ئێمە لە تۆرە کۆمەڵایەتیەکان

کوردستان

شاناز ئیبراهیم ئەحمەد پەیامێك ئاڕاستەی كۆسرەت ڕەسوڵ دەكات

خەڵك – بەشی هەواڵ
شاناز ئیبراهیم ئەحمەد پەیامێك بۆ جێگری سكرتێری گشتی یەكێتیی نیشتمانیی كوردستان دەنێرێت و ڕایدەگەیەنێت، لەماوەی ڕابردودا و سەبارەت بە وەڵامدانەوەی خواستی كادر و ئۆرگانەكانی یەكێتی بۆ بڕیاری یەكلاكەرەوە بۆ بەستنی كۆنگرە بەو ئەركە هەڵنەستاون، دەشڵێت: “یەكێتییە نەگۆڕ و ڕێچكە پارێزەرانی حزبی شەهیدان هێندە بێ ئومێدبوونە لێتان، كە كاسەی سەبریان بەرەو لافاو دەچێت”.

شاناز ئیبراهیم ئەحمەد، بەرپرسی ناوەندی دەوەرەوەی یەكێتی لە پەیامێكدا، كە وێنەیەكی دەست (خەڵك) كەوتووە و ئاڕاستەی جێگری سكرتێری گشتی یەكێتی كردووە، ڕایگەیاندووە، ماوەی چەند ساڵێكە تەواوی جەماوەر و ئۆرگانەكانی یەكێتی لەچەندین ڕێگای جیا جیاوە داوای بەستنی كۆنگرەتان لێدەكات، پێشتر و لەچەندین وێستگەدا بەهۆكار و بیانووی جیاواز ڕێگری لەبەستنی كۆنگرە كراوە‌ و نەهێڵدراوە خواستی نوێكردنەوەی یەكێتی بێتەدی ‌و لەسایەی ئەو دۆخە قەتیسبووە‌ ڕێكخراوەییەوە، ئێستا كار گەیشتۆتە ئەوەی نەك هەر یەكێتییە دڵسۆزەكان حزبەكەی خۆیان نەناسنەوە، بەڵكو هیچ سیمایەكی حزبایەتی بە حزبە 44 ساڵەكەمانەوە نەمێنێتەوە.

دەشڵێت: “ئێستا ‌سەرجەم ئۆرگان‌ و كادران ‌و جەماوەری یەكێتی، بەنیگەرانییەكی قوڵَەوە دەپرسن، كە چی دەبێت ئەگەر تەنیا بۆ جارێكیش بێت بەرژەوەندی یەكێتی بخەنە سەروو بەرژەوەندییە تایبەتییەكان‌ و گوێ لە جەماوەری یەكێتی بگرن”.

ڕاشیگەیاندووە، ئایا پاراستنی یەكێتی وەك بیلبیلەی چاوتان ئەوەندە ناهێنێت، كە هەر هیچ نەبێت لە كاتی خواردنی برنج‌ و شلەی قەیسی ‌و قەلی خۆماڵی بەیانی جەژندا مژدەی بەستنی كۆنگرەمان لەڕۆژی 21-11-2019 پێ بدەن.

برای بەڕێزم كاك كۆسرەت، سڵاوێكی گەرم
ماوەی چەند ساڵێكە تەواوی جەماوەرو ئۆرگانەكانی یەكێتی لەچەندین رێگای جیا جیاوە داوای بەستنی كۆنگرەتان لێدەكات، پێشترو لەچەندین وێستگەدا بەهۆكارو بیانووی جیاواز رێگری لەبەستنی كۆنگرە كراوە‌و نەهێڵدراوە خواستی نوێكردنەوەی یەكێتی بێتەدی‌و لەسایەی ئەو دۆخە قەتیسبووە‌ رێكخراوەییەوە، ئێستا كار گەیشتۆتە ئەوەی كە نەك هەر یەكێتییە دڵسۆزەكان حزبەكەی خۆیان نەناسنەوە، بەڵكو هیچ سیمایەكی حزبایەتی بە حزبە چل‌و چوار ساڵەكەمانەوە نەمێنێتەوە.

