ئێمە لە تۆرە کۆمەڵایەتیەکان

جیهان

جەواد زەریف: ئەمریكا كەنداو دەكاتە گڕكان

خەڵك- بەشی هەواڵ
وەزیری دەرەوەی ئێران ڕەخنە لە هەنگاوەكانی واشنتن دەگرێت بۆ دروستكردنی هاوپەیمانییەكی سەربازی لە دژی تاران لە كەنداو، و دەڵێت، ئەمریكا ناوچەكە دەكاتە گڕكان.
محەمەد جەواد زەریف، وەزیری دەرەوەی ئێران لە میانی سەردانەكەی بۆ دەوحە بە كەناڵی (الجزیرە)ی ڕاگەیاندووە”كەنداو بەرتەسكە، چەندە كەشتییە بیانییەكان تێیدا زیاترببن، هێندە ئاسایش تێدا كەمدەبێتەوە، نوقمكردنی ناوچەكە بە چەك لەلایەن ئەمریكا و هاوپەیمانەكانی، وایكردووە ناوچەكە ببێتە گڕكان و ئەگەری تەقینەوەی لێبكرێت”.

بە وتەی زەریف”لە سەردانەكەیدا بۆ دەوحە، وتوێژی بەرهەمداری لەگەڵ میری قەتەر و وەزیری دەرەوەی وڵاتەكە ئەنجامداوە و پەیامی ئەوەی گەیاندووەتەوە قەتەرییەكان و جیهان كە وڵاتانی ناوچەكە بۆخۆیان دەتوانن ئاسایشی خۆیان زامن بكەن، بەبێ‌ ئەوەی پێویست بە دەستوەردانی دەرەكی بكات”.

ئاژانسی (رۆیتەرز) بڵاویكردبووەوە، قەتەر كە میوانداری یەكێك لە گەورەترین بنكەی سەربازی ئەمریكایی دەكات لە خۆرهەڵاتی ناوەڕاست، هەوڵدەدات بەرەو ئەو ململانێیە نەخزێت كە لەنێوان واشنتن و تاران لە ناوچەكەدا درستبووە.

جیهان

ڕاپۆرتێكی خۆرئاوایی خوێندنەوە بۆ بڕيارەكەى ئەبو بەكر بەغدادی دەكات

خەڵك- بەشی هەواڵ
ڕاپۆرتێكی تۆڕی (ئینتەرناشیوناڵ پۆلیسی دایجست) بۆ شكارییە سیاسییەكان، وردەكاریی بڕیارەكەی ئەم دواییەی ئەبو بەكر بەغدادی سەركردەی ڕێكخراوی داعش ئاشكرا دەكات، سەبارەت بە ڕادەستكردنی دەسەڵاتەكانی بە كەسێكی تر.

ڕاپۆرتەكەی تۆڕی (ئینتەرناشیوناڵ پۆلیسی دایجست) دەڵێت”بەغدادی بڕیاریداوە سەركردایەتی داعش ڕادەستی جێگرەوەكەی بكات، بەڵام خۆی پارێزگاریی لە نازناوی خەلیفە دەكات، بەو پێیەی پێگەیەكی ئاینییە، بە تایبەتیش لەگەڵ خراپبوونی باری تەندروستی سەركردەی ڕێكخراوەكە، دوای ئەوەی تەئكید لەسەر ئیفلیجبوونی یەكێك لە لاقەكانی كرایەوە لەپاش برینداربوونی لە شەڕەكانی سوریا”.

(ئینتەرناشیوناڵ پۆلیسی دایجست) پێیوایە”زۆرێك لە میدیاكان و سیاسەتوانان بە هەڵە لە وازهێنانی سەركردەی داعش تێگەیشتوون، چونكە ئەو هەر لە دەسەڵاتدا دەمێنێتەوە، بەڵام سەركردایەتی ڕێكخراوەكە دەداتە عەبدوڵڵا قەرداشی جێگرەوەی كە توركمانێكی خەڵكی تەلەعفەرە.

