ئێمە لە تۆرە کۆمەڵایەتیەکان

راپۆرت

بڕیارێكی دیكە بۆ دەوامی فەرمانبەران و مامۆستایان دەرچوو
“وەزیرەكان هەر باسی دەوام دەكەن و باسی مووچە و پلەبەرزكردنەوە ناكەن”

خەڵك- بەشی هەواڵ
دوابەدوای بڕیارێكی حكومەتی نوێی هەرێمی كوردستان بۆ پابەندبوونی فەرمانبەران بە كاتەكانی دەوامەوە، تا ئێستا ژمارەیەك وەزارەت گشتاندنیان كردووە و دەوامی فەرمانبەرانیان زیاكردووە، بەڵام وەك فەرمانبەرێك دەڵێت: “هەر باسی دەوام دەكەن، ئەی بۆ باسی مووچە فەوتاوەكان و پلەبەرزكردنەوەی فەرمانبەران ناكەن؟”، پەڕلەمانتارێكیش دەڵێت: “حكومەت ناتوانێت دەوام زیادبكات تا مووچە باشنەكات”.

بەپێی نووسراوێكی وەزارەتی خوێندنی باڵا و توێژینەوەی زانستی حكومەتی هەرێم، كە وێنەی دەست (خەڵك) كەوتووە، “بڕیار دراوە بە ڕێكخستنەوەی دەوام و پابەندبوون بە دوامی فەرمی و پێویستە سەرۆك زانكۆكان و یاریدەدەرەكانیان و ڕاگرەكان و یاریدەدەرەكانیان و سەرۆك بەشە زانستی و كارگێڕییەكان و فەرمانبەران لە سەعات 8:00 بۆ 3:00 پابەندی دەوامی فەرمی بن”.

هەر بەپێی نووسراوەكە، پێویستە مامۆستایان ئەوانەی هەڵگری نازناوی زانستین هەفتانە ماوەی 30 كاتژمێر دەوام بكەن، جگە لە كاتی پشووی هاوین.

ئەم بڕیارەی وەزارەتی خوێندنی باڵا لەكاتێكدایە، كە پێشتریش وەزارەتەكانی دیكەی حكومەتی هەرێم هەمان بڕیاریان دەركردووە و ئەوەش نیگەرانی لای فەرمانبەران لێكەوتۆتەوە.

لای خۆشیەوە، فەرمانبەرێكی زانكۆ بۆ (خەڵك) ڕایگەیاند، لەگەڵ بڕیاری هەڵوەشاندنەوەی پاشەكەوتی مووچە دەوامی فەرمانبەران زیاد كراوەتەوە و تەناوب نەماوە، بەڵام بۆچی دەوام تا كاتژمێر 3 بێت لەكاتێكدا حكومەت تا ئێستاش پەیڕەوی سیستمی پاشەكەوت دەكات.

ڕاشیگەیاند، ماوەی 4 ساڵە بەبێ‌ هیچ بیانوویەكی یاسایی پلەبەرزكردنەوەی فەرمانبەرانی مەدەنی ڕاگیراوە و لەمساڵیشدا تەنها 4 مووچە دراوە لە كاتێكدا مانگی 7 لەكۆتاییدایە.

هاوكات، فەرمانبەرێكی سەر بە وەزارەتی داد بۆ (خەڵك) ئاماژەی بەوەكرد، كە پێویستە فەرمانبەران ئەو دۆخە قبوڵ نەكەن، چونكە تا ئێستا حكومەت پاشەكەوت لە مووچەكانمان دەكات و لەمساڵدا هەرچەندە ڕایانگەیاند، كە پاشەكەوت نەماوە، بەڵام هەر پێشەكی مووچەی 3 مانگمان چارەنووسی دیارنەما.

بەپێی زانیارییەكانی (خەڵك) یەكێك لە وەزیرەكانی حكومەتی هەرێم لە كۆبوونەوەی دووەمی ئەنجوومەنی وەزیران ئەو بابەتەی خستۆتەڕوو، كە بەهۆی ئەوەی دەوام بەشێوەیەكی باش لەسەرجەم فەرمانگەكان دەكرێت نابێت فشاری زۆر بخرێتە سەر فەرمانبەران لەكاتژمێر 8 بۆ 3 دەوام بكەن، چونكە هێشتا حكومەت پارەیەكی زۆری فەرمانبەران قەرزدارە و پلەبەرزكردنەوەش نەكراوەتەوە.