هەڤاڵی بەڕێز

كۆچی دوایی مام جەلالی رابەر، ئەرك‌و بەرپرسیاریەتی لە پاراستن‌و نوێكردنەوەو گەشەپێدانی یەكێتی خستۆتە ئەستۆی هەموومان، لەسەرو هەمووانیشەوە، جێگری سكرتێری گشتی ئەركی قورستتر‌و گەورەترە، بەڵام بەداخەوە لەماوەی رابردوداو سەبارەت بە وەڵامدانەوەی خواستی كادرو ئۆرگانەكانی یەكێتی بۆ بڕیاری یەكلاكەرەوە بۆ بەستنی كۆنگرە بەو ئەركە هەڵنەستاون، هەربۆیەش یەكێتییە نەگۆڕو رێچكە پارێزەرانی حزبی شەهیدان هێندە بێ ئومێدبوونە لێتان كە كاسەی سەبریان بەرەو لافاو دەچێت، بۆیە پێویستە وەك جێگری سكرتێری گشتی بەزووترین كات متمانەو ئومێدیان بۆ بگەڕێننەوە.

هەڤاڵی بەڕێز..

ئێستا ‌سەرجەم ئۆرگان‌و كادران‌و جەماوەری یەكێتی، بەنیگەرانییەكی قوڵَەوە دەپرسن، كە چی دەبێت ئەگەر تەنیا بۆ جارێكیش بێت بەرژەوەندی یەكێتی بخەنە سەروو بەرژەوەندییە تایبەتییەكان‌و گوێ لە جەماوەری یەكێتی بگرن؟.
چی دەبێت گەر لە پێناو پاراستنی گەورەیی یەكێتیدا بڕیار لە بەستنی كۆنگرە بدەن‌و خواستی كەسوكاری سەربەرزی شەهیدان‌و جەماوەری یەكێتی بێننەدی؟.

ئایا ئاوڕدانەوە لە خواستی جەماوەری یەكێتی ئەوەندە ئەستەم‌و قورسە كە نەتوانن پێش جەژن كۆببنەوەو مژدەی بەستنی كۆنگرەمان لە رۆژی شەهیدی حزبەكاماندا پێ رابگەیەنن؟.
ئایا داواكارییەكەمان ئەوەندە زیانبەخشە بە بەرژەوەندی تاكەكان كە بووبێتە هۆكاری ئەوەی نەوێرن كۆنگرەیەكی بێ تەوافوق ببەستن؟. ئایا ریزەكانی یەكێتی هێندە لێك ترازاوە، كە چیتر نەتوانن لەژێر چەتری ماڵەكە گەورەكەدا كۆببنەوە؟.
ئایا تا ئەو رادەیە متمانەتان بەیەكتر نەماوە، كە مەترسیتان لە هێنانی هێزو چەكداری یەكتر هەبێت بۆ سەریەك لە ناو هۆڵی كۆنگرە؟.

ئایا پاراستنی یەكێتی وەك بیلبیلەی چاوتان ئەوەندە ناهێنێت كە هەر هیچ نەبێت لە كاتی خواردنی برنج‌و شلەی قەیسی ‌و قەلی خۆماڵی بەیانی جەژندا مژدەی بەستنی كۆنگرەمان لەرۆژی بیست‌و یەكی یانزەی دوو هەزارو نۆزدەدا پێ بدەن؟.

ئایا پاش ئەو هەموو ماوەیە لەدواخستن، هێشتاش دەتانەوێ پاساوی نوێ بدۆزنەوە بەوەی كە كاتەكە نەخەمڵیووە؟. دەشكرێت بپرسین، ئایا ئەوەندە لە یەكێتی‌و خەڵكەكەی بێ متمانە بوونە، كە قسەی نەیارەكانمان لەناو میدیاكان كارتان لێ بكات‌و پێتانوابێت یەكێتی كۆنگرە بكات پارچه پارچە‌ دەبێت؟ بە پێچەوانەوە، نەبەستنی كۆنگرەو خۆدزینەوە لەو ئەركە دیموكراسییە یەكێتی دەخاتە بەردەم مەترسییەكی زۆر گەورەترەوە..!

