ئێمە لە تۆرە کۆمەڵایەتیەکان

جیهانی

زێدان هێشتا بە کڕینی نایمار قایل نییە و کەیسی پۆگبا و شوێنگرەوەکانی دانەخستووە !

خەڵک سپۆرت

زینەدین زێدانی فەرەنسی ڕاهێنەری یانەی ڕیاڵ مەدرید، پێی وایە گواستنەوەی نایمار دا سیلڤا بۆ پێکهاتەکەی زیانی لە سودەکانی زیاترە و تا ئەم ساتەش هیوای بەگواستنەوەی پۆل پۆگبا، یاخود یەکێک لە شوێنگرەوەکانیەتی.

پۆرتاڵی “دیاریۆ گۆڵ”ی ئیسپانی لەڕاپۆرتێکدا ئاشکرای کردووە، لەگەڵ ئەوەدا کە دەرگای گواستنەوەکان لە خولی ئینگلتەرا داخراون و ئەگەرەکانی گواستنەوەی پۆل پۆگبای فەرەنسی بە سفر یەکسانبووەتەوە، بەڵام هێشتا زێدان کۆڵی نەداوە و هیوای بەوەیە لە گواستنەوەکانی زستانە، یاخود هاوینی داهاتوو داواکاریەکەی جێبەجێ بکرێت.

سەرچاوەکە ئاماژەی بە هەڵوێستی ڕاهێنەرەکە کردووە و دووپاتی کردۆتەوە، فلۆرنتینۆ پێرێزی سەرۆکی یانە و ئەنجومەنی ئیدارەی مێرەنگی لە ئاستی پێکهاتەی سەردەمی نوێی زیزۆ قایل نین، بەڵام ڕاهێنەرەکە پێی وایە لەداهاتوودا ئیدین هازارد لە پێگەکەی باڵی هێرشبەریدا هاوشێوەی کریستیانۆ جێگەی خۆی بەباشترین شێوە دەکاتەوە و ئەگەر نایمار پەیوەندیان پێوە بکات ئەوا بارودۆخەکە لەڕووی تاکتیکیەوە گۆڕانکاری نەرێنی دروست دەکات.

دیاریۆ گۆڵ نوسیویەتی، هێشتا زێدان پێی وایە پۆگبا لە گواستنەوەکانی داهاتوودا ئەگەری گواستنەوەی هەیە و سودی گەورەش بە پێکهاتەکەی دەگەیەنێت، بەڵکو لە نایمار باشتر دەتوانێت ئامانجە گەورەکانی ڕیاڵ مەدرید بپێکێت، لەبەرامبەردا پێرێز و نوێنەرانی یانەی شاهانە هەوڵەکانیان بە ئاڕاستەی ڤان دی بێکی هۆڵەندی چڕکردۆتەوە و بەهیوان بتوانن لەدەرەوەی خواستی زێدان ئەو یاریزانە هۆڵەندیە دابین بکەن.

جیهانی

بایرن میونشن به‌ کڕینی کۆتینیۆ هه‌وادارانی به‌خه‌به‌رهێنا و به‌رهه‌مه‌که‌ی (١٠٠ ملیۆن) لایک بوو !

خه‌ڵک سپۆرت

یانه‌ی بایرن میونشن له‌داهاتوودا سودی وه‌رزشیی له‌ گواستنه‌وه‌ی فیلیپی کۆتینیۆی به‌رازیلی وه‌رده‌گرێت و به‌ر له‌و واده‌یه‌ش له‌ڕووی دارایی و کۆمه‌ڵایه‌تیه‌وه‌ سودی زیاتری به‌ده‌ستهێناوه‌.

یانه‌ ئه‌ڵمانیه‌ ناوداره‌که‌ی ئه‌وروپا له‌ تۆڕه‌ کۆمه‌ڵایه‌تیه‌کانی تویته‌ر و فه‌یسبوک و ئینستاگرامه‌وه‌ هاشتاگی (به‌خێربێیت کۆتینیۆ)ی کردووه‌، له‌هه‌رسێ تۆڕه‌ کۆمه‌ڵایه‌تیه‌که‌ زیاتر له‌ ١٠٠ ملیۆن لایک و ٣٠٠ هه‌زار کۆمێنتی بۆ هاتووه‌، ئه‌وه‌ش جگه‌ له‌ ڕووه‌ کۆمه‌ڵایه‌تیه‌کان و به‌خه‌به‌رهێنانه‌وه‌ی هانده‌رانی یانه له‌سه‌رجه‌م جیهان‌، سودی دارایشی ده‌بێت.