هەر بەپێی زانیارییەكان، ئەو بڕیارەی ئەنجوومەنی وەزیران و وەزارەتەكان تەنها وەك جەختكردنەوەیەكە لە یاسا و لەڕووی كردارییەوە وەزارەت و فەرمانگەكان كارئاسانی دەكەن و بەهۆی ئەوەی مووچەیەكی زۆری فەرمانبەران فەوتاوە و پلەبەرزكردنەوە نەكراوتەوە دەوام بەشێوەیەكی گشتی لە فەرمانگەكان ڕێكدەخرێتەوە لە 8:30ی بەیانی بۆ 2ی پاشنیوەڕۆ.

لە هەمان كاتدا، سۆران عومەر، ئەندامی پەڕلەمانی كوردستان لە یاداشتێكدا بۆ سەرۆكایەتی پەڕلەمانی كوردستان دەڵێت: “حكومەت ناتوانێت دەوامی فەرمانبەران زیاد بكات، تا ئەوكاتەی مووچە پاشەكەوتكراوەكانیان دەداتەوە”.

ڕاشیگەیاندووە، سەرەتایەكی باشە ئەگەر بۆ پێدانەوەی مووچە پاشكەوتكراوەكان، حكومەت هەژماری بانكی و مامەڵەكردن بە ژمارەی بانكی بۆ فەرمانبەران بخاتەگەڕ، هەروەها پێویستە پلەبەرزكردنەوەی فەرمانبەران، كە ئێستا ڕاگیراوە هەڵوەشێتەوە، چونكە ئەوە مافی یاسایی فەرمانبەرانە.

راپۆرت

كاتی كاراكردنی زانكۆلاین دیاریكرا
سێ‌ بەشی دەرچووان لە خوێندنی خۆڕایی زانكۆ و پەیمانگاكان وەرگیران

خەڵك- بەشی هەواڵ
ئەمڕۆ سێ شەممە ڕێكەوتی 8-10-2019 ناوی دەرچووان لە زانكۆ و پەیمانگاكانی هەرێمی كوردستان ڕاگەیەنرا و بەپێی ئەنجامەكانی وەرگرتنیش ٧٤%ی دەرچووان لە خوێندنی بەخۆڕایی لە زانكۆ و پەیمانگا حكومیەكان وەرگیراون و خوێندكارانیش دەتوانن (لەم لینكەوە) ناوەكانیان بدۆزنەوە.

ئارام محەمەد، وەزیری خوێندنی باڵا و توێژینەوەی زانستی لەكۆنفڕانسێكی ڕۆژنامەوانیدا ڕایگەیاند، خوێندكاران سەرمایەی مرۆیی گرنگی ئەم هەرێمەن و ئێمە وەك وەزارەت تەواوی ئامادەكاری و پشتویوانیان دەبین بۆ سەركەوتنیان لەپڕۆسەی خوێندن، ڕاستە چەند سەرنج و تێبینییەك هەبوون لەبارەی دواكەوتنی ڕاگەیاندنی ناوی دەرچووان، بەڵام ئەم پڕۆسەیە پڕۆسەیەكی ورد و تەكنیكییە بۆیە ئێمە لەگەڵ وەزارەتی پەروەردەی حكومەتی هەرێمی كوردستان لەسەر هێڵین بتوانین بۆ ئەوەی ئەم بابەتە زیاتر تاوتوێ بكەین و لەساڵانی داهاتوو ئەو كێشانە نەمێنێت.

كورسی خوێندن بەڕێژەی 30% لە حكومی خۆڕایی زیادكراوە
ئاشكراشی كرد، بەشێك لەهۆكاری دواكەوتنی ناوی دەرچووانیش پەیوەندی بەزیادكردنی پلانەوە هەبوو، كەسەرەتا زانكۆكان پلانیان زیاد كرد و دواتریش ئێمە وەك وەزارەت ڕیژەی 30%ی كورسی خوێندنی گشتیمان زیاد كرد ئەمەش لەپێناو ڕەخساندنی هەلی زیاتر بە دەرچووان.

