ئێمە لە تۆرە کۆمەڵایەتیەکان

وتار

خۆ هه‌ڵخه‌ڵتاندن و درۆکردن له‌ ژێر ناوی هه‌ڵبژارده‌ی عێراق

هه‌رێز جه‌مال

ماوه‌ی چه‌ند ساڵێكه‌ به‌هۆی كرانه‌وه‌ی ده‌رگای پاڵه‌وانێتییه‌كانی ده‌ره‌وه‌و به‌شداری هه‌ڵبژارده‌ جیاوازه‌كانی عێراق بۆ ئه‌و پاڵه‌وانێتییانه‌ كه‌ زۆربه‌ی زۆری خۆ هه‌ڵ خه‌ڵتاندن و دۆستانه‌ بووه‌ جار جار ناوی پێكهاته‌و شانده‌كه‌مان به‌ر گوێ ده‌كه‌وێت .

عێراق و كوردستان كه‌ نوقمی گه‌نده‌ڵیه‌كی زۆره‌و كایه‌ی وه‌رزشیش له‌و گه‌نده‌ڵیه‌ بێه‌به‌ری نییه‌ ساڵانه‌ یان مانگانه‌ چه‌ندین هه‌ڵبژارده‌ی به‌ ناوی پاڵه‌وانێتی وه‌همی و ئاستنزم به‌شداری ده‌ره‌كی ده‌كه‌ن، واز له‌مانه‌ ده‌هێنین به‌ڵام ئه‌وه‌ی به‌دی ده‌كرێت چه‌ندین ساڵه‌ دووباره‌ ده‌بێته‌وه‌ دیارده‌یه‌كی قێزه‌ون و ناشرینی هه‌ندێك یاریزانی ندی و بدی كورده‌ به‌ حساب خۆیان به‌ یاریزانی هه‌ڵبژارده‌ی عێراق ده‌ناسێن و لافی پاڵه‌وان بوون لێده‌ده‌ن له‌ كاتێكدا ئه‌وه‌ی شاره‌زای زۆریان بێت ده‌زانێت ئه‌و به‌ ناو پاڵه‌وانانه‌ زۆر كات سنووری گه‌ڕه‌كه‌ی خۆشیان نه‌به‌زاندووه‌ چی جای سنوری هه‌ڵبژارده‌.

چه‌ندین ساڵه‌ به‌ هۆی كاری رۆژنامه‌وانیمه‌وه‌ وردو درشتی پاڵه‌وانێتییه‌كان و یه‌كێتییه‌ وه‌رزشیه‌كان و هه‌ڵبژارده‌كان و خودی یاریزانه‌كانیش ده‌ناسم،چه‌ندین جار له‌گه‌ڵ شانده‌ جیاوازه‌كانی هه‌ڵبژارده‌ی عێراق گه‌شتم كردووه‌ هه‌موویان له‌ ته‌رازوو بده‌م ده‌زانم چۆن و چی ده‌كه‌ن و نیه‌تیان له‌ پاڵه‌وانێتییه‌كان چییه‌.
له‌ ده‌یه‌یه‌ی رابردوو تاك و ته‌ره‌ له‌ یارییه‌كانی گۆره‌پان و مه‌یدان و كاراتی و چه‌ند یارییه‌كی كه‌می به‌ كۆمه‌ڵ كه‌ تاوه‌كو ئێسته‌ش وه‌ك یاریزان و راهێنه‌ری جێگیر ماونه‌ته‌وه‌ یاریزانی كوردمان هه‌بووه‌ له‌ هه‌ڵبژارده‌ی عێراق ماونه‌ته‌وه‌ ئه‌وانیش به‌ ئاست و ئه‌نجام و سه‌ركێشی خۆیان بووه‌و به‌شداریان له‌ پاڵه‌وانێتییه‌كانی ده‌ره‌وه‌ كردووه‌و جێگه‌ ده‌ستیان دیار بووه‌.