هیوادارم قسەكانم بەدڵێكی گەورەوە لێ وەربگرن‌و بەرپرسیارییەتی مێژوویی سەرشانتان جێبەجێ بكەن‌و هەرچی زووە، وەك بەرپرسیاری یەكەمی بەڕێوەبردنی یەكێتی‌و لەسۆنگەی ئەو دەسەڵاتەی پەیڕەوی ناوخۆی یەكێتی پێیداون، رۆژی شەهیدانی یەكێتی، بكەنە رۆژی كۆنگرەی وابەستەبوونەوە بە خوێن‌و ئاكاری شەهیدان‌و هەمووان پێكەوە یەكێـتی بكەینەوە یەكێتییەكەی جاران.
تەواوی دڵسۆزانی یەكێتی چاوەڕوانی مژدانەی جەژنن
لەگەڵ رێزمدا

شاناز ئیبراهیم ئەحمەد
٩-٨-٢٠١٩

کوردستان

عەبدولڕەحمان مستەفا: وەرگرتنەوەی پۆستی پارێزگاری كەركوك بۆ كورد ئەستەمە

خەڵك – بەشی هەواڵ

پارێزگاری پێشووتری كەركوك ڕایدەگەیەنێت، ئەستەمە جارێكی تر كورد لەكەركوك پۆستی پارێزگار وەربگرێتەوە.

عەبدولڕەحمان مستەفا پارێزگاری پێشووتری كەركوك كە ئێستا سەرۆكی لیستی هاوپەیمانی كوردستانییە بۆ هەڵبژاردنی ئەنجومەنی پارێزگاكان لەناوچە جێناكۆكەكان لە لێدوانێكی ڕۆژنامەوانیدا ڕایگەیاند،:”ئەستەمە بارودۆخی كورد لە كەركوك وەك جارانی لیبێتەوە و ئەو پۆستانەی، كە لەدەستیداوە وەریبگرێتەوە”.

پارێزگاری پێشووتری كەركوك ئاماژەی بەوەشدا:”كورد بەیەك شێواز دەگەڕێتەوە بارودۆخی جارانی و دەسەڵاتەكانی بۆ دەگەڕێتەوە ئەویش بەڕێگای هەڵبژاردن، بەڵام لەئێستادا بەهۆی بارودۆخی عیراق وەك دەبینین هەڵبژاردن دواخراوە”.

سەبارەت بەو پرسەی، كە ئایا كورد لەهەڵبژاردن دەتوانێت زۆرینە بەدەستبهێنێت؟ عەبدولڕەحمان مستەفا ئەوەیخستەڕوو:”بەو یەك لیست و یەك دەنگییە ئەگەر كاری زیاتری بۆ بكەین ئەوە كورد لە كەركوك زۆرینەی كورسییەكان بەدەست دەهێنێت ئەوكاتەش پۆستەكان وەردەگرێتەوە”.

بەردەوام بە لە خوێندنەوە

عێراق

سەرۆكایەتی هەرێم: ئەو كوشتارەی بەرامبەر خۆپیشاندەرانی بەغدا دەكرێت تاوانی بێ پاساون

خەڵك – بەشی هەواڵ

سەرۆكایەتیی هەرێمی كوردستان ڕاگەیەنراوێكی لەبارەی دۆخی خۆپیشاندانەكانی عیراق و ئەو گرژییەی شەوی ڕابردوو لە بەغدا دروستبوو بڵاوكردەوە و ڕایدەگەیەنێت “ئەو كوشتارەی بەرامبەر بە خۆپیشاندەرانی سڤیل لە پردی سنەك و گۆڕپانی خللانی لە بەغدا كرا، تاوانی بێ پاساون”.

سەرۆكایەتیی هەرێمی كوردستان لە ڕاگەیەنراوەكەدا، بە نیگەرانییەكی زۆرەوە لە بەردەوامیی ڕووداو و توندوتیژییەكانی بەغدا و پارێزگاكانی تری عیراق دەڕوانێت و ڕایدەگەیەنێت “لە كاتێكدا پرسە و سەرەخۆشیی قووڵمان ئاڕاستەی كەسوكاری قوربانییان دەكەین و هاوخەمیانین، هیوای زوو چاكبوونەوەش‌ بۆ برینداران دەخوازین، دووپاتی دەكەینەوە كە خۆپیشاندانی ئاشتییانە و سڤیل، مافێكی دەستووریی ڕەوا و پارێزراوە و بە هیچ شێوەیەك قبوڵكراو نییە”.

جێی ئاماژەیە، شەوی ڕابردوو ژمارەیەك چەكداری دەمامكدار لە گۆڕەپانی تەحریری شاری بەغدا تەقەیان لە خۆپیشاندەران كرد و لە ئەنجامدا 16 كەس گیانیان لەدەستدا و زیاتر لە 50 كەسی تریش برینداربوون.

دەقی ڕاگەیەندراوەكەی سەرۆكایەتیی هەرێمی كوردستان..