ئارام محەمەد وتیشی، “بەگشتی ڕێژەی وەرگرتن بۆ ساڵی خوێندن بەم شێوەیە بووە ،بۆ پلانی بەخۆڕایی لەزانكۆ و پەیمانگاكان 74% و ئێواران 14% و پارالێڵ 8%، بەم شێوەیە بۆ ساڵی خوێندنی (٢٠١٨-٢٠١٩) لە زانكۆ و پەیمانگە حكومییەكان دا (٤١٨٣٣) خوێندكار وەرگیران”.

ڕێژەی وەرگرتن دەبێت بە 100% لە خوێندنی خۆڕایی
لای خۆشیەوە خەتاب ئەحمەد شێخانی، بەڕێوەبەری گشتی خوێندن و پلاندانان و بەدواداچوون لە وەزارەتی خوێندنی باڵا و توێژینەوەی زانستی ئەنجامی وەرگرتنی خوێندكارانی ڕاگەیاند و وتی، “وەزارەتەكەمان ماوەیەكە بەچڕی و ورد كار بۆ وەرگرتنی خوێندكاران لە زانكۆكانی هەرێمی كوردستان دەكات”.

وتیشی، “ئەمساڵ دەرچوانی خولی یەكەم و دوەمی قۆناغی (١٢)ی‌ ئامادەیی لە یەك كاتدا بەسیستمەكانی (زانكۆلاین، پارالێڵ و ئیواران) داوایان پێشكەش كرد كە (٣٨٢٨٤) دەرچوی پۆلی 12ی ئەمساڵ‌ فۆڕمی وەرگرتنیان لە زانكۆ و پەیمانگەكان پێشكەش كردووە، لە ئەنجامدا (٢٨١٨٥) خوێندكار، كە دەكاتە ڕێژەی 74% لەپلانی گشتی واتە خوێندنی بەخۆڕایی لە زانكۆ و پەیمانگە حكومیەكان بۆ ساڵی خوێندنی (٢٠١٨-٢٠١٩) وەرگیران و (٣١٣٦) دەرچووی دیكەش كە دەكاتە 8% لەخوێندنی پارالێڵ وەرگیراون و ٥٥٤٤ دەرچووی دیكەش، كە دەكاتە ڕێژەی 14% لە خوێندنی ئێواران وەرگیراون بەوەش ڕێژەی وەرگرتن بریتیە لە (٩٦%)ە، ١٤٨١ خوێندكاریش كە دەكاتە ڕێژەی 4% بەهۆی هەڵە پڕكردنەوەی فۆڕم لەهەڵبژاردنی بەشەكان ناویان نەگەڕاوەتەوە و هاوكات ٣٠٥٢ كورسی بەتاڵیش لەزانكۆ و پەیانگاكان ماون بەپێشكەش كردنی سكاڵا ناوی ئەوانەش دەگەڕێتەوە و ڕێژەی وەرگرتن دەبێت بە لە 100%”.

كاتی دۆزینەوەی شوێنی وەرگرتن لە زانكۆكان
د.خەتاب ئەحمەد شێخانی، دەرچووانی پۆلی 12ی ئامادەیی ئاگادار كرد، كە ئێوارەی ئەمڕۆ، لە كاتژمێر (٥) بەدواوە لە ڕێگەی وێبسایتی ئەلیكترۆنی (www.regayzanko.com) بەبەكارهێنانی هەمان ناوی بەكارهێنەر و وشەی تێپەڕ (یوزەیەر نەیم و پاسۆرد) كە پێشتر فۆڕمەكانیان پێ‌ پڕكردبووەوە، دەتوانن ئەو شوێنە بدۆزنەوە، كە لێیی وەرگیراون.

دەچووانی ساڵانی دیكەش ناویان گەڕاوەتەوە
د.خەتاب شێخانی وتیشی، “جگە لەدەرچووانی ساڵی ٢٠١٩ دەرچووانی ساڵی پاریش، كە ناویان نەگەڕابووەوە داوایان پێشكەش كردووە، كە ژمارەیان ٦٧٩٣ خوێندكارە و ٩٦٥ دەرچوو ناویان لە پلانی گشتی واتە خوێندنی بەخۆڕایی گەڕاوەتەوە و ١٠٢٢ دەرچووش لە خوێندنی پارالێڵ و ٢٩٨١ دەرچووش لە خوێندنی ئێواران ناویان گەڕاوەتەوە و بەمەش ٤٩٦٨ دەرچووی ساڵانی ڕابردوو لەمساڵی خوێندن ناویان لە زانكۆ و پەیمانگاكان گەڕاوەتەوە و بەمەش لەگەڵ دەرچووانی ئەمساڵ كۆی وەرگیراوان ٤١٨٣٣ خوێندكار ناویان لە زانكۆ و پەیمانگاكان گەڕاوەتەوە”.