له‌به‌رامبه‌ر ئه‌مانه‌ش كۆمه‌ڵێك یاریزان و راهێنه‌ری سۆشیال میدیای هه‌ڵتۆقیوون كه‌ به‌داخه‌وه‌ هه‌ندێكیان كاریان به‌س چه‌واشه‌كاری بووه‌، له‌ ژێر دروشمی وه‌رزشكردن و یاریكردن، هه‌بووه‌ وه‌ك سپێری تایه‌ی سه‌یاره‌ له‌ بێ یاریزانی براوه‌ته‌ پاڵه‌وانێتییه‌كی ده‌ره‌كی دوو مانگ پێش ئه‌و پاڵه‌وانێتییه‌ كه‌ڤه‌رو پرۆفایل و بیۆی فه‌یسبووكه‌كه‌ی كردووه‌ به‌ هه‌ڵبژارده‌ی عێراق، خۆشیه‌كه‌شی له‌وه‌دایه‌ به‌ عه‌ره‌بیه‌كی تێكلاو به‌ كوردی تێكسته‌كه‌ی نووسیوه‌ .

به‌ داخه‌وه‌ ئه‌و ره‌وشته‌ی یاریزانان و راهێنه‌ران زۆر كات رۆژنامه‌نووس و میدیاكارانیشی پێ چه‌واشه‌ كراوه‌، زۆربه‌ی كه‌ناڵه‌كان بۆ پڕكردنه‌وه‌ی شاشه‌ و زۆربه‌ی په‌یجه‌كان بۆ كۆكردنه‌وه‌ی لایك و كۆمێنت هه‌واڵه‌ چه‌واشه‌كارییه‌كانیان بڵاو ده‌كه‌نه‌وه‌، به‌ بێ گه‌ڕانه‌وه‌ بۆ ئه‌سڵی بابه‌ته‌كان و ریسێچكردنێك بۆ راستی و دروستیان .

ئه‌و به‌ حساب پاڵه‌وانانه‌ سیحری به‌تاڵیان له‌وه‌دایه‌ زۆر زوو دیار نامێنن، زوو ده‌پوكێنه‌وه‌، زۆر كاتیش زۆر زووی به‌ درۆ ده‌خرێنه‌وه‌،كورد وته‌نی ده‌ڵێت په‌تی درۆ زۆر كورته‌ .

خۆنووساندن به‌ ناوی هه‌ڵبژارده‌ی عێراقه‌وه‌و خۆ به‌ زلكردن به‌ ناوی یاریزانی هه‌ڵبژارده‌ی عێراقه‌وه‌ به‌ نامه‌ی ماسنجه‌ری فه‌یسبووك و پیاسه‌ی نێو یاریگه‌كان نابێت ، له‌ هه‌موو دنیادا یاریزان بانگهێشتكردن له‌ رێگه‌ی ئاست و تواناو ئه‌نجامه‌كانی ده‌بێت دواتریش به‌ نووسراوی فه‌رمی ، به‌شداریكردن له‌سه‌ر ئاستی پاڵه‌وانێتتیه‌كان به‌ گشتاندن و پۆلێنبه‌ندی ئاستی پاڵه‌وانێتییه‌كانیش ده‌بێت دیار بێت .

