ئێمە لە تۆرە کۆمەڵایەتیەکان

کوردستان

“پارتی هەوڵ دەدات مەسعود بارزانی بكاتە مەڕجەع”

خەڵك – بەشی هەواڵ
ئەندامێكی پێشووی پەڕلەمانی عیراق ڕایدەگەیەنێت، پارتی ھەوڵ دەدات حیزبەكانی بەشدار لە حكومەت ڕازی بكات ئەنجوومەنی پارتە سیاسیەكان پێكبهێنن و یاسای بۆ دەربكرێت و بیكاتە ئەنجوومەنێكی فەرمی لە پاڵ سێ دەسەڵاتەكەی دیكە و بیكاتە مەڕجەعی بڕیاردان، دەشڵێت: “هەموو ئەوەش لە پێناو بەمەڕجەعكردنی مەسعود بارزانییە”.

لەتیف شێخ مستەفا، ئەندامی پێشووی پەڕلەمانی عیراق لە هەژماری تایبەتی خۆی لە فەیسبووك لە نووسینێكدا ڕایگەیاندووە، “ئەم ئەنجوومەنە ئەگەر ئەنجوومەنێكی دەسەڵاتدار بێت و دەسەڵاتی بڕیاردانی ھەبێ ئەنجوومەنێكی نادەستوریە و لە سیستەمی دیموكراتی پەڕلەمانیدا جێگای نابێتەوە، بەڵكو جۆرێكە لەو ئەنجوومەنە نا ھەڵبژێردراوە نا دیموكراتیانەی لەسەدەی ڕابردوو لە وڵاتانی ناوچەكە و لە عیراقیش ھەبوون وەك مەجلیسی قیادەی سەورە”.

دەشڵێت: “پێش دروستبوونی حكومەت لە بەرامبەر گۆڕینی سیستەمی سیاسی بۆ پەڕلەمانی و داماڵینی دەسەڵات لە سەرۆكی ھەرێم و كردنی بەدەسەڵاتێكی پڕۆتۆكۆڵی دەبوو ئەنجوومەنێكی وا دابمەزرایە و مەسعود بارزانیش سەرۆكی بوایە ئەویش بە دوو مەرج یەكەمیان ئەنجوومەنەكە سیاسی بوایە نەك یاسایی، دووەم ئەنجوومەنێكی ڕاوێژكاری بێ دەسەڵات بوایە، لە بەرامبەر ئەوەی سیستەم بكرێتە پەڕلەمانی و سەرۆكی ھەرێم پڕۆتۆكۆڵی بوایە”.

دەقی نوسینەكەی :
ئەنجومەنی پارتە سیاسیەكان یان جاڕدانی دیكتاتۆریەت بە فەرمی
پارتی ھەوڵ ئەدات حیزبەكانی بەشدار لە حوكمەت ڕازی بكات ئەنجومەنی پارتە سیاسیەكان پێك بھێنێ و یاسای بۆ دەركات و بیكاتە ئەنجومەنێكی فەرمی لە پاڵ سێ دەسەڵاتەكەی تر و بەلكو باڵاتریشی بكات بەسەر سێ دەسەڵاتەكەی ترەوە و بیكاتە مەرجەعی بڕیار دان ،ھەموو ئەوەش لە پێناوی ئەوەی كە پارتی ھەوڵی بۆ ئەدات و بریتیە لە بەمڕجەع كردنی بەڕێز مەسعود بەرزانی ئەم ئەنجومەنە ئەگەر ئەنجومەنێكی دەسەڵاتدار بێت و دەسەڵاتی بڕیاردانی ھەبێ ئەنجومەنێكی نادەستوریەو لە سیستەمی دیموكراتی پەرلەمانیدا جێگای نابێتەوە، بەڵكو جۆرێكە لەو ئەنجومەنە نا ھەڵبژێردراوە نا دیموكراتیانەی لەسەدەی ڕابردوو لە وڵاتانی ناوچەكە و لە عێراقیش ھەبوون وەك مەجلیسی قیادەی سەورە،بۆیە نابێ حیزبەكانی تر و باڵی نێچیرڤان بارزانیش لەناو پارتیدا بە ھیچ شێوەیەك ئەوە قبوڵ بكەن
پێش دروست بونی حوكمەت لە بەرامبەر گۆڕینی سیستەمی سیاسی بۆ پەرلەمانی و داماڵینی دەسەڵات لە سەرۆكی ھەرێم و كردنی بەدەسەڵاتێكی پڕۆتۆكۆڵی دەشیا ئەنجومەنێكی وا دابمەزرایە و مەسعود بەرزانیش سەرۆكی بوایە ئەویش بە دوو مەرج یەكەمیان ئەنجومەنەكە سیاسی بوایە نەك یاسایی دوەم ئەنجومەنێكی ڕاوێژكاری بێ دەسەڵات بوایە ئەویش لە بەرامبەری ئەوەی سیستەم بكرێتە پەرلەمانی و سەرۆكی ھەرێم پڕۆتۆكۆلی بوایە و بدرایە بە یەكێتی یان گۆڕان ،بەڵام كە ئەوە نەكراوە سیستەمەكە لە ھەرێم نەبۆتە پەرلەمانی و پارتی ھەردوو دەسەڵاتی سەرۆكی ھەرێمی بەدەسەڵاتەوەو سەرۆكی حوكمەت و تەنانەت سەرۆكی پەرلەمانیشی لایە ،چونكە (ئەوەندەی تێبینیم كردوە میدیای پارتیش و پەرلەمانیش زاراوەی سەرۆكایەتی پەرلەمان بەكار دێنێ بەمەبەست بۆ ئەوەی بڵێ سەرۆكایەتێ پەرلەمان دەستەیە نەك تاك لەم حاڵەشد سەرۆكایەتی پەرلەمان واتە ھی پارتیە چونكە لە سێ دەنگ دوانی ھەیە)
بۆیە لە حاڵەتێكی وادا ڕازی بوون بە ئەنجومەنێكی سیاسی دەسەڵاتدارو كردنی بەمەرجەع واتە جاڕادنی ئاشكرای دیكتاتۆریەتی تاكەكەسی و تەنانەت تەركیز كردنی دەسەڵاتەكان كە ھەموشیان بەدەست پارتیەوەن لەدەستی یەك كەسدا.
لە جیاتی ئەوە با لایەنەكانی غەیرە پارتی پێشنیازی ئەوە بكەن سیستەم ببێ بە پەرلەمانی كۆماری و ئەنجومەنەكەش ڕاوێژكاری بێت،یان تەنانەت ڕازیش بن «ھەرچەندە ئەمە دژی دەستوری عێراقیشە » سیستەم ببێ بە پەرلەمانی پاشایەتی دەستوری و مەسعود بەرزانی ببێتە پاشای دەستوری كوردستان بە مەرجێك سیستەمی پەرلەمانی مەلەكی بێت و دەسەڵات لە باوكەوە بۆ كوڕ بگوازرێتەوە و پاشا دەسەڵاتی ڕاستەقینەی نەبێت و و پڕۆتۆكۆلی بێت و خزم و كوڕو نەوەی پاشا تا پلەی چوارەم بۆیان نەبێت ھیچ پۆستێكی ڕەسمی وەربگرن وەك ئەوەی لە ھەموو سیستەمە پەرلەمانیەكاندا ھەیە.

