ئێمە لە تۆرە کۆمەڵایەتیەکان

کوردستان

ڕۆژئاوای كوردستان داوایەكی ئەمریكا بۆ ناوچەی ئارام ڕەتدەكاتەوە

 

خەڵك – بەشی هەواڵ

 

ئیدارەی ڕۆژئاوای كوردستان لە ڕاگەیەنراوێكدا، ئاماژە بەوە دەكەن، لەگەڵ ئەمریكا نەگەیشتوینەتە ڕێككەوتن لەبارەی دروستكردنی ناوچەی ئارام لە سوریا.

بە پێی ڕاگەیەنراوەكەی ئیدارەی رۆژئاوای كوردستان، رازی نابن ناوچەی ئارام لە پێنج كیلۆ مەتر زیاتر بێت و دەبێت ئەو پێنج كیلۆمەترەش لەژێر چاودێری كۆمەڵگەی نێودەوڵەتیدا بێت.

توركیا داوا دەكات ناوچەیەكی ئارام لە باكوری سوریا بە قوڵایی ٣٢ كیلۆ مەتر دروست بكرێت و خۆشی سەرپەرشتی ئەو ناوچە ئارامە بكات، بەڵام ئیدارەی رۆژئاوا و ئەمریكاش بەو مەرجانەی توركیا رازی نیین.

بڕیارە، دوو شەممەی ئەم هەفتەیە شاندێكی ئەمریكاو توركیا لەسەر سنوری توركیاو سوریا لەبارەی ناوچەی ئارام كۆببنەوە و تیایدا گفتوگۆ لەسەر ئەو ناوچەیە بكەن كە توركیا پێداگری دەكات لە سەر دروستكردنی.

هاوكات، جەیمس جیفری نێردەی ئەمەریكی بۆ كاروباری سوریا لەم بارەیەوە ڕایگەیاندووە، گفتوگۆكانی وڵاتەكەی لەگەڵ توركیا بەردەوامن لەسەر درووستكردنی “ناوچەی ئارام” لەرۆژئاوای كوردستان، كە قووڵایی گونجاو بۆ ئەو ناوچەیە لەنێوان ٥ بۆ ١٥ كیلۆمەتر دەبێت.

کوردستان

تەندروستی سلێمانی؛ 2 تۆن خۆراكی خراپ و ماوە سەرچوو دەستی بەسەرداگیرا

خەڵك – بەشی هەواڵ
لیژنەكانی چاودێری تەندروستی سلێمانی ڕایدەگەیەنێت ، بۆ پاراستنی تەندروستی هاووڵاتیان و رێگریكردن لەخۆراكی نا تەندروست و ماوە بەسەرچوو، لەلایەن لیژنەكانمانەوە دەستگیرا بە سەر نزیكەی 2 تۆن خۆراكی خراپ و ماوە بەسەرچوودا.

لیژنەكانی چاودێری تەندروستی سلێمانی لە ڕاگەیەنراوێكدا، كە وێنەیەكی بۆ (خەڵك) ناردووە ڕایگەیاندووە، لە ماوەی چەند ڕۆژی ڕابردوودا دەستگیراوە بە سەر نزیكەی (۲) تۆن خۆراكی خراپ و ماوە سەرچوودا.

دەشڵێت،”تیمەكانی چاودێری تەندروستی دەستیان گرتووە بە سەر 1 تۆن و ۷۰۰كگم، تیمەكانی مەڵبەندی تەندروستی شەهید عومەر تاڵەبانی ۲۰۰كگم، هەروەها تیمەكانی مەڵبەندی تەندروستی شەهید سەردار-یش 100كگم خۆراكی خراپ و ماوە بەسەرچوودا”.

ڕاشیگەیاندووە، لێپێچینەوەی یاسای لە گەڵ خاوەنەكانیان گیراوەتەبەر و سەرجەمیان خۆراكەكانیش لەلایەن لیژنەی تایبەتەوە بە شێوەیەكی تەندروست لە ناوبران، داواش لە هاووڵاتیان دەكەن لەكاتی بینینی هەر خواردن و خواردنەوەیەكی نا تەندروست لیژنەكانی لێ ئاگادار بكەنەوە .

وێنەی ‏Sulaymaniyah Healthcare چاودێری ت. سلێمانی‏.

وێنەی ‏Sulaymaniyah Healthcare چاودێری ت. سلێمانی‏.وێنەی ‏Sulaymaniyah Healthcare چاودێری ت. سلێمانی‏.وێنەی ‏Sulaymaniyah Healthcare چاودێری ت. سلێمانی‏.

بەردەوام بە لە خوێندنەوە

کوردستان

دابەشكردنی مووچە دەستپێدەكاتەوە
پارەكەی بەغدا گەیشتە هەرێمی كوردستان

خەڵك- بەشی هەواڵ
بانكی ناوەندی لە هەرێمی كوردستان گەیشتنی ئەو بڕە پارەیەی بەغدا بۆ مووچەی فەرمانبەرانى هەرێمی كوردستان دەينێرێت، ڕادەگەیەنێت .

ماڵپەڕی ڕووداو لە زاری عابد ساڵح، بەڕێوەبەری گشتیی بانكی ناوەندی لە هەرێمی كوردستان بڵاویكردووەتەوە “پاشنیوەڕۆی ئەمڕۆ (پێنجشەمە 22-8-2019) پارەكە گەیشتە هەرێمی كوردستان، بەگەیشتنی ئەو پارەیەش دابەشكردنی مووچە لە هەرێمی كوردستان خێراتر دەبێت”.