ئێسته‌ش یه‌كێتییه‌ وه‌رزشیه‌كان و هه‌ڵبژارده‌كانی عێراق له‌سه‌ر بنه‌مای شیعه‌و سونه‌ ململانێ ده‌كه‌ن ئیتر كورد چی بێت داخۆ له‌ هاوكێشه‌ی ئه‌وان؟ ده‌یان جار یاریزانی تاك و ته‌رای كورد له‌ لیستی سه‌ره‌تای هه‌ڵبژارده‌ی عێراق بووه‌ بۆ تۆپی پێ و هه‌ر لیسته‌كه‌ بڵاوبۆته‌وه‌ كردوێتی به‌ هه‌را چه‌ند كاتژمێرێكی نه‌بردووه‌ ناوی هه‌ر نه‌ماوه‌، واز له‌وه‌ بێنن تاوه‌كو ساڵی 2019 هه‌تا ئێسته‌ش هه‌ڵبژارده‌كانی عێراق ده‌چنه‌ ده‌ره‌وه‌ بۆ پاڵه‌وانێتییه‌كان به‌ هه‌ڵبژارده‌ی ( سه‌فه‌رو سیاحه‌ت) ناویان ده‌به‌ن..
یاخود جارێک هەر وەک سەرە پارچە یاریزانێک براوەتە پالەوانێتییە تاوەکو 1000 سالی تر وەک یاریزانی هەلبژاردە خۆی دەناسێنێت لە کاتێکا سروشتی هەر پالەوانێتییەک وایە کە کۆتایی هات پێکهاتەی هەلبژاردەکەش ئۆتۆماتیکی قابیلی گۆڕانە.

ئیتر پێویسته‌ یاریزان و راهێنه‌ری كورد له‌و وه‌همه‌ بێته‌ ده‌ره‌وه‌ له‌ رێگه‌ی سۆشیال میدیاو كه‌ناڵه‌كانه‌وه‌ تاكی كوردی چه‌واشه‌ بكات و خۆی بكات به‌ فس فس پاڵه‌وان ، باشه‌ ئه‌گه‌ر دواتر ناوی له‌ كوله‌كه‌ی ته‌ڕ نه‌بوو خۆی وته‌نی ئه‌م پاڵه‌وانه‌ هیچ ئه‌نجامێك و به‌رده‌وامیه‌كی نه‌بووه‌ چۆن زات ده‌كات سه‌ر له‌ ئاستی كه‌سه‌ نزیكه‌كان و هاورێكانی به‌رز بكاته‌وه‌ ، یاریزانی كورد پێویسته‌ ئه‌گه‌ر گه‌یشته‌ قۆناغێكی پێشه‌وه‌و بۆ هه‌ڵبژارده‌یه‌كی به‌هێز یان یانه‌یه‌ك بانگهێشتكرا ، قۆناغی پۆستی قه‌یسبووك و ئینستگرام و سناپ چات بگوازێته‌وه‌ بۆ مامه‌ڵه‌یه‌كی پرۆفیشناڵانه‌و پیشه‌گه‌رانه‌ .

وتار

گواردیۆلا و زمانی داتا له‌ تۆپی پێدا

هه‌وراز كاوه‌
له‌گه‌ڵ ڕۆشتن و ده‌ستپێكردنی قۆناغی یارییه‌كانی خولی ئینگلیزی به‌ پێویستی ده‌زانم هه‌ڵوێسته‌ له‌سه‌ر هه‌ردوو ڕاهێنه‌ری سیتی و لێڤه‌رپوول (كڵۆپ و گواردیۆلا) بكه‌م، كه‌ پێم وایه‌ ئه‌وان به‌هۆی ناوی یاریزانه‌كانیانه‌وه‌ گه‌وره‌ نه‌بوون، به‌ڵكو ئه‌و دووانه‌ خودی خۆیان ڕاسته‌وخۆ كاریگه‌ریان له‌سه‌ر كاره‌كته‌ری تیپه‌كانیان هه‌یه‌، واته‌ ڕاهێنه‌ره‌كانی ڕكابه‌ریان به‌ر له‌وه‌ی بیر له‌ پێكهاته‌ی ئه‌و دوو تیپه‌ بكه‌نه‌وه‌، ئه‌وه‌ سه‌ره‌تا ده‌ڕوانن بۆ شه‌ڕكردن له‌سه‌ر دید و ئه‌فكاری هونه‌ری ئه‌و دووانه‌ و پێیان وایه‌ ده‌بێت شه‌ڕی ته‌كتیك و ژماره‌یان له‌گه‌ڵدا بكه‌ن و دواتر ڕاگرتنی ستاره‌كانیان ئاسانه‌.