له‌ڕووی وه‌رزشییه‌وه‌ گواستنه‌وه‌ی کۆتینیۆ هاوشێوه‌ی ڕووه‌ کۆمه‌ڵایه‌تیه‌که‌ به‌هێز بووه‌، به‌وپێیه‌ی له‌ یه‌که‌م یه‌که‌ی مه‌شق و ڕاهێنانی ئه‌ستێره‌که‌ی سیلیساو به‌درێسی باڤارییه‌وه‌ زیاتر له‌ ١٥٠٠ هانده‌ر له‌ یاریگای مه‌شقه‌کان ئاماده‌بوون، ئه‌و ڕێژه‌یه‌ش ماوه‌ی (١٠) ساڵ زیاتره‌ له‌ ئه‌ڵمانیا و به‌تایبه‌ت له‌یانه‌ی بایرن میونشن تۆمار نه‌کراوه‌.

له‌ڕووی بازرگانیشه‌وه‌، ئیداره‌ی یانه‌ هۆلیودیه‌که‌ی ئه‌ڵمانیا به‌فه‌رمی ئاشکرای کردووه‌ که‌ درێسی “کۆتی ١٠” له‌سه‌رجه‌م کۆگاکانی ئه‌دیداس له‌مه‌ودوا بوونی ده‌بێت و هه‌ز‌اران هانده‌ر خۆیان ناونوس کردووه‌ تا یه‌که‌مین کڕیاری درێسه‌کان بن، ئه‌وه‌ش ئیداره‌ی ئۆلی هۆنێس و کارڵ هاینز ڕۆمه‌نیگه‌ ده‌هێنێته‌ ئه‌و قه‌ناعه‌ته‌ی که‌ پێویسته‌ هاوینی داهاتوو گواستنه‌وه‌ی یاریزانه‌که‌ له‌ خواستنه‌وه‌ بکه‌ن به‌ هه‌میشه‌یی.

بەردەوام بە لە خوێندنەوە

جیهانی

ئیل شیرینگیتۆ: بارسا له‌ کڕینی نایمار بێهیوا بووه‌ و بۆندی (سێ به‌ یه‌ک)ی ڕیاڵیش ڕه‌تکراوه‌ته‌وه‌ !

خه‌ڵک سپۆرت

ئیداره‌ی یانه‌ی پاریس سانت جێرمانی فه‌ره‌نسی سوره‌ له‌به‌ده‌ستهێنانی بڕی ٢٢٢ ملیۆن یورۆ له‌ گواستنه‌وه‌ی نایمار دا سیلڤای به‌رازیلی و به‌ که‌متر له‌و نرخه‌ قایل نابێت، ئه‌وه‌ش هه‌ردوو یانه‌ی ڕیاڵ مه‌درید و به‌رشلۆنه‌ی بێهیوا کردووه‌.

ڕۆژنامه‌وانانی ئیسپانیا له‌ به‌رنامه‌ی “ئیل شیرینگیتۆ” تایبه‌ت به‌گواستنه‌وه‌ی نایمار له‌ پاریسه‌وه‌ بۆ ئیسپانیا ئاماژه‌یان به‌چه‌ند زانیارییه‌ک کردووه‌ که‌ هه‌رگیز له‌ به‌رژه‌وه‌ندی جه‌مسه‌ری کڕیار نییه‌.

به‌پێی زانیارییه‌کان، ئیداره‌ی یانه‌ی به‌رشلۆنه‌ له‌ پێشنیاری گواستنه‌وه‌ی نایمار به‌شێوه‌ی خواستن و پێشکه‌شکردنی ١٨٠ ملیۆن یورۆ له‌ هاوینی داهاتوو به‌ته‌واوی شکستیان هێناوه‌، به‌ڵکو له‌لایه‌ن نوێنه‌رانی یانه‌ی پاریس سانت جێرمانه‌وه‌ پشتگوێخراون و بۆنده‌ پێشکه‌شکراوه‌که‌ش به‌ گاڵته‌جاڕی وه‌سف کراوه‌.

له‌به‌رامبه‌ردا یانه‌ی ڕیاڵ مه‌درید به‌هێزه‌وه‌ هاتۆته‌ نێو هاوکێشه‌که‌ و ئاماده‌ییان نیشانداوه‌ بڕی ١٠٠ ملیۆن یورۆ و گاریس به‌یل و جه‌یمس ڕۆدریگێز و کیلۆر ناڤاس به‌ یه‌ک پاکێج به‌رامبه‌ر گواستنه‌وه‌ی یاریزانه‌ به‌رازیلیه‌که‌ پێشکه‌ش بکه‌ن، کۆی گشتی نرخی ئه‌و یاریزانانه‌ش له‌گه‌ڵ بڕه‌ پاره‌ی پێشکه‌شکراو زیاتر له‌ (٢٠٠ ملیۆن) ده‌کات، به‌ڵام سه‌یر ئه‌وه‌یه‌ ناسڕ خلێفی و هاوه‌ڵانی ئه‌و ئۆفه‌ره‌شیان قبوڵ نه‌کردووه‌ و ته‌نها و ته‌نها ئاماده‌بوون له‌حاڵه‌تی پێشکه‌شکردنی بڕی ٢٢٢ ملیۆندا ڕه‌زامه‌ندی نیشان بده‌ن.