کوردستان

وەزیری تەندروستی هەرێم: هیچ حاڵەتێكی تووشبوون بە ڤایرۆسی كۆرۆنا تۆمار نەكراوە

خەڵك – بەشی هەواڵ

وەزیری تەندروستی هەرێم ڕایدەگەیەنێت، بۆ ڕووبەڕووبوونەوەی ڤایرۆسی كۆرۆنا هەموو ڕێكارە پێویستەكان گیراونەتە بەر.

سامان بەرزنجی وەزیری وەزیری تەندروستی هەرێم لە كۆنفرانسێكی هاوبەشدا كە لەگەڵ ڕێبەر ئەحمەد وەزیری ناوخۆی هەرێم ئەنجامیدا ڕایگەیاند، تا ئەم ساتە ۱۷۳٤ لە ئێران گەڕاونەتەوە و لەكەرەنتینن لە ۱٥ شوێن.

وەزیری تەندروستی هەرێم ئاماژەی بەوەشدا، ۱٤ كەس پشكنینی بۆكراوە و ۱۱ پشكنین دەرچوون هیچ حاڵەتێكی كۆڕۆنا دەرنەچووە، تەنها ۳ پشكنین ماوە ئەنجامەكان دەربچێت و بڵاوی دەكەینەوە.

وتیشی، ۱۷۰ قەرەوێلە دانراوە بۆ هەر حاڵەتێك ئەگەر هەبێت.

سامان بەرزنجی ئاشكراشیكرد، لەخاڵەكانی پشكنینی نێوان هەرێم و عیراق كە ۱٤ خاڵی پشكنین هەن تیمی پزیشكیان بۆ دانراوە بەئامێری تایبەت پشكنین بۆ ئەو كەسانە دەكەن كە دێنە ناو هەرێم.

ك.ج

بەردەوام بە لە خوێندنەوە

کوردستان

وەزیری ناوخۆ هەرێم؛ هاووڵاتیان لە خاڵەسنورییەكان كەرەنتینە ناكرێن

خەڵك – بەشی هەواڵ

وەزیری ناوخۆ هەرێمی كوردستان ڕایدەگەیەنێت ، حكومەت جدیە بۆ ڕووبەڕووبونەوەی ڤایرۆسی كۆرۆنا گرنگیش بە نەخۆشیەكە دەدەین دەمانەوێت بەشەفافی كارەكان بكەین، دەشڵێت،”ئەمڕۆ ئامارمان بەدەست گەیشتووە بێ پشكنین 536 هاووڵاتی لە خاڵەسنوورییەكانی عیراق هاتوونەتە ناو هەرێم”.