ئه‌م وه‌رزه‌ چونكه‌ دووانه‌ی ناو هاتوو خۆیان ئه‌ستێره‌كانیان دروستكردووه‌ كه‌متر سه‌رقاڵی بازاڕی میركاتۆ بوون، به‌ڵام له‌ هه‌ندێك بابه‌تی وردی داتایی ئه‌وه‌ گواردیۆلا زیره‌كانه‌ پێكهاته‌كه‌ی ڕێكخستووه‌ و زیاتر به‌وه‌وه‌ ماندوو بووه‌ هه‌موو له‌ بردنه‌وه‌ی تیپه‌كه‌یدا به‌شداربن و ده‌ستكه‌وته‌كان هی هه‌مووان بێت، ئه‌مه‌ش ڕێژه‌ی زۆری سه‌ركه‌وتن و خاڵی زۆری پێداون.

ئه‌وه‌تا له‌ ساڵی پێشوو له‌ كۆی (38) یاریی پرێمه‌رلیگ (95) گۆڵیانكردووه‌، كه‌چی لێڤه‌ر (89) بوو، كه‌ سه‌رجه‌م یاریزانه‌كانی پیپ كه‌ ژماره‌یان (16)بوو هه‌شتیان زیاتر له‌ پێنج گۆڵیان كردووه‌. له‌ كۆی (89) گۆڵ ئه‌وانه‌ی ریدز (14) یاریزانیان گۆڵیان هه‌بووه‌، به‌ڵام زۆرینه‌ی (سه‌ڵاح و مانی و فێرمینۆ) بووه‌.

له‌سه‌ر ئاستی هێڵی ناوه‌ندیش ئه‌وه‌ سیتی له‌ پله‌ی یه‌كه‌م دێت به‌ تایبه‌تی سیلڤا و گۆندۆگان و برناردۆ سیلڤاو محرز زۆرترین گۆڵ و هه‌ڵكوتانیان هه‌بووه‌، كه‌ ئه‌مه‌یان زۆر گرنگ نییه‌ چونكه‌ لێڤه‌رپوول وه‌رزی پێشوو حه‌وت یه‌كسانی هه‌بوو به‌رامبه‌ر به‌دووان بۆ ركابه‌ره‌كه‌ی.

ئه‌م چه‌ند دێره‌ ساكاره‌ پێمان ده‌ڵێت: ئیسپانییه‌كه‌ پێش هه‌موو ئه‌وانه‌ی دیكه‌ كار له‌سه‌ر ئه‌وه‌ ده‌كات به‌ ته‌واوی له‌رووی داتا و ئامارەوه‌ ستاره‌كانی به‌هره‌وه‌ر بكات و له‌و ڕێگایه‌وه‌ ڕكابه‌ری بخاته‌ نێوانیان، كه‌ كێ‌ زۆرترین ژماره‌ و خاڵ له‌ گۆشه‌ی یاریگاكه‌دا تۆمار بكات ئه‌وه‌ به‌ ئاسانی ده‌توانێت وه‌كو ستاری سه‌ره‌كی یاریی بكات، هه‌روه‌ها له‌م ڕێگایه‌وه‌ به‌ كه‌مترین وزه‌ و ته‌نیا پشت نه‌ به‌ستن به‌ تاك یاریزانێك ده‌توانێت تیپه‌كه‌ی له‌ ئینهاری جه‌سته‌یی و پێكان و په‌یوه‌ست نه‌بوون به‌ پلانه‌كانی ڕزگار بكات، به‌ پوختی ئه‌گه‌ر بته‌وێت له‌ مانچسته‌ر سیتی یاریی بكه‌ی پێویسته‌ ژماره‌ و داتای (گۆڵ، ئه‌سێست، ڕكاركردن، داپۆشینی ڕوووبه‌ر، چاودێری ڕكابه‌ر، كه‌مترین هه‌ڵه‌ی هونه‌ریت) هه‌بێت، خودی ئه‌مه‌ش تیپه‌كه‌ی وه‌كو یانه‌یه‌كی گه‌وره‌ی خاوه‌ن داتا والێكردووه‌ داهێنان له‌ ژماره‌كاندا بكه‌ن و كه‌مترین كات پێویستیان به‌ یاریزانی گه‌وره‌ بێت، له‌ كاتێكدا پیاوێكی گه‌وره‌یان هه‌یه‌ و هیچی دیكه‌.