ماوەی سكاڵا 4 ڕۆژە
لەبارەی پێشكەش كردنی سكاڵاش د.خەتاب شێخانی ڕایگەیاند، ئەو دەرچووانەی سكاڵایان هەیە بەهەمان پاسوۆرد و یوزەرنەیمەوە دەچنە ناو سیستمەكە و دەتوانن سكاڵا پێشكەش بكەن، كە تا ئێوارەی ڕۆژی شەممە كاتژمێر ١٢ی شەو پێشكەش كردنی سكاڵا بەردەوام دەبێت.

ئاشكراشی كرد، بۆ دابەینی بەش و كۆلێژەكانیش بەهەمان پڕۆسە و لەنێو سیستمی وەرگرتندا دەرچووان دەتوانن داوای دابەزین بكەن.

ڕاستەوخۆڕاگەیاندنی ئەنجامی وەرگرتنی خوێندکاران لەزانکۆ و پەیمانگاکان۸/۱۰/۲۰۱۹

Posted by Xelk Media Network on Tuesday, October 8, 2019

بەردەوام بە لە خوێندنەوە

راپۆرت

نرخی مۆلیدە ئەهلیەكان لە سلێمانی و هەولێر و دهۆك دیاریكرا

خەڵك- بەشی هەواڵ
نرخی ئەمپێری كارەبای مۆلیدە ئەهلییەكان بۆ مانگی ئەیلولی ڕابردوو لە شارەكانی (سلێمانی، هەولێر، دهۆك) دیاریكرا، كە لە سلێمانی كەمترین نرخ بووە بەهۆی باشی دۆخی كارەبا و كەمی كاتی كارەبای مۆلیدەوە.

مانگانە لەلایەن لیژنەی هاوبەشی ئاسایشی ئابووری و قائیمقامیەت و بەڕێوەبەرایەتییەكانی كارەبا و كۆمەڵەی مۆلیدە ئەهلییەكانەوە خوێندنەوە بۆ كاتژمێرەكانی پێدانی كارەبای مۆلیدە دەكرێت و نرخی ئەمپێری كابەرای مۆلیدە دیاری دەكرێت.

سلێمانی كەمترین پارە بۆ هاووڵاتیان دێتەوە
قایمقامیەتی سلێمانی لە ڕاگەیەنراوێكدا، كە وێنەی دراوە بە (خەڵك) ئاماژەی بەوەكردووە، نرخی كاتژمێرێك ئەمپێری مۆلیدەی ئەهلی بۆ مانگی ئەیلول بە 42 دینار دیاریكرا و مۆلیدەكانیش بەتێكڕایی لە نێوان 50 بۆ 70 كاتژمێر كاریان كردووە، بەوەش نرخی یەك ئەمپێر كارەبا لە نێوان 2 هەزار بۆ 3 هەزار دینار دەبێت.

ئاماژە بەوەشدراوە، خشتەی پێدانی كارەبای مۆلیدە لە مانگی تشرینی‌ یەكەم، بەجۆرێك دەبێت، كە لە كاتژمێر 10 پێشنیوەڕۆ بۆ 2ی شەو لە ئامادەباشیدا دەبن، هەر كاتێك كارەبای نیشتمانی بڕا پێویستە كارەبای‌ مۆلیدە بۆ هاووڵاتیان دابین بكەن.

جەخت لەوە كراوەتەوە، پێویستە پاش كوژانەوەی كارەبای نیشتمانی 10 خولەك زیاتر بەسەر دابینكردنی كارەبای مۆلیدە تێنەپەڕێت، بەپێچەوانەوە، سەرپێچیكار ڕووبەڕووی یاسا دەكرێتەوە.