⚡️⚡️"Si NEYMAR NO dice públicamente que QUIERE ir al BARÇA, NO LE QUIERO". Quim Domènech 'ESTALLA' en #ElChiringuitoDeMega

Posted by El Chiringuito TV on Wednesday, August 21, 2019

سه‌رچاوه‌ ئیسپانیه‌کان پێیان وایه‌ ئیداره‌ی بارسا به‌ته‌واوی له‌م که‌یسه‌دا کۆڵیداوه‌، به‌ڵام یانه‌ی شاهانه‌ هێشتا قسه‌ی کۆتایی نه‌کردووه‌ و  ڕۆژنامه‌وانه‌کان جه‌خت له‌وه‌ ده‌که‌نه‌وه‌ که‌ یانه‌ مه‌دریدیه‌که‌ له‌توانایدایه‌ بۆنده‌که‌ ئیمزا بکات.

بەردەوام بە لە خوێندنەوە

جیهانی

یوڤانتۆس چاوی له‌ ڕاکیتیچه‌ و جگه‌ له‌ ئیمری جان یاریزانێکی تریان بۆ به‌رشلۆنه‌ پێشنیار کردووه‌ !

خه‌ڵک سپۆرت

ئیداره‌ی یانه‌ی یوڤانتۆسی ئیتاڵی له‌هه‌وڵدایه‌ بۆ که‌مکردنه‌وه‌ی ڕێژه‌ی ناوه‌ندسازه‌کانی و له‌پێناو گواستنه‌وه‌ی ئیڤان ڕاکیتیچی کرواتیدا ئاماده‌یه‌ دوو یاریزانی پێکهاته‌که‌ی ساری بکاته‌ قوربانی.

ڕۆژنامه‌ی “لاگازێتا دێلۆ سپۆرت”ی ئیتاڵی له‌زاری سه‌رچاوه‌ ناوخۆییه‌کانی یانه‌ی یوڤانتۆسه‌وه‌ ئاشکرای کردووه‌، له‌ماوه‌ی چه‌ند هه‌فته‌ی ڕابردوودا فابیۆ پاراتیچی به‌ڕێوه‌به‌ری وه‌رزشیی بیانکۆنێری له‌شاری به‌رشلۆنه‌ گفتوگۆی له‌گه‌ڵ نوێنه‌رانی یانه‌ که‌ته‌لۆنیه‌که‌دا کردووه‌، که‌سایه‌تی ناوبراو له‌سه‌ر ڕاسپارده‌ی سه‌رۆکایه‌تی یانه‌ پێشنیاری ئاڵوگۆڕی ئیڤان ڕاکیتیچی به‌ ئیمیری جان کردووه‌، به‌ڵام ئیریک ئه‌بیدال و هاو‌کارانی ئه‌و پێشنیاره‌یان ڕه‌ت کردۆته‌وه‌.

سه‌رچاوه‌که‌ جه‌خت ده‌کاته‌وه‌، ئیمیری جان تاکه‌ یاریزان نابێت په‌یوه‌ندی به‌ به‌رشلۆنه‌وه‌ بکات، به‌ڵکو پاراتیچی ناوی ڕۆدریگۆ بینتانکۆری ئۆرۆگوایی به‌هه‌مان شێوه‌ پێشنیار کردووه‌ و بۆ ئه‌م گواستنه‌وه‌یه‌ تائێستا ئیداره‌ی بارتومیۆ وه‌ڵامێکی ئه‌رێنی، یاخود نه‌رێنیان نه‌داوه‌ته‌وه‌ و بێده‌نگیان هه‌ڵبژاردووه‌.

ئه‌م جموجۆڵانه‌ هاوکاتن له‌گه‌ڵ ده‌نگۆکانی ڕۆیشتنی بله‌یز ماتویدی فه‌ره‌نسی له‌ یانه‌ی یوڤانتۆس و چه‌ندین یانه‌ی زه‌به‌لاح به‌ داهاتووی یاریزانه‌که‌وه‌ به‌ستراونه‌ته‌وه‌.

بەردەوام بە لە خوێندنەوە

کوردستان