بەردەوام بە لە خوێندنەوە

وتار

فشاره‌کانی زێدان بۆسه‌ر گاریس به‌یل دوو هۆکاری له‌پشته‌

بڕیار ته‌ها

فشارەکانی زیدانی ڕاهێنەر و کارگێڕی ڕیاڵ مەدرید بۆ سەر گاریس بەیڵ تا ئەوەی یانەکەیان جێبهێڵێت دەگەڕێتەوە بۆ دوو هۆکار.

یەکەم ــ مووچەی ساڵانەی بەیڵ نزیکەی 17 ملیۆن یۆرۆیە، کارگێڕی ڕیاڵ مەدرید 17 ملیۆن یۆرۆی ساڵانە بۆ یاریزانێک کە لە دەرەوەی پلانەکانی ڕاهێنەران بێت و بەردەوام پیلانەکانیشی دووبارە ببێتەوە بە بارگرانی دەزانێت.

دووەم ــ لەم هاوینەدا ڕیاڵ مەدرید بە گواستنەوەی ( هازارد و یۆڤیچ و میلیتاو و مێندی و ڕۆدریگۆ ) تا ڕادەیەک بڕێک پارەی زۆری خەرج کردووە کە نزیکدەبێتەوە لە 300 ملیۆن یۆرۆ. خواستی زیدانیش لە مێرکاتۆدا گواستنەوەی یاریزانێکە بۆ هێڵی ناوەند ( پۆگبا و ئیرکسن لە لیستی داواکارییەکانی زیدانن )، بۆیە کارگێڕی ڕیاڵ مەدرید دەیەوێت بەیڵ بە نزیکەی 60 بۆ 90 ملیۆن یۆرۆ بفرۆشێت و یاریزانەکە ناچار بە ڕۆیشتن بکات، تا ئەوەی بەو پارەیەیی لە فرۆشتنی بەیڵدا دەستی دەکەوێت یەکێک لە ( پۆگبا یان ئێرکسن )ـــی پێ بکڕێت.

کارگێڕی ڕیاڵ مەدرید شەڕی دەکردنی گاریس بەیڵ بە زیدان دەکات، ئەمەش وای لێکدەدرێتەوە کە زیدان لەلایەن کارگێڕی ڕیاڵ مەدریدەوە پێی گوترا بێت، تا بەیڵ نەفرۆشین ناتوانین یاریزانی دیکە بگوازینەوە.

بەردەوام بە لە خوێندنەوە

وتار

کەس یەکسان نییە بە کەس، نە ئاژاوەگێڕ دڵسۆزە نە دڵسۆزانیش ئاژاوە دروست دەکەن

دانه‌ر ئه‌سڵان

دوێنێ پاش وەستاندنی یاری کۆتایی خولی فۆتساڵی نایابی خانمانی کوردستان و بە کۆتا هێنانی لە وادەیەکی تردا شتێکی جوان سەرنجی منی ڕاکێشا هەر بۆیە فۆتۆم بۆی چرکاند ئەویش ئەو هەڵوێستە جوانەی کۆمەڵێک لە ئازیزانی یانەی چۆمان بوون کە هەستان بە پاک کردنەوەی تەواوی هۆڵی ساڵح عەلی و دواتریش دەرەوەی هۆڵەکە ئەمە شتێکی جوان بوو من بینیم بۆیە هەمیشە و هەردەم من چاوەڕێ دەکەم ئەوەی خۆم دەمەوێت بیبینم ئینجا هۆڵ و یاریگاکان جێ دەهێڵم، بەڵام داخم لە ناو میللەتی کورد دا هەموو شتێک جوان لە لایەن کۆمەڵێک نەخۆش و نەخوێندەوار و کەسی بۆگەن و مرۆڤی نەخۆشەوە کە ماڵی خۆیان کەلاوەی دروست کردنی خۆڵ و خاشاکی وەکو ئەوە چاوی بەم کارە جوانانەدا هەڵنایەت، چونکە وەک وتم خۆی لە ژینگەیەکی بۆگەندا دروست بووە ئیدی چۆن دەستخۆشی لە کارێکی وا جوان و بێ وێنە دەکات.

وڵاتی ژاپۆن لە سەرجەم پاڵەوانێتی و خولەکانی ئەم چەند ساڵەی ڕابردوودا جوانترین دیارییان پێشکەش دەکرد ئیدی بدۆڕانایە یان بیان بردایەتەوە ….. هەموو جیهان بەم ناوچەیەی ئێمەشەوە هەمووی دەستخۆشی لێ دەکردن و باس لەوە دەکرا کە خەڵکی ژاپۆن هەڵگری دید و ئایدیایەکی هێند مەزنن هێشتا کۆمەڵگاکانی جیهان و مرۆڤایەتی نەگەیشتوون پێیان.

بەڵام لەم کوردستانەدا ئەمە دووەم جارە من ئەم دیاردە جوانە دەبینم سەرەتا لە دەستەی ئیدارە و هاندەرانی ڕانیەی سەربەرز دوێنێش لە ئازیزانی دەڤەری باڵەک و چۆمانی خۆشەویست، بەڵام جارێکی تر من پارچە هۆنراوە بەرزەکەی مامۆستای جوان پەرستی عەبدوڵا گۆرانی نەمر دەڵێمەوە کاتێک لە موناجاتی دەروێش عەبدوڵای شمشاڵ دا دەڵێت؛
بەڵام داخم له ناو قەومی بەسیتا
قەدری سەنعەتکار وەکو عەکسی قەمەر وایە لە ناو حەوزێکی لیخندا

من فۆتۆم داناوە باس لەو کارە جوانە دەکەم نابەشەرێک کە نازانم مارکە سور چۆن هێشتوویەتی ئەو شکڵە لە فەیس بووک دا بمێنێت نووسیویەتی: (ئاخر خۆڵ کۆکردنەوە هەواڵە باسی ئەکەیت) ئەی چی هەواڵە عەبقەری ئەگەر ئەو هەڵوێستە جوانە هەواڵ نەبێت یان کەسێکی تر نووسیویەتی: (ئاژاوەیان نەنایەتەوە نەک یاریگا پاک بکەنەوە) دەک ڕووی مێژوو ڕەش بێت کە کوردی تیادایە بە ژاپۆنییەک دەوترێت واو عەقڵییەتی لە پێش جیهانەوەیە کەچی بە کوردەکەی هاونیشتمانی خۆی دەڵێت ئەوە کەی ئیشە.

من لێرەوە دەستی یەکە بە یەکەی ئەو برا بەڕێزانەم دەگوشم و سوپاسیان دەکەم شانازییان پێوە دەکەم و سەری ڕێزیان بۆ دادەنەوێنم بە بێ جیاوازی داوەشین و ڕوو ڕەشیش بۆ ئەو نەخۆشانەی ئەو کارە جوان و نایابە نابینن، چونکە ئەوانە خۆیان بۆگەنن مێشکیان جەستەیان بیر کردنەوەیان بۆیە چاویان بە جوانی و بە هەڵوێستی جوانی مرۆڤی کورد دا هەڵنایەت.

تێ بینی/ تکایە هەر بەڕێزێک فۆتۆکان دەبات و بڵاویان دەکاتەوە یان بابەتەکە دەبات با بنووسێت ئەمە تایبەتە بەو کەسە من هیلاک ببم تۆش ئاوها شتەکانم ببەیت خواش بە دزی لە سەرتی دەنووسێت بۆیە تکایە بە ئاگاییەوە مامەڵە بکەن سوپاستان دەکەم.

بەردەوام بە لە خوێندنەوە

کوردستان