ڕێبەر ئەحمەد ، وەزیری ناوخۆ هەرێمی كوردستان لە كۆنفرانێكی ڕۆژنامەوانیدا ڕایگەیاند، ئێمە لەگەڵ خەڵكی خۆمان ڕاستگۆین و ئەمڕۆش هیچ حاڵەتێكی ڤایرۆسی كۆڕۆنا تۆمار نەكراوە، بۆ ئەوەی دڵەڕاوكێ نەمێنێ ڕۆژانە زانیاری و داتای نوێ دەدەینە هاووڵاتیان و بەردەوام لە كۆبوونەوەكاندا تائكید لەسەر جێ بەجێكردنی ڕێنماییەكان دەكەین، هەر كەمتەرخەمییەكیش هەبێ لە بەرپرس و لایەنی بەرپرس لە ڕووبەرووبوونەوە كۆرۆنا قەبوڵكراو نییە و دەبێت یەك تیم و یەك دەست كاربكەین.

وتیشی ،”حكومەت جدیە بۆ ڕووبەڕووبونەوەی نەخۆشیەكە ، بۆیە وەك حكومەت گرنگیش بەنەخۆشیەكە دەدەین دەمانەوێت بەشەفافی كارەكان بكەین لەسەرجەم بوارەكان و ڕۆژانەش تیمەكان هاووڵاتیان هۆشیار بكەنەوە، بۆ ئەوەی دوور بین لە كۆرۆنا، ڕێوشوێنمان گرتۆتە بەر و حكومەتی هەرێمیش پێی وابوو حاڵەتەكان نزیكن لەهەرێم بۆیە پشوومان ڕاگەیاند”.

ڕاشیگەیاند، نامانەوێ توشی حاڵەتێك ببین گلەیی لە خۆمان بكەین و ئەوەی لەتواناماندایە ئەنجامی دەدەین ، دڵنیایش دەدەینە هاووڵاتیان كە شەفافانە مامەڵە لەگەڵ دۆخەكە دەكەین و تا ئێستا حاڵەتمان نییە و ئەوەی هەیە تەنهاگومانە.

ئاشكراشیكرد، بەشێكی زۆر لە هاووڵاتیان كە لە سنوورەكان دەگەڕێنەوە، دوای پشكنین كەرەنتینە ناكرێن، كە ئەمە پێچەوانەی بڕیارەكانی حكومەتە بۆ ڕووبەڕووبوونەوەی كۆرۆنا، هەروەها ئەمڕۆ ئامارمان بەدەست گەیشتووە بێ پشكنین هاتوون 536 هاووڵاتی لە خاڵەسنوورییەكانی عیراق هاتوونەتە ناو هەرێم، داوامان لە لایەنی بەرپرس كردووە بیاندۆزێتەوە و پشكنینیان بۆ بكرێت.

وەزیری ناوخۆ داواشی لەو كەسانە كرد، كە هەرچی بەقاچاغ هاتۆتەوە هەرێم خۆیان بە تیمەكانی تەندروستی بناسێنن، چونكە ئێمە ژمارە و ناوی ئەوانەمان لایە، كە بە ناساسایی هاتوونەتەتەوە ناو هەرێم.

بەردەوام بە لە خوێندنەوە

کوردستان

لەبارەی تۆماركردنی حاڵەتی توشبوون بە كۆرۆنا لە دهۆك ڕاگەیەندراوێك بڵاودەكرێتەوە

خەڵك- بەشی هەواڵ
بەڕێوەبەرایەتی گشتی تەندروستی دهۆك، لەبارەی تۆماركردنی حاڵەتی توشبوون بە ڤایرۆسی كۆرۆنا لە پارێزگەكە، ڕاگەیەندراوێك بڵاودەكاتەوە.

بەپێی ڕاگەیەندراوێكی كورت كە ئەمڕۆ چوار شەممە لەلایەن بەڕێوەبەرایەتی گشتی تەندروستی پارێزگەی دهۆكەوە بڵاوكرایەوە”بوونی حاڵەتی گوماناوی توشبوون بە ڤایرۆسی كۆرۆنا لە قەزای زاخۆ و هەموو ناوچەكانی پارێزگەی دهۆك، ڕەتدەكەینەوە”.

بڵاوكردنەوەی ئەو ڕاگەیەندراوە لەلایەن بەڕێوەبەرایەتی گشتی تەندروستی پارێزگەی دهۆك لەكاتێكدایە كە پێشتر لە تۆڕە كۆمەڵایەتییەكان، تۆماركردنی یەكەم حاڵەتی توشبوون بە ڤایرۆسی كۆرۆنا لە قەزای زاخۆی سەر بە پارێزگەی دهۆك، بڵاوكرایەوە.

وێڕای تۆماركردنی حاڵەتێكی توشبوون لە پارێزگەی نەجەف و چوار حاڵەتی تر لە پارێزگەی كەركوك بە ڤایرۆسی كۆرۆنا، سەرچاوە فەرمییەكان لە هەرێمی كوردستان ڕەتیدەكەنەوە، تائێستا هیچ حاڵەتێكی توشبوون بە كۆرۆنا لە هەرێمی كوردستاندا تۆماركرابێت.

بەردەوام بە لە خوێندنەوە

کوردستان