بە نیگەرانییەكی زۆرەوە لە بەردەوامیی رووداو و توندوتیژییەكانی بەغدا و پارێزگاكانی دیكەی عێراق دەڕوانین. ئەو كوشتارەی بەرامبەر بە خۆپیشاندەرانی سڤیل لە پردی سنەك و گۆڕپانی خللانی لە بەغدا كرا، تاوانی بێ پاساون و تاوانكاران هەر كێ و لە هەر لایەنێكەوە بن، دامودەزگا و لایەنە بەرپرسەكانی عێراق دەبێ بیاندۆزنەوە و بەپێی یاسا مامەڵەیان لەگەڵدا بكرێت.

لە كاتێكدا پرسە و سەرەخۆشیی قووڵمان ئاراستەی كەسوكاری قوربانییان دەكەین و هاوخەمیانین، هیوای زوو چاكبوونەوەش‌ بۆ برینداران دەخوازین، دووپاتی دەكەینەوە كە خۆپیشاندانی ئاشتیانە و سڤیل، مافێكی دەستووریی ڕەوا و پارێزراوە و بە هیچ شێوەیەك قبووڵكراو نییە ئەو زێدەڕۆییە لە توندوتیژی‌ بەرانبەر بە خۆپیشاندەر‌ان بەكار بێت و بكرێنە ئامانجی دەستڕێژ و هێرشی لەوجۆرە.

ئەركی هەموو لایەكە بە گیانێكی نیشتمانیی بەرپرسیارانەوە، مامەڵە لەگەڵ دۆخەكەدا بكەن تاكو لە دەست دەرنەچێت و پێشهاتی ترسناكتر ڕوونەدەن، چیتریش خوێن نەڕژێت و هەمووان لە چوارچێوەی یاسادا بجووڵێنەوە.

سەرۆكایەتیی هەرێمی كوردستان

7/12/2019

بەردەوام بە لە خوێندنەوە

کوردستان

پارتی: لایەنێك دەیەوێت پڕۆژە چاكسازیەكە دوابخرێت

خەڵك – بەشی هەواڵ
وتەبێژی فراكسیۆنی پارتی لە پەڕلەمانی كوردستان ڕایدەگەیەنێت، پڕۆژە یاسای چاكسازی لەدەستی ئێمەدا نیە و دەشڵێت: “لایەنێكی سیاسی بەناڕاستەوخۆ داوای كردوە، كە پڕۆژەكە كەمێك درەنگتر ڕەوانەی پەڕلەمان بكرێت”.

پێشەوا هەورامانی، وتەبێژی فراكسیۆنی پارتی لە پەڕلەمانی كوردستان بە (خەڵك)ی ڕاگەیاند، پڕۆژە چاكسازیەكە لەدەستی ئێمەدا نیە و چاوەڕێ دەكەین بگاتە پەڕلەمان، وەك پارتی نیەتێكی باش هەیە بۆ ئەوەی ئەم پڕۆژەیە بگەڕێتەوە پەڕلەمان.

وتیشی، “بە فەرمی نا، بەڵام لایەنێك هەیە، كە هۆكار بووە بۆ ئەوەی لە ئێستادا پڕۆژەكە نەگەڕێتەوە پەڕلەمان و داوا دەكەن كەمێك دوابخرێت، هەرچەندە بە فەرمی داوایان نەكردووە، بەڵام لە ژێرەوە لۆبی و فشارێك كراوە بۆ ئەوەی دوابخرێت”.

ڕاشیگەیاند، ڕەنگە ئەم دواخستنەش زۆر نەخایەنێت، بەڵام سەرۆكی حكومەت زۆر سوورە لەسەر ئەوەی پڕۆژە یاسای چاكسازی زوو بگەڕێتەوە پەڕلەمان و پەڕلەمانی كوردستان و بەشێكی زۆریش لە فراكسیۆنەكان ئەوە خواستیانە، كە بگەڕێتەوە بۆ پەڕلەمان.

ئەمە لەكاتێكدایە، كە ئەمشەو لە وتارێكدا بەبۆنەی تێپەڕبوونی 100 ڕۆژ بەسەر دەستبەكاربوونی كابینەی نۆیەمی حكومەتی هەرێم، مەسرور بارزانی، سەرۆكی حكومەتی هەرێم ڕایگەیاند، دوای پێداچوونەوەیەكی ورد بە پڕۆژە یاسای چاكسازی، پڕۆژەكە ئامادەیە ڕەوانەی پەڕلەمان بكرێت بۆ پەسەند كردنی.

بەردەوام بە لە خوێندنەوە

کوردستان