر بڕی بەرهەمی هاوردەكراو بۆ مانگی ٢ شوبات دا.

ئاماژەی بۆ ئەوەشكردووە، هەرچەندە لە كۆبونەوەكەدا جەخت لەسەر پەرەپێدانی بەروبوومی ناوخۆ كراوەتەوە بۆئەوەی لەگەڵ بەروبوومە هاوردەكراوەكاندا ھاوسەنگ بێت، بەڵام بڕی ئەو بەروبوومانەی لە مانگی شوباتدا هاوردە دەكرێن بریتییە لە ٥٠٠ تۆن ماسی، ٥٠٠ تۆن مریشكی بەستوو بەپێی پشكنینی تەندروستی و ٥٠٠ تۆن گۆشتی سوور و ١٠ھەزار سەر ئاژەڵی زیندوو.

بەردەوام بە لە خوێندنەوە

کوردستان

یەكگرتوو و پارتی: پاراستنی دەستكەوتەكان و ئەنجامدانی چاكسازی ڕاستەقینە ئەركی هەموولایەكە

خەڵك-بەشی هەواڵ

شاندێكی باڵای یەكگرتووی ئیسلامی كوردستان سەردانی پارتی دیموكراتی كوردستان دەكات و لە كۆبوونەوەیەكدا دۆخی ناوچەكە تاوتوێ دەكەن.

ئەمڕۆ یەك شەممە (26/1/2020) شاندێكی باڵای یەكگرتووی ئیسلامی كوردستان بەسەرۆكایەتی سەڵاحەدین محەمەد، ئەمینداری گشتی یەكگرتووی ئیسلامی كوردستان، سەردانی مەكتەبی سیاسی پارتی دیموكراتی كوردستانیان كرد.

میدیای فەڕمی یەكگرتوو بڵاویكردەوە، لە كۆبونەوەیەكدا دۆخی سیاسی كوردستان‌ و عیراق و ناوچەكە و ئەو بارودۆخە ئاڵۆز و نەخوازراوەی هاتۆتە كایەوە تاوتوێ كراوە و جەخت لە پەیوەندی دۆستانەی نێوان هەردوولا كراوەتەوە.

ئاشكراشی دەكات، هەردوولا هاوڕابوون لەسەر یەكهەڵوێستی لایەنە سیاسییەكانی كوردستان و فراكسیۆنە كوردستانییەكان بە سیاسەتێكی هاوبەش‌ و ژیرانەی كوردستانیانە، كە پێویستییەكی هەنووكەیی و چارەنووسسازی ئەم قۆناغەیە.

پارتی و یەكگرتوو لە كۆبوونەوەكەدا جەختیان لەسەر ئەوە كردۆتەوە، زەروریەتی ڕۆڵی ئۆپۆزسیۆن و دەسەڵات لەسەر پاراستن و پەرەپێدانی دەستكەوتەكان و ئەنجامدانی چاكسازی ڕاستەقینە و هەنگاوی جددی بنێرێت بۆ خۆشگوزەرانیكردنی خەڵكی كوردستان و سەرباری ئەركە سیاسی‌ و حزبیەكان، لایەنە سیاسیەكان ڕۆڵیان هەبێت لەچارەسەركردنی كێشە كۆمەڵایەتییەكان و ڕێگەگرتن لە تەشەنەكردنیان، كە كاریگەری خراپیان بۆ سەر كۆمەڵگا هەیە و پێویستە حكومەتی هەرێم چارەسەریان بكات.

بەردەوام بە لە خوێندنەوە

کوردستان

قائیمقامیەتی سلێمانی، لەسەر گرانبوونی نرخی غاز ڕوونكردنەوە دەدات

خەڵك-بەشی هەواڵ

سەرۆكی لیژنە هاوبەشەكانی قائیمقامیەتی سلێمانی ڕایدەگەیەنێت، هەر كارگە و وەكیلێك سەرپێچی یاساكان بكات و نرخەكان بەرز بكاتەوە سزای دەدەین.

دوای گران بوونی غاز لە هەولێر و دواتر دابەزاندنەوەی نرخەكەی، چەند ڕۆژێكە دەنگۆی گرانبوونی نرخی غاز لەنێو هاووڵاتیان لە سلێمانی بڵاوبۆتەوە و بەپێی زانیارییەكانیش ئەو بابەتە تەنها دەنگۆیە و غاز و نرخەكەی هیچ گرفتێكیان بۆ دروست نەبوووە.

لەشكر حەمید، سەرۆكی لیژنە هاوبەشەكانی قائیمقامیەتی سلێمانی بۆ (خەڵك) وتی، “وەكو لیژنە هاوبەشەكانی قائیمقامیەتی ناوەندی سلێمانی دڵنیایی دەدەینە هاووڵاتیان، كە لە ئێستادا هیچ گرفتێكی غاز لە سنوورەكەدا بوونی نییە”.

وتیشی، “نرخی غاز تەنها بە 7500 دینارە و نرخەكەی وەكو ڕابردووە و هیچ زیاد نەكراوە”

ناوبراو داواشی لە هاووڵاتیان كرد، لەكاتی بوونی هەر سەرپێچییەك لە هەر كارگەیەك یان هەر بریكارێكی فرۆشتنی غاز، كە پابەند نەبوون بە نرخەكانەوە، ڕاستەوخۆ لیژنە هاوبەشەكان ئاگادار بكەنەوە و وەكو لیژنەكانی قائیمقایەت و ئاسایشی ئابووری بە وردی چاودێری بازار دەكەین و ڕێگا نادەین هیچ كەسێك هۆكار بێت بۆ بەرزكردنەوەی نرخی غاز، لەبەرئەوەی هیچ گرفتێكی غاز لە سنووری پارێزگای سلێمانی بوونی نییە.

بەردەوام بە لە خوێندنەوە

کوردستان