لە هەولێر نرخی ئەمپێرێك لە 5 هەزار زیاترە
قارەمان مەولود، سەرۆكی ئەنجوومەنی مۆلیدە ئەهلییەكانی هەولێر لە ڕاگەیەنراوێكدا ئاماژەی بەوەداوە، مانگی 9 لە هەولێر بەشێوەیەكی گشتی 130 كاتژمێر بۆ 150 كاتژمێر كارەبای مۆلیدەی ئەهلی بە هاووڵاتیان و شوێنە بازرگانیەكان دراوە.

ڕاشیگەیاندووە، نرخی هەر ئەمپێرێك بە 42 دینار دیاری كراوە و تێكڕای نرخی هەر ئەمپێرێكی كارەبا لە هەولێر لە نێوان 5 هەزار و 250 دینار بۆ 7 هەزار و 250 دینارە.

سەبارەت بە نرخی كارەبای مۆلیدەی ئەهلی ناو بازاڕ بۆ هەر ئەمپێرێك دەگاتە 9 هەزار و 250 دینار.

لەناو دهۆك جیاوازی لە نرخ هەیە
لیژنەی باڵای مۆلیدە ئەهلیەكان لە پارێزگای دهۆك لە كۆنووسێكدا خشتەی كارەبا بۆ مانگی تشرینی یەكەم و نرخی ئەمپێری كارەبای مۆلیدە بۆ مانگی ئەیلول دیاری دەكات و ڕایدەگەیەنێت، بەهۆی كاركردن لە ئۆڤەرپاسێك لە شەقامی بارزان لەناو دهۆك و بڕانی كارەبای نیشتمانی لە زۆر كاتدا، نرخی ئەمپێری مۆلیدە بە بەراورد بە شوێنەكانی دیكە 500 دینار زیاترە.

هەر بەپێی كۆنووسەكە، نرخی ئەمپێری كارەبای مۆلیدە بەپێی ناوچەكان دەبێت و كەمترین نرخ 4 هەزار دینارە و لە هەندێكە ناوچە دەگاتە 7 هەزار دینار.

بەردەوام بە لە خوێندنەوە

راپۆرت

ڕێبوارانی مەولەوی لەگەڵ دەنگی كەمال محەمەد شەربەت دەخۆنەوە

خەڵك – بەشی هەواڵ

كەم كەس هەیە جارێك بەشەقامی مەولەویدا تێپەڕیبووبێت و گوێی لە گۆرانییەكی كەمال محەمەد نەبووبێت، كە لە بڵندگۆی شەربەتخانەیەكی خنجیلەوە دێت لەناوەندی شەقامی مەولەوی لەسلێمانی.

شەربەخانەی كەمال محەمەد، شەربەتخانەیەكی بچوكە لەناوەندی شەقامی مەولەوی لەسلێمانی، كە ماوەی حەوت ساڵە بەردەوام گۆرانییەكانی هونەرمەند كەمال محەمەدی تێدا لێدەدرێت.

ئەم شەربەتخانەیە تەنها جێگەی دوو كەسی تێدا دەبێتەوە، بەڵام هاوڵاتیان بەپێوە لەسەر شەقامەكە ڕادەوەستن و بەدەم گوێگرتن لەگۆرانی كەمال محەمەد شەربەتێكی سارد دەخۆنەوە.

خاوەنی شەربەتخانەكە، كە ناوی (دەروون خالید)ە، لەوتووێژێكیدا لەگەڵ پەیامنێری (خەڵك) باسی لەئەوەكرد، كەمال محەمەد كە دێتەوە كوردستان سەردانیان دەكات و چەندجار لێرە شەربەتی خواردۆتەوە.

ئاماژەی بەئەوەشدا، هەندێك كەس دێن بۆ شەربەت خواردن و دەڵێن:”لەبەر گۆرانییەكە لامانداوە گۆرانییەكی خۆشە، كەمێك دەنگی زیاد بكە”، پاشان بەدەم گوێگرتن لە گۆرانییەوە شەربەتێك دەخۆنەوە.

بەوتەی خاوەن شەربەتخانەكە، هەندێك كەس هەیە بەتایبەت سەردانی شەربەتخانەكەی دەكەن، تەنانەت كەسی عەرەب هەبووە سەردانی كردوون و كەمال محەمەدی ناسیوە و زۆر گۆرانییەكانی پێ خۆشبووە.

بەردەوام بە لە خوێندنەوە

کوردستان