وەزارەتی دارایی هەرێمی كورستان پێش پشووەكانی جەژنی قوربان لە داهاتی ناوخۆ، دەستیكردووە بە دابەشكردنی مووچە، بەڵام بەهۆی نەگەیشتنی پارەی مووچە لە بەغداوە، لە چەند رۆژی رابردوودا پرۆسەی دابەشكردنی مووچە بەخاوی بەڕێوەچوو، ئەمەش كەشێكی بێئومێدی لەنێو توێژی فەرمانبەراندا دروست كرد، بەو هۆیەی كە هەرێمی كوردستان بۆ دابەشكردنی موچە تەنیا پشت بە گەیشتنی پارەی بەغدا دەبەستێت.

حكومەتی هەرێمی كوردستان مانگانە پێویستی بە 881 ملیار دینارە بۆ دابینكردنی مووچەی سەرجەم فەرمانبەرانی، لەو بڕەش 453 ملیار دیناری حكومەتی عیراق ‌و 378 ملیار دیناری وەزارەتی سامانە سرووشییەكانی هەرێمی كوردستان دابینی دەكەن، ئەوەی تریش لە داهاتی ناوخۆ دابیندەكرێت، بەڵام لە دوای جەژنی قوربانی پیرۆزەوە، پرۆسەی دابەشكردنی موچەی فەرمانبەران بەشێوەیەكی نائاسایی دواكەوت، ئەمەش وایكرد كەشێكی بێئومێدی لەنێو خەڵكدا دروست ببێت، بەو هۆیەی كە هەرێمی كوردستان بۆ دابەشكردنی مووچەی فەرمانبەرانی، بەشێوەیەكی سەرەكی پشت بە حكومەتی فیدراڵ دەبەستێت، نەك بەو داهاتەی كە لەڕێی فرۆشتنی نەوتی ناوخۆ و داهاتە ناوخۆییەكانی ترەوە دەستەبەری دەكات.

لەبارەی دواكەوتن و خاوبوونەوەی پرۆسەی دابەشكردنی مووچەش بەسەر فەرماندبەرانی هەرێمی كوردستان، پێشتر هەڤیدار ئەحمەد پەرلەمانتاری پارتی دیموكراتی كوردستان بە (خەڵك)ی ڕاگەیاندبوو، هۆكارەكە پەیوەندی بە نەگەیشتنی پارەی بەغداوە هەیە، لەگەڵ گەیشتنی پارە لە بەغداوە، پرۆسەی دابەشكردنی مووچە بەسەر فەرمانبەرانی هەرێمی كوردستاندا دەستپێدەكاتەوە.

بەردەوام بە لە خوێندنەوە

کوردستان

چەكێكی زۆر دەستی بەسەرداگیراوە
باندێكی مەترسیدار لە پشدەر دەستگیردەكرێت

خەڵك- بەشی هەواڵ

هێزەكانی باندێكی مەترسیدار لە پشدەر دەستگیردەكەن كە تاوانی جۆراوجۆریان ئەنجام داوە و هەوڵیانداوە ئاسایش و ئارامی هاوڵاتیان لەو ناوچەیەدا تێكبدەن.

بەپێی ڕاگەیەندراوێكی پۆلیسی ڕاپەڕین”پاش بەدواداچون بەدەستهێنانی زانیاری هێزەكانمان لە نوسینگەی نەهێشتنی تاوانی پشدەر بە هاوكاری بنكەی پۆلیسی فریاكەوتنی پشدەر و بنكەی پۆلیسی راپەڕین باندێكیان دەستگیر كرد كە پێكهاتوون لە دوو كەس و پێشینەیان هەیە لە تاوانكاری و پێشتریش فەرمانی دەستگیر كردنیان هەبووە بە ماددەكانی 14 لە یاسایی ماددە هۆشبەرەكان و 405 لە یاسایی سزادانی عیراقی.

هەر لە ڕاگەیەندراوەكەدا هاتووە”لە كاتی دەستگیركردنی باندەكاندا دەستگیراوە بەسەر چەكێكی جۆری كڵاشینكۆف و دوو دەمانچە و چەند ماددەیەكی هۆشبەر لە جۆرەكانی (حەشیش و كریستاڵ و هێرۆین) و دەستگیراوە بەسەر ژمارەیەك كەلوپەلی بەكارهێنانی ماددە هۆشبەرەكان و چەندین كەلوپەلی تر، باندەكەش لە ماڵی یەكێك لە تۆمەتبارەكان دەستگیر كراون”.

پۆلیسی راپەڕین دەڵێت”پاش لێكۆڵینەوە لەگەڵیاندا باندەكە دانیان ناوە بە تاوانەكەیاندا و بە وتەی خۆیان پێشتر تەقەیان لە خەڵك و ماڵان كردووە، لە ئێستاشدا باندەكە بە فەرمانی دادوەر بە ماددەی 405 لە یاسایی سزادانی عیراقی راگیر كراون و لێكۆڵینەوەش لەگەڵیاندا بەردەوامە”.

پۆلیسی راپەڕین دواجار دەڵێت: “هاوڵاتیان دڵنیا دەكەینەوە كە هێزەكانمان بەردەوام لە حاڵەتی ئامادەباشی دان بەمەبەستی پاراستنی سەر و ماڵیان و بەرقەراركردنی ئەمن و ئاسایش تا هەموان لەو پێناوەدا ژیانی ڕۆژانەیان دوور لە ترس و دڵەڕاوكێ بەڕێبكەن”.

 

بەردەوام بە لە خوێندنەوە

کوردستان