سەرۆكی پارتی دیموكراتی كوردستان لەگەڵ ئەمینداری گشتی یەكێتیی جیهانی زانایانی موسڵمان كۆبووەوە و ڕایانگەیاند، زمانی دیالۆگ و ئاشتیخوازی باشترین ڕێگەیە بۆ چارەسەركردنی كێشە و قەیرانەكانی ناوچەكە.
بەپێی ڕاگەیەنراوێكی بارەگای بارزانی، ئەمڕۆ سێ شەممە 22ـی تشرینی دووەمی 2022 لە سەڵاحەدین، مەسعود بارزانی پێشوازی لە دكتۆر عەلی قەرەداغی، ئەمینداری گشتی یەكێتیی جیهانی زانایانی موسڵمان و شاندێكی هاوبەشی زانكۆی گەشەپێدانی مرۆیی و رێكخراوی رابیتەی مرۆیی لە كوردستان كرد.
بەپێی ڕاگەیەنراوەكە، “لە دیدارەكەدا بارودۆخی عێراق و ناوچەكە تاوتوێ كرا و بیروڕا لەبارەی تەحەددی و هەڕەشەكانی بەردەم سەقامگیری و ئاشتەوایی لە ناوچەكە و جیهان ئاڵوگۆڕ كرا”.
بارزانی و قەرەداغی جەخت لە ڕەتكردنەوەی زمانی هەڕەشە و نكۆڵیكاری دەكەنەوە و جەختدەكەنەوە، “زمانی دیالۆگ و ئاشتیخوازی باشترین ڕێگەیە بۆ چارەسەركردنی كێشە و قەیرانەكانی ناوچەكە”.
ئاماژەی بەوەشكردووە، لە بەشێكی تری ئەو دیدارەدا بارودۆخی ناوخۆی كوردستان و بار و گوزەران و نیگەرانییەكانی خەڵكی كوردستان گفتوگۆی لەسەر كرا.