بەردەوام بە لە خوێندنەوە

جیهان

ترەمپ: بۆ ئەنجامدانی ئەم جەنگە هەڵبژاردەی خودام

خەڵك- بەشی هەواڵ
سەرۆكی ئەمریكا دەڵێت، ئەو جەنگە بازرگانییەی لەگەڵ پەكین دەیكات، جەنگی ئەو نییە، بەڵكو سەرۆكەكانی پێشووتر لە كۆشكی سپی دەبوو ئەو جەنگە بكەن، بەڵام خوداوەند ئەوی هەڵبژاردووە بۆ بەجێگەیاندنی ئەركەكە.

ئەمڕۆ پێنج شەممە، دۆناڵد ترەمپ سەرۆكی ئەمریكا لە كۆنفرانسێكی ڕۆژنامەوانیدا ڕایگەیاندووە”ئەم جەنگە بازرگانییە جەنگی من نییە. ئەم جەنگە بازرگانییە دەبوو سەرۆكەكانی پێشووتری ئەمریكا ئەنجامیان بدایە”.

بە وتەی ترەمپ”كەس بۆی نەبوو ئەو ئەركە بەئەنجام بگەیەنێت، بەر لەوەی تەماشای ئاسمان بكات و دەستی بەرزبكاتەوە و بڵێت: من هەڵبژێردراوم”، سەرۆكی ئەمریكا بۆ ئەو گوزارشتە سودی لە زاراوەیەكی تەوراتی وەرگرتووە.

سەرۆكی ئەمریكا پێیوایە”ویلایەتە یەكگرتووەكان جەنگە بازرگانییە سەپێنراوەكە لە چین دەباتەوە”.

ترەمپ، باجێكی گومرگی توندی بە بەهای 250 ملیار دۆلار بەسەر هاوردەی ساڵانەی چیندا سەپاند، بەنیازیشە گومرگی زیاتر بەسەر كاڵاكانی چیندا بە بەهای 300 ملیار دۆلار لە دوو گوڕی داهاتوودا لە 1ی ئەیلول و 15ی كانوونی یەكەمی داهاتوودا، بسەپێنێت.

وێڕای هۆشداریی سندوقی دراوی نێودەوڵەتی سەبارەت بە خاوبوونەوەی گەشەی جیهانی بەهۆی جەنگەكەی ترەمپەوە، لەگەڵ دەركەوتنی ئەگەری ڕوودانی كرژبوونەوە لە ئابوری ئەمریكایی، پێناچێت سەرۆكی ئەمریكا بەنیازبێت لە توندی ئەو جەنگە كەمبكاتەوە.

بەردەوام بە لە خوێندنەوە

جیهان

سێ‌ سەربازی تورك لە نزیك سنورەكانی هەرێمی كوردستان كوژاران

خەڵك- بەشی هەواڵ
دەسەڵاتدارانی خۆجێی لە توركیا، كوژرانی سێ‌ سەربازی سوپای وڵاتەكەیان لە پێكداهەڵپژانێكدا لە نزیك سنورەكانی هەرێمی كوردستان ڕادەگەیەنن.

نوسینگەی حاكمی ویلایەتی شرناخ لە بەیاننامەیەكدا لەو بارەیەوە ڕایگەیاند”سێ‌ سەربازی تورك لە پێكداهەڵپژانێكدا لەگەڵ چەكدارانی پارتی كرێكارانی كوردستان لە باشووری خۆلاهەڵاتی توركیا و لە ناوچەیەكی نزیك سنورەكانی سوریا و عیراق، كوژران”.

بەپێی بەیاننامەكە”ئەو سەربازانەی كوژراون، پاسەوانی كۆمپانیای نەوتی نیشتمانی توركی (TPAO)بوون لە نزیك شاری سلۆپی”، ئاماژەی بە كوژرانی سێ‌ چەكداری بەرانبەریش كردووە لە پیكداهەڵپژانەكەدا.

بەیاننامەكەی حاكمی ویلایەتی شرناخ، ئاماژەی بە دەستنیشانكردنی جموجۆڵ و چالاكییەكانی پارتی كرێكارانی كوردستان كردبوو كە لەلایەن ئەنقەرەوە بە ڕێكخراوێكی تیرۆریستی ناودەبرێت.

ئەمەش لەكاتێكدایە كە حكومەتی ئەنقەرە، بەردەوامە لەسەر ئۆپەراسیۆنەكانی لە دژی گەریلاكانی (پەكەكە) لە ناوچە جیاجیاكانی وڵاتەكە.

بەردەوام بە لە خوێندنەوە

